Ɉeremi 5 - Yálá laawoo hɛɓɛ (dc)Ɉerusalɛmə taa da ɉu lɔi di yee ə kɛ túwɔ́ pələ ɲɔ̨n ɉu, yili ɓə pa a kɔ́ 1 Ka tɛɛ Ɉerusalɛmə gwəliɠaa pɔ, ka naa mąąkpɛɛ, ka gaa, ka ka ɲɛ̨i laa gwəli lɔwaiɠaa ɓa, akɛ ka káá pai nu tɔ̨nɔ̨ kpɛli kaai, a nu tɔ̨nɔ̨ kpɛli, yii ɲee hvo túwɔ́ pələ ɲɔ̨n ɉu; dələnmoɔ, yɛ tɛ̨ą kwɛli; akɛ tii ŋį́ daa ŋɛ̨i mąą hvaalɛɛ. 2 Nuą di mą kɛ di kwɛlai diɛ kɛ: «Kpɔ Yai-Laa laa hu.» Daa di kwɛla a lɛɛ. 3 Yai-Laa! Kɛlɛi tɛ̨ą mɛ̨nį ɓə ə́ ɲɛ̨i a tɔɔ ɉu-e? Yáá di kɛlɛ, Kɛlaa yili hvo diɛ a mɛ̨nį ta. Yáá damąą paa, kɛlaa mɛ̨nį ə́ kaa nɛi diɛ di hvo di yee heei mu, daa di nwun nwalawala yɛ kwɛni di hvo gɛi di hvo həɠə di hon ɲɔ̨n bulu, di hvo pa ə́ pɔ. 4 Ya ɓə ŋį́ kɛ diɛ: «Di hvo gbana li kpɛli tiikpə, nu tununŋaaɓaa diɛ, di ŋaakpɛɛ diɛ, mąąhɔlɔɓo, di hvo Yai-Laa woo kɔ́lɔn, di hvo di wɔ Yálái nwɔ tɔ́n gɔlɔn. 5 Yili ɓa, gáá kani ɲɛ̨i heei nu kpɛa kpɛa diɛ, kwa diɛni ku da ɓo. Di wɛi, di Yai-Laa woo kɔ́lɔn. Di di wɔ Yálái nwɔ tɔ́nŋaai kɔ́lɔn.» Di kəlee di kaa lɔ tɔ̨nɔ̨; daa kɛ di nwun gulɔ mu, daa kɛ di yɛli tee. 6 Yili mąą mɛ̨nį ɓa, yalaɠaa kaa kulɔi gban mu, diɛ wolo diɛ; húlúɠaa diɛ kulɔ gbaalə hu, diɛ di hu kala. Kwɛ́liɠaa diɛ di wɔ taaleeɠaa kwɛlɛ tɛ; hɛn kpɔ a kulɔ taai diɛ ɉu hvala-hvala. Mąąhɔlɔɓo, di wɔ kwɛli tee laa hu lɔ ɓə kɛnɛ̨i, diɛ di pulu tɔɔ la Yálá ɓa. 7 Ɉerusalɛmə taa! Mɛ̨nį kɛ pələ a kɛ tii, ŋį́ pɛli ə́ mąą hvaalɛɛi ləi? Ə́ lonni daa nɛ́ɛ́ laa, diɛ di kwɛla hali ɓa. Ŋą́ di yee laholon, diɛ di kpɔɔ kɛ a wɛlii kɛ nuą, di pulu tɔɔ wɛli kɛ Nɛ̨ɛ̨nu yee bɛlɛ́ laaləi, diɛ nąą mąąkɔ̨nwɔ̨. 8 Di kaa yɛ hoo hilɛɠaai di hutono, daa kpɔɛ; diɛ di lii pɔ wɔlɔ di kee ni nɛ̨ąni pulu. 9 Túwɔ́ taalə a kɛ tii, ya ɓə mɔ̨ɔ̨ vá pɛli mɛ̨nį laai la nuą tii diɛ? Ə lɛɛ, nu huwu taaləi tii, vá mɔ̨ɔ̨ nwáná kulɔ diɛ? Ɲą́ą́ Yai-Laa nwóó li. 10 'Ka tɛ daa mąąkpɛ hįį mɛ̨i, 'ka bu. Kɛlaa ka hvo gəlee pu kpɔ tii tɛ̨ɛ̨tɛ̨ɛ̨?. Ka wɔ viɲəɠaai nwonwoɠaa kulɔ mą. Mąąhɔlɔɓo, hvo a Yai-Laa nwɔɔ. 11 A tɛ̨ą leelee, Israɛlə nuą, da Ɉuda nuą, daa mówó. Ɲą́ą́ Yai-Laa nwóóli. Nu a həɠə Yálá pulu, mɛ̨nįi a laa mą 12 Daa lənə Yai-Laa ɓa, diɛ kɛ diɛ: «Ho laa! Mɛ̨nį nwąnąą hvo pai laai kuɔ, kɔ́ hvo pai həlii kuɔ, ə mą kɛ, pulu. 13 Yálá kwəi mɛ̨nį hukulɔ nuą daa lɛɛ a hvaŋą, woo hvo kɛa di la. Mɛ̨nįi da mo, ə́ laa diɛ.» 14 Yili mąą mɛ̨nį ɓa, mɛ̨nįi Yai-Laa Mɛ̨nį Kəlee ŋą Hééɓomun Yálá kaa moi, ya ka: Yii bələ ɓə di hvaa pələ aa kɛ lai, Ɉeremi! Nwóóɠaai gaa bui ə́ la, gáá gɛi yɛ nwɔ̨n. Nuą ŋɛ̨i ɓə kɛi a gwɛituwɔ yɛ di kələn. 15 Kaai ɓaa Israɛlə nuą, gáá pai nuą ɲąątɔɔi kaa diɛ həɠə kwɛa la. Da kɛ a nu huwu yii ka yee hva lɔ diɛ. A tɔwɔ-tɔwɔ nu huwuɠaa. Ka hvo kpɛli di lawoo kɔ́lɔn. Di woo hu kpinɛ̨ɛ̨ kaa. Ɲą́ą́ Yai-Laa nwóó li! 16 Di wɔ tonwą taɠai ka a kámą laa ɓoɔ, di kəlee di kaa a kulaa kpəɠiɛɠaa. 17 Di kaa pai too ə́ wɔ mɔ̨nun ɉu da ə́ kɔ̨nɔ̨n, di too ə́ lon ɉinąą mɛ̨i, da ə́ lon nɛ̨ąą; di too ə́ wɔ viɲəɠaa kəlee mɛ̨i da mɔlaa wuluɠaa; diɛ ə́ wɔ taaleeɠaai mąąkpɛ hįįɠaa wolo; a daaɠaa tii ə́ kilitɔɔ kɛ diɛ, yɛ́ ə́ kpɔɔ kaa la liilaa hu, ə mą kɛ, kɔ́ kaa pai. 18 Nąąlɔwai tii, Yai-Laa yɛ diɛ; «Vá ka huwu pu, və́ gbɛɛ tɛ̨ɛ̨tɛ̨ɛ̨?.» 19 Ə lɛɛ, kaa pa kɛi diɛ: «Lə ɓə kɛ yaai, Yai-Laa kuɔ Yálái ə mɛ̨nįɠaa ŋɛ̨i laa kuɔ?» Yɛ́i ɓaa Ɉeremi, yá kɛ diɛ: «Bələi lɔ tii ka həɠə la Yai-Laa pulu, kaa kwɛli hvilɛn haliɠaa diɛ ka wɔ lɔi hu, bələ lɔ ɓə ka káá pai kóló kɛi la lɔi takpɛli hu nuą diɛ, ɓɛi hvo a ka pɔ lɔi.» Di hvo kɛa Yálá mąąwiɛi 20 Ka noloi ŋɛ̨i ɓo Ɉakɔbə yəi bɛlɛ́n nuą mɛ̨i, Ɉuda lɔi hu nuą di mɛ̨n, kaa diɛ: 21 «'Ka ka wəli tɔɔ! Kai ka kiliŋaa pɛlɛɛ, ka hva ŋąą hiɛ. Ɲɛi kɔ́w kaa ka, ka hva kɛɛ kaa la! Wəli ə ɓo ka, ka hva mɛ̨nį mɛ̨n na!» 22 Yai-Laa yɛ diɛ: Ka hvo bɔ ka hvo mɛ́lɛ kɛ mą́ą́, ka hva ɲɔw mą́ą́. Ɲą́ą́ ŋɛ̨i gboloyá ɲɛn dɔɔ a ɲɛa kɔ́w, ɛlɛɛ, gboloyá hvo pai lagin ɉii ɲɛn tii mɛ̨i a Yələ ta, ə mą kɛ lii tii yɛ pa a vaŋa, hva ɲɛn tii mąą teen; gboloyá a huluun, kɛlaa, hva ɲɛn tii mąą tɛɛ. 23 Kɛlaa nu huwui ŋɛ̨i kili ka laa gwəi, di hva lɛɛ nu woo mu. Daa həɠə bələ mɛ̨i diɛ li di nwun ma. 24 Di hva kɛ di kpɔɔ ɓa: «Maa nɛɛ ka gu Yai-Laa gu wɔ Yálái mąąwiɛ. A yaa tii a tulɔ tɛɛ gu pɔ a bui lɔwai, yɛ pu a weewaa da tɛlin; yɛ mɔ̨nun dee ɲąnįnŋaa tɛɛ gu pɔ, di ɓo laa di mąą hva hvalin.» 25 Mɛ̨nįɠaa tii ŋį́ di hee kpəlin na kɛ, ka wɔ túwɔ́ hɔnŋaa daa kpəɲan mɛ̨inɛ̨ɛ̨ɠaa tii tɔwɔ, ka kɛ nɛ̨ŋɛ̨nŋaa da kpəɲan ka wɔ mɛ̨nįɠaa lɛlɛɛɠaa tɔwɔ. 26 Gaa tii, mɛ̨nį ɲɔ̨n gɛ nuą kaa nwɔ nuą lɔwai, daa hee nuą tɔwɔ di loɔ yɛ nwɛ̨nį kpɛmun. Diɛ hɛlɛn dɛ, diɛ nu hon na. 27 Bələi lɔ da nwɛ̨nį kɛ la heen vɛɛ, bələ lɔ ɓə di wɔ pɛlɛ́ɠaa laahvɛɛ la a nwuɔ̨ hɛn. Bələ ɓə da kɛ la a nu kpɛa kpɛa diɛ kɛ la a hɛn gɔw nąmįną. 28 Di ɲɛ̨i wulɔ yɛ kulɔ, di koo a hee, di yee laɠin ŋąą nu kəlee mɛ̨i mɛ̨nį ɲɔ̨n gɛɛ hu. Di hva kɛa tɛ̨ą mąąwiɛ kiti tee lɔwai, di hva təlilon nwɔ tɛ̨ą mɛ̨nį ɲɛ̨i kulɔ, ə gɛ lɔ di hɛn ɉɔlɔɓo. Di hva mąąwɛli mun mąą mɛ̨nį ɲɛ̨i kulɔ. 29 Yai-Laa yɛ diɛ: Mɛ̨ni kɛ pələ a kɛ tii, a kɛ tii, vá mɔ̨ɔ̨ di hutɔɔ? Ŋą́ nwą́ną kulɔ nu huwu taaləi tii ɓa! 30 Kwəi pili mąą mɛ̨nį, da kɛɛ kala mɛ̨nįɠaa kaa kɛi nɔi; a ɓɛlɛ too mɛ̨nį. 31 Nuą daa di kpɔɔ kɛ a Yálá kwəi mɛ̨nį hukulɔ nuą, di kaa lɛɛ woo ɓoi. Ɉaláá kulɔ nuą diɛn, hɛn lɔpee di yee a pɛli mą, da nɔ di yəi ɲuɓoi. Yili aa kɛi kɛ tii, nwɔ́ nuą kwəinɛ̨ɛ̨ ɉu. Kɛlaa, ka káá pai gɛi ləi a naa kulɔ yələ? |