Ɉeremi 4 - Yálá laawoo hɛɓɛ (dc)Yai-Laa woo ka 1 Yai-Laa yɛ di: Israɛlə! Ya kɛ bɔ ə́ yali ə́ pului, ɲą́ą́ ɓə mąąnɛ̨ɛ̨ ə́ pa bɔ́. Akɛ, yá ə́ wɔ haliɠaai tii pili ɲɛ̨́i hvo kɛa tɔɔ mą́ą́, hvo kɛa pai həɠəi nííla a nwumɛ̨, yɛ́ ə́ loo mą́ą́. 2 Akɛ, yá ə́ woo kwɛlɛ mɛ̨nį ta hu a Yai-Laa, ə́ gɛ a tɛ̨ą, a tələnmoɔ laa, a ə́ kwəi kwɛlɛɛ; lɔiɠaa kaa pai lúwɔ́ tooi di kpɔɔ ɓa náá hu, diɛ di kpɔɔ mąątɛ̨nɛ̨ náá hu. 3 Yai-Laa woo ka, Ɉuda lɔi hu nuą da Ɉerusalɛmə nuą diɛ; yɛ diɛ: Ka pənə ka ka wɔ tííɠaa pɛli a nɛlɛɛ ka hvo hɛn da hin ɲąąlən ɉu. 4 Ka kɛ a Yai-Laa nwɔ kɛ́nɛ̨lɛa, kaai ɓaa Ɉuda lɔi hu nuą da Ɉerusalɛmə daai nuą, ka wala gɛ tii, nwɔ́ liiholi kaa pai ɓɛlai yɛ nwɔ̨n. Gaa pai kɛɛ kələn ɉii, nu ta hva pɛli nuwun ɉii. Ka kɛ mɛ̨nįɠaa ɲɔ̨nwɔ pələ ɓa. Gɔi həɠə ɲánwuɔ̨ pələ 5 Ka noloɓo Ɉuda lɔi hu! Ka Ɉerusalɛmə nuą kilaa pɔ̨nɔ̨! «Ka dulu hvɛɛ nɔi nąą kəlee ka tomą a ka woo kɛnɛ̨, kaa diɛ: ‹Ka pa-o! Ka ka ɲąąkpɔn daaɠaai hįi kaa diɛ ɉu!› 6 Ka huu pili nuą diɛ Siɔn pələ! Ka lí, ka ka mąą kilɛ! Ka hvo tɔɔ pələi nu ta hvo kɛ gaa lɛɛi ɉeei! Kpalo ka tii Yai-Laa aa ɉəɠə ɲanwuɔ̨ pələ, yɛ paa la, ə kə! Kɛɛ kala mɛ̨nį kɛnɛ̨!» 7 Yala aa kulɔ ɲəi gban mu, nɔiɠaa kalamun aa hvilɛn bələ ɓa, aa həɠə bɔɔli, yɛ pa kuɔ lɔi kala mɛ̨nį ɓa, di kaa pai kuɔ taaɠaa kələn ɉii diɛ naa lɛɛ a taa kpoloon. 8 Yili mąą mɛ̨nį ɓa, ka ɓíi haɠa too ka kwąną, ka mąąwɛli heeɓo; ka ka woo laa! Ka gboo təli! Mąąhɔlɔɓo, Yai-Laa nwɔ liiholi kɛnɛ̨i hvo həɠə li gu pulu. 9 Yai-Laa woo ka, yɛ diɛ: Ɲələi tii a həli! Tɔɔmun da nwɔ kalanɉonŋaai, liikpələ hva kɛ di yəi. Ɉaláá laa həli nuą hu a pu diɛ, Yálá kwəi mɛ̨nį hukulɔ nuą kwəi a pili diɛ. 10 Ya ɓə ŋį́ kɛ diɛ: «Ə́kə́! Hɛn Gəlee Nąmu Yálá! Akɛti, yáá kani nuą ŋɛ̨i ɓowo kɛnɛ̨-ee! Yáá Ɉerusalɛmə taa ɓowo, a ə́ woo kwɛlɛi ə́ mo mą, yɛ́ kɛ diɛ: ‹Ka kaa pai kɛi ka nɛɛ hu,› ya ɓə kɔ́ kɔ́ ɓɔwa kaa ku kwąnąai!» Gɛɛ kala nuą daa kulɔ pələ kəlee 11 Maa hvólói tii, di kaa pai kɛi nuą ŋɛ̨i da Ɉerusalɛmə diɛ: «Hvaŋą kələnŋąą kaa bələ ɓa yɛ pa nwɔ́ nuąi pɔ, yɛ həɠə nɔi pun ɉu pələ. Hvó ɓaa hvaŋą holɛɛ yii da mɔ̨nun vɛɛ la. 12 Hvaŋą huwalawalaa ɓə ŋį́ dɔɔ yɛ pa, ɲą́ą́ gbɛli mąn nwɔ́ yələ aa ɉəli, ə gɛ ŋį́ di kiti tee.» 13 Kaa ɲɛ̨i hee tai ku yowo ɓa! Gaa pai yɛ hvaŋą a hee tulɔ kpinįn ɉu; ku yowo nwɔ kɔ́ kɔ́ wotoloɠaai kaa yɛ tulɔ hvaŋą. Nwɔ hooɠaa mąąhulaa di tɛɛ kuwɔ ɓa. Ə́ kə néé! Ku nwun na piliɛ li-ee! 14 Ɉerusalɛmə taa! Akɛ ə́ kaa bɔ ə́ nwun ə kulɔ ɉui, ə́ lii hu mąąhəɠə, ə́ mɛ̨nį ɲɔ̨n gulɔ laa! Akɛ tii, kiliŋąhiɛ ɲɔ̨nŋaa tii di kaa pai lɛɛ heeni ə́ lii hu hąą mįnɛ̨ lɔwai? 15 Ə́ wə́li tɔɔ tai, di kaa loloɓoi yɛ həɠə Dan huwuhu, di kaa mɛ̨nį ɲąąnwąnąą pa mɛ̨nį hukulɔi, yɛ həɠə Ɛfraimə yee ɓa. 16 Ka nuą kiliŋą pono, ka Ɉerusalɛmə taa kiliŋą pono gɔ too nuą daa lɛɠɛ ɓɛ. Daa həɠə kwɛala lɔi hu, di kaa kɔ́ ɉələ kɛi, diɛ tomą a kɔ́ mɛ̨i woo Ɉuda taɠaa mɛ̨i. 17 Di kaa yɛ tíi mąąkpɛ nuą, daa Ɉerusalɛmə taa mąątinɛn, diɛ həɠə pələ kəlee pɔ, mąąhɔlɔɓo, aa kulɔ nwóó mu. Ɲą́ą́ Yai-Laa nwóó li. 18 Ɉerusalɛmə taa! Yá gaa yili kaa laai yɛ́, ə́ kulɔ ə́ túwɔ́ pələ da ə́ kɛ mɛ̨nįɠaa hu. Gbaloi tii aa ɓɛla yɛ́, yɛ́ ɉu mɔ̨nɔ̨ mį́i. Ə́ wɔ lii ɲɔ̨n gwəi laa mąą mɛ̨nį ɓə. Mɛ̨nį nwąnąą tii a ɲɔ̨n bɛlɛ Ɉerusalɛmə ɓa 19 Ə́kə́ Níí! Ə́kə́ níí kaa kpəlaan ɉii gwə́i mɔ̨nɔ̨i gáá mįi mąą mɛ̨nį ɓa. Níí yɛ kulɔ mą́ą́, gwəi aa kɛ tukpu-tukpu, vá pɛli náá pilɛi, mąąhɔlɔɓo, ŋą́ą́ gɔ́ tulu woo mɛ̨n, ŋą́ą́ gɔ́ mɛ̨i woo mɛ̨n aa too nwə́lii. 20 Di kaa kɛi diɛ: «Kɛɛ kala mɛ̨nį ɓə-o, kɛɛ kala mɛ̨nį ɓə-o.» Nɔi kəlee aa lɛɛ a lɔi pun. Daa nwɔ́ pɛlɛ́ɠaa pu lɔ tɔ̨nɔ̨, kpulú! Daa ku nwun mąąkilɛi lɛɛ a hvea ŋą. 21 Ka mɛ̨i huu woo kaa pai lɛɛi tɔɔ nwəlii ə lɛɛ la mįnɛ̨ lɔwai? Ya ka, gáá lɔ nuą təli tulu woo mɛ̨n ɉii. Mɛ̨nįi Yálá kwəi yɛ hvilɛn na nwɔ nuą diɛ 22 A tɛ̨ą, nwɔ́ nuąi kili hvo di kwəi! Di hvo kpɛli gɔ́lɔn. Di hva mɛ̨nį kpaɠala kaa. Di yɛlɛɛi mɛ̨nį ɲɔ̨n gɛi, di hva pɛli nɛlɛɛ kɛi. 23 Ŋą́ ɲɛ̨i hee lɔi mɛ̨i, ŋį́ yələi kaa, kɛɛ pɔ̨nɔ̨ hvo laa. 24 Ŋą́ ɲɛ̨i hee ɲeeɠaa diɛ; di kaa kpɛli ɉii. Ɲee kpu kpuɠaa kəlee diɛ gɛ ɉuwu-ɉuwu. 25 Ŋą́ ɲɛ̨́i hee, və́ nui lɔpee ta kaa, nwɛ̨nįɠaa kəlee daa pu. 26 Ŋą́ ɲɛ̨i hee, nɔi kɛ a wali lɔi, aa lɛɛ a hvaŋą da gbalə lɔi. Daaɠaa kəlee daa wolo, Yai-Laa kɛ mɛ̨nį li; níiholi pələ ɓa. 27 Yai-Laa woo ka, yɛ diɛ: Gáá nɔi kəlee kalai. Kɛlaa, ə mą kɛ tii, gáá ɲéé pulu lɛɛi naa ta. 28 Yili mɛ̨nį ɓə nɔi kaa mąąwɛli hee ɓoi la; yələ kwəi yɛ kpinį, mąąhɔlɔɓo, mɛ̨nįi ŋą kili tee gwə́i, ŋą́ą́ mo; və́ pai ɉəgəi mą. 29 Daa lee hu nuą da pa: ɉooɠaa da gilɛn bili nuą tin mɛ̨n ɉii, di kəlee di kaa pai tɛɛi a gilɛ; diɛ lɔ gbomoɠaa hu; diɛ tɛ kwɛniɠaa ɓa; nuą daa kulɔ daa kəlee hu, nui lɔpee ta hvo lɛɛ li daai. 30 Ə lɛɛ yɛ́i ɓaa Ɉerusalɛmə taa, lə ɓə ə́ kaa pai gɛi? Hɛli həɠə ɓə ŋɛ̨i ə́ kaa gɛi yɛ́i? Ə́ kaa mɔ̨ɔ̨ pai ə́ mąą yilii a hɛni? Ə́ kaa mɔ̨ɔ̨ pai pəna laa ə́ ɲɛ̨i? Kpɛli ka tii ə́ kaa gɛi, yɛ́ lɛlɛ kwɛli. Yɛ́ wɛliɠaa daa tɛɠɛɓo ə́ hu, ə́ paa mɛ̨nį ɓə kɛa di kaa la ə́ pulu. 31 Gaa yɛ ŋį́ kɛi kwəi kwąną kɛ Nɛ̨ɛ̨nu woolaa woo mɛ̨n; wɔlɔ woo yɛ tɔɔ yɛ, Nɛ̨ɛ̨nu aa kɛi gbəla lon gaa. Siɔn taa ɲiŋɛ woo ka tii, yɛ ɲee hanŋa, yɛ kɛ diɛ: «Ə́kə́ kpalo aa gáá-ee! Ɉáá hiɛ ka nu paa nuą ŋɛ̨i yee mu!» |