Ɉeremi 33 - Yálá laawoo hɛɓɛ (dc)Di kaa pai daaɠaa puɔi a nįnɛ̨ 1 Yai-Laa woo ə həli nwɔ̨nɔ̨ Ɉeremi ɓa, ə ɓo kpɔlɔ ni gaho ŋą, dɔɔ kwəli mąąkpɛɛ nuą yəi gwəlii. 2 Yálái, yai hɛn gəlee pɛli, yɛ ɉee tin, naa ɓaa a Yai-Laa, nwoo ka, yɛ diɛ: 3 «Vɛ́li, ŋą́ ə́ woo mu hon, gáá pai mɛ̨nį kpɛa kpɛa kulɔi pɔ̨nɔ̨ŋa ə́ ɲɛ̨i ɓa, a mɛ̨nįɠaai di looɔ, yiiɠaai hvo gɔlɔn. 4 A tɛ̨ą, Yai-Laa Israɛlə nwɔ Yálái woo li, yɛ hvilɛn na daai ŋɛ̨i hu pɛlɛ́ɠaa diɛ da Ɉuda tɔɔɓɛlaa di wɔ pɛlɛ́ɠaai, diɛɠaai di puɔ a daa hvaną lɔwa pɔɔ da kɔ́ kɔ́ ɓɔwa. 5 Di kaa pai gɔ́ woloi ŋą da Kalde nuą, kɛlaa yaamun, daai ŋɛ̨i laahvɛɛ mɛ̨nį lɔ ɓə a nu powa, a nuąi gáá pai di kɛlɛi nwɔ́ liiholii hu, da nwɔ́ liikələn gwəi hu. Mąąhɔlɔɓo, ŋą́ą́ búlu tinɛ̨n diɛ, di wɔ nɛ̨ŋɛ̨nŋaai kəlee mąą mɛ̨nį ɓa. 6 «Kɛlaa, gáá di hali kɛ mɛ̨nį hu wəleen ɉii, da di ɓalo mɛ̨nį. Ŋą́ di ɓalo, gɛ́ nwun na nɛ̨ɛ̨ da liilaa mɛ̨inɛ̨ɛ̨ kɛ diɛ. 7 Gáá pai Israɛlə da Ɉuda di pui di nįnɛ̨ kɔ́lɔi. Ŋą́ di tɔɔ yɛ bələi di kɛ la tɔlɔɔ. 8 Mɛ̨nį ɲɔ̨nwɔ̨ɔ̨ɠaai kpɔ di gɛ mą́ą́ a di hɔn, gɛ́ gəlee waa diɛ. Nɛŋɛ̨nŋaai di ɉəɠə mą́ą́ a di hɔn, gɛ gəlee lɛɛ diɛ a kpɛli. 9 Náá lɛlɛɛ kaa pai tɛi mɛ̨nįi tii hu, yɛ kɛ a ɲɛ̨́i pɔ̨nɔ̨ mɛ̨nį da gwə́inɛ̨ɛ̨ mɛ̨nį, ɓɛlɔwai yɛnɛ̨ɛ̨ lɔiɠaa kəlee kaa pai bələ mɛ̨n ɉii la, diɛ kɛ ŋą́ą́ mɛ̨nįɠaai tii kɛ Ɉuda da Israɛlə diɛ. Di kaa pai di laa taɠai, diɛ ɲɔw, nwun na nɛ̨ɛ̨ kɛnɛ̨i da mɛ̨inɛ̨ɛ̨ kɛnɛ̨i gáá pai gɛi Ɉuda ɓa, di mąą mɛ̨nį ɓa.» 10 Yai-Laa woo ka, yɛ diɛ: Ka kaa kɛi diɛ: Gɛɛnąąi ŋɛ̨i kaa a lɔi pun. Nu hvo laa, taatɛlɛɛ hvo laa; Ɉuda taaɠaa hu da Ɉerusalɛmə kwəliɠaa hu. Nąą mąą aa wɛli; nu hvo laa, taatɛlɛɛ hvo laa. Di kaa nwɔ̨nɔ̨ pai, 11 kwəinɛ̨ɛ̨ wələɠaa mɛ̨n ɉii laa, da yɛlɛ wooɠaa, nɛ̨ą həɠə mun nwɔ wələ woo yɛ tɔɔ. Hilɛtai nɛ̨ɛ̨nu nwɔ mąną kaa tin yɛ tɔɔ. Nuąi pai a hɛɠɛɛɓo halááɠaa Mɛ̨nį Kəlee ŋą Hééɓomun Yai-Laa yəi bɛlɛ́n, di wɔ hvɛ́li woo yɛ tɔɔ laa, diɛ kɛ mą: 'Ká Yai-Laa Kɔlaɠa Nwun Ną́mu laa too a wələ, mąąhɔlɔɓo, nwɔ mɛ̨nį lɛlɛɛi, nwɔ wɛlikɛmąąlaa ɲɛ̨n deei hvo mą. «A tɛ̨ą, ŋą́ pənə ŋą́ nɔi ŋɛ̨i tɔɔ, ə pənə ə kɛ yɛ bələi ə kɛ la tɔlɔɔ. Ɲą́ą́ Yai-Laa nwoo li.» 12 Yai-Laa Mɛ̨nį Kəlee ŋą Hééɓomun nwoo ka, yɛ diɛ: «Ɉuda taaɠaa kəlee hu, da gɛɛnąąi ŋɛ̨i a lɔi pun, nu hvo laa, taatɛlɛɛ hvo laa; taatɛlɛɛ kwənąŋaa kaa nwɔ̨nɔ̨ kɛi laa. Daatɛlɛɛ mɛ̨i kaa nuą diɛ di wɔ ɓɛlaaɠaai pɛlɛ laa. 13 Ɲee hu taaɠaa, da nɛ̨ŋɛ̨ hu taaɠaa, da ɉɛɠɛɛ pələ taaɠaa, Bɛnɉamɛn nwɔ lɔi hu, Ɉerusalɛmə kwɛlɛɠaa da Ɉuda lɔi taaɠaa hu. Ɓɛlaaɠaa kaa nwɔ̨nɔ̨ pai kɛi laa, diɛ tɛɛ, diɛ di lono. Ɲą́ą́ Yai-Laa nwoo li.» Dɔɔlaa kaa pai lɛi Davidə ɲəi bɛlɛ́n 14 Yai-Laa yɛ diɛ: «Hvolóɠaa kaa pai pai, mɛ̨nįi ŋą́ naakwɛlanmo Israɛlə nwɔ pɛlɛ́i ɓa da Ɉuda nwɔ pɛlɛ́i, gɛ́ bɔ mɛ̨nį kɛ. 15 Vólói tii ɉəli, ɲələi kpɔ kpɔɔ a ɉəli kpɔlɔɔ mą, gáá pai tələnmo lon da tɛɛi Davidə pɔ, yɛ tɛ̨ą da tələnmolaa di mąąkɔ̨nwɔ̨ nɔi hu. 16 A mąą yələi tii, Ɉuda nwun mąą kaa pai ɓoi, Ɉerusalɛmə yɛ nwɔ yɛnɛ̨ɛ̨ kɛ liilaa hu. Naai di kaa pai kɛi dəlii la, ya ka, di kaa pai kɛi mą: ‹Yai-Laa kaa a gu wɔ tələnmolaa.›» 17 Yai-Laa woo ka, yɛ diɛ: «Davidə huwu hu, nu hvo pai kpɛɛi laa yɛ hee Israɛlə nwɔ pɛlɛ́i dɔɔ kpəlin ɉu. 18 Lévi huwu hu haláá laa həli mun və pai kpɛɛi laa, yɛ tɔɔ nííla, yɛ haláái da gəlee kələn, nulu tɛ; yɛ gɔ́ hɛnŋaa kələn. Yɛ ɉalááɠaa kulɔ a yələ kəlee.» Mįnɛ̨i ɲali bulu hvo mą 19 Yai-Laa ə hvaa nwɔ̨nɔ̨ Ɉeremi pɔ, yɛ mą: 20 «Yai-Laa woo ka, yɛ diɛ: Akɛ, ka yee a pɛli mą, ka ku lɔwai mįnɛ̨ hu kala; kwa yələ ɓɔɔ da kpinį, yələ ɓɔɔ da kpinį di hva kɛa pɛli pai a di pai lɔwai, 21 akɛti, mįnɛ̨i kwa nwɔ́ tí mun Davidə ku ɉəɠə, ɉu a kala; ɉuwu ta hva kɛa pɛli kɛi a tɔɔmun, ə ɓo heeni nwɔ tɔɔkpəlin hu. A kɛ lɔ nwɔ̨nɔ̨ tii a mįnɛ̨i ku ɉəɠə kwa Lévi lonnii, diɛi tii a nwɔ́ tínuą ɉaláá kulɔ mɛ̨nį hu. 22 Bələi lɔ nu hva pɛli yələkɔlɔn ɉu kɔlaɠa lonoi la, bələi lɔ gboloyá kwɛlɛ ɲɛa kaa la, lono hvo mą, bələ lɔ ɓə gáá pai nwɔ́ tii mun Davidə huwu tamai la, da Lévi lonnii a nwɔ́ kóló kɛ nuą.» 23 Yai-Laa ə mɛ̨nį ɓo Ɉeremi ɓa, yɛ mą: Ə́ kaa nąą kaai! 24 «Gaa nuąi ŋɛ̨i kwəi diɛ kɛ, bɛlɛ hveelɛi ŋɛ̨i Yai-Laa ə ɉɛɠɛ ɉu, aa ɲee kulɔ di mu; yili ɓə gɛi diɛ nwɔ́ nu huwui hviiɓa, hvo kɛa a lɔi ɲąą mąą di ɲɛ̨i ɓa. 25 Ɲą́ą́ ŋɛ̨i kwa hvóló da ɲąnin kwaa mįnɛ̨ həɠə, gɛ́ yələkɔlɔn da lɔi di hee kpəlin na kɛ; gɛ́ di tí a di kɛ mɛ̨nį, ɲą́ą́ Yai-Laa nwóó li! 26 Ŋą́ mɔ̨ɔ̨ pɛli ɲéé kulɔi Ɉakɔbə da nwɔ́ tí mun Davidə di huwu mu? Ŋą́ mɔ̨ɔ̨ pɛli kpɛlai nuą həɠəi di lɔwai, diɛ Abrahamə, Isaakə da Ɉakɔbə di huwu ɲąą woo ɓo? Vá gɛ́ tii! Ŋą́ pənə ŋį́ di pu di nįnɛ̨ kɔ́lɔi, mąąhɔlɔɓo, di mąąwɛli kaa mą́ą́. Ŋą́ą́ Yai-Laa nwóó li.» |