Ɉaan 13 - Yálá laawoo hɛɓɛ (dc)Jesus ə nwɔ kalan nɛa kɔ́wɔ mąąwaa 1 Gɛɛ pakə hɛli hvo kɛ ɉəli, Jesus ə gaa yɛ nwɔ lɔwai aa ɉəli yɛ pa kulɔi ɲɛnɛ̨ɛ̨ ŋɛ̨i hu, yɛ li Nąn bɔ. Nwɔ́ nuą ŋɛ̨i yɛnɛ̨ɛ̨, yaai ə di wɛli la kɛ, ə di wɛli la kɛ kpɔ kɛnɛ̨ɛ̨. 2 Ɓɛlɔwai di kɛi yələ wilii kɔ̨nɔ̨n mį́i la, nąnį aa gbɛa kɛ Jesus lɔwɔ́tɔɔ mɛ̨nį giliŋąhiɛ lɔ Simɔn lon Ɉudasə hu, yai a Iskariɔtə mun. 3 Jesus ə gɔlɔn gɛ yɛ ə həɠə Yálá pɔ, Yálá aa hɛn gəlee tɛɛ bɔ, ɛlɛɛ, Yálá pɔɔli ɓə gaa lii laa. 4 Jesus ə muhəɠə, ə nwɔ həɠəi kulɔ gwaną, ə həɠə ɓɛla yili ɉąą. 5 Ə ya pu hɛn ɲąŋą ta hu, yɛ nwɔ kalan nɛai kɔ́wɔ mąąwaa, yɛ di kɔ́wɔ mąą kələ a ɉəɠəi ŋɛ̨i kɛ ɲiliɛ ɉaai. 6 Ə həli Simɔn Piɛrə ɓa, yili yɛ mą: «Ną́mu, yɛ́ ɓə yɛi gɔ́wɔ́ mąąwaa?» 7 Jesus ə nwoo pulu pənə yɛ mą: «Mɛ̨nįi ŋɛ̨i gáá gɛi hva pɛli ɉu gbɛɛ ɓoi. Kɛlaa, ə kaa pai mukulaa kɔ́lɔn ɉi.» 8 Piɛrə yɛ mą: «Ə́ gɔ́wɔ́ mąąwaai, a ɲą́ą́! Kpaa!» Jesus yɛ mą: «Ŋą́ wala ə́ waa, ə́ nwɔ nąą hvo nwɔ́ mɛ̨nįi hu.» 9 Simɔn Piɛrə yɛ mą: «Akɛ yili kaa tii, Ną́mu, gɔ́wɔ́ lɔ hvəə, kɛlaa, nwún da ɲééɠaa mąąwaa!» 10 Jesus yɛ mą: «Nui a nwaa, di hva pənə di hvo nwaa, mąąhɔlɔɓo, mąąhəɠɛɛi, gɔwɔ lɔ ɓə da waa. Ka mąąhəɠɛɛi, kɛlaa nu kəlee hvəə.» 11 Jesus ə kɛ nɔwɔ tɔɔmun gɔlɔn. Mɛ̨nįi gɛ, yɛ kɛ mą: «Nu kəlee mąą hvo həɠə li», yaa li. 12 Ɓɛlɔwai Jesus ə kpɛɛ la a di kəlee di kɔ́wɔ mąą waai, ə nwɔ həɠəi həɠə ə doo gwaną, ə pənə ə hee da diɛni diɛ kɔ̨nɔ̨n mį́i. Yɛ diɛ: «Mɛ̨nįi tii ŋą́ gɛ́ a kaa, ka ŋąą kaa? 13 Ka kɛ kɛi mą́ą́ ‹Mąąkwɛli kɛmun› da ‹Ną́mu›, ka kɛ moi a nɛlɛɛ, mąąhɔlɔɓo, ɲą́ą́ ɓə. 14 Akɛ ɲą́ą́ ŋɛ̨i a ka mąąkwɛli mun, gɛ́ ɓo a ka Ną́mu, ɲą́ą́ ɓə ka kɔ́wɔ mąą waai, mąąnɛ̨ɛ̨ ka ka kee ni kɔ́wɔ mąą waa. 15 Mɛ̨nį kɔ́ɔn mąą ka tii ŋą́ nɛ kaa. Bələi ŋą́ gɛ la a kaa, kaa kpɛlimąn ka gɛ tii a ka kee. 16 A tɛ̨ą kpɔ-kpɔ gáá moi kaa, kólo kɛmun hvo tɛɛ li nąmu ɓa. Kɛla hvo tɛɛ li nui dɔɔɔ mą. 17 Kaa yiliɠaai kɔ́lɔn, ka bɔ mɛ̨nį kɛi, ka kɛ a nwun na nɛ̨ɛ̨ nuą. 18 Və́ bələi ŋɛ̨i ɓoi a ka kəlee ka mąą mɛ̨nį, yiiɠaa ŋą́ di həɠə ɉu a nííɓa, ŋą́ di kɔ́lɔn. Hvo kɛ li mɛ̨nįi bɛ̨ɛ̨ Yálá laawoo hu bɔ mɛ̨nį ə kɛ; yaai ə kɛ mą: ‹Nui ŋɛ̨i kwa yaa ku yee kaa kɔ́wɔ tɔ̨nɔ̨ hu, aa muɠəɠə náá ɓa.› 19 Yiihu, gáá mɛ̨nįɠaa tii ɓoi kaa, ə gɛ, ɲələ a ɉəli, əgɛ, ka gɔlɔn kaa: ‹Ɲą́ą́ ɓə gáá a Yaai Gaa Lɔ Laa.› 20 A tɛ̨ą kpɔ-kpɔ gáá moi kaa, ŋą́ nu tɔɔ, nu a ɲee hee mui, aa ɲee hee mú; nui a ɲee hee múi, aa ɲee hee nui dɔ́ɔ́ mu.» Ɉudasə ə Jesus lɔwɔ́tɔɔ ( Matie 26.20-25 ; Markə 14.17-21 ; Lukə 22.21-23 ) 21 Jesus kpɛɛ kɛa a nwooɠaa tii ɓoɔ, nii ə kələn gbɔ gwəi kɛnɛ̨, yɛ diɛ: «A tɛ̨ą kpɔ-kpɔ gáá moi kaa, ka tɔ̨nɔ̨ kaa pai nɔ́wɔ́ tɔɔi.» 22 Galan nɛa di di ɲɛ̨i hee di kee ɓa, diɛ di kee mąąnikɛ, diɛ kɛ mą: gbɛɛ gaa mąą mɛ̨nį ɓoi? 23 Jesus nwɔ kalan non dɔ̨nɔ̨, yii kpɔ nwɛli ə kɛ mą, ə kɛ heeni gwɛlɛ. 24 Simɔn Piɛrə ə ɲɛ̨i gbaląąn too galan non tii ɓa yɛ mą: «Mąąnin kɛ, gbɛɛ ɓə gaa mą?» 25 Galan non tii, ə tinɛ̨n, ə ɲɛ̨i hee Jesus ɓa, yɛ mą: «Ną́mu, gbɛɛ ɓə?» 26 Jesus ə nwoo pulu pənə yɛ mą: «Nui gáá pai nɛɠɛ kpuɔi ŋɛ̨i tɛɛi bɔ, mąą nu ɓə.» Jesus ə mo lɔ tii, ə nɛɠɛ kpuɔ həɠə ə dɛɛ Simɔn lon Ɉudasə Iskariɔtə mun bɔ. 27 Ɓɛlɔwai tii Jesus ə nɛɠɛ kpuɔ tɛɛ la Ɉudasə pɔ, nąąlɔwai kpɔlɔ ɓə ɓilihi ə lɔ la Ɉudasə hu. Jesus yɛ Ɉudasə ɓa: «Mɛ̨nįi yɛ́i gɛ, gɛ ɉa-ɉa.» 28 Nuąi kpɔ kɛ laa, mɛ̨nįi gɛ Jesus yɛ nwoo tii ɓo, di hvo ɉu gbɛɛ ɓo. 29 Ə kɛ nu taɠaa kwəi yii Ɉudasə ɓə kɛi nwali laaikɛ, Jesus kaa kɛi ma: li, ə ɉɛli kɔ̨nɔ̨n da ya, a wala kɛ tii, ə wali tɛɛ mąąwɛli nuą pɔ. 30 Ɉudasə nwɛi, yii kɛa ə nɛɠɛ kpuɔi tii hon, ə kulɔ kpɔlɔ tii ŋąąɓa. Kpini pɛlɛi kɛa kɛ. Liɛwoo nįnɛ̨ 31 Yii kɛa Ɉudasə ə kulɔ, Jesus yɛ diɛ: «Yiihu, Nu Lon aa mąąwiɛ hɔlɔɓo, ɛlɛɛ, Yálá mąą aa wiɛ yaa mąą mɛ̨nį hu. 32 Yii Yálá mąą aa wiɛ mąą mɛ̨nį hu, Yálá kaa pai mąąwiɛi gbɔwɔ hu; ɛlɛɛ, gaa pai mąąwiɛi ɉu hvo kwɛa li. 33 Nónni, və́ kɛa pai lamui ka pɔ, ka káá pai kɛi gwɛ́li; kɛlaa, yɛ pələi ŋą́ mo la Ɉuifəɠaa diɛ gɛ́ diɛ: ‹Ɓɛi gáá lii laa ka hva pɛli lii laa›, bələ lɔ ɓə nwɔ̨nɔ̨ gáá moi la kaa. 34 Gáá nwɔ̨nɔ̨ tíɓo nįnɛ̨ tɛɛi ka pɔ, ya ɓaa: Ka ka kee ni wɛli la kɛ yɛ bələi ŋą́ ka wɛli la kɛ la. 35 Yili ɓə a gɛ, nu kəlee di gɔlɔn diɛ ka káá a nwɔ́ kalan nɛa, a ka kee wɛlila kɛi ka mo.» Jesus yɛ Piɛrə ɓa ə kaa pai lənəi mą́ą́ ( Matie 26.31-35 ; Markə 14.27-31 ; Lukə 22.31-34 ) 36 Simɔn Piɛrə yɛ Jesus ɓa: «Ną́mu, mįnɛ̨ ɓə ə kaa lii laa?» Jesus ə nwoo pulu pənə yɛ mą: «Ɓɛi gáá lii laa, hva pɛli hvilɛn ɉi búlú yiihu, kɛlaa, nɔwai ŋɛ̨i a tɛɛ, ə́ kaa pai hvilɛn ɉi búlú.» 37 Piɛrə yɛ Jesus ɓa: «Ną́mu, lə mɛ̨nį ɓa va pɛli hvilɛn ɉi ə́ pulu yiihu? Ŋą́ pɛli kpɔ ŋą́ haa ə́ mąą mɛ̨nį ɓa.» 38 Jesus yɛ mą: «Ya pɛli kpɔ ə́ haa mą́ą́ mɛ̨nį ɓa a tɛ̨ą! Gáá tɛ̨ą ɓoi yɛ, ə́ kaa pai lənəi mą́ą́ gee mɛ̨i haaɓa gɛɛ tɛ́ɛ́ hvo nwoo pili.» |