Izikiɛ 45 - Yálá laawoo hɛɓɛ (dc)

Nɔi a Yálá nwɛi

¹ «Ká kɛi pa nɔi ɲąą kwɛlɛi, ka Yai-Laa nwɛi laa a dee; a kɛ a kɛɛnąą mąąhəɠɛɛ, nɔi hu. Gwɛa pələ a kɛ a nu yee tɔɔɉu waa pow-hveelɛ-gɔw lɔɔli; goloon ɉu ə ɓo a waa pow. A kɛ a kɛɛnąą mąąhəɠɛɛ nąą kɔ́lɔ kəlee.

² Nɔi kwəi pələ, a ɉaláá kulɔ kɛɛnąą mąąhəɠɛɛ; nu yee tɔɔɉu nwun nɔɔli, bələ kəlee; ɛlɛɛ nu yee tɔɔɉu pow lɔɔli ə tinɛ̨n mą ə doo gee hu.

³ Nɔi ka káá pai ka yee lɛi mą, ə kɛ a yee tɔɔɉu waa pow hveelɛ gɔw lɔɔli gwɛa pələ hu, yee tɔɔɉu waa pow goloon ɉu; ká gɔɔn, nąą ɓə gɛɛnąą mąąhəɠɛɛ kaa pai kɛi laa; gɛɛnąą mąąhəɠɛɛ kɛɛnąą kəlee ɓa.

⁴ Gɛɛnąąi tii a kɛ a kɛɛnąą mąąhəɠɛɛ nɔi hu, a ɉaláá laahəli nuą di wɔɔ; diɛi da kɛ kóló kɛi gɛɛnąą mąąhəɠɛɛ ɓa, diɛ lɛɠɛ Yai-Laa ɓa, diɛ nwɔ kólói kɛi. Di wɔ pɛlɛ́ɠaai tɔɔi li, da Yálá hee pɛlɛ́.

⁵ Kɛɛnąą takpɛli a kɛ laa, yii gwɛa yee a kɛ a yee tɔɔɉu waa pow hveelɛ kɔ́w lɔɔli, goloon ə ɓo a yee tɔɔɉu waa pow; yili kaa a Levi nu huwu nwɔ taaɠaai tɔɔi.

⁶ Daa pui nwɔ lɔi, ka goloon ɉu kɛ a yee tɔɔɉu waa lɔɔli, ɛlɛɛ, gwɛa pələ ə kɛ a yee tɔɔɉu waa pow hveelɛ kɔ́w lɔɔli; ganąn ŋąą gɛɛnąą mąąhəɠɛɛ nwɔ lɔi ɓa. A kɛ a Israɛlə nwɔ pɛlɛ́i kəlee nwɔɔ.

⁷ Dɔɔmun nwɔ lɔi a kɛ gɛɛnąą mąąhəɠɛɛ da daa nwɔ lɔi di lɔwai, ə ɓo bələ hveelɛi ɓa, nąą ta ə ɓo gɛɛnąą mąąhəɠɛɛ ɓa, da daa nwɛi. Ɲɛ̨i a kɛ a ɉeɛ vóló kulɔi pələ, bələ tɔ̨nɔ̨ ɲɛ̨i heɛ vóló tooi pələ. Gwɛa pələ a kɛ yɛ pɛlɛ tɔ̨nɔ̨ nwɛi; ə həɠə gboloyá ɓa, ə həli la nɔi ɲɛn ma voló kulɔi pələ.

⁸ Nwɛi nąą ka tii Israɛlə nwɔ lɔi hu. A kɛ ti, nwɔ́ tɔɔɓɛlaai di hva kɛa nɔi lonnii hulu; di kaa pai lɔi tɛɛi Israɛlə nwɔ pɛlɛ́i pɔ, yɛ bələi di ɲąąkwɛlɛ la a gwəliɠaa laa.»

Dɔɔɓɛlaa di wɔ mąą tíiɠaa

⁹ Mɛ̨nį kəlee ŋą Hééɓomun Yálá woo ka, yɛ: «Aa tɛɛ ɲɛ̨n ɉu, Israɛlə ɲɛ̨itɔwɔ nuą, 'ká kpəla wea da toomɛ̨i kɛɛ ɓa; ka túwɔ a tɛ̨ą da tələnmolaa. Ka hvo kɛa hee nwɔ́ lɔi lonnii mɛ̨i, Mɛ̨nį kəlee ŋą Hééɓomun Yálái woo li.

¹⁰ «'Ká ɉɛn gɔɔn ɉɛnŋąą kɛ a bɛliɛ ɉu, gəgənŋaa di kɛ a di pɛliɛ ɉu.

¹¹ Efa da batə di pɛli a di kee, da omɛrə tɔ̨nɔ̨ ɲąąkwɛlɛ ɉu pow, ɉeei tɔ̨nɔ̨ ə pɛli ə kɛ a batə tɔ̨nɔ̨, dɔ̨nɔ̨ ə pɛli kɛi a efa tɔ̨nɔ̨; omɛrə ɓə di kaa pai di kɔ́ɔn ɉii mą, diɛ di hu kɛnɛ̨ pələ kaa.

¹² Siklə ə kɛ a gera pow hveelɛ, siklə pow hveelɛ pɛlɛɛ siklə pow hveelɛ kɔ́w lɔɔli ɓa, ə pɛlɛ siklə pow kɔ́w lɔɔli ɓa, di kɛ a mine tɔ̨nɔ̨.

¹³ «Yii ka káá pai gulɔi ɉɛnŋaa hu, yii a kɛ a ɉaláá hɛnŋaa, ya ka: mɔ̨nun a omɛrə laa hvɛɛ, ka efa mɔ̨nun ɲąąkwɛlɛ ɉu mɛ̨ida, ka mɛla tɔ̨nɔ̨ tɛɛ. Efa ɲąąkwɛlɛɛ ɉu mɛ̨ida, bələ tɔ̨nɔ̨ omɛrə kpai hu

¹⁴ Wulɔ kɔ́ɔn bələ ka: Nwulɔ gəgən ɲąą pow, gəgən ɲąą tɔ̨nɔ̨.

¹⁵ Ɓɛlaa kpulu nwun veelɛ a kɛ Israɛlə kpomói, ɓɛlaa tɔ̨nɔ̨ a kɛ a Yálá kɔ́ hɛn; a haláái da gəlee kələn, da liilaa haláá; a nuą mąąhəɠə mɛ̨nį. Mɛ̨nį kəlee ŋą Hééɓomun Yálá woo li.

¹⁶ Nɔi lonnii kəlee da nįįhɔ̨nwɔ̨i tii kulɔ a tɔɔmun nwɔɔ.

¹⁷ «Dɔɔmun nwųɔ tiɛ̨ ɓaa; haláá da gəlee kələn, Yálá kɔ́ haláá, nwulɔ da nɔɔ, a ɉiɛ kulɔ yələɠaa; a ɲąnin nįnɛ̨ hɛli yələɠaa, Israɛlə nwɔ pɛlɛ́i nwɔ hɛli yələɠaa kəlee. Ya ɓə a nɛ̨ŋɛ̨n mąąhvaalɛɛ haláá kulɔ, da gɔ́ mɛ̨nį, da kwɛli hvilɛn mɛ̨nį ma, da nii laa haláá; diɛ Israɛlə nwɔ pɛlɛ́i mąąhəɠə la.

¹⁸ Mɛ̨nį kəlee ŋą Hééɓomun Yálá woo ka, yɛ: Ɲąnįn dɔlɔɔ nwɔ hvóló dɔlɔɔ yələ, yá nįŋɛ̨ lon ɉəɠə yii pɔɔ hvo mą, ə́ ɉaláá kulɔi mąą haláá kulɔ la.

¹⁹ Ɉaláá laa həli mun a ɉuwɔi tii ɲąmą həɠə, ə ɉiɛ Yálá hee pɛlɛ́ gbon nwuluɠaa diɛ, da ɉaláá konwolon ɉee hɛn nwəli la nąąn ɓa, ə mą nwɔ̨nɔ̨ kɛ ɲįmąn mu gbon nwulu ɉu pələ nwɛi ɓa.

²⁰ Ɲąnin nwɔ hvóló mɛ̨ihveelɛ yələ, da mɛ̨nį tɔ̨nɔ̨i tii ta kɛ lɔ nwɔ̨nɔ̨, nuąi daa nɛ̨ŋɛ̨n ɉəɠə di hvo naa li di kwəi, da yiiɠaai daa nɛ̨ŋɛ̨n ɉəɠə di tɛɠii di mąą mɛ̨nį ɓa. 'Ká bɛlɛ́ mąąhəɠə haláá kulɔ tii.

²¹ Ɲąnin dɔlɔɔ nwɔ hvóló pow kɔ́w nąąn ɲələ, a kɛ a ka wɔ pakə hɛli; ka bu hvóló mɛ̨ihveelɛ yeemu, lɛɠɛi dɛ hɛn və ɉu, ya ɓə ka mįi a mąą yələ.

²² Mąą yələ, dɔɔmun a nɛ̨ŋɛ̨n mąąhvaalɛɛ ɉaláá kulɔ, a nįŋɛ̨ hilɛ tɔ̨nɔ̨, yaa da nɔi lonnii kəlee di mąą mɛ̨nį ɓa.

²³ Voló mɛ̨ihveelɛi tii yeemu, a haláá hɛn da gəlee kələn gulɔ, a Yai-Laa nwɔɔ; nįŋɛ̨ hilɛ mɛ̨ihveelɛ da ɓɛlaa hilɛ mɛ̨ihveelɛ, yii pɔɔ hva kɛ diɛ; hvóló tɛi tɛi yeemu; da nɛ̨ŋɛ̨n mąąhvaalɛɛ haláá, yii a gulɔ a ɓoli hilɛ tɔ̨nɔ̨ hvóló tɛi tɛi kəlee.

²⁴ A Yálá kɔ́ a lɛɠɛ hunwɔ, nįŋɛ̨ hilɛ tɔ̨nɔ̨ efa tɔ̨nɔ̨; ɓɛlaa hilɛ tɔ̨nɔ̨, efa tɔ̨nɔ̨, nwulɔ nwɛi, efa tɔ̨nɔ̨ hin tɔ̨nɔ̨ wulɔ hu.

²⁵ Ɲąnin mɛ̨ihveelɛnąą nwɔ hvóló pow kɔ́w lɔɔli yələ, a gɛ lɔ nwɔ̨nɔ̨ tii, ɉɛli kɛnɛ̨ pu mɛ̨nį hu, hvóló mɛ̨ihveelɛ yeemu. Gɛ pələ a kɛ lɔ tanɔ̨n nɛ̨ŋɛ̨n mąąhvaalɛɛ haláá mɛ̨nį hu, ə mą kɛ ɉaláá yii da gəlee kələn, da Yálá kɔ́ haláá, da nwulɔ tɛɛ mɛ̨nį.»