Ɉeremi 27 - Yálá laawoo hɛɓɛ (dc)

Babilonə tɔɔmun nwɔ tiɛ̨i

¹ Ɉuda tɔɔmun Sedesiasə Ɉosiasə lon nwɔ tɔɔlaa kɔ́wɔ tɔɔi lɔwai, nwooi ŋɛ̨i ə həɠə Yai-Laa pɔ yɛ həli Ɉeremi ɓa, yɛ mą:

² «Yɛli kwɛli da kwɛi, ə́ kwɛi yiliɠaa kɛ, ə́ da laa ə́ nwuɔ̨,

³ ə́ da tɛɛ Edɔmə tɔɔmun da Moabə tɔɔmun ma, Amɔn lonnii di wɔ tɔɔmun, Tirə tɔɔmun, da Sidɔn tɔɔmun; di wɔ kɛlaɠaai tii pa Ɉerusalɛmə, Ɉuda tɔɔmun Sedesiasə pɔ ə́ dɛɛ di pɔ dəli la.

⁴ Nwɛlɛɛi ŋɛ̨i ɓo diɛ, da li di mo nwun nąmįną diɛ, diɛ diɛ: Yai-Laa Mɛ̨nį Kəlee ŋą Hééɓomun, Israɛlə tɔɔmun nwoo ka.

⁵ Ɲą́ą́ ɓə lɔi pɛli, da nu kanŋaa, ə mą kɛ, huwɔɠaai lɔi mɛ̨i, a nwɔ́ yee walawala laa da váŋa, nui a nɛ̨ɛ̨ mą́ą́, ya ɓə ŋą́ dɛɛ bɔ.

⁶ Yii hu, ɲą́ą́ ɓə nɔiɠaai tii kəlee too nwɔ́ tímun Babilonə tɔɔmun Nabukodonosorə yee kɔ́nma, ə mą kɛ, nɔwɔ huwɔɠaa ɓə, gáá di tɛɛi bɔ, diɛ tí

⁷ Lɔiɠaa kəlee kaa pa tí mą, yaa da non, da non nwɔ lon; yili pulu nwɔ lɔi yaa kpɛli, nwɔ yələ a pa həlii, lɔi tamąą da tɔɔɓɛlaa huwalawalaaɠaa diɛ hee mɛ̨i.

⁸ «Yai-Laa woo ka: Akɛ lɔi ta a wala kɛ tii tɔɔlaa ta, a lənə nɛɛ mɛ̨nį ɓa Babilonə tɔɔmun Nabukodonosorə yeemu, a wala nwun nɔ Babilonə tɔɔmun nwɔ tiŋɛi mu, ŋą́ múhəɠə mąą lɔi laa ɓa, a ɓɔwa kwɛa da pulu, ə mą kɛ, ɲɔ̨n, ə lɛɛ ɉu, ŋą́ di huwu pu a ɲee.

⁹ «A kɛ tii, ka hvo ka wəli tɔɔ ka wɔ mɛ̨nį ɓoɔ gɛɛ tɔwɔ nuą woo ɓa, da ka wɔ tɔli kpɛ nuą, da ka wɔ hįi woo hukulɔ nuą da ka wɔ ɲɛ̨ąkpɛ nuą, da gwɛlɛɛn gɛ nuą diɛ, diɛi tii kɛi kaa: 'Ká hvo pai lɛɛi Babilonə tɔɔmun yee mu.

¹⁰ Lɛɛ ka tii di kaa gɛi káá; Di káá ka mąą kwɛai ka wɔ lɔi ɓa. Gáá pai ka taɠa taɠai, káá haa.

¹¹ «Kɛlaa lɔi pai hvaai mą, yɛ nwun nɔ Babilonə tɔɔmun nwɔ tiɛ̨i mu yɛ tí mą, gaa pai nɛɛi a nwəli pulu laɠiɛ nwɔ lɔi hu, yɛ kóló kɛ mą. Yɛ hee mɛ̨i; Yai-Laa woo li.»

¹² Ɉuda tɔɔmun Sedesiasə nwɛi, mɛ̨nįi gáá moi mą, ya ka: «Ka ka nwun nɔ Babilonə tɔɔmun nwɔ tiŋɛi mu, ka tí mą, yaa da nwɔ lɔi əgɛ ka lɛɛ yɛnɛ̨ɛ̨.

¹³ Lə mɛ̨nį ɓa yai, yɛ́ ká ə́ wɔ nuąi ka káá pai haai a ɓɔwa kwɛaa da pulu, da ɲɔ̨n? Yɛ bələi Yai-Laa ə gili tee la gwəi, yɛ hvilɛn na lɔi lɔpee hvo bɔ hvo lɛɛ Babilonə tɔɔmun yee mu, mą.

¹⁴ 'Ká hvo ka wəli tɔɔ ka wɔ Yálá kwəi mɛ̨nį hukulɔ nuą tii woo ɓa: diɛi di kaa kɛi káá: 'Ká hvo pai kɛi Babilonə tɔɔmun yee mu. Lɛɛ woo ka tii di kaa moi kaa a náá.

¹⁵ Yai-Laa yɛi: ‹Ɲą́ą́ hvəi di tɛɛ li, mɛ̨nįi di kaa moi a náá, lɛɛ li. Yili mąą mɛ̨nį ɓa, gáá pai ka taɠa taɠai, ɛlɛɛ, káá haa, káá mąn, da nuąi mąn, ká wɔ Yálá kwəi mɛ̨nį hukulɔ nuąi lɛɛ kɛ káá.›»

¹⁶ Gáá moi ɉaláá laa həli nuą diɛ da nɔi lonnii, Yai-Laa woo ka, yɛ: «Yálá kwəi mɛ̨nį hukulɔ nuąi mɛ̨nį ɓoi kaa a náá, diɛ kɛ di kaa pai həɠəi a ɉu kpua Babilonə, a Yai-Laa nwɔ pɛlɛ́i mu hɛnŋaa, diɛ pənə diɛ pa a diɛ, ka hvo ka wəli tɔɔ di woo ɓa. Lɛɛ woo ka tii di kaa moi a náá.

¹⁷ 'Ká hvo ka wəli tɔɔ di woo ɓa, ka tí Babilonə tɔɔmun ma, əgɛ, ka lɛɛ yɛnɛ̨ɛ̨, Ka káá bɔ daai ŋɛ̨i, ə kɛ a taa kpoloon lə mɛ̨nį ɓa?»

¹⁸ Akɛ mɛ̨nį ɓoɔ gɛɛ tɔwɔ kɛ nuą ɓaa diɛ, akɛ Yai-Laa woo kaa di yəi, mąąnɛ̨ɛ̨ kani di Yai-Laa Mɛ̨nį Kəlee ŋą Hééɓomun mąąnɛ̨ɛ̨, ɉɛn ɲąŋąɠaai ŋɛ̨i Yálá hee pɛlɛ́ mu da tɔɔmun ɲəi bɛlɛ́n, da Ɉerusalɛmə, di hvo li a da Babilonə.

¹⁹ Maahɔlɔɓo, Yai-Laa Mɛ̨nį Kəlee ŋą Hééɓomun, Israɛlə nwɔ Yálá nwoo ka: Yɛ hvilɛn na bɛlɛ́ hɔlɔɔnŋaa diɛ, da gboloyá tea da ɉɛn tii mįnɛ̨ kəhi hvilɛn ŋąą mɛ̨i, da ɉɛn ɲąŋą takpɛliɠaai Ɉerusalɛmə daai.

²⁰ Ɉɛnŋaai kpɔ Nabukodonosorə Babilonə tɔɔmun hvo di həɠə Ɉerusalɛmə, yɛ li a diɛ Babilonə, ɓɛlɔwai ə li la a Ɉuda tɔɔmun Yoyakimə lon Yekonia luwɔlaa hu, da Ɉuda ə lɛɛ da Ɉerusalɛmə nu kpɛa kpɛaɠaa kəlee.

²¹ Yai-Laa Mɛ̨nį Kəlee ŋą Hééɓomun, Israɛlə nwɔ Yálá nwoo ka; yɛ hvilɛn na ɉɛn ɲąŋąɠaai kpɔ da lɛɛ Yálá hee pɛlɛ́ mu, da dɔɔ pɛlɛ́ mu da Ɉerusalɛmə daai diɛ.

²² «Di kaa pai lii a diɛ Babilonə diɛ lɛɛ laa, ɛlɛɛ ɉu ɲą́ą́ gbį́nįi ŋą́ di mąą mɛ̨nį ɲɛ̨i kulɔ, ɲələi tii ɓə ŋą́ di həɠə la laa gɛ́ pənə gɛ́ pa a diɛ gɛɛnąąi ŋɛ̨i ɓa.»