Ɉeremi 43 - Yálá laawoo hɛɓɛ (dc)

¹ Ɉeremi kpɛɛ kɛa a nwoo laa kulaa nuą ɲɛ̨i ɓa, a Yai-Laa di wɔ Yálái, wooɠaai ɓoɔ, a yai Yai-Laa di wɔ Yálái ə mo mą, ə gəlee laa həli.

² Kɛlaa, Hosaya lon Azaria, Karea lon Yohanan, da dɛɠɛɓo ɉu nuąi tii kəlee, di Ɉeremi woo pulu pənə; diɛ mą: «Lɛɛ ka ŋɛ̨i ə́ kaa gɛi, Yai-Laa ku wɔ Yálá hvo ə́ tɔɔ li, yɛ kɛ ku hvo ku mąąkilɛ Eziptə.

³ Neriya lon Barukə ka tii ə́ ɲąątɔɔi kuɔ. Gaa bɔ ə ku tɛɛ Kalde nuą pɔ yiliɠaai diɛ ku paa, diɛ li a kuɔ Babilonə.»

⁴ Karea lon Yohanan mąn, gɔ́kulaa nwun nąmįną mąn, nu ta lɔpee hvo gɛ hvo nwəli tɔɔ Yai-Laa woo ɓa, yɛ kɛ di lɛɛ Ɉuda lɔi hu.

⁵ Karea lon Yohanan da gɔ́kulaa nwun nąmįnąi tii kəlee, di di laa tɛ Ɉuda nuą kpəlii kɛ yɛnɛ̨ɛ̨ di mu, nuąi tii kɛ daa pənə daa pa daa hee nɔi hu, nuąi tii kɛ di taɠa taɠaa di kwɛlɛ lɔiɠaa hu.

⁶ Da ɉinąą, nɛ̨ąą, nɛapɛlɛɛ, dɔɔ pɛlɛ́ mu nɛ̨ąą, da nuąi kpɔ tii dɔɔmun mąąkpɛ kɔ́kulááɠaa nwun nąmu Nebuzaradan ə di kalihvaɓo Gedaliasə ɓa, ə mą kɛ Ahikamə lon, Safan lon, ə mą kɛ Yálá kwəi mɛ̨nį hukulɔ mun Ɉeremi, da Neriya lon Barukə,

⁷ di di həɠə, dəli a diɛ Eziptə lɔi hu, dəli di hee Dafne, mąąhɔlɔɓo, di hvo gɛ di hvo di wəli tɔɔ Yai-Laa woo ɓa.

Ɉeremi ə Eziptə hon mɛ̨nį a kɔ́ lɛɛ tɔwɔ, ə ɉukulɔ

⁸ Yai-Laa woo ə həli Ɉeremi ɓa Dafne daai, yɛ mą:

⁹ «Kwɛni kpuwulu kpɛa-kpɛa həɠə, ə di loo Ɉuda nuą taɠaa ɲɛ̨i ɓa, bɔlɔ kɔ́w kulɔi tii tɔɔmun nwɔ pɛlɛ́i laaləi Dafne.

¹⁰ Yili pulu, yɛ diɛ: ‹Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka: Gáá wɛlɛɛ tɔɔi nwɔ́ tí mun Nabukodonosorə Babilonə tɔɔmun bulu, gáá nwɔ tɔɔ kpəlin hvilɛn ɉii, gwɛniɠaai ŋɛ̨i ə́ di lɔ ɓɛ di mɛ̨i, diɛ nwɔ tɔɔ wɛɛlɛi hɛlɛn mɛ̨i

¹¹ Gaa pai Eziptə lɔi kɛlɛi, nui haa pɛ̨ɛ̨ nwuɔ̨, ə lɛɛ haa yəi, nui luwɔlaa pɛ̨ɛ̨ nwuɔ̨, ə li luwɔlaa hu, nui ɓɔwa kwɛa pɛ̨ɛ̨ nwuɔ̨, ə lɛɛ ɓɔwa kwɛa yee kɔ́nma.

¹² Gaa pai nwɔ̨n bilii Eziptə yáláɠaa di mąąwiɛ pɛlɛ́ɠaa hu, yɛ ɲáláɠaa tii kələn; a wala kɛ tii, yɛ li a diɛ. Gaa pai Eziptə lɔi mąą hɛnŋaa kulɔi mą, yɛ bələi taatɛlɛɛ mɛ̨i kaamun a kala kulɔ la nwɔ həɠəi hu. Ɛlɛɛ gáá pai pənəi ə li a nwəli pulu laɠiɛ.

¹³ Gaa pai voló mąąnįnįnŋaa woloi Eziptə lɔi hu, ə Eziptə yáláɠaa mąąwiɛ pɛlɛ́ɠaa kələn.›»