Izikiɛ 9 - Yálá laawoo hɛɓɛ (dc)Yálá kaa nwąną kulɔi 1 Ə tómą nwə́lii a nwala wala, yɛ kɛ mą́ą́: «Daa hutɔɔ yələ aa lɛɠɛ; nu kəlee nwɔ nu hu kala hɛn ə kɛ ɲəi ɲą.» 2 Ə kɛ lɔ tii, hinąą mɛ̨ida di həɠə bɛlɛ́ laaləi yii ti kɛ ɲələi pələ, ɲɛ̨i həɛ ɲánwuɔ̨ pələ; di tɛi tɛi di wɔ nu hu kala hɛn ə ɓo di yee ɲą. Nu tɔ̨nɔ̨ ə kɛ di hamąi həɠə kwəlɛɛ ə ɓo gwąną; hɛɓɛ́ pɛ̨ɛ̨ mun ŋą hɛɓɛ́ kpɔwi ə ɓo nwɔ hɛ̨ą yili kɔ́lɔi ɓa. Di pa di tɔɔ gwɛli kpɔlu haláá kulɔi lííla. 3 Israɛlə nwɔ Yálái mąąɲinɛ̨n ə tɛ ɲələi pələ, mąąkpɛ malakaɠaa ti ə kɛ mɛ̨i a bɔlɔ pɔlɔ, yili nwun mɛ̨i pələ, yɛ li Yálá hee pɛlɛ́ laaləi pələ; ɉəɠə kwəlɛɛ nąmui ti ɉɛɓɛ́ kpɔw ə kɛ nwɔ hąmą yili kɔ́lɔi ɓa, ə yili təli. 4 Yai-Laa yɛ mą: «'Hvilən daa pɔ, Ɉerusalɛmə taa pɔ; nuąi kpɔ ɲįŋɛ̨i, diɛ di woolaa dúwɔ́ pələ ɲɔ̨nŋąąi nuą kaa gulɔi daa kwəi mąą mɛ̨nį ɓa, ə́ ə́ pɔɔ kɛ mąą nuą tɔwɔla.» 5 Yili pulu, ŋą́ nwoo mɛ̨n; yɛ kɛ nuą yiiɠaai ti diɛ: «'Ka hvilɛn daa pɔ, nui ɲɛ̨i pulu; ɛlɛɛ, ka paa ɓo kɛ; ka hvo nu ɲɛ̨́i mąąwɛli kaa, ka hvo nu mąą hvaa lɛɛ. 6 Ə kɛ a hulɔngolo, ə kɛ a ląŋąlon, ə kɛ a halakpɛla, lɛapɛlɛɛ mąn, nɛ̨ąą mąn; ka gəlee paa, ə lɛɛ ɉu, di kpɛɛ kpɔ tɛ̨ɛ̨ tɛ̨ɛ̨. Kɛlaa, nui lɔpee, nui ɲɛ̨i pɔɔ a kɛ mą, 'ká hvo tunwɔ̨n mą. 'Ká gbala tɔɔ Yálá hee pɛlɛ́ ɓa. Di gbala tɔɔ kɛa ɉulɔngoloɠaai ti kɛ Yálá hee pɛlɛ́ laaləi diɛ.» 7 Yɛ diɛ: «'Ka Yálá hee pɛlɛ́ mu kala; ɛlɛɛ, 'ka ká wɔ lí ɓo! Di pɛlɛ kɛa nu paa ɓa, daa pɔ.» 8 Di kɛi baa ɓo kɛi, ŋą́ kɛ dɔ̨nɔ̨ kan ɉu; ŋą́ pɛlɛ níí ɓa, ŋą́ tomą, gɛ́ diɛ: «Ee kə Ną́mu Yálá! Yɛ́ mɔ̨ɔ̨ ə́ Israɛlə nuą gbəli paa a ni holii ŋɛ̨i ə́ kaa ɉeei Ɉerusalɛmə ɓai?» 9 Yɛ mą́ą́: «Israɛlə da Ɉuda nwɔ pɛlɛ́i di wɔ nɛ̨ŋɛ̨n kɛnɛ̨i naai və mą; nɔi laahvɛɛi a ɲąmą, daa laahvɛɛ a wea; mąąhɔlɔɓo da kɛ kɛi diɛ: ‹Yai-Laa aa ɓo nɔi ɓa, aa doo, hva kɛ kɛa mɛ̨nį ta kaai.› 10 Yili mąą mɛ̨nį ɓa, ɲɛ́i ya hvo pai kɛi ɉú, və́ pai nu ɲɛ̨imąąwɛli kaai; gáá di túwɔ pələ pulu mɔ̨nɔ̨ laai di nwuɔ̨.» 11 Nui tii ɉəɠə kwəlɛɛ ə kɛ gwąną, ɉɛɓɛ́ kpɔw ə ɓo nwɔ hɛ̨ą yili kɔ́lɔi ɓa, ə pa nąąlɔwai nwoo hukulɔi, yɛ kɛ diɛ: «Bələi ə́ dí la, ŋą́ą́ gɛ tii.» |