Ɉeremi 40 - Yálá laawoo hɛɓɛ (dc)

Ɉeremi ə hee Gedaliasə kɔ́wɔ mɛ̨i

¹ Ɓói dɔɔmun mąąkpɛ kɔ́kulááɠaa nwun nąmu Nebuzaradan ə mo Ɉeremi ɓa Rama daai, mąąhɔlɔɓo, ya ɓə ɲɛ̨i ə kɛ Ɉeremi ɓa, ɓɛlɔwai yili ə kɛ la yɛli ŋą, da mɛlaa gaho nąmįną diɛi kɛ a Ɉerusalɛmə da Ɉuda nuąi kɛi pa lii a diɛ Babilonə; Yai-Laa woo ə həli Ɉeremi ɓa.

² Dɔɔmun mąąkpɛ kɔ́kulááɠaa nwun nąmu ɓə Ɉeremi ə kɛ ɲəi. Yɛ Ɉeremi ɓa: «Yai-Laa ə́ wɔ Yálái ɓə mɔ̨nɔ̨i ŋɛ̨i mąą kili tee gwəi, yɛ hvilɛn na gɛɛnąąi ŋɛ̨i ɓa.

³ Yai-Laa ɓə naa ti mą. Ɛlɛɛ, ə gɛ yɛ bələi ə kɛ la gwəi. Ka ka hɔn gɛ a Yai-Laa, ka hvo ka wəli tɔɔ li nwoo ɓa, ya ɓə gɛ mɛ̨nįi ŋɛ̨i yɛ kɛ.

⁴ Kɛlaa, ə́ ɲɛ̨i hee, yiihu, háákələi, gáá ə́ wɔ yɔwɔnŋaai kulɔi ə yee ɓa, Yá kɛ ɓɔ, gwa yɛ́ gwəli Babilonə, pa ŋį́ ə́ mąą mɛ̨nį ɲɛ̨i kulɔ. Kɛlaa, gwa yɛ́ gu li mɛ̨nį Babilonə wɛli a wala kɛ yɛ́, hvó pa. Nɔi nąą kəlee kaa ə́ líila, ɓɛi lɔpee nąą a nɛ̨ɛ̨ yɛ́, lí laa.»

⁵ Yá wala kɛ bɔ hvo lɛɛ bɔ́, pənə ə́ li Gedaliasə pɔ, yii gaa a Ahikamə lon, ə ɓo a Safan wɔ lon, ya ɓə Babilonə tɔɔmun ə ɉee, yɛ ɲɛ̨i kɛ Ɉuda taaɠaa diɛ, lɛɛ bɔ ka nɔi hu nuą, a wala kɛ tii, li ɓɛi ə́ kaa bɔ ə́ li laa. Tɔɔmun mąąkpɛ kɔ́kulááɠaa nwun nąmu, ə kɔnɔ̨nŋaa tɛɛ Ɉeremi pɔ, da dɔɔ bələi hɛn, ə yələ wala too mą.

⁶ Ɉeremi ə li Mispa, Ahikamə lon Gedaliasə pɔ, ə lɛɛ bɔɔli da nuąi tii lɛɛ nɔi.

⁷ Gɔ́laɠa nwun nąmįnąi tii kɛ di taɠa taɠa nɔi hu, da di wɔ nuą di bələ mɛ̨n diɛ kɛ, Ahikamə lon Gedaliasə ɓə Babilonə tɔɔmun ə ɉee, yɛ ɲɛ̨i kɛ nɔi ɓa, ə mą kɛ ɉinąą, nɛ̨ąą da nɛapɛlɛɛ, ɛlɛɛ, nɔi hu nuą taɠaa, diɛi hɛn və di yəi, di hvo li li a diɛ Babilonə, di di kəlee di kalihvaɓo mą.

⁸ Yili ɓə gɛ nuą ŋɛ̨i diɛ pa Gedaliasə kaai Mispa, diɛ ɓaa kɛ: Netaniahu lon Yismaɛlə, da Karea lonnii Yohanan da Yonatan, Seraya Tanhumetə lon da Netofa mun Efayi lonnii, da Maaka mun lon Yezaniahu, nuąi tii da di yee pɔ nuą.

⁹ Ahikamə lon Gedaliasə yai kɛ a Safan lon, ə gwɛla diɛ, da di yee pɔ nuą, yɛ diɛ: 'Ka ká yee hee Kalde nuą mu, ka hvo ɲɔw, ka lɛɛ nɔi hu, ka lɛɛ Babilonə tɔɔmun woo mu, bulu a nɛ̨ɛ̨ káá.

¹⁰ Nwɛ́i, gáá ɓɛ Mispa, Kalde nuąi di kaa pai kɛ di tɛɛi ɓɛ, gɛ́ di mąą mɛ̨nį ɲɛ̨i kulɔ, ka wɛi ka ka wɔ kólóɠaa kɛ, káá nwulu ɓáɠaa kulɔ, káá nwulɔ kulɔ, káá ka kwɛlɛ hee, daaɠaai tii ka káá di hui, ka lɛɛ laa.

¹¹ Ə mą kɛ, Ɉuda nuąi Moabə lɔi hu, Amɔn nuą lɔwai Edɔmə da nɔi kəlee hu; di bələ mɛ̨n diɛ kɛ Babilonə tɔɔmun aa kɛ nuą lɛɛ Ɉuda lɔi hu; ɛlɛɛ, aa kɛ Ahikamə lon Gedaliasə, yai kɛ a Safan lon ɉee, yɛ ɲɛ̨i kɛ nɔi ɓa.

¹² Di həɠə ɓɛɠaai kpɔ kɛ di taɠa taɠaa laa, di pənə diɛ pa Ɉuda lɔi hu Gedaliasə pɔ Mispa. Di lɔɔ da wulu ɓáɠaa hɔlɔɓo kpɔ kɛnɛ̨.

Gedaliasə paa mɛ̨nį

¹³ Pai Karea lon Yohanan ə mo Mispa Gedaliasə pɔ, gɔ́kulaa nwun nąmįnąi kɛ di taɠa taɠa nɔi hu,

¹⁴ Di mo Gedaliasə ɓa, diɛ mą: «Hvó ɉu kɔ́lɔn yɛ́ kɛ: Amɔn nuą di wɔ tɔɔmun Baalisə ə Netania lon Yismaɛlə tí, ə́ paa mɛ̨nį ɓa?» Kɛlaa Ahikamə lon Gedaliasə hvo gaa a tɛ̨ą.

¹⁵ Yili ɓə gɛ, Karea lon Yohanan ə mo Gedaliasə ɓa loo pələi Mispa, yɛ mą: «Hvaa mą ŋį́ li ŋį́ Netania lon Yismaɛlə paa, nu ta hva gili kɔ́lɔn. Ə́ kaa mɔ̨ɔ̨ lɔ bɔ ə ə́ paa? Ɉuda nuąi kpɔ tii daa di ɲąąkpɔn ə kwɛlɛ, da lee lɛɛ di kpɔɔ ɓa, ɛlɛɛ, nu gbəlii aa lɛɛ Ɉuda lɔi hu, nwuna ə pili.»

¹⁶ Ahikamə lon Gedaliasə yɛ Karea lon Yohanan ɓa: «Hvo gɛ tii, lɛɛ ka tii ə́ kaa gɛi a Yismaɛlə laa.»