Ɉeremi 28 - Yálá laawoo hɛɓɛ (dc)Ɉeremi da Hanania 1 Gwɛlan dɔ̨nɔ̨i tii Ɉuda tɔɔmun Sedesiasə nwɔ tɔɔlaai kɔ́wɔ tɔɔi lɔwai, gwɛlan nąąn nwɔ ɲąnin nɔɔlii naa, Yálá kwəi mɛ̨nį hukulɔ mun Hanania, Azurə lon yai həɠə Gabaɔn, ə mo mą́ą́ Yai-Laa yəi bɛlɛ́n, ɉaláá kulɔ nuą da nɔi lonnii kəlee ɲɛ̨i ɓa, yɛ mą́ą́: 2 «Yai-Laa Mɛ̨nį Kəlee ŋą Hééɓomun, Israɛlə nwɔ Yálái woo ka: Gáá Babilonə tɔɔmun nwɔ kponoi hu yalii, 3 gɛɛ kwɛlan veelɛ hvo tɛɛ kpɔlɔ ɲąąɓa. Yai-Laa nwɔ pɛlɛ́i mu hɛnŋaai Babilonə tɔɔmun ə di həɠə gɛɛnąąi ŋɛ̨i ɓa, yɛ li a diɛ Babilonə, ŋą pənə ŋą pa a gəlee, 4 ə makɛ Ɉuda tɔɔmun Yekonia Yoyakimə lon, da Ɉuda nuąi kpɔ də li a diɛ Babilonə, ŋą pənə ŋą pa a diɛ gɛɛnąąi ŋɛ̨i ɓa. Yai-Laa woo li, mąąhɔlɔɓo, gáá Babilonə tɔɔmun nwɔ kponoi hu yalii.» 5 Yálá kwəi mɛ̨nį hukulɔ mun Ɉeremi ə Hanania woo pulu pənə, ɉaláá kulɔ nuą da nɔi lonnii kəlee di ɲɛ̨i ɓa, di ɓo Yai-Laa yəi bɛlɛ́n yɛ mą: 6 «Mįįną lúwɔ́; Yai-Laa əgə tii wɛ! Mɛ̨nįɠaai kpɔ ŋɛ̨i ə́ di lɛɛ kwɛa la yɛ́ mo a Yai-Laa laa, ə gəlee kɛ-oo! Yálá hee pɛlɛ́ mu hɛnŋaa da nəɠiɠaa kəlee, ə di kulɔ Babilonə, ə pa a diɛ gɛɛnąąi ŋɛ̨i ɓa-oo! 7 Ə mą kɛ tii, ə́ wəli tɔɔ mɛ̨nįi gáá moi ə́ mąą mɛ̨nį hu, da nɔi lonnii kəle mąą mɛ̨nį ɓa; 8 Yálá kwəi mɛ̨nį hukulɔ nuąi di wɔ kólói kɛ, ɲą́ą́ gwa yɛ́ gu tɔwɔ, ə həɠə wɔlɔ-wɔlɔ ɓa, di mɛ̨nįɠaa ɓo yɛ hvilɛn lɔi tamąą da tɔɔlaa tamąą diɛ, di di lɛɛ kwɛa la, diɛ mo; kɔ́ mɛ̨nįɠaa, mąąwɛli mɛ̨nį, lɔi wolo ɲɔ̨n, mąą mɛ̨nį. 9 Kɛlaa Yálá kwəi mɛ̨nį hukulɔ mun da, a kɛi Yálá kwəi mɛ̨nį hukulɔ, yɛ liilaa mɛ̨nį lɛɛ kwɛaa la yɛ mo, hvo kɛ li mɛ̨nįi tii ə mo a nɛ̨ɛ̨mą, ya ɓə da Yálá kwəi mɛ̨nį hukulɔ mun tii kaa la a nui Yai-Laa ə dɔɔ kpɔ a neelee.» 10 Nąąlɔwai, Yálá kwəi mɛ̨nį hukulɔ mun Hanania, ə Yálá kwəi mɛ̨nį hukulɔ mun Ɉeremi kɔ́nma kponoi tii kulɔ, ə ɉu yali. 11 Yili pulu, Hanania ə mo nɔi lonnii kəlee ɲɛ̨i ɓa, yɛ diɛ: «Yai-Laa woo ka, yɛ diɛ: ‹Gɛɛ kwɛlan veelɛ hvo tɛɛ, kpɔlɔɔ ɲą́ą́lee, bələ ɓə gáá pai Babilonə tɔɔmun Nabukodonosorə nwɔ kpɔ̨nɔ̨i hu yalii la, gɛ́ ɉəɠə nɔi kəlee mɛ̨i!›» Yai-Laa kwəi mɛ̨nį hukulɔ mun Ɉeremi ə li! 12 Yii kɛa Yálá kwəi mɛ̨nį hukulɔ mun Hanania ə gbɔ̨nɔ̨i tii kɛ Ɉeremi ɓa ɉu yali; Yai-Laa yɛ Ɉeremi ɓa: 13 «Lí, yɛ Hanania ɓa: Yai-Laa woo ka, yɛ diɛ: ‹Wulu kpɔ̨nɔ̨ ka tii ə́ ɉu yali, ə́ kaa pai kwɛli kpɔ̨nɔ̨ kɛi a mąąhvalin.›» 14 Ɉeremi yɛ mą: «Hvó gaai, Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka, yɛ diɛ: ‹Kwɛli kpɔ̨nɔ̨ ɓə gáá lɔi kəlee tooi ŋą, diɛ lɛɛ Babilonə tɔɔmun Nabukodonosorə ye mu, di kaa pai tí mą, ə mą kɛ, lɔwɔ huwɔɠaa ɓə, gáá di lɛɛi ɲee kɔ́nma.›» 15 Nąąlɔwai, Yálá kwəi mɛ̨nį hukulɔ mun Ɉeremi yɛ Yálá kwəi mɛ̨nį hukulɔ mun Hanania ɓa: «Ə́ wəli tɔɔ Hanania, Yai-Laa hvə ə́ tɔɔ li, yɛ́ ɓə gɛi, nuą ŋɛ̨i diɛ di kpɔɔ ŋąąkolon a lɛɛ mɛ̨nįɠaa. 16 Ə həli kɛa yɛ́; Yai-Laa woo ka, yɛ diɛ: Gaa pai ə́ həɠəi nɔi ŋɛ̨i mɛ̨i, ə́ kaa pai haai gwɛlan ŋɛ̨i yee mu. Mąąhɔlɔɓo, yáá nuą kwɛli tee Yai-Laa ɓa.» 17 Yálá kwəi mɛ̨nį hukulɔ mun Hanania ə haa a gwɛlan nwɔ ɲąnin mɛ̨ihveelɛ lɔwai. |