Izikiɛ 48 - Yálá laawoo hɛɓɛ (dc)Nɔi ɲąąkwɛlɛ pələ, ɲələi pələ nuą di nwɛi 1 «Nu huwuɠaa laa ka, ə həɠə kpɔ ɲələi pələ, ə hvilɛn Hɛtlɔn pələi ɓa, a bələi tii lii Hamatə pələ, da Hasarə-Einan, Damasə lɔi yɛ lɛɛ ɲələi pələ; Hamatə kwɛlɛ, da wolo yɛ li voló ɓɛlai bələ, da gboloyá pɔ pələ, Dan nwɛi li. 2 Ə həɠə Dan nwɔ lɔi ɲɛ̨n ma, voló kulɔi pələ, ə həli la gboloyá ɓa, Asɛrə nwɛi li. 3 Ə həɠə Asɛrə nwɔ lɔi ɲɛ̨n ma, voló kulɔi pələ, ə həli la gboloyá ɓa, Nɛftali nwɛi li. 4 Ə həɠə Nɛftali nwɔ lɔi ɲɛn ma, ə həɠə voló kulɔi pələ, ə həli la gboloyá ɓa, Manase nwɛi li. 5 Ə həɠə Manase nwɔ lɔi ɲɛn ma, ə həɠə voló kulɔi pələ, ə həli la gboloyá ɓa, Ɛfraimə nwɛi li. 6 Ə həɠə Ɛfraimə nwɔ lɔi ɓa, ə həɠə voló kulɔi pələ, ə həli la gboloyá ɓa, Rubɛn nwɛi li. 7 Ə həɠə Rubɛn nwɔ lɔi ɓa, ə həɠə voló kulɔi pələ, ə həli la gboloyá ɓa, Ɉuda nwɛi li.» Yai-Laa nwɛi 8 «A hvilɛn Ɉuda nwɔ lɔi ɓa, ə həli voló kulɔi pələ, ə həli la gboloyá ɓa, ka lɔi ta lɛɛ laa, goloon ɉu a kɛ a yee tɔɔɉu waa pow hveelɛ kɔ́w lɔɔli, a kwɛa lɔ yɛ ka wɔ lɔiɠaai dɔ̨nɔ̨ kwɛa pələ; ə həɠə voló kulɔi pələ, ə həli la gboloyá ɓa, gɛɛnąą mąąhəɠɛɛ a kɛ ɉɛ̨ąi. 9 Nɔi ka káá pai nɛɛi a Yai-Laa nwɛi, a kwɛa a yee tɔɔɉu waa pow hveelɛ kɔ́w lɔɔli, goloon ɉu ə ɓo a yee tɔɔɉu waa pow. 10 Lɔi mąąhəɠɛɛ a kɛ laa a ɉaláá laahəli nuą di wɔɔ, ɲələi pələ a kwɛa a yee tɔɔɉu waa pow hveelɛ kɔ́w lɔɔli, gboloyá kwɛlɛ pələ goloon ɉu a kɛ a yee tɔɔɉu waa pow, voló kulɔi pələ, goloon ɉu ə ɓo a yee tɔɔɉu waa pow, ɉɛɠɛɛ pələ, gwɛa yee ə ɓo a yee tɔɔɉu waa pow hveelɛ kɔ́w lɔɔli; Yai-Laa nwɔ pɛlɛ́i ə ɓo ɉɛ̨ąi. 11 Ɉaláá laa həli mun Sadɔkə lonnii tii di di həɠə ɉu a nwɔ́ɔ́, diɛi tii lɛɛ nwɔ́ tɔ́n nwooi pulu, di hvo lan Israɛlə lonnii di wɔ lan mɛ̨nįi hu, yɛ bələi Levi huwu hu nuą di lan nai, 12 da kɛli nɔi ɲąąkwɛlɛ, da a tɛɛ di pɔ, a lɔi mąąhəɠɛɛ, nɛɠɛɛ Levi lonnii di wɔ lɔi ɓa. 13 Levi lonnii diɛn, di wɔ lɔi a kɛ lɔ yɛ ɉaláá laahəli nuą di wɛi; a kwɛa a yee tɔɔɉu waa pow hveelɛ kɔ́w lɔɔli, goloon ɉu ə kɛ a yee tɔɔɉu waa pow, kɛɛnąą kəlee, gwɛa pələ a kɛ a yee tɔɔɉu waa pow kɔ́w lɔɔli, goloon ɉu ə kɛ a yee tɔɔɉu waa pow. 14 Mąą hvo nɛ̨ɛ̨li di hvo da lɔwɔ́tɔɔ, di hvo da mąąhvalin, di hvo da toláá hee, mąąhɔlɔɓo, gaa a Yai-Laa nwɔɔ.» Ɉerusalɛmə nwɛi, da dɔɔmun nwɛi 15 «Yee tɔɔɉu waa lɔɔli kaa pai lɛɛi, nwaa pow hveelɛ gɔw lɔɔli kwɛlɛ, goloon ɉu pələ, yili a kɛ a daa nwɔ lɔi, taa nwɔ lɔi li, da taatɛlɛɛɠaa laa mįi. Daa a kɛ ɉɛ̨ąi. 16 Gɔɔn bələ ka; ɲələi pələ, yee tɔɔɉu waa nąąn pulu nwun nɔɔli, ɉɛɠɛɛ pələ, yee tɔɔɉu waa nąąn pulu nwun nɔɔli, voló kulɔi pələ, yee tɔɔɉu waa nąąn pulu nwu nɔɔli, gboloyá pɔ pələ, yee tɔɔɉu waa nąąn pulu nwun nɔɔli. 17 Daai taatɛlɛɛɠaa laa mįi; ɲələi pələ, yee tɔɔɉu nwun veelɛ yee lɔɔli, ɉɛɠɛɛ pələ, yee tɔɔɉu nwun veelɛ yee lɔɔli, voló kulɔi pələ, yee tɔɔɉu nwun veelɛ yee lɔɔli, gboloyá pɔ pələ, yee tɔɔɉu nwun veelɛ yee lɔɔli. 18 Nɔi mąąhəɠɛɛi tii kpəli kaa pai lɛɛi, goloon gɛɛnąą pələ, a kɛ a yee tɔɔɉu waa pow, voló kulɔi pələ, yee tɔɔɉu waa pow gboloyá pɔ pələ, tɔ̨nɔ̨i pai kɛi hɔlɔɓoi ɉu, a kɛ a daa kóló kɛ nuą kɔ̨nɔ̨n. 19 Daa kóló kɛ nuąi pai kɛi tíi kɛi laa, mąąnɛ̨ɛ̨ diɛ həɠə Israɛlə pɛlɛ́ pow kɔ́w hveelɛi mu. 20 Nɔi pɛlɛɛ geeɓa, a kɛ a yee tɔɔɉu waa pow hveelɛ kɔ́w lɔɔli bələ kəlee. Ka nɔi tii ɓɛlaɓo ɉu nąąn, ka mɛla tɔ̨nɔ̨ həɠə a daa tɔɔi, 21 gbəli a kɛ a dɔɔmun nwɛi; nɔi mąąhəɠɛɛ bələ hveelɛ, da daa tɔɔ lɔi bələ hveelɛ, ɲee tɔɔɉu waa pow hveelɛ kɔ́w lɔɔli koo ɓa, ə həɠə la voló kulɔi pələ ɲɛ̨n ma, ɛlɛɛ, gboloyá pɔ pələ, ɲee tɔɔɉu waa pow hveelɛi koo ɓa; ə həɠə la gboloyá ɓa. Dɔɔmun nwɔ lɔi a kɛ lɔ yɛ bələi nuą di wɛi a kɛ la; gɛɛnąą mąąhəɠɛɛ kaa pai kɛi nɔi hɛ̨ąi da Yálá hee pɛlɛ́ nwɔ lɔi. 22 Levi lonnii di wɔ lɔi da daa tɔɔi, da lɛɛ Ɉuda nwɔ lɔi ɲɛ̨n da Bɛnɉamɛn nwɔ lɔi ɲɛ̨n di lɔwai, dɔɔmun nwɔ lɔi hamąi.» Ɉɛɠɛɛ pələ lɔiɠaa 23 «Bɛlɛ́n nuą yiiɠaai tii daa lɛɛ, ə həɠə voló kulɔi pələ ə həli la gboloyá ɓa; Bɛnɉamɛn nwɔɔ li. 24 Ə hvilɛn Bɛnɉamɛn nwɔ lɔi ɓa, ə həɠə voló kulɔi pələ, ə həli la gboloyá ɓa; Simeɔn nwɛi li. 25 Ə hvilɛn Simeɔn nwɔ lɔi ɓa, ə həɠə voló kulɔi pələ, ə həli la gboloyá ɓa Isakarə nwɛi li. 26 Ə həɠə Isakarə nwɔ lɔi ɓa, ə həli la voló kulɔi pələ, ə həli la gboloyá ɓa, Zabulɔn nwɛi li. 27 Ə həɠə Zabulɔn nwɔ lɔi ɓa, ə həli la voló kulɔi pələ, ə həli la gboloyá ɓa, Gadə nwɛi li. 28 Ə həɠə Gadə nwɔ lɔi ɓa Negɛvə tənən ma ɉɛɠɛɛ pələ, nɔi ɲɛn ga; ə həɠə Tamarə da Meriba yáɠaa diɛ, diɛi di kaa Kadɛsə, ə hvilɛn na ɲá lon ma, yɛ li gboloyá pɔ pələ. 29 Nɔi ka káá pai ɲąąkwɛlɛi Israɛlə nwɔ nu huwu lɔwai, nu tɛi tɛi nwɛi ka ti. Mɛ̨nį kəlee ŋą Hééɓomun Yálá woo li.» Ɉerusalɛmə nwɔ kpon bow gɔw hveelɛi 30 «Bələ nwunnaɠaa daa ɓa, diɛ ka: Ɲələi pələ, bələ ɲąą a kɛ a, yee tɔɔɉu waa nąąn pulu nwun nɔɔli. 31 Mąąnɛ̨ɛ̨ di daa gbonŋaa laa hee a Israɛlə pɛlɛ́ɠaa laa, kpon ɉaaɓa ɲələi pələ; Rubɛn nwɔ kpon, Ɉuda nwɔ kpon da Levi nwɔ kpon. 32 Voló kulɔi pələ, bələ ɲąą a kɛ a, yee tɔɔɉu waa nąąn pulu nwun nɔɔli; kpon ɉaaɓa, Ɉosɛfə nwɔ kpon, Bɛnɉamɛn nwɔ kpon da Dan nwɔ kpon. 33 Ɉɛɠɛɛ pələ, bələ ɲąą a kɛ a, yee tɔɔɉu waa nąąn pulu nwun nɔɔli, kpon ɉaaɓa; Simeɔn nwɔ kpon, Isakarə nwɔ kpon da Zabulɔn nwɔ kpon. 34 Gboloyá pɔ pələ, bələ ɲąą a kɛ a, yee tɔɔɉu waa nąąn pulu nwu nɔɔli, kpon ɉaaɓa; Gadə nwɔ kpon, Asɛrə nwɔ kpon da Nɛftali nwɔ kpon. 35 Mąą tinɛ̨n ŋąą doɔ gee hu, yee tɔɔɉu waa pow kɔ́w mɛ̨ihaaɓa. Ə həɠə háákəlee ɓa, daa laa ɓaa kɛa: ‹Yai-Laa kaa ɓɛ.›» |