Ɉeremi 47 - Yálá laawoo hɛɓɛ (dc)

Mɛ̨nįi di mo yɛ hvilɛn na Filisti nuą diɛ ya ka

¹ Yai-Laa wooi həli Yálá kwəi mɛ̨nį hukulɔ mun Ɉeremi ɓa, yɛ hvilɛn na Filisti nuą diɛ, nąąlɔwai, Eziptə tɔɔmun hvo ni kɛ Gaza lɔi hon ni a kɔ́.

² Yai-Laa yɛ diɛ: Ɲáɠaa daa hvɛɛ ɲələi pələ, daa di mąą pənə a ya huluunŋaa; daa hiɛ nɔi da ɉu hɛnŋaa kəlee mɛ̨i, ə mą kɛ, da ɉu nu kanŋaa kəlee. Nuą kaa tomąi, nɔi nuą kəlee kaa nuą təlii diɛ.

³ Mąąhɔlɔɓo, di kaa nwɔ hooɠaa kɔ́wɔ mu tin mɛ̨n ɉii, da gɔ́ kɔ́ wotoloɠaa tii, da nwotolo kɔwɔɠaa hiɛ tin. Lon gaa nuą yee hu aa haa, di lonnii mąą mɛ̨nį niihɛlɛn hvo kpɛli kɛa diɛ

⁴ Volói ŋɛ̨i pai, Filisti nuą kəlee ɲąą yii mɛ̨nį ɓa, nu tɛitɛi kəlee da kpɔnmąą tɛɛ Tirə da Sidɔn di pɔ, di paa mɛ̨nį ɓa. Gaa tii, Yai-Laa kaa Filisti nuą kpɛɛi yɛnɛ̨ɛ̨, diɛi di kaa Kaftɔrə dínɉu gboloyá hąmąi di wɔ nu gbəliɠaa.

⁵ Daa Gaza nwun galaan, daa laa lɔ Askelɔn la. Ka káá lɛɛi a nu gbəli ka wɔ lɔi hu, ka mąą kaa pai lɛɛi a mɛlaa, əlɛɛɉu lə yələ?

⁶ Lə mɛ̨nį ɲąąnwąnąą ɓəi, Yai-Laa nwɔ ɓɔwai! Akɛti, hvįįtɔɔ hvo kɛa yɛ́? 'Lɔ ə́ taa hu, too ə́ kɔ́lɔi, ə́ liilaa.

⁷ A pɛli vįitɔɔi ləi? Hvo gaai, Yai-Laa ɓə dɔɔ kóló ɓa, yɛ li pɛlɛi Askelɔn da gboloyá kwɛlɛ lɔi diɛ; naa ɓə di nɛ ma.