Kolosə 1 - Yálá laawoo hɛɓɛ (dc)

Túwɔ́-woo

¹ Ɲą́ą́ Polə, Jesus Kristə ŋą tímun, a Yálá liiɓa, kwa gu nąn non Timote,

² kuɔ ɓə ɉɛɓɛ́i ŋɛ̨i tɛɛi Yálá nwɔ nuą diɛ, diɛi di kaa a ku nąn nonnii, di tələnmoɔ Kristə laa hu, diɛ ɓo Kolɔsə daai. Kuɔ gu Ną́n Yálá ə mɛ̨inɛ̨ɛ̨ da liilaa tɛɛ ka pɔ.

Yálá hɛɠɛɛɓo mɛ̨nį nwɛlɛɛ lɛlɛɛ mąą mɛ̨nį ɓa

³ Ɓɛlɔwai kwa kɛi Yálá hvɛlii la, kwa gu Ną́mu Jesus Kristə nąn Yálá hɛɠɛɛɓo ká mąą mɛ̨nį ɓa.

⁴ Bələi ká wɔ laa na laa kaa Jesus Kristə hu, ɛlɛɛ, wɛlikɛmąą laai ká yəi, yɛ hvilɛn na Kristalɛa kəlee diɛ, kwaa yili kəlee bələ mɛ̨n.

⁵ Gilitɔɔmąą laai gaa ká mąąkpɔn ɉii yələkɔlɔn ɉu, mąą kilitɔɔmąą laai tii ɓə di naa həli káá, a tɛ̨ą woo, ya ɓaa, nwɛlɛɛ lɛlɛɛ,

⁶ yai pa ə həli káá; bələi lɔ gaa kɛ mɛ̨nį kɛi la, ɉu yɛ kɛnɛ̨, yɛnɛ̨ɛ̨ nąą kɔlɔ kəlee, bələ lɔ ɓə a gɛ la ká lɔwai, ə həɠə ɲələ ká ká yee hee la mu, ká gɔlɔn ŋą tɛ̨ąi hu, a Yálá ŋą mɛ̨inɛ̨ɛ̨,

⁷ yɛ bələi Epafrasə ə ká mąąkwɛli la, yai a gu ɓɛlan, a gu hiɛgee pulu, a Kristə ŋą timun dələnmoɔ,

⁸ wɛlikɛmąąlaa huwui Kili-Mąąhəɠɛɛ aa ká huwələən na, ya ɓə pa, ə ɉukulɔ kuɔ.

Yálá hvɛli mɛ̨nį gbɔn mąą mɛ̨nį ɓa

⁹ Yili ɓə gɛ, ɲələi ku ká mąą mɛ̨nį mɛ̨n na, ə həɠə ɲələ ɓa, ə həli la yiihu ɓa, ku hva kpɛla Yálá hvɛlii káá. Kwa vɛli Yálá ɓa, kuɔ, ká niiɓa kɔ́lɔn gbɔ kɛnɛ̨, a kilikɛɲəi laa kɛnɛ̨, yɛ hee la ká nįį pɔ.

¹⁰ Yili ɓə a gɛ, káá pɛli yɛnɛ̨ɛ̨ kɛi a gu Ną́mu liiɓa, yii gaa bɔ, kaa gwɛli, a kɛ tii, ka kɛ mɛ̨nįɠaa ɲɛ̨i tínɛ̨nŋąą mɛ̨nį lɛlɛɛ pɔ pələ, dɔlɔ ə ɓo mą mɛ̨nį kəlee hu, káá tɛ la tɔwɔ Yálá kɔlɔn mɛ̨nį leelee hu.

¹¹ Ká hu yɛ pɛli walawalai la mɛ̨nį kəle hu, mąąɲįnɛ̨n vaŋą kɛnɛ̨ɛ̨ háálai, káá pɛli tɔɔi la a vaŋąlɔ da liikpələ, hukɔɔn mɛ̨nįɠaa kəlee hu. Kwəinɛ̨ɛ̨ hu,

Kristə yɛnɛ̨ɛ̨ tɔɔmun mąątɛ̨nɛ̨ wələ

¹² 'ká gu Ną́n mąmąɓo, yai gɛ, guɔ gu wɔɔ hɔlɔɓo nu mąąhəɠɛɛɠaa kwɛlin ɉu, yələkwəi.

¹³ Aa gu kulɔ kpinį ŋą luwɔlaa yəi, aa gu lɔ nwɛlikɛmąą lon ŋą tɔɔlaa hu.

¹⁴ Non ti háálai ɓə gwaa kulɔ la haa hu, aa gu wɔɔ nɛ̨ŋɛ̨nŋąa mąąhvaalɛɛ.

¹⁵ Gaa a Yálái káá hvo mą, mąą ninįn, ə ɓo pɛli-hɛn gəlee tɔwɔ.

¹⁶ Mąąhɔlɔɓo, yaa ɉu ɓə Yálá ə hɛn gəlee pɛli laa, yələ pələ mąn, da lɔi ɓa pələ mąn; hɛnŋaai kpɔ káá kaa mą, da yiiɠaai kpɔ káá hvo mą; tɔɔkpəlin da hééɓolaa, ŋąąwooɓolaa da hvaŋą laa. Ya ɓə gəlee pɛli, ɛlɛɛ, nwɔɔ ɓaa a gəlee.

¹⁷ Ɛlɛɛ Yaa lɔ ɓə, a Yaa, ə ɓo gəlee tɔwɔ, yiihu, hɛn gəlee kaa ɉu,

¹⁸ Ɛlɛɛ Yaa lɔ ɓə, a Yaa, a gɔlɔ nwun ganįn, yai a Yálá ŋą kpɔn. Yaa ɓə a gɔwɔ tɔɔi, a nuąi da haa, diɛ nwun, di tɔlɔɔ, ə gɛ, mɛ̨nį kəlee hu, Yaa tii, ə kɛ tɔwɔ.

¹⁹ Hvo gaai, Yálá ə naa gwəi, ə ɉuɓo ɉu,

²⁰ ɛlɛɛ Yaa tii mąą mɛ̨nį ɓa, ə da hɛn gəlee di yee lɔ geei, Yaa tii ɉáálai, ə kɛ a lɔi ɓa pələ, ə kɛ a yələi pələ; ə liilaa hee di mɛ̨i, a ɲąmąi pu kolɔwa ɓa.

²¹ Ɛlɛɛ, káái tɔlɔɔ kɛ a nwɛ̨ąą, káá kɔ́ pɛlɛ mą a ká wɔɔ túwɔ́ pələ ɲɔ̨nŋaa.

²² Ya ka kɛa yiihu, Yálá aa ká diɛni ká yee lɔ gee hu, a non gulɔi ə mo a hálaa, ɉáálai; káá pɛli kɛi la a nu mąąhəɠɛɛɠaa ɲɛ̨i mu, ká mąąkulɔi hva kɛ káá, hɛn da hva pɛli kɔ́ pɛlɛi káá.

²³ Kɛlaa, hvo kɛli, laa na laa háálai, ká kanąn mą, 'ká ɉon kpɔ kpąą, 'ká hvo nɛɛ laa, di hvo ká mąąkwɛa nwɛlɛɛ lɛlɛɛ ŋą kilitɔɔmąą laa ɓa, yai ká mɛ̨n; a yai, di naa həli pɛli-hɛn gəlee ɓa yələkɔlɔn mu nąą kəlee, yaa tii ɓə, ɲą́ą́ Polə ŋą́ kɛ a ŋą tímun.

Gɔi Polə kaa gɔi

²⁴ Mɔ̨nɔ̨ɠaai gáá mįi ká mąą mɛ̨nį ɓa yiihu, ŋą́ gwə́inɛ̨ɛ̨ mɛ̨nį hɔlɔɓo ɉu, ɛlɛɛ, Kristə ŋą mɔ̨nɔ̨ yiiɠaai lɛɛ pulu, gáá naa kulɔi gɔ́lɔ́ hu, gɔlɔ mąą mɛ̨nį ɓa, yai a ŋą kpɔn;

²⁵ ŋą́ kɛ a ŋą tímun, yɛ bələi, Yálá ə mąą laa tɛɛ la bɔ́, ká mąą mɛ̨nį ɓa; ə gɛ, ŋą́ Yálá laa woo laa həli mɛ̨nį laa kulɔ,

²⁶ a mɛ̨nįi wɔlɔ noɔ, yai Yálá aa doo pono ɲą yiihu, ŋą nu mąąhəɠɛɛɠaa diɛ.

²⁷ Bələ ɓə ə kɛ la tii bɔ, ə mɛ̨nįi tii ŋą yəi-kɛnɛ̨laa da ŋą mąąwiɛlaa lɛ la huwu takpɛliɠaa lɔwai, a Kristə kɛ mɛ̨nį ká lɔwai, a kilitɔɔmąą laa, a mąąwiɛlaa!

²⁸ Yaa tii ɓə ku kaa mąą mɛ̨nį la həli, kuɔ nu kəlee kilaa pono, kuɔ di mąąkwɛli a kilikɛɲəi laa kəlee, əgɛ, nu kəlee mąą mɛ̨nį laa ə kulɔ kpɔ a neelee, Kristə hu.

²⁹ Nwɔ́ɔ́ tɔɔ a nwąnąi laa nwun gaa mą, ya ɓaa; gɔi gáá gɔi, a hvaŋąi kolo kɛi ɉú.