Ɉeremi 18 - Yálá laawoo hɛɓɛ (dc)Ɉeremi ə li ləɠi tɔɔ mun da pɔɔli 1 Yai-Laa wooi həli Ɉeremi ɓa, ya ka, yɛ mą: 2 «'Li kpɔlɔɔ yiihu, nəɠi tɔɔmun bɔɔli, nąą ɓə gáá pai mɛ̨nį ta ɓoi laa yɛ́.» 3 Ŋą́ li nəɠi tɔɔ mun bɔɔli, yili yɛ ləɠi ta tɔɔ. 4 Nəɠi tɔɔmun a lɛɛ kɛ hɛn da pɛlii a nəɠi pɔlɔ, ɲee pɔɔ a kala, ɉɛn ə kɛi bɛli a wala kɛ a nɛlɛɛ, a daɠa, yɛ dakpɛli pɛli yɛ bələi ɲɛlɛ kaa la ɲəi. 5 Nąąlɔwai, Yai-Laa ə mɛ̨nį ɓo mą́ą́, yɛ mą́ą́: 6 «Akɛti, kaa ŋɛ̨i a Israɛlə nuą, vá mɔ̨ɔ̨ pɛli ka hon bələ kɛi yɛ bələi nəɠi tɔɔ mun ŋɛ̨i kaa gɛi la? Ɲą́ą́ Yai-Laa nwóó li! Israɛlə lonnii, ka káá ɲə́ə́ ŋą yɛ bələi lɔ ləɠi tɔɔ mun nwɔ ləɠi pɔlɔ kaa la ɲəi. 7 Akɛ ŋą́ naa gwə́i a yələ ta, gɛ́ kɛ gáá tɔɔmun da nwɔ lɔi hu kalai, ŋą́ pɛli mą, ŋą́ bu, ŋą́ ɉu kala. 8 Kɛlaa lɔi yii a túwɔ́ pələ ɲɔ̨n gɛ, ə nwɔ́ liiɲąnwąną muhəɠə, nɔi tii a bulú tɔɔ ɉɔn ma, mɛ̨nįi ŋą kɛi pa naai mą, ŋą ɉəɠə mą. 9 Yələ takpɛli, ŋą pɛli ŋą naa gwə́i, gɛ́ lɔi, awala kɛti, tɔɔi ŋą́ ɉee, ŋą́ gɔwɔ hvilɛn kpɔ tin-tin. 10 Kɛlaa da wala di wəli tɔɔ nwóó ɓa, mɛ̨nį ɲɔ̨n nwɛli hvo mą́ą́ diɛ di yee too ɉu, mɛ̨inɛ̨ɛ̨ ŋą́ kɛi pa gɛi diɛ, ŋą́ ɲali bulu.» 11 'Li kɛa yiihu, yɛ́ Ɉuda da Ɉerusalɛmə nuą diɛ: «Yai-Laa yɛ: ‹Gáá mɛ̨nį ɲąąnwąnąą pɛlii, gɛ́ pa naai kaa, ŋą́ą́ kili tee gwə́i. Nu kəlee ə bulu tinɛ̨n nwɔ túwɔ́ pələ ɲɔ̨n ma.›» 12 Kɛlaa ka káá pai kɛi diɛ: «Pɛli mąą hvo ɉu, ku kaa hiɛi yɛ bələi ku kwəi kili kaa la. Ku kaa kanąn ku wɔ lii pɔ ɲɔ̨nŋaa diɛ.» Israɛlə aa lɛ̨ą Nąmu ɓa 13 Yili ɓə gaa mą, Yai-Laa woo ka, yɛ diɛ: Yii gaa tii, kɛɛ mąąni kɛ lɔiɠaa hu, kaa ta mɛ̨nį taaləi tii ta bələ mɛ̨n? Israɛlə nɛ̨ɛ̨gbɛla aa kɛɛ kala túwɔ́ ɓo. 14 Ɲái a kulɔ Liban yee hu, yɛ tɛɛ kwɛniɠaa mɛ̨i lɔwɔi, da mɔ̨ɔ̨ nɛɛ laa? Yai a həɠə kwɛa la, a tɛɛyá naɠiɛ lon lon, da mɔ̨ɔ̨ bili? Kpaa-o! 15 Kɛlaa yaamun, nwɔ́ nuąi di wɛi, daa lɛ̨ą mą́ą́, diɛ haláá kulɔ ɉɛnŋaai di hvo a hɛn da diɛ. Daa lan di wɔ pələɠaai ɓa, diɛ ɉon a pələ puɔɠaa. 16 Di kaa pai gɛi di wɔ lɔi ə lɛɛ a lɔi pun. Diɛ yɛlɛ diɛ a yələ kəlee, Nui lɔpee pai tɛɛi laa, gwəi kaa pai pilii mą, Yɛ nwun gbɛŋɛn. 17 Gáá pai di taɠai di yowoɠaa tɔwɔ yɛ hvaŋą, di wɔ mɔ̨nɔ̨ mį́i yələ, gɔ́n bulu ɓə di kaa pai gaai, ɲɛ̨ilaa loɔ diɛ. Nuą di kili Ɉeremi ɓa 18 Nuą di kɛ laa diɛ kɛ diɛ: «Ka gu gilima həɠə Ɉeremi ɓa, gu hvo pai hvɛɠɛi a gu mąą kwɛli mun, a gu liɛwoo ɓomun, a Yálá kwəi mɛ̨nį hukulɔ mun. Ka gwəli gu mɛlɛtoo a naa kala pələ, gu hvo gu wəli tɔɔ nwoo ɓa.» 19 Yai-Laa, ə́ wəli tɔɔ di woo ɓa, Nuąi ɓaɠa ɓoi mą́ą́, di woo mɛ̨n. 20 Da mɔ̨ɔ̨ mɛ̨nį lɛlɛɛ pɔɔ kulɔ a mɛ̨nį ɲɔ̨nwɔ̨ɔ̨? Di kaa mą́ą́ tinɛ̨n ɉii a hɛlɛn, bələi ŋą́ą́ tɔɔla ə́ ɲɛ̨i ɓa, nąą kili ə too ə́ ŋą. Gɛ́ ə́ hvɛli di mąą mɛ̨nį ɓa, gɛ́ ə́ wɔ líiɲąnwąną mąą kwɛa diɛ. 21 Yili ɓa, di lonnii lɛɛ pulu yee kɔ́nma, di lɔ kɔ́ kɔ́ ɓɔwa ŋą. Di nɛ̨ąni di lɛɛ a lon nwɛli da hilɛ wɛli. Di hilɛni di haa ɲɔ̨n ɲəi, di lon ɉilɛlɛa di lɛɛ kɔ́ hu. 22 Wɔlɔ woo ə tɔɔ di wɔ pɛlɛ́ɠaai mu. Ɓɛlɔwai ə́ kaa pai toomɛ̨i kɛ nuą ɲąątɔɔ la diɛ di tɛɠi mąąhɔlɔɓo, daa mą́ą́ tinɛ̨n a hɛlɛn, ɉón mɛ̨nį ɓa. Daa hɛlɛn dɛ gɔ́wɔ́ mu. 23 Kɛlaa yɛ́i a Yai-Laa, ə́ di kwəi kili ɲɔ̨nwɔi tii kɔ́lɔn, yɛ hvilɛn na mą́ą́. 'Hvó nɛ̨ŋɛ̨n tii mąąhvaalɛɛ diɛ, 'hvó di wɔ nɛ̨ŋɛ̨n tii hu pu ə́ ɲɛ̨i mu. 'Gɛ di too ə́ ɲɛ̨i mu, 'hee di hu a ə́ wɔ liiholi yələ. |