Izikiɛ 47 - Yálá laawoo hɛɓɛ (dc)Ɲá nwun gulɔi kɛ Yálá hee pɛlɛ́ mu 1 Ɉulɔnui tii ə pənə ə pa a ɲą́ą́ Yálá hee pɛlɛ́ laaləi pələ, yá ta ə kɛi kulɔ laa nɔi mu, ɓɛ pələi tii vóló a həɠə lai; mąąhɔlɔɓo Yálá hee pɛlɛ́ laa heɛi kɛ voló həɠəi pələ, ə lɛɛ ɲa ə kɛi yɛɛ Yálá hee pɛlɛ́ kooɓa, mamįiyee hu pələ; yɛ tɛɛ ɉaláá kulɔi pulu pələ. 2 Ə gúlɔ Yálá hee pɛlɛ́ mu a bɛlɛ́ laaləi tii ɲɛ̨i heɛ ɲələi pələi, yili pulu, ku Yálá hee pɛlɛ́ mąątínɛ̨n ɲɛnɛ̨ɛ̨ pələ, ku həli la bɛlɛ́ laaləi yii tii ɲɛ̨i heɛ voló kulɔi pələ mą, ɛlɛɛ, ɲá ə kɛi lɔ kulɔ mamįiyee hu pələ. 3 Ɉulənui ə kulɔ ɲɛ̨i hąŋąnŋąą voló ɓɛlai pələ, mąnįngɔw ə ɓo ɲəi; ə yee tɔɔɉu waa tɔ̨nɔ̨ kɔ́ɔn; yɛ mą́ą́: 'Ɲá teen! Ɲá ə kɛi ɉón a gɔ́wɔ́ kwąną. 4 Ə yee tɔɔɉu waa tɔ̨nɔ̨ kɔ́ɔn nwɔ̨nɔ̨; yɛ mą́ą́: 'Ɲá teen! Ɲá ə kɛi həli nwúngbə la; yili pulu ə yee tɔɔɉu waa tɔ̨nɔ̨ kɔ́ɔn; yɛ mą́ą́: 'Ɲá teen! Ɲá ə kɛi həli nə́ŋəi. 5 Yili pulu ə yee tɔɔɉu waa tɔ̨nɔ̨ kɔ́ɔn; ɲa ə kɛ kɛa a ya hvɛɛ, vá pɛli deen ɉi, vɛɛ pələ ɓa; ə kɛ kɛa a yái mąąnɛɛ nu ə gɛlɛ, a yáleei nu hva pɛli deen ɉi ə́ kɔwɔ ɲąi. 6 Yɛ mą́ą́: Hulɔnu lon, yáá nąą kaa? Ə li a ɲą́ą́, ə pənə ə pa a ɲą́ą́ ɲá kwɛlɛ. 7 Pənəi ə mo ə pa a ɲą́ą́, wulu kpulu kɛnɛ̨ɛ ə kɛ tɔɔni ɲá kwɛlɛ, gbonwo hveelɛi ɓa. 8 Yɛ mą́ą́: Ɲái ŋɛ̨i kaa li hvóló ɓɛlai pələ lɔi hu, yɛ yɛɛ Ɉurdɛn ɲa-ɓoloon bɔ lɔi hu, yɛ pu Gboloyá powa hu; a pa pui Gboloyá hu, gaa pai ɲá nɛ̨ɛ̨i. 9 A kɛ ti kɛa, huwɔi kpɔ a nɔw, di kaa pai di ɓuwuɓoi; diɛ ɓalo ɓɛi lɔpee ɲálee tii kaa pai tɛɛi laa. A kɛ ti, hɔ̨nwɔ̨lee kaa pai ɓuwuɓoi, mąąhɔlɔɓo, ɲá kaa pai həlii laa, ɛlɛɛ, gboloyá hu yá kaa pai nɛ̨ɛ̨i. Ɓɛi lɔpee ɲai tii kaa pai həlii laa, hɛnŋaa kaa pai ɓaloi laa. 10 Hɔ̨nwɔ̨leekpɛ-nuą kaa pai kɛi tɔɔni gbonwo ɲa, ə həɠə Ein-Gɛdi, ə həli la Ein-Ɛglaimə ɓa, nąą kaa pai kɛi a hɔ̨nwɔ̨lee kpɛ tumɔɠaa kpalai. Ɉɔwɔlee huwuɠaai pai kɛi laa, di kaa pai lɔ kɛi a di kpulu kɛnɛ̨ɛ, yɛ bələi gboloyá kɛnɛ̨ɛ hu nwɛiɠaai tamąą la. 11 Kɛlaa bɔwaɠaa di wɛi, di hu yaɠaa di hvo pai lɛlɛi; di kaa pai di lɛɛi tii, diɛ pɛli kpolo kulɔi laa. 12 Ɲá hvɛɛi tii kwɛlɛ, gbonwon ɲa hveelɛi ɓa, ɓá wulu huwu kəlee kaa pai kɛi ɓɔn ɉii laa, di laa hvo pai kpalai di ɲa, di ɓa hvo pai kpɛɛi di hu; di kaa pai ɓa nįnɛ̨ ɓoi ɲąnin dɛi tɛi yeemu, mąąhɔlɔɓo ɲáleei tii kaa kulɔi Yálá hee pɛlɛ́ mu. Di ɓa kaa pai kɛi a kɔ̨nɔ̨n, di laa ə ɓo a hali. Yálá kaa nɔi ɲɛ̨n naai 13 Yai-Laa woo ka; yɛ diɛ: «Nɔi ka káá pai ɲąąkwɛlɛi Israɛlə nu huwu pow kɔ́w hveelɛi lɔwai, ɲɛn ga; Ɉosɛfə nwɔ lɔi a kɛ hveelɛ. 14 Ka káá pai ɲąąkwɛlɛi, yɛ pɛli a gee ka kəlee ka yəi; mąąhɔlɔɓo, ŋą́ gwɛ́la, gɛ́ ŋą́ dɛɛ ka nąnni pɔ; nɔi ŋɛ̨i kaa kɛa a ka kwɛlin. 15 Nɔi ɲɛ̨n ga, ɲələi pələ, a həɠə gboloyá kɛnɛ̨ɛ̨ ɓa, a Hɛtlɔn pələi, yai a li Sedadə. 16 Hamatə, Berotai, Sivraimə, yai tii Damasə lɔi da Hamatə lɔi di lɔwai. Haserə, Tikɔn yai tii Hauran lɔi pɔ pələi. 17 A kɛ ti, nɔi ɲɛn gaa pai həɠəi gboloyá ɓa, ə həli la Hasarə-Einan ɓa, Damasə lɔi da Hamatə lɔi diɛ lɛɛ ɲələi pələ. Ɲələi pələ nwɔ ɲɛ̨n ka ti. 18 Voló kulɔi pələ nwɛi, ka gɔɔn Hauran da Damasə di lɔwai; Galaadə da Israɛlə di lɔwai, Ɉurdɛn a kɛ a nɔi ɲɛn ə həli la gboloyái tii voló kulɔi pələ mą. Voló kulɔi pələ nwɛi ka tii. 19 Negɛvə pələ, ya ɓaa ɉɛɠɛɛ pələ, ə həɠə Tamarə, ə həli la Meriba yáɠaa diɛ, diɛi tii Kadɛsə; ə həɠə Nahala ɓa, ə həli la gboloyá kɛnɛ̨ɛ ɓa ɉɛɠɛɛ pələ. Negɛvə pələ nwɛi kaa ti. 20 Gboloyá pɔ pələ, ə həɠə gboloyá kɛnɛ̨ɛ ɓa, ə həɠə ɉɛɠɛɛ pələ nɔi ɲɛn ma, ə həli la Lebo-Hamatə tənən ma. Gboloyá pɔ pələ, ɲɛ̨n ga ti. 21 «Ka nɔi ɲąąkwɛlɛ ka lɔwai, Israɛlə nu huwu pow kɔ́w hveelɛi lɔwai. 22 Ka nɔiɠaa kɔ́ a kpɛɛn, ka wɛi da nweai da hee ka kɔ́wɔ mɛ̨i; ɛlɛɛ, da lonŋąąi di di kaa ka lɔwai. Mąąnɛ̨ɛ̨ ka di hon yɛ nɔi lon da Israɛlə nu huwui lɔwai. Ka diɛni ka nɔi kɔ́ a kpɛɛn, da Israɛlə nu huwu kəlee. 23 Bɛlɛ́i nwɛ̨ą a kɛ mu, mu nuą ɓə pai gɔi a lɔi. Mɛ̨nį kəlee ŋą Hééɓomun Yálá woo li.» |