Kolosə 2 - Yálá laawoo hɛɓɛ (dc)

¹ Gáá bɔ́, gɔ́ kɛnɛ̨i ŋɛ̨i gáá gɔi, ká gili kɔlɔn kaa diɛ, ka mąą mɛ̨nį ɓə gáá gɔi la, ə mą kɛ, Laodise nuą da nuąi kpɔ di hvo ni ɲɛ̨́ilaai kaa li.

² Gáá gɛi ti, əgɛ, di lii ə kpələ, di kanąn di kee ɓa wɛlikɛmąąlaa hu. Kilitɔɔmąą leeleei mɛ̨nį kɔ́lɔn ŋąą a dɛɛ nu pɔ, di gɔlɔn, əlɛɛ, di Kristə kɔ́lɔn yai a Yálá ŋą loo mɛ̨nį.

³ A yai, kili mɛ̨nį da mɛ̨nį kɔlɔŋąą ŋą hɛngɔw kəlee kaa ɉu.

⁴ Gáá yili ɓoi ti, əgɛ, nu ta hvo pa ka ɓowo, a lɛɛ wooɠaa.

⁵ Ə mą kɛ, gbínį hvo ka lɔwai, kɛlaa, gáá laa a gíli, gɛ́ ká yee kɛ mɛ̨nį ka kɛ tíi ɓa kpɔ tii kpąą, a laa na laa Kristə ɓa, gwəinɛ̨ɛ̨ kulɔ.

Yɛnɛ̨ɛ̨ kɛ pələ leeleei a hɔlɔɓo Jesus Kristə hu

⁶ Yili ɓa, ká lɛɛ kani ká ɲɛ̨i tɔwɔ ká wɔɔ pələi mɛ̨i Kristə hu, a Jesus a gu Nąmu, yai ká ɉɔlɔɓo;

⁷ 'Ká hamu ə hvilɛn kani Kristə mɛ̨i kpɔ kpąą, ká hu ə walawala a laa na laai di ká mąąkwɛli mą, ɛlɛɛ, káá ɓo la tii, a mɛ̨inɛ̨ɛ̨ hukɔlɔn nuą.

⁸ 'Ká tɔɔ a ká nwąną, nu ta hvo ká hon a ŋą gbąnąlaa woo, a dɔwɔ-tɔwɔ nuą yíí pələ kulaai gaa a ɓowo woo, yɛ hvilɛn na yɛnɛ̨ɛ̨ mɛ̨nįɠaa diɛ lɔ, hvo a Kristə mąą mɛ̨nį.

⁹ Mąąhɔlɔɓo, Kristə kpinį hu ɓə Yálá ə ɉuɓo laa.

¹⁰ Ɛlɛɛ, nui ŋɛ̨i a, hééɓolaa kəlee da huwalawalalaa kəlee, nąmu, ɉu ɓə kɛa, ká mąą mɛ̨nį kəlee ɲąą a pɛli laa.

¹¹ Yaa tii ɉu ɓə, káá kɛ la a kɛ́nɛ̨-lonni, ka wɔ kɛ́nɛ̨ kuu hvo kɛ li, yɛ bələi nuą da gɛ la. Kɛlaa, yili ɓə a Kristə ŋą kɛ́nɛ̨ kui; yai gu wɔ nɛ̨ŋɛ̨n gɔlɔi kulɔ guɔ.

¹² Gu lowii di mo gwa diɛni, a mąąwaa ɓo, gwa diɛni gwaa nwɔ̨nɔ̨ nwun, gbala ə tɔɔ, ká laa Yálá ŋą huwalawalalaa la, yai nwun haa nuą lɔwai.

¹³ Ɛlɛɛ, káái tɔlɔɔ ká haa kɛ, a ká wɔɔ túwɔ́ pələ ɲɔ̨nŋaa da ká wɔɔ kɛ́nɛ̨-kpolaa laa laa pɔɔ, Yálá aa yɛnɛ̨ɛ̨ tɛɛ ká pɔ, ká Kristə ni: Aa gu wɔɔ túwɔ́ pələ ɲɔ̨nŋaa mąąhvaalɛɛ,

¹⁴ mɛ̨nįɠaa kpɔ dɔ́n nwoo ə kɛi gu kalamąɓo la, yɛ giti kala guɔ, ə yili kəlee lɛɛ guɔ a kpɛli; aa nwaa kpɔ laa hva-hva, ə gbanwo kolɔwa ɓa.

¹⁵ Ə ɲąąwooɓolaa da hvaŋąlaa di mąąkpoloon, ə di too nu kəlee ɲɛ̨i ɓa. Ə di pu gɔwɔ mu, a ŋą kolɔwa hvaŋą.

¹⁶ Ə həɠə kɛa yiihu ɓa, nu ta hvo kɛa ɲɛ̨i hvala: kɔ̨nɔ̨n mɛ̨nį ɓa, ə mą kɛ, a kpələ hɛn mɛ̨nį, hɛli mɛ̨nį, ɲąnįn nįnɛ̨ mɛ̨nį, awala kɛ tii, túwɔ́ yələ mɛ̨nį.

¹⁷ Yili kəlee kaa lɔ a mɛ̨nįi kɛli la kɛi ɉunįnįn, kɛlaa, nwun neelee ɓaa a Kristə.

¹⁸ 'Ká hvo ká kpɔwɔ lɛɛ laa, ɲɛ̨imąą-nɛ̨ɛ̨ nuą hvo ká ɲąąnɛ̨nɛ̨n, di hvo ká ɲɛ̨i tínɛ̨n di pɔ pələ: A kalan gɛ pələ huwu ta, a malakaɠaa hvɛli pələ huwu ta; da lɔ di kpɔɔ kiliŋąhiɛ hu, di wɔ mɛ̨nį kɔlɔn bələ yɛ di hu hvɛɛ a ɓowo pələ.

¹⁹ Di hva gɛ di hvo kanąn Kristə ɓa, yai a nwun, ɉaalai hu ɓə tɔɔ-tɔɔiŋaa kəlee yiliɛ la di kee ɓa, diɛ kɛnɛ̨ la yɛ bələi Yálá ə mąą laa tɛɛ la bɔ.

Waa-lonnii di wɔɔ lɛɛ gbɔwɔ ɓa laa

²⁰ Yii kɛa ká Kristə ni kaa haa, ɛlɛɛ, káá kulɔ yɛnɛ̨ɛ̨ hɛnŋaa yəi. Lə mɛ̨nį ɓa, ká dɔn bɔ yíiɓo, yɛ ká kɛ ni, a ká hɛlɛnŋąą yɛnɛ̨ɛ̨ ɓa?

²¹ Diɛ kɛ káá: 'ká hvo yii mįi, ka hvo yii kpələ, ka hvo lɛɠɛ yii ɓa!

²² Ɉɛnŋaai ti kaa a hɛn yá gɛ, akɛtii ɉukalaa li; ɛlɛɛ, yaan, ya lɔ ka tii, a nu kanŋaa di wɔɔ tɔn da di wɔɔ laa na mɛ̨nį.

²³ Di mąn kpɔ dɔn nwooɠaa ti heekpəlin na kɛ a kilikɛɲəi laai, gaa lɔ a: di kpɔ-kpɔɔ kalan bələ, a kalan bələ huwu ta, a di kɔlɔ mɔ̨nɔ̨ ɓo pələ; nwun nɔ pee ta hvo mą, gaa lɔ a kɔlɔ liiɓa kɛ mɛ̨nį.