Izikiɛ 8 - Yálá laawoo hɛɓɛ (dc)Kwɛli hvilɛn mɛ̨nį hali ɓa Yálá hee-pɛlɛ́ mu 1 Gwɛlan mɛ̨ida nwɔ ɲąnin mɛ̨ida nąn ŋą hvóló lɔɔli yələ; ŋį́ kɛ heeni ɲə́i bɛlɛ́n, Ɉuda kalanɉonŋąą di ɓo heeni níí la, Yai-Laa ə ɲee pɛlɛ mɛ̨́i. 2 Ŋį́ ɲɛ̨́i hee, ŋį́ nu kulɔmąą kaa: ɓɛi ti kɛ gulaa nəŋəi ɓai, ə həɠə laa ə yɛɛ nɔi ɓa pələ, ə kɛ a nwɔ̨n; ə həɠə nəŋəi ti ɓa ə tɛ ɲələi pələ, hɛn da ə kɛ laa yɛ lən yɛ pɛnɛ̨n galan. 3 Ə hɛn da hąŋąn yɛ nu yee, ə ɉón a nwún nɛɠa; yili pulu, Yálá nwɔ Kilii ə gbə́ŋə, ə tɛ a ɲą́ą́ yələkɔ́lɔn da lɔi di lɔwai, ə li a ɲą́ą́ Ɉerusalɛmə, bɛlɛ́ laaləii ti naa a ɓo ɉu pələ, ŋą́ kɛ Yálá yee kɔ́nma, gɛ́ gɛɛ ti kaa, ɲɛ̨i həɛ ɲánwuɔ̨ pələ; nąą ɓə doló kulɔ hɛn mąąnįnįn gaa laa; a ɉɛn mąąnįnįn ti a tóló tɛ nu hui. 4 Israɛlə nwɔ Yálá mąąɲinɛ̨n ə kɛ laa, gulaa mɛ̨nįi ŋą́ gaa ɲee lɔwai lɔi hu, mą. 5 Yɛ mą́ą́: «Hulɔnu lon, ə́ ɲɛ̨i hee ɲánwuɔ̨ pələ.» Ŋį́ ɲɛ̨́i hee ɲánwuɔ̨ pələ; ya ɓə gbon ɲɛ̨i tɔwɔ pələ, ŋį́ haláá kulɔi ta kaa; doló kulɔ hali mąąnįnįn ə kɛ bələi. 6 Yɛ nwɔ̨nɔ̨ mą́ą́: «Hulɔnu lon, mɛ̨nįi di kaa gɛi ə́ kaa nąą kaai? A gili kpɛɛ gwəi mɛ̨nį kpɛa kpɛaɠaai Israɛlə nwɔ pɛlɛ́i kaa gɛi ɓɛ, yáá gaa? Yili ɓə aa gúlɔ ɲə́i bɛlɛ́n. Ə́ kaa pai ɓowo mɛ̨nį kpɛa kpɛa takpɛliɠaa kaai nwɔ̨nɔ̨.» 7 Ə li a ɲą́ą́ ɲimąn bɛlɛ́ laaləi; ŋį́ ɲɛ̨́i hee, wolo ɓɔɔ kɛ bɛlɛ́ nwąną hu. 8 Yɛ mą́ą́: «Hulɔnu lon, wolo ɓɔ kan bɛlɛ́ nwąną ɓa; ŋą́ wolo ɓɔ bɛlɛ́ nwąną ɓa, nu yɛ pɛli tɛɛi laa.» 9 Yɛ mą́ą́: «'Lɔ, mowo mɛ̨nį ɲɛ̨i kɛnɛ̨ɠaai di kaa gɛi ɓɛ, ə́ 'gaa. 10 Ŋą́ lɔ, ŋą́ ɲɛ̨́i hee; tala hɛnŋąą, huwɔ mąąnįnįn ɉuwui lɔpee ə kɛ laa, yɛ ɓai lii tɛ a nu; ɛlɛɛ, Israɛlə nwɔ haliɠaa kəlee di mąąnįnįn ə kɛ bɛlɛ́ nwąną ɓa nąą kɔ́lɔ kəlee aa doo la gee hu. 11 Israɛlə pɛlɛ́ mu kalanɉon bow mɛ̨ihveelɛ di kɛ laa tɔɔnin, ɉali mąąnįnįnŋąąi ti lííla; Safan lon Yaazaniahu ə kɛ tɔɔnin di hąmąi; nu kəlee nwɔ lansan kələn ɉɛn ə kɛ ɲee ɲą; lansan kələn nwɔ̨n nulu yɛ kɛi tɛ.» 12 Yɛ mą́ą́: «Hulɔnu lon, mɛ̨nįi Israɛlə pɛlɛ́ mu kalanɉonŋąą kaa gɛi kpinįi, nu kəlee ə ɓo ɲəi bɛlɛ́n yɛ kwɛli hvilɛn ŋą hali ɓa, yaa naa kaa? Da kɛ kɛi diɛi; Yai-Laa hva pɛli ku kaai. Yai-Laa aa kulɔ nɔi.» 13 Yɛ mą́ą́: «Ə́ kaa pai nwɔ̨nɔ̨ ɓowo mɛ̨nį kpɛa kpɛa ta kpɛliɠaa kaai; di yee ə ɓo mą diɛ gɛ.» 14 Ə li a ɲą́ą́ Yai-Laa hee pɛlɛ́ laaləi, ti ɲɛ̨i həɛ ɲánwuɔ̨ pələi; nɛ̨ąą di kɛ laa heeni, diɛ wɔlɔ Tamuzə mɛ̨i. 15 Yɛ mą́ą́: «Hulɔnu lon, yáá nąą kaa? Ə́ kaa nwɔ̨nɔ̨ pai ɓowo mɛ̨nį ta kpɛliɠaa kaai dɛɛ yii ɓa.» 16 Ə li a ɲą́ą́ Yai-Laa hee pɛlɛ́ mu pələ; Yai-Laa hee pɛlɛ́ laaləi, ɲįmąn mu da ɉaláá kulɔi di lɔwai, hinąą pow hveelɛ gɔw lɔɔli pɔɔla di kɛ laa, di pulu tinɛ̨nŋąą Yai-Laa kɔ́i ɓa, di ɲɛ̨i həɛ hvóló ɓɛlan bələ; di kɛi pɛlɛ nɔi ɓa hvóló ɓɛlan bələ, diɛ kwɛli hvilɛn hvóló ɓa. 17 Yɛ mą́ą́: «Hulɔnu lon, yáá nąą kaa? Mowo túwɔ́i Ɉuda nwɔ pɛlɛ́i mu nuą kaa moi ɓɛ, yili hva mɔ̨ɔ̨ di lii hon? Daa nɔi laahvɛɛ a wɛa mɛ̨nį; diɛ nwɔ̨nɔ̨ nwą́ną́lɔ; ə́ kaa di kaai diɛ nwulu ɓəɠən nɛɠɛ di hunwɔ̨ ɓa? 18 Nwɔ́ɔ́ yələ aa həli, gɛ́ gɛ́ mɛ̨nį kɛ ɉu a líiholi kɛnɛ̨. Ɲɛ́iyá hvo pai kɛi ɉú; və́ pai nu mąąwɛlikaai; di kaa pai kɛi tómąi nwə́lii; kɛlaa və́ pai nwəli tɔɔi di woo ɓa.» |