Ɉeremi 48 - Yálá laawoo hɛɓɛ (dc)Moabə 1 Mɛ̨nįi Yai-Laa Mɛ̨nį Kəlee ŋą Hééɓomun, Israɛlə nwɔ Yálá kaa moi yɛ hvilɛn na Moabə ɓa, ya ka, yɛ diɛ: Mąąwɛli mɛ̨nį aa laa Nebo taa ɓa, daa nwolo, daa Kiriataimə hon, daa nwumɛ̨ tɛ la. Gbakolo taai aa too, nwumɛ̨ aa ɲɛ̨i paa. 2 Moabə hva kɛa nwun dɛ, di kaa mąą nwun dɔɔ ɲɔ̨nwɔ̨ɔ̨ kɛi Hɛsbɔn, ə mą kɛ yɛ́ Madmen, daa laa lɔ ə́ la, ɓɔwa kwɛaa hvilɛn ŋąą ə́ pulu. 3 'Ká pa kilɛ mą́ą́ woo kaa tɔɔi Horonaimə, kɛɛ kala mɛ̨nį da yee lɛɛ ɉu kɛnɛ̨. 4 Daa Moabə huwolo, ɉu lɛapɛlɛɛ tomą woo kaa tɔɔi. 5 Di kaa Luhitə yee tɛi, diɛ wɔlɔ; Nuą di kaa Horonaimə yee yɛɛi, diɛ təli ɓo woo mɛ̨n, yɛ həɠə mąąwɛli mɛ̨nį kɛɛnąą pələ. 6 'Ka pu! Nu kəlee ə gbɔwɔ mąąkɔ̨nwɔ̨! Ka kɛ yɛ bələi Aroɛrə kaa la nɔi pun ɉu. 7 Mąąhɔlɔɓo, ka ka kilitɔɔ ka kpɔwɔ ɓa, da ka yəi hɛn gɔwɠaa, ka hon ŋąą li. Kemɔsə kaa lii mąąkilɛi, da nwɔ haláá kulɔ nuą, da nwɔ ɲąąwooɓo kɛ nuą kəlee. 8 Gɛɛ kalamun aa pili daa kəlee hu, da lɔpee hvo kulɔ li a ɲee wolo. Nɛ̨ŋɛ̨ hu lɔi aa kwɛlɛɛn, ɲee ɓa lɔi hu aa wolo; Bələ ɓə Yai-Laa ə mo la. 9 'Ká kámą tee Moabə ɓa, aa lɛɛ lɔ kɛa a lɔi pun. Nwɔ taaɠaa daa lɛɛ a taa kpoloonŋaa, nui lɔpee ta hvo kɛa ɉu. 10 Nui a Yai-Laa nwɔ kólói kɛ a hviikpɛɛ laa, mąą nu nɛ̨ŋɛ̨n naa ɓə, ə mą kɛ, nui a nwɔ kɔ́ kɔ́ ɓɔwa kunwɔ a ɲąmą. 11 Moabə ə kɛ liilaa hu, ə həɠə kpɔ muhəɠə yələ ɓa, ə kɛi vįitɔɔ nwɔ lɔɔ kpoi mɛ̨i, mąąhɔlɔɓo, di hvo ta kɛ ɉuɓo li. Mukulaa ɓaa: Hvo ta kɛ li li kɔluwɔlaa hu. Yili mąą mɛ̨nį ɓa, neen gaa lɔ ni ɉu, gun nɛɛ ə ɓo lɔ ni a gɛ pələ. 12 Yili mąą mɛ̨nį ɓa, Yai-Laa yɛi: Yələ ta kaa pai həlii, gɛ́ ɉuɓo nuą tɔɔ, diɛ ɉuɓo, diɛ ɉɛnɲąŋąɠaa huɓo, diɛ nɔɔ yáləɠiɠaa wolo. 13 Moabə kaa pai nwumɛ̨i Kemɔsə ɲɛ̨i ɓa, yɛ bələi Israɛlə nuą di nwumɛ̨ la Betɛlə ɲɛ̨i ɓa, yaai kɛ a di kilitɔɔi. 14 Ka tɔɔ pələ kɛi ləi, kaa kɛ diɛ: «Kɔkulaa gbəliɠaa ɓaa kuɔ? Kɔ kɔ́ nuą kpɔ-kpɔ ɓaa kuɔ?» 15 Moabə hukala mun gaa tɛi a kɔ́, yɛ pɛlɛ nwɔ taaɠaa diɛ. Ɉu hilɛlɛa li hiɛ ka tii paa ɓo kɛɛnąą. Dɔɔmun naa ɓaa Yai-Laa Mɛ̨nį Kəlee ŋą Hééɓomun, nwoo li! 16 Moabə too mɛ̨nį aa lɛɠɛ kpɔ hɔɔlɛɛ, nwun na pili mɛ̨nį hɛlɛnŋąą kɛa mɛ̨i. 17 'Ká gbəla ɓo, kaai a gwɛlɛ nuą, a nwɛlikɛmąą nuą, ka kɛ mą: «Ee kə! Nɔi huwalawala ŋɛ̨i, ɉééɓo taa mąąwia ŋɛ̨i, daa nwolo?» 18 Kulɔ ə́ wɔɔ mąąwiɛ laa hu, ə́ yɛɛ ə́ hee muluun ɉu. Divɔn nuą, kaan, Moabə hukala mun gaa tɛi a kɔ́, yɛ pɛlɛ yɛ́. Gaa ə́ mąąkpɛ hiinŋaa pui. 19 'Ká tɔɔ bələi, 'ká bələ hɛlɛn dɛ; Aroɛrə nuą Ka bu nuą tii mąąni kɛ, kaa diɛ: Lə ɓə kɛ? 20 Moabə aa too, nwumɛ̨ aa ɲɛ̨i paa; 'Ká gboo təli! 'Ká nu təli káá. 'Ká nolo ɓo Arnɔn yá mɛ̨i, káá diɛ: Daa Moabə huwolo. 21 Giti aa həli ɲee hu lɔi mɛ̨i, aa həli Holɔn mɛ̨i, da Yasa, Mefaatə, 22 Divɔn, Nebo, Bɛtə-Divlataimə, 23 Kiriataimə, Bɛtə-Gamulə, Bɛtə-Meɔn, 24 Keriyotə, Bɔsra, Moabə taa kəlee lɔ, ə kɛ kwɛaa la, ə kɛ kpuɔla. 25 Hvaŋa lɔpee hvo kɛa Moabə hu, daa ɲee yali. Yai-Laa woo li. 26 Ka lɔɔ tɔɔ na, ə gɛlɛ, hvo gaai, ə gbɔwɔ gɛnɛ̨ ə dɛɛ Yai-Laa ɓa. Ya ka mąąkɔ̨nwɔ̨i maɠi hu, yaa kpɛli aa kɛ a yɛlɛ mąą hɛn. 27 Kɛlɛi ə́ kɛi lɔ yɛlɛ tii Israɛlə ɓa, gaa ɓə mɔ̨ɔ̨ ə́ mo nwuɔ̨ nuą lɔwai, yaai naa ɓo pələ tɛi tɛi kəlee hvo kɛli yá ə́ nwun gbɛŋɛn? 28 'Ká həɠə daaɠaa hu, ka li ka hee gwɛni woloɠaa hu; Moabə nuą, ka kɛ yɛ tonwələnŋaa, kaa ka taa tɔɔ kɛɛnąą ləɠə-ləɠə ɓa, moloonŋaa mɛ̨i. 29 Kwaa Moabə nwɔ kpɔwɔɲąą kɛnɛ̨ mɛ̨nį bələ mɛ̨n kɛnɛ̨, ə kɛi nwun dɛ tai! Dɛɠɛɓo ɉuɔ, ɲɛ̨i piliɛ yələi, hvo kɛi nwumɛ̨ nu ta ɓa, ɉu mɛ̨nį kɛnɛ̨. 30 Ŋą́ nwɔ huɲąŋą kɛnɛ̨ kiliŋąhiɛ kɔ́lɔn gwəi, da nwɔ hvaa wolo-wolo, da gɛ mɛ̨nįɠaai ɲąą hvo mą; Ɲą́ą́ Yai-Laa nwóó li! 31 Yili mąą mɛ̨nį ɓa, gáá hvaai Moabə mɛ̨i, gáá nuą təlii Moabə lɔi kəlee ɓa, gáá wɔlɔi Kirə-Hɛrɛsə nuą mɛ̨i. 32 Gáá wɔlɔi ə́ mɛ̨i dɛɛ Yazerə nwɛi ɓa, yɛ́i ɓaa Sivma nwɔ viɲə yɛa lɛlɛɛ. Yáá kpɔlɔ, ə́ kpɔlɔɠaa daa li kpɔ gboloyá pulu pələ, diɛ həli Yazerə ɓa. Gɛɛ kalamun aa too ə́ wɔ hihɛnŋaa ma mɛ̨i da ə́ wɔ lɔɔi. 33 Moabə, ə wɔ kwəinɛ̨ɛ̨ hu kɛnɛ̨i gaa ə́ yəi ɲɛa kɔ́ɔɠaa hu, viɲə yɛɛɠaa hu, gəlee kpɛɛ li. Nu huluun nwoo hva kɛa tɔɔ viɲə lɔɔɠaa pɛlii. 34 'Ka pa mą́ą́ kilɛ! Nwooɠaai tɔɔi Hɛsbɔn, di kaa kpɔ di mɛ̨n ɉii Eleale, di woo kaa həlii kpɔ Yasa, di kaa wɔlɔi Soarə, yɛ həli Horonaimə, Ɛglatə-Selisiya. Mąąhɔlɔɓo, ə mą kɛ Nimrimə ya aa kpala ɉu. 35 Yai-Laa woo ka, yɛ diɛ: «Nui lɔpee a haláá kulɔ ɲaɠaa kɔ́i, yɛ lansan kələn ɲaɠaa tii diɛ, Moabə lɔi hu, ŋą́ mąą nu kulɔ nɔi.» 36 Yili mąą mɛ̨nį ɓə gɛi, gɛ́ wɔlɔ la Moabə mɛ̨i, yɛ bələi ɓɔɔ hvɛɛ mun a wɔlɔ la ɓɔɔ hu. Gɛ́ wɔlɔ Kirə-Hɛrɛsə nuą mɛ̨i yɛ ɓɔɔ hvɛɛ mun. Di nwun na aa pili, ɉɛnŋaai di diɲɛ gee mɛ̨i mąą mɛ̨nį ɓa. 37 Yili mąą mɛ̨nį ɓa, daa di nwun gəlee kalaan, daa di kpɛlɛ kəlee pu, daa ɓɔwa pɔɔ kɛ di yee kəlee ɓa, ɓíi hɛlɛn ŋąą nu kəlee woɓə ɓa. 38 Moabə pɛlɛ́ kəlee mu, gwəli kəlee hu, wɔlɔ woo lɔ ɓə laa, diɛ kɛ mą: «Daa Moabə wolo yɛ kɔ́wɔ haɠa. Ɲą́ą́ Yai-Laa nwóó li!» 39 Ə́kə! Aa too. 'Ká tomą, káá mą: «Ə́kɛ! Moabə aa pu a nwumɛ̨, Moabə kwɛlɛ nuą kəlee kaa yɛ́lɛ́i mą.» Di hu aa pu diɛ mąą mɛ̨nį hu. 40 Yai-Laa woo ka, yɛ diɛ: «Gaa yɛ geelə a kɛi koon, aa goon bɛlɛ Moabə mɛ̨i.» 41 Daa Keriyotə hon, daa lɔ Mesadotə. Moabə kɔ́kulááɠaa lii aa kɛ di kwɛi yɛ yɛ̨ɛ̨nui kwəi nwąną kɛi a volói tii. 42 Daa Moabə huwolo, lɔi hvəli kɛa, mąąhɔlɔɓo, ə́ ə́ nwun dɛ, ə́ dɛɛ Yai-Laa ɓa. 43 Ɲɔw lɔwa da diŋɛ̨n daa lɛɛ a ka wɔ, Moabə nuą. Yai-Laa woo li. 44 Nui a pu ɲɔw tɔwɔ, a too lɔwai. Nui a kulɔ lɔwai, a too diŋɛ̨n ɉu. Gaa tii, gwɛlan mąąnɛ̨ɛ̨ ə nwoo hukulɔ la, mąą kwɛlan ga tii pai Moabə mɛ̨i. Yai-Laa woo li! 45 Nuąi pui, hviikpɛɛ, daa kpəla daa tɔɔ Hɛsbɔn nįnįn mu. Kɛlaa, nwɔ̨n aa kulɔ Hɛsbɔn, nwɔ̨n nən aa ɓɛla Sihɔn dɔɔ pɛlɛ́ mu. Gaa Moabə wəlii kwɛli kələn ɉii, yɛ woo ɲąnwąną nuą nwuɔ̨ kələn. 46 Lə mąąwɛli mɛ̨nį ɓəi aa laa yɛ́i, Moabə! Kemɔsə nwɔ nuą nwun aa lɛɛ ɉu, di kaa lii a ə́ lon ɉinąą kɔluwɔlaa hu, ə́ lonnii nɛ̨ąą diɛ li luwɔ pələi. 47 Kɛlaa, ɲɛnɛ̨ɛ̨ tɔwɔ pələ, gáá pai Moabə tɔɔi Ɲą́ą́ Yai-Laa nwóó li! Moabə nwɔ kiti kpɛlai ka. |