Ɉeremi 42 - Yálá laawoo hɛɓɛ (dc)

Ɉuifəɠaa ka pui diɛ li Eziptə

¹ Nąąlɔwai, gɔ́kulaa nwun nąmįną, gəlee ə mą kɛ Karea lon Yohanan da Hosaya lon Azaria, da nɔi lonnii kəlee, gbɛa kpɛa mąn bɛlɛɛ mąn, di pa;

² diɛ Yálá kwəi mɛ̨nį hukulɔ mun Ɉeremi ɓa: «Kuɔ nɛ̨ɛ̨mąą hvə woo ə həli yɛ́. Yai-Laa ə́ wɔ Yálái hvɛli, ku kpəli woloi aa lɛɛ, ku mąą mɛ̨nį ɓa. Kwaa lɛɛ lɔ kɛa tɛitɛi; ya pa ku kpulu kɛnɛ̨ kɛ, gbaɠala kaa yɛ́.

³ Yai-Laa ə́ wɔ Yálái ə ku tənən dɔɔ, kwa gɛ pələ kɛ ləi?»

⁴ Yálá kwə́i mɛ̨nį hukulɔ mun Ɉeremi yɛ diɛ: «Ŋą́ą́ mɛ̨n, gáá ka mąą nɛ̨ɛ̨mąą hvəi Yai-Laa ka wɔ Yálái ɓa, yɛ bələi ka káá ɉu hvɛlii la mą́ą́. Bələi lɔpee Yai-Laa a ka woo pulu pənə la, ŋį́ ɉukulɔ kaa; va da loo gwə́i.»

⁵ Nąąlɔwai, diɛ Ɉeremi ɓa: «Yai-Laa kaa a kɛla haŋąą, dələnmoɔi. Wooi lɔpee gaa pai moi yɛ́, a ku mąą mɛ̨nį, bələ kpɔlɔ ɓə kwa gɛ la.

⁶ Ə lɛlɛ, ə ɲɔ̨nwɔ, kwa tí Yai-Laa woo ɓa, hvo gaai, kuɔ ɓə ə́ tɔɔ bɔ ku mąą mɛ̨nį ɓa. Bulu a lɛlɛ kuɔ, mąąhɔlɔɓo, ku kaa pai lɛɛi Yai-Laa ku wɔ Yálái woo mu.»

⁷ Hvóló pow kulaa ɉu, Yai-Laa woo ə həli Ɉeremi ɓa.

⁸ Ə Karea lon Yohanan təli, da gɔ́kulaa nwun nąmįnąi tii kɛ bɔi, da nɔi lonnii kəlee, gbɛa kpɛa da bɛlɛɛ-pɛlɛɛ;

⁹ yɛ diɛ: «Yai-Laa Israɛlə nwɔ Yálái woo ka káá ɓə dɔ́ɔ́ bɔ, gɛ́ ka wɔ nɛɛmąą hvə woo laa həli mą.

¹⁰ 'Ká hvaa mą ka lɛɛ nɔi ŋɛ̨i hu, ŋą́ ka tɔɔ, vá kɛa ka hukala, ŋą́ ka hin, vá kɛa ka kulɔ a ka nwun. Mɛ̨nį ɲąąnwąnąąi ŋą́ naa kaa, ŋą́ bɔ́ɔ́ŋą pɛli.

¹¹ Ka hvo kɛa ɲɔw Babilonə tɔɔmun ma. Yai tii ka mąą kpɛlin ɉii. Ka hvo kɛa ɲɔw mą, Yai-Laa woo li. Gáá ka pɔ, gɛ́ ka kulɔ mɛ̨nįi. Gɛ́ ka kulɔ ɲee mu.

¹² Ŋą́ gɛ ə ka mąąwɛli kaa. A ka mąąwɛli kaa yɛ ka lɛɛ ka wɔ lɔi hu.

¹³ Kɛlaa, ka kɛ diɛ: Ku hvó bɔ ku hvó lɛɛ nɔi ŋɛ̨i hu, kaa ka wəli kulɔ la tii Yai-Laa ka wɔ Yálái woo hu,

¹⁴ kaa kɛ diɛ; ku kaa lii Eziptə, ku hva kɛa pulu həɠə laa; nąą ɓə ku kaa bɔ kwəli ku hee laa;

¹⁵ ka gɛ tii, kaa ŋɛ̨i kaa lɛɛ a Ɉuda lɔi hu nuą gbəli, ka ka wəli tɔɔ Yai-Laa woo ɓa; Yai-Laa Mɛ̨nį Kəlee ŋą Hééɓomun, Israɛlə nwɔ Yálái woo ka: 'Ka Eziptə pələ hon, kaa li laa, ka ka mąą kilɛ laa.

¹⁶ Gɔ kɔ́ ɓɔwai tii ka káá ɲɔwii mą, a ka hon nąą Eziptə lɔi hu. Bului tii mąą liihɛlɛn gaa kaai, a kanąn kaa, ə mą kɛ Eziptə lɔi hu ɓə, ɛlɛɛ, ka haa la.

¹⁷ Nuąi kpɔ pai di ɲɛ̨i haŋąi Eziptə pələ, diɛ di mąą kilɛ laa, ɓɔwa kwɛa ɓə pai di paai, da pulu, ɛlɛɛ nu paa ɲɔ̨n. Mɛ̨nį ɲąąnwąnąąi gaa pai ɲɛɛi a di nwun, nu ta hva kulɔ ɉu, nu ta hva lɛɛ a vulú.

¹⁸ Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo li! Bələi lɔ nwɔ́ liiholi da nwɔ́ liikələn gwəi a ɓɛla la Ɉerusalɛmə nuą diɛ, bələ lɔ ɓə nwɔ́ liiholii kaa pai hee la ka hu, ɓɛlɔwai ka káá pai həlii la Eziptə lɔi hu. Da, nɛ̨ŋɛ̨n naa kɛ a ka laa, kaa mąą yɛ wɛli, diɛ ka lalan a lalan ɉuwui lɔpee, ka hva kɛa ka ɲɛ̨i tɔɔ nɔi ŋɛ̨i ɓa.

¹⁹ Kaai ŋɛ̨i a Ɉuda nuą gbəli; Yai-Laa yɛ kaa: 'Ká hvo li Eziptə. Ká ɲɛ̨i ɓa li, ŋą́ą́ mo káá, gɛ gwɛla ɉu háákələi.

²⁰ Ka wɔ yɛnɛ̨ɛ̨ ka tii ka káá mąą mɛ̨nį kɛi, kaa kpinįi ɓə dɔ́ɔ́ Yai-Laa ka wɔ Yálái pɔ, kaa kɛ mą́ą́: Ku mąą nɛɛmąą hvə Yai-Laa ku wɔ Yálái ɓa, mɛ̨nį Yai-Laa ku wɔ Yálái a mo, ə́ pənə ə́ mo kuɔ kpɔlɔ ɲą́ą́lee, kwa gɛ.

²¹ Ya ka ŋɛ̨i mɛ̨nįɠaai ə mo mą́ą́ a ka mąą mɛ̨nį, ka hvo ka wəli tɔɔi da ɓa.

²² Ka ka kili lɛɛ ɉu, káá diɛ ɓɔwa kwɛa kaa li ku paai, ɛlɛɛ, pulu da ɲɔ̨n. Ɓɛi tii ka káá bɔ ka li laa, ka ka mąą kilɛ laa.»