Ɉeremi 49 - Yálá laawoo hɛɓɛ (dc)Amɔn nuą 1 Mɛ̨nįi Yai-Laa kaa moi yɛ hvilɛn na Amɔn lonnii diɛ, ya ka, yɛ diɛ: «Lon və mɔ̨ɔ̨ Israɛlə ɓa? Gwɛlin ɉəɠə nuą di hvo mɔ̨ɔ̨ laa? Lə mɛ̨nį ɓa kan yaai, Milkomə ə Gadə hɔlɔɓo a nwɔɔ, nwɔ nuą diɛ hee nwɔ taaɠaai hu?» 2 Yili mąą mɛ̨nį ɓa, Yai-Laa yɛ diɛ: «Hvolóɠaa kaa pai həlii, gɛ́ kɔ́ kɔ́ woo tɔɔ Raba Amɔn nuą mɛ̨i, naa a lɛɛ a lɔi pun, diɛ ɲee kɔ́nma taaɠaa kələn, ɛlɛɛ, Israɛlə yɛ pənə yɛ gwɛlin ɉəɠə nuą hɔlɔɓo a nwɔɔ.» Ɲą́ą́ Yai-Laa nwóó li! 3 Hɛsbɔn! 'Toma yɛ́ kɛ mą: «Daa Ai taa pu!» 'Ka tomą, kaai a Raba yee mu taaɠaa! 'Ka ɓíi haɠa too ka kwąną, 'ka ká woo laa! 'Ka tɛɛ gumunŋaa lɔwai! Milkomə kaa lii kɔluwɔlaa hu, da nwɔ haláá laa həli nuą, da nwɔ nu kpɛa kpɛa kəlee, di kaa lii a gee. 4 Ə́ kɛ mɛ̨nį heeni yee lɔwai, ə́ kaa ə́ kpɔɔ ɲąą kɛnɛ̨i yili hu, lə mɛ̨nį ɓa? Ə́ wɔ lɔi kaa a lɔi lɛlɛɛ, yɛ́i ɓaa halakpɛla, liihɛlɛn və yɛ́. Yɛ́i ə́ kilitɔɔi ə́ wɔ hɛn gɔwɠaa diɛ, yɛ́ kɛ diɛ: «Gbɛɛ ɓə a kɔ́ pɛlɛ mą́ą́?» 5 «Yili mąą mɛ̨nį ɓa, ɲą́ą́ Nąmu Yai-Laa Mɛ̨nį Kəlee ŋą Hééɓomun, nwóó ka, gɛ́ diɛ: Gáá pai ə́ mɛ̨i a ɲɔw kɛnɛ̨, yɛ həɠə ə́ heeyɔwɔ kəlee pɔ pələ, di kaa pai ka hu taɠai, nu kəlee yɛ li gɔwɔ ɲɛ̨i tɔwɔ pələ. Ɛlɛɛ, nu hva hɔlɔɓo, nuąi di kaa pui, hvo di ɲąąkpɔn. 6 Yili pulu, ŋą́ pənə ŋą́ Amɔn lonnii hee di nwun ɲa.» Edɔmə 7 Mɛ̨nįi Yai-Laa Mɛ̨nį Kəlee ŋą Hééɓomun kaa moi yɛ hvilɛn na Edɔmə ɓa, ya ka; yɛ mą: «Mɛ̨nį kɔ́lɔn nuą di hvo mɔ̨ɔ̨ kɛa Teman? Kili hvo kɛa mɔ̨ɔ̨ gilimąą nuą diɛ, di wɔ mɛ̨nį kɔ́lɔn gili aa mɔ̨ɔ̨ kala? 8 'Ka pu, ka yali ka pulu, 'Ka ka loo gwɛni woloɠaa hu. Dedan nuą, Esau hukala mɛ̨nį ka tii gáá pai la. Gwəlamoi lɔwai aa həli. 9 Mɔ̨nun dee nuą da pa ə́ pɔɔli, di hva hɛn da lɛɛ mɔ̨nun gban ɉu, nwuɔ̨ nuą da pa kwii hąą, yii di yee a pɛli mą da gəlee hukala. 10 Ɲą́ą́ gbinįi ɓə pai Esau kpuwulu ɓoi, nwɔ hɛn gɔwɠaai aa di loo, gɛ́ di kulɔ di loo pələi. Hva pɛli nooi. Ɉuwuhu, gaayɔwɔɠaa, gwɛlɛ nuą, da gəlee hukala. Ɛlɛɛ, nu hva hɔlɔɓo, yɛ kɛ mą: 11 'Hvó ə́ liihɛlɛn ə́ wɔɔ təlilɛa mąą mɛ̨nį ɓa, ɲą́ą́ ɓə pai di kulɔi ɉu. Ə́ wɔɔ kalaninŋaa da pɛli di di kilitɔɔ mą́ą́.» 12 Gaa tii, Yai-Laa woo ka: «Nuąi kɛ mąą hvo nɛ̨ɛ̨li di hvo nɔɔ ta kpələ, da di kpaan, diɛ da tɔɔ di la, ɛlɛɛ, yɛ́i ŋɛ̨i ə́ nwun a kulɔ ɉu, hva kɛ tii, ə́ nwun va kulɔ ɉu, hva ɉəɠə mą, ə́ kaa pai da kpələi. 13 Yai-Laa woo li, gáá gwɛ́lai a gbɔ́ɔ́ kpinį lee, Bɔsra kaa pai lɛɛi a lɔi pun, a taa kpoloon, diɛ gɛ a lalan ɉɛn, da nɛ̨ŋɛ̨n naa hɛn. Daaɠaa kpɔ ɲee hu di kaa pai lɛɛi a taa kpoloon, a yələ kəlee da nwɔɔ.» 14 Ŋą́ą́ wɛlɛɛ woo mɛ̨n, Yai-Laa ɓə dɛɛ. Diɛ kuláá ta dɔɔ lɔiɠaa hu, yɛ kɛ diɛ: «'Ka ká ɲąąkpɔn, 'ká wolo mą, 'Ka ka muhəɠə, aa kɛ a kɔ́! 15 A tɛ̨ą, gáá ə́ lɛɛ tiikpə lɔiɠaa lɔwai, nuą diɛ tɛɠɛɓo ə́ hu. 16 Ə́ kaa ə́ kpɔɔ ɓowoi, mąąhɔlɔɓo, ə́ kɛi ɲɔw too ə́ kwɛlɛ nuą hu a kili ɲɔ̨nwɔ̨ɔ̨. Yɛ́i heeni gwɛni woloɠaa hu. Ə́ hɛlɛn ŋąą yee tɔɔɠaa diɛ, ə mą kɛ, yaa ə́ taa tɔɔ yee tona yɛ geelə, ŋą́ ə́ wean nąą. 17 «Edɔmə aa kɛ a lɔi pun, nui lɔpee a tɛɛ laa, gwəi a pili mą. Nu hva gɛɛ kala pələ taaləi tii kaa, hvo kɛli ə tomą a ɲɔw. 18 Bələi lɔ ə kɛ la a Sodomə taa da Gomorə taa, da di kwɛlɛ taaɠaa di pu yələ, nu ta hvo kɛa pai lɛɛi laa. Yɛnɛ̨ɛ̨ mun da hva kɛa daa tɔɔlaa. «Ɲą́ą́ Yai-Laa nwóó li! 19 Bələi lɔ yala a kulɔ la Ɉurdɛn kpomói, yɛ tɛ la taatɛlɛɛ kwənąnŋaa hu, diɛi di laa hvɛɛ a yələ kəlee, bələ lɔ ɓə gáá pai di kulɔi la mą́ą́ tɔ̨nɔ̨, di tɛɠii pələ. Gɛ́ laŋa kɔ́kulááɠaa ɲąątɔɔ diɛ. Mąąhɔlɔɓo, gbɛɛ ɓə gaa yɛ ɲą́ą́? Gbɛɛ ɓə a pɛli də́lii kiti haɠa ɓa? Taatɛlɛɛ ɲɛ̨itɔwɔ mun nɛlɛ ɓə a pɛli tɔɔi ná?» 20 Mɛ̨nį ɲɔ̨nwɔ̨ɔ̨, Yai-Laa aa mąą kili tee gwəi, yɛ hvilɛn na Edɔmə ɓa, ka ka wəli tɔɔ mą; mɛ̨nįɠaa gaa bɔ ə naa Téman nuą diɛ, daatɛlɛɛ kpulu lɔwai, ə mą kɛ, yiiɠaa di hviikpɛɛ, di kaa pai kɛi di yalai. Di mąą mɛ̨nį ɓa, gaa pai di wɔ lɔi huwoloi. Yili hva ɉəɠə mą. 21 Lɔi kaa pai kpɛlin ɉii di too tin ma, di tomą woo yɛ həli kpɔ veen gbɔ̨nɔ̨ gboloyá ɓa. 22 Gaa yɛ geelə a kɛi tɛ yələi, yɛ koon, yɛ goon ɉu lɛan Bɔsra mɛ̨i. Volói tii, Edɔmə kɔ́kulááɠaa lii a kɛ di kwəi, yɛ kwəi nwąną kɛ nɛ̨ɛ̨nu lii. Damasə mąą mɛ̨nį 23 Damasə nwɛi ka: Nwumɛ̨ aa Hamatə da Arpadə nuą ɲɛ̨i paa, wɛlɛɛ ɲɔ̨nwɔ̨ɔ̨ aa həli diɛ. Di hu kaa kpɛlin ɉii, yɛ gboloyá. Liihɛlɛn gɛnɛ̨ li, nu hva pɛli heei laa kpɛ-kpɛ. 24 Damasə aa too, aa bulu tinɛ̨n yɛ pu. Maa yɛ kpɛlin nɔ ya ya mɔ̨nɔ̨ da liikələn gwəi daa həli mą, yɛ Nɛ̨ɛ̨nui kwəi nwąną kɛi. 25 Ee kə! Daa lɛ̨ą gwəinɛ̨ɛ̨ taai ɓa, aa lɛɛ a taa kpoloon. 26 Gaa tii, mąą yələ, nwɔ kɔkulaa laŋaa da too gwəli hąąɠaa. Nwɔ kɔ́kulááɠaa kəlee mɛ̨i a haa; Ɲą́ą́ Yai-Laa Mɛ̨nį Kəlee ŋą Hééɓomun nwóó li! 27 Gáá nwɔ̨n dooi Damasə mąąkpɛɛ hįi hu, yɛ Bɛn-Hadadə nwɔ tɔɔ pɛlɛ́ɠaai kələn. Arabə nuą mąą mɛ̨nį 28 Mɛ̨nįi Yai-Laa kaa moi yɛ hvilɛn na, Kedarə da Hasɔrə tɔɔ lɔiɠaa, diɛi tii Babilonə tɔɔmun Nabukodonosorə ə di hon kɔ́ hu, ya ka: «'Ka ká muhəɠə, ka kɔ́ pɛlɛ Kedarə ɓa; ka Kɛdɛmə nuą hukala. 29 Di kaa di wɔ huwɔ kɔ́lɔ kələɠaa həɠəi, da di wɔ taatɛlɛɛɠaa. Di wɔ həɠə ɓɛlaaɠaa, da di wɔ hɛnɲąŋąɠaa di kaa lii a di wɔ ɲɔ̨nwɔmɛɛɠaa, diɛ tomą di mɛ̨i, diɛ kɛ diɛ: ‹Ɲɔw kɛnɛ̨ kaa pələ kəlee.› 30 Ka pa, ka tɛɛ a gilɛ, ka ka loo woloɠaa hu, Hasɔrə nuą; Yai-Laa woo li. Mąąhɔlɔɓo, Babilonə ə tɔɔmun Nabukodonosorə aa ka mąą kili tee gwəi, aa ka mąą nwun dɔɔ kɛ. 31 «'Ka ka muhəɠə ka li, nɔi liihɛlɛn və mą, gili hvo mɛ̨nį ta hu, ka kɔ́ pɛlɛ mą. Ɲą́ą́ Yai-Laa nwóó li. Kpón və di yəi. Kpón naa kpulu kwɛli hvo di yəi. Di kaa lɔ di tɔ̨nɔ̨ kon ɉu. 32 Di wɔ ɲɔ̨nwɔmɛɛɠaai daa lɛɛ a too ɉu hɛn, di wɔ taatɛlɛɛ kpului aa lɛɛ a kɔ́ hon. Gáá di hu taɠai, yələ ɲɛ̨i, kɛɛnąą kəlee. Nuąi di wəli kwɛlɛ kpɛlɛ kalaan ŋąą, di hukala mɛ̨nį a həɠə bələ kəlee. Ɲą́ą́ Yai-Laa nwóó li. 33 Hasɔrə aa lɛɛ a yalaɠaa pɛlɛi, aa lɛɛ a lɔi pun a yələ kəlee mɛ̨nį. Nu ta hva kɛa hee laa. Nu ta hva kɛa daa tɔɔ laa.» Elamə mąą mɛ̨nį 34 Ɉuda tɔɔmun Sedesiasə nwɔ tɔɔlaa kɔ́wɔ tɔɔ lɔwai, Yai-Laa ə nwooi ŋɛ̨i ɓo Yálá kwəi mɛ̨nį hukulɔ mun Ɉeremi ɓa, yɛ hvilɛn na Elamə lɔi ɓa. 35 Yai-Laa Mɛ̨nį Kəlee ŋą Hééɓomun nwoo ka, yɛ diɛ: «Gáá pai Elamə nwɔ kilɛn hu yalii, yaai gaa a vaŋa mɔlɔmun. 36 Gáá pai heei Elamə ɓa a hvaŋą nąąn bələ kəlee gɛ́ daɠa taɠa yələ ɲɛ̨i, lɔi ta hvo pai kɛi laa, ɓɛi da di mąąkilɛ laa. 37 Elamə nuą da pa di yowoɠaa kaai, nuąi ŋɛ̨i di hvilɛnŋąą di wɔ yɛnɛ̨ɛ̨ pulu, di ɲɛ̨i a tɔɔ diɛ. Ɲą́ mąą kpɛlin doo di hu, nííholi pələ ɓa, ɲą́ą́ nwɔ́ liiholi kɛnɛ̨ɛ hu; ɲą́ą́ Yai-Laa nwóó li. Gáá kɔ́ hvilɛn ɉi Elamə pulu, əlɛɛ ɉu, ŋą́ di kpɛɛ yɛnɛ̨ɛ̨. 38 Gáá nwɔ́ tɔɔ kpəlin heei Elamə lɔi hu, dɔɔmun mąn, galan ɉonŋaa mąn, ŋą́ gəlee kulɔ laa. Ɲą́ą́ Yai-Laa nwóó li.» 39 «Kɛlɛɛ tinąą tɔwɔ pələ, ŋą́ pənə ŋą́ Elamə tɔɔ. Yai-Laa woo li.» |