Ɉeremi 52 - Yálá laawoo hɛɓɛ (dc)

Babilonə nuą di Ɉerusalɛmə hon a kɔ́

¹ Sedesiasə kaa kwɛlan ə kɛ a kwɛlan pow hveelɛ kɔ́w tɔ̨nɔ̨, ɓɛlɔwai ə dɔɔlaa hɔlɔɓo la. Ə tɔɔlaa kɛ Ɉerusalɛmə a kwɛlan bow gɔw tɔ̨nɔ̨. Nee laa ɓaa kɛ a Hamutalə ə kɛ a Livna mun Yimeyahu lon nɛ̨ɛ̨nu.

² Mɛ̨nįi nwɛli kpɛɛ Yai-Laa ɓa, ya ɓə Sedesiasə ə ɲee lɔ ɉu, yɛ gɛ, kpɔlɔɔ yɛ bələi Yoyakimə ə kɛi gɛ la.

³ Mɛ̨nįi di kɛi gɛ Ɉerusalɛmə daai da Ɉuda lɔi hu, ə Yai-Laa liiholi, yili ɓə gɛ, yɛ di pili, yɛ di həɠə ɲɛ̨i mu. Sedesiasə ə tɔɔ Babilonə tɔɔmun na.

⁴ Sedesiasə nwɔ tɔɔlaa gwɛlan mɛ̨inąąn nɔwai, ɲąnin mɛ̨ida nwɔ hvóló pow yələ, Babilonə tɔɔmun Nabukodonosorə ə pa, yaa da nwɔ kɔkulaa kpulu kɛnɛ̨i Ɉerusalɛmə daa kpala, di kɔlaɠa pɛlɛ laa, di galaɠaa tɔɔ, di mąątinɛn na di doo gee hu.

⁵ Daa ə tɔɔ kpɔ a nwąnąi, ə mąąkɔ̨nwɔ̨ kpɔ ɲəi, əlɛɛɉu, di həli Sedesiasə nwɔ tɔɔlaa gwɛlan bow gɔw tɔ̨nɔ̨ lɔwai ɓa.

⁶ Ɲąnin nwɔ hvóló mɛ̨inąąn ɲələ, pulu ə kɛ daa kwəi, hɛn nąmįną kɔ̨nɔ̨n və kɛa kɛ di yəi.

⁷ Di nɛ̨ɛ̨ mą, di wolo ɓɔ daa mąąkpɛɛ hįį ɓa, gɔ́ kɔ́ nuą kəlee di pu, di kulɔ taai a kwiihąą, bɛlɛ́ nwąną hveelɛ lɔwai kpon gɛɛnąą, tɔɔmun nwɔ nɔw yɛa kwɛlɛ, bələi mąn Kalde nuą daa kɛ daa mąątinɛn na daa doo gee hu. Di ɉon a Ɉurdɛn ɲa-ɓoloon bɔ pələ.

⁸ Kalde kɔ́kulááɠaa di hvilɛn tɔɔmun Sedesiasə pulu, di ɉon Ɉeriko yɛɛ kɔwɔ hu, nwɔ kɔ́kulááɠaa kəlee daa kɛ taɠa, daa nɛɛ gbɔwɔ ɓa.

⁹ Kalde kɔ́kulááɠaa di Sedesiasə hon, di tɛ la Rivla daai, Hamatə lɔi hu, Babilonə tɔɔmun bɔ, yili ə Sedesiasə kiti tee.

¹⁰ Babilonə tɔɔmun ə Sedesiasə lonnii nwun dee di nąn ɲɛ̨i ɓa; ə Ɉuda lɔi ɲɛ̨itɔwɔ nuą kəlee nwun dee lɔ nwɔ̨nɔ̨ Rivla daai.

¹¹ Yili pulu, ə Sedesiasə ɲɛ̨i wolo, ə ɲili a ɓala kwɛli yɔwɔn veelɛ. Ə ɉəɠə ə li la Babilonə daai, ə doo laa gaho ŋą, ə lɛɛ laa, ə haa.

¹² Babilonə tɔɔmun Nabukodonosorə nwɔ kwɛlan bow gɔw mɛ̨inan nąąn, nwɔ ɲąnin nɔɔli lɔwai dɔɔlaa hu, voló pow yələ, Nebuzaradan yai kɛ a Nabukodonosorə nwɔ tɔɔlaa kwɛlɛ kalanɉon da, ə pa Ɉerusalɛmə.

¹³ Ə nwɔ̨n nɔ Yálá hee pɛlɛ́ hu, da tɔɔmun nwɔ pɛlɛ́i, ə mą kɛ, Ɉerusalɛmə nu kpɛa kpɛaa di wɔ pɛlɛ́ɠaai.

¹⁴ Ɉerusalɛmə taa mąąkpɛɛ hįį nwɛi, Kalde kɔ́kulááɠaa di pu kpɔ nąą kəlee daa ɓa. Dɔɔmun kwɛlɛ kalanɉon tii ɓə di tí la.

¹⁵ Ɉɛn gɔw nąmįnąi kɛ daa kwəi, da nuąi daa kɛ di kpɔɔ tɛɛ Babilonə tɔɔmun bɔ, da nuąi lɛɛ daai diɛ, dɔɔmun gwɛlɛ kulaa nwun nąmu Nebuzaradan ə li a gəlee.

¹⁶ Kɛlaa, ə nɔi kóló kɛ nuąi taɠaa lɛɛ laa, diɛ díiɠaa, da ɉihɛn ɲeaɠaa laa hɔnmo.

¹⁷ Yálá hee pɛlɛ́, bɛlɛ́ dɔɔ muɠaa tii kɛ a ɓala kwɛli, bɛlɛ lon gɔwɔɠaa tii di kɛi giliɠilin na, mala kwɛli gboloyá kɔ́ɔn ɉɛn tii kɛ Yai-Laa yəi bɛlɛ́n, Kalde nuą di di hu yali yali, də li a mala kwɛli Babilonə.

¹⁸ Gwɛli ləɠiɠaa, goagoaɠaa, nuwu kələ hɛnɲąŋąɠaa, nuą mąąhəɠə gəgənŋaa, gbələ kɔ́wɔɠaa, da ɉaláá kulɔ hɛnŋaa kpɔ kɛ a ɓala kwɛli, di gəlee həɠə.

¹⁹ Gəgənŋaa, lansan kələn ɉɛnɲąŋąa, nuą mąąhəɠə gəgən gbɛa-kpɛaɠaa, gwɛli ləɠiɠaa, ləɠi tɔɔ hɛnŋaa, gbələ gəgənŋaa, da gəgən pɛlɛɛɠaa; yiiɠaa kpɔ tii kɛ a hɛni da wali, tɔɔmun mąąkpɛɛ kulaaɠaa nwun nąmu ə gəlee həɠə.

²⁰ Bɛlɛ́ dɔɔ mu hveelɛi, gboloyá pu hɛnɲąŋą tɔ̨nɔ̨i, da nįŋɛ̨ mąąnįnįn bow kɔ́w hveelɛi tii kɛ a mala kwɛli, bɛlɛ́ lon giliɠilin gɔwɔɠaa hvilɛn ŋąą mɛ̨i, diɛi tɔɔmun Salomɔn ə di pɛli Yai-Laa nwɔ pɛlɛ́i mąą mɛ̨nį ɓa, nu hva pɛli gwɛli wiɛ yee kɔ́lɔn ɉii, ya ɓaa, ɉɛnŋaa tii kəlee wiɛ yee.

²¹ Bɛlɛ́ dɔɔ muɠaa kwɛa yee, ə kɛ a yee laa mą pow kɔ́w mɛ̨ihaaɓa; gbinį kɛnɛ̨ yee, ə ɓo a yee laa mą pow kɔ́w hveelɛ, ɉu wiɛ yee ə ɓo a nu yee kpiɛ nąąn, nwolo ɓo.

²² Ɓala kwɛli ɓɛla pɛlɛɛ kɛ mɛ̨i, gwɛa yee ə ɓo a yee laa mą lɔɔli, mąą puɔ a wulu ɓa mąąnįnįnŋaa, da kwɛli hɔlɔɔnŋaa pilɛɛ gee hu. Gəlee ə ɓo a ɓala kwɛli, veelɛnąą kɛ pələ ə kɛ lɔ tii.

²³ Nwulu ɓa mąąnįnįnŋaa di kɛ pow mɛ̨inąąn gow mɛ̨ida, di ɲɛ̨i kulaa. Wulu ɓa mąąnįnįn nwun dɔ̨nɔ̨ ə kɛ a gwɛli hɔlɔɔn bili-piliɛ gee hu aa mąątinɛn yɛ doo gee hu.

²⁴ Dɔɔmun mąąkpɛɛ kulaa nwun nąmu ə ɉaláá laa həli mun Seraya hon, da Sefania yai kɛ a ɉaláá laa həli mun, da nu haaɓai di ɲɛ̨i ə kɛ Yálá hee pɛlɛ́ ɓa.

²⁵ Daa kwəi nwɔ̨nɔ̨ ə nɔi kóló kɛ mun dɔ̨nɔ̨ hon; yili ɓə gɔ́ kɔ́ nuą mąą mɛ̨nį ə kɛ mą, da nu mɛ̨ihveelɛ, a tɔɔmun ɉee gwɛlɛɠaa. Yiliɠaa di kɛ ni taai, da gɔ́ nwun nąmu nwɔ hɛɓɛ́ kɛ mun. Yili ɓə kɛi gulaaɠaa kulɔ da nu pow mɛ̨ida, di kɛ ni daa kwəi.

²⁶ Dɔɔmun mąąkpɛɛ kulaa nwun nąmu, ə di hon ə li a diɛ Babilonə tɔɔmun Nebukodonosorə pɔ Rivla daai.

²⁷ Babilonə tɔɔmun ə mo, di di paa Rivla daai Hamatə lɔi hu. Bələ ɓə di Ɉuda nuą kulɔ la di pɔ lɔi, diɛ li a diɛ kwɛaa la luwɔlaa hu.

²⁸ Nuąi Nabukodonosorə ə li a diɛ luwɔlaa hu, a gwɛlan mɛ̨ihveelɛnąą, di lonoɔ ka: Ɉuda nuą, nu waa haaɓa nu pow hveelɛ kɔ́w haaɓa (3023).

²⁹ Tɔɔmun Nabukodonosorə nwɔ tɔɔlaa gwɛlan bow gɔw mɛ̨ihaaɓa nąąn, Ɉerusalɛmə nuąi li luwɔlaa hu, di kɛ a: Nu nwun mɛ̨ihaaɓa ɲee haaɓa kɔ́w hveelɛ (832).

³⁰ Nabukodonosorə nwɔ tɔɔlaa gwɛlan bow hveelɛ gɔw haaɓa yələ, tɔɔmun mąąkpɛ kulaaɠaa nwun nąmu Nebuzaradan, ə li a Ɉuda lɔi hu nuą, nu nwun mɛ̨ihveelɛ ɲee nąąn kɔ́w lɔɔli (745). Nuą kəlee pɛlɛɛ di kee ɓa, di kɛ a nu waa nąąn, nu nwun mɛ̨ida (4600).

Babilonə tɔɔmun ə Yoyakimə mąąhvaalɛɛ

³¹ Ɉuda tɔɔmun Yoyakimə nwɔ tɔɔlaa gwɛlan bow haaɓa gɔw mɛ̨ihveelɛ yələ, ɲąnin bow kɔ́w hveelɛnąą nwɔ hvóló pow hveelɛ kɔ́w lɔɔli yələ, Ewilə-Merodakə, yai kɛ a Babilonə tɔɔmun; gwɛlan nɔ ə dɔɔlaa hɔlɔɓo la, ə Ɉuda tɔɔmun Yoyakimə mąąwɛli kaa, ə mo di gulɔ gaho ŋą.

³² Ə gɛ a mɛlan mun. Mɛlaa tɔɔɓɛlaa tii da diɛni di kɛ Babilonə, ə ɉee gəlee ɲɛ̨itɔwɔ.

³³ Ə Yoyakimə nwɔ luwɔ həɠəɠaa kəlee kulɔ gwąną. Yoyakimə da Babilonə tɔɔmun mə kɛi di yee lɔ kɔ́wɔ tɔ̨nɔ̨ hu, nwɔ yɛnɛ̨ɛ̨ kəlee yee mu.

³⁴ Yoyakimə laa hɔnmo mɛ̨nį, Babilonə tɔɔmun mə kɛi ɲɛ̨i kulɔ a yələ kəlee da nwɔɔ, nwɔ yɛnɛ̨ɛ̨ kəlee yee mu, əlɛɛɉu, ə haa la.