Izikiɛ 7 - Yálá laawoo hɛɓɛ (dc)

¹ Yai-Laa woo ə həli mąą, yɛ mąą:

² «Yɛ́, hulɔnu lon, ə́ wəli tɔɔ, mɛ̨nįi Mɛ̨nį kəlee ŋą Hééɓomun Yálá kaa moi yɛ hvilɛn na Israɛlə lɔi ɓa, ya ka: mɛ̨nį kəlee kpɛɛ li; nɔi hu mɛ̨nį kəlee aa həli gbɛlai ɓa.

³ Ə́ wɔ yɛnɛ̨ɛ̨ aa həli kɛa ɲąąkpɛɛi: Gáá pai níiholii ə́ pɔ, gɛ́ ə́ kiti tee yɛ bələi ə́ tuwo la, gɛ́ ə́ mąąni kɛ yɛ́ ɓowo tuwoɠaai kəlee mąą mɛ̨nį ɓa.

⁴ Və́ pai ə́ ɲɛ̨imąąwɛli kaai; və́ pai ə́ mąąhvaalɛɛi; gáá pai ə́ hɔn dooi yɛ́; yɛ́ ɓowo tuwoɠaai kaa lɔ pai lɛɛi nɔi hu; ɛlɛɛ, ka gili kɔ́lɔn a mąą yələ kaa kɛ Yai-Laa ɓaa a ɲą́ą́.»

⁵ Yai-Laa woo ka, yɛ diɛ: «Ə́kə! Mɛ̨nį ɲąąnwąnąą kɛnɛ̨, ɲɔ̨nwɔ̨mąn və ta kaa li, ya ka ti pai-o.

⁶ Mɛ̨nįɠaa kpɛɛ yələ kaa pai, gaa pai yoo; a mɛ̨nį kpɛɛ yələi tii. Gaa muhəɠəi ə́ mąą mɛ̨nį ɓa, yɛ pa.

⁷ Pulu kaa pai ə́ mɛ̨i nɔi lon, ɲələ kaa pai; voló aa lɛɠɛ. Ɲɔw ɓə ɲeeɠaa nwuɔ̨, kwəinɛ̨ɛ̨ hvəi.

⁸ Yiihu, a yiihu kpɔlɔ; ŋą́ liiholii ɓɛla hiɛ li ə́ mɛ̨i. Gáá nwą́ną kulɔi yɛ́, vá kpəla pələi. Ŋą́ ə́ kiti tee, yɛ bələi ə́ túwɔ la, gɛ́ ə́ wɔ ɓowo túwɔɠaaai kəlee gələ kulɔ.

⁹ Və́ pai nu ɲɛ̨imąąwɛli kaai, vá nu mąąhvaalɛɛ. Ŋą́ naa yɛ́, yɛ bələi ə́ gwɛli la; ɛlɛɛ, mowo túwɔɠaa da kɛ lɔ nɔi hu, nąąlɔwai, ka gili kɔ́lɔn kaa ɲą́ą́ Yai-Laa, ɲą́ą́ ɓə gɛlɛɓo kɛi.

¹⁰ «Ɲələ ka, pulu ka ŋɛ̨i pai; gaa bələ pɔ, wea mɛ̨nį nwɛi ɓə a nɛ̨ɛ̨mą. Kpɔwɔ ɲąą kɛnɛ̨ laa yɛ tɔɔ.

¹¹ Wea mɛ̨nį aa muhəɠə, kili ɲɔ̨nwɔ̨ɔ̨ yəi hɛn ni, nu hva kɛa di pɔɔ kaa. Nu hva kɛa di tomą woo mɛ̨n, da di huluun nwoo; hvitɔɔ hvə di yəi.

¹² Nąąlɔwai kaa pai, ɲələ aa lɛɠɛ, hɛn ɲamun və kwəinɛ̨ɛ̨ kulɔ; hɛn nɔwɔtɔɔmun və kɛ liiɲąnwąną hu. Mąąhɔlɔɓo, kɛɛ kala liiholi kaa pai heei nɔi hu hɛn gɔw kəlee diɛ.

¹³ Hɛn nɔwɔtɔɔmun və pai pənəi yɛ li nwɔ lɔwɔtiɛ̨ kɛɛnąą, ə mą kɛ, gaa ni yɛnɛ̨ɛ̨. Mąąhɔlɔɓo, mɛ̨nįi gáá gaai, vilɛn ŋaai nɔi hu hɛn gɔw kəlee pulu; ɛlɛɛ, di hvo pai ɲalii bulu. Nu kəlee yee kaa pai kɛi nwɔ nɛ̨ŋɛ̨n hu, ɛlɛɛ, di hvaŋą ta hvo pai pɛlɛi ma.

¹⁴ Di kaa pai tulu hvɛɛi, diɛ di kpɔwɔ pɛli, kɛlaa, nu ta hvo pai lii gɔ́ ɓa. Mąąhɔlɔɓo, nwɔ́ kɛɛ kala liiholi hvilɛn ŋąąi yɛnɛ̨ɛ̨ hɛnŋaa kəlee pulu.»

Nu ta hvo pai kulɔi ɉu

¹⁵ Gɔ kɔ́ ɓɔwa kaa pai kɛi bələ mɛ̨i, ɲɔ̨n da pulu di ɓo bɛlɛ́n bələ. Nui yɛa, gaa pai haai a kɔ́ kɔ́ ɓɔwa laa pɔɔ; nui tai, pulu da ɲɔ̨n mə pai ɉu kalai.

¹⁶ Nuai pai kulɔi ɉu, di kaa pui diɛ li ɲeeɠaa hu, yɛ lɔwɔ-tonwələnŋaa; di mąąwɛliɛ. Nu kəlee kpɔwɔ nɛ̨ŋɛ̨n mąą mɛ̨nį ɓa.

¹⁷ Yee kəlee hu kaa pai haai, nu kpəlin gəlee hvii yɛ kpɛɛ.

¹⁸ Di kaa pai ɓíiɠaa kɛi diɛ, diɛ kpɛlin, nwumɛ̨ yɛ di kəlee di ɲɛ̨i paa, Da di nwun gəlee kalaan.

¹⁹ Diɛ di wɔ waliɠaa pili kwəli hąąɠaa, di wɔ hɛniɠaa di lɛɛ di ɲɛ̨i ɓa a hɛn gbɛli-kpɛli. Di wɔ walii da di wɔ hɛnii di hvo pai di ɓaloi a Yai-Laa nwɔ liiholi yələ.

²⁰ Di kɛi di nwun dɛ di mąą yili hɛnŋaa hu, ya ɓə di di wɔ hɛn mąąnįnįn ɲɔ̨nwɔ̨ɔ̨ɠaai pɛli la, a gili kpɛɛ ɲəi hɛŋaai tii. Yili mąą mɛ̨nį ɓa, gáá pai di kɛi a di mąąluwu hɛn.

²¹ Gáá pai dɛɛi nwɛ̨ąą pɔ, diɛ too ɉu. Nɔi hu nu kpoloonŋaa pɔ a kɔ́ hon, diɛ ɉu kala.

²² Gáá pai búlu tinɛ̨n ɉii diɛ, diɛ nwɔ́ hɛn gɔwi hukala. Nwuɔ̨ nuą di kaa pai pai laa, diɛ ɉu kala.

²³ Yɔwɔn bɛli, mąąhɔlɔɓo nɔi laahvɛɛi a nu paa kili, daa laahvɛɛ a wea mɛ̨nį.

²⁴ Lɔiɠaai di ɲɔ̨nwɔ̨ɔ̨ di ɓɛlaa diɛ, diɛ ɓə gáá pai a diɛ, diɛ di wɔ pɛlɛ́ɠaai həɠə. Gáá pai yeewalawala nuą di wɔ kpɔwɔ ŋąą kɛnɛ̨ mąąyɛɛi, gɛɛnąąɠai di kɛi di mąąhəɠə laa, da nąą laa pu.

²⁵ Lii hɛlɛn gaa pai, di kaa liilaa kwɛlii, kɛlaa hva həli diɛ.

²⁶ Kɛɛ lɔ ɓə pai kɛi kalai diɛ, wɛlɛɛ ɲɔ̨nwɔ̨ɔ̨ lɔ ɓə pai kɛi həlii diɛ; di ka mɛ̨nį kwɛlii Yálá kwəi mɛ̨nį hukulɔ mun na, ɉaláá laa həli mun və kɛa pai kɛi kalan gɛi diɛ, galanɉonŋaa di hva kɛa nwun dɔɔ kɛ.

²⁷ Tɔɔmun gaa pai kɛi yɛ haa a too mą, nɔi ɲąąwooɓomun gaa pai kɛi lii kələn gwəi hu. Nɔi lonnii yee kaa pai kɛi kpɛlin ɉii, gáá pai di hon ɉii yɛ bələi di túwɔ la; gɛ́ di kiti tee, yɛ bələi di kɛi kiti tee la, da gili kɔ́lɔn nąąlɔwai, diɛ kɛ gáá a Yai-Laa.