Izikiɛ 44 - Yálá laawoo hɛɓɛ (dc)Bɛlɛ́ laaləi voló ɓɛlai pələ, tɔɔmun nwɛi li 1 Ɉulɔnui tii ə pənə ə pa a ɲą́ą́ bɛlɛ́ mąąhəɠɛɛ mu, bɛlɛ́ laaləi tii gaa ɉu pələ nií la, yai ti ɲɛ̨i həɛi voló ɓɛlai pələ, naa kpulɔɔi kɛ. 2 Yai-Laa yɛ mą́ą́ bɛlɛ́ laaləi yii, naa kaa pai lɛɛi a gbulɔɔ, di hva naa ɓo, mąąhɔlɔɓo nąą pələ ɓə Yai-Laa, Israɛlə nwɔ Yálá ə lɔ la; naa a lɛɛ a gbulɔɔ. 3 Kɛlaa tɔɔmun nwɛi, yɛ bələi gaa la a tɔɔmun, nąą ɓə gaa pai heei laa yɛ kɔ̨nɔ̨n mįi Yai-Laa lííla. Gaa pai kɛi lɔi a ɲimɛn mu pɛlɛ laaləi pələ, yɛ kulɔ a bələ yii ti. Nwɛ̨ąą di hva pɛli lɔi Yálá hee pɛlɛ́ mu 4 Nui tii ə nɔ́ voló ɓɛlai pələ pɛlɛ́ laaləi; bɛlɛ́ ɲɛ̨i lɛlɛɛ kɛɛnąą pələ. Ŋą́ ɲɛ̨i hee, ŋą́ Yai-Laa Mąąɲinɛ̨n gaa, aa kɛ Yai-Laa nwɔ pɛlɛ́i laa hvɛɛ, ŋą́ pɛlɛ nɔi ɓa, nííɓa. 5 Yai-Laa yɛ mą́ą́: ə́ kili lɛɛ mɛ̨nįɠaa ŋɛ̨i kəlee hu, ə́ ɲɛ̨i hee mɛ̨nįɠaai kpɔ gáá pai moi yɛ́, yɛ hvilɛn na Yai-Laa nwɔ Pɛlɛ́i mąą tɔnŋą́ą́ ɓa, da nąą mɛ̨nįɠaa kɛ pələ, ə́ wəli tɔɔ gəlee ɓa, nu lɔiɠaa, da nu kulɔiɠaa gɛɛnąą mąąhəɠɛɛ ɓa; yili kpaɠala ə lɛɛ yɛ́. 6 'Mó gulɔ nwoomu-nuąi tii diɛ, Israɛlə nwɔ pɛlɛ́i ɓa, yɛ́ mą: «Mɛ̨ni kəlee ŋą Hééɓomun Yálá woo ka, yɛ: Ká wɔ tuwɔ pələ ɲɔ̨n a tɛɛ kɛa ɲɛn ɉu, Israɛlə nwɔ pɛlɛ́i. 7 Kɛ́nɛ̨ kpolɔwaɠaai di kili mąą kuu hvo kɛ li, da di kɔ́lɔ hvo hee li kɛ́nɛ̨ ɓa, diɛi a nwɛ̨ą, ká kɛ lɔi a diɛ nwɔ́ kɛɛnąą mąąhəɠɛɛi ɓa, diɛ nwɔ́ pɛlɛ́i laa pu. Ká kɛ gɔ́nɔn naa həli, ɉuwɔ wulɔ da ɲąmą, ká kɛ nwɔ́ mįnɛ̨i hukalai a ka wɔ ɓowo túwɔɠaai tii. 8 Bələi kɛ mąąnɛ̨ɛ̨ ka nwɔ́ hɛn mąąhəɠɛɛɠaa hon na, ka hvo di hon ni tii; kɛlaa yaamun, nwɛ̨ąą ɓə ka di hee diɛ nwɔ́ kólóɠaai kɛ, nwɔ́ kɛɛnąą mąąhəɠɛɛi ɓa. 9 Mɛ̨nįi Mɛ̨nį kəlee ŋą Hééɓomun Yálá kaa moi, ya ka: Nwɛ̨ąi lɔpee a kɛ́nɛ̨ kpolɔwa, gili mąą kuu hvo kɛ li, da kɛ́nɛ̨ kpolɔwa gɔlɔ pɔ pələ, hva lɔ nwɔ́ kɛɛnąą mąąhəɠɛɛi ɓa; nwɛ̨ąąi tii Israɛlə lonnii lɔwai, di ta lɔpee hva lɔ laa.» Leviɠaa mąą mɛ̨nį 10 «Leviɠaai tii di mąąkwɛa mą́ą́, a ɓɛlɔwai Israɛlə ə lan na, di lan, diɛ di mąąkwɛa mą́ą́ di hvilɛn ŋąą di wɔ haliɠaai pulu, di kaa pai di wɔ nɛ̨ŋɛ̨n diɛ̨i həɠəi. 11 Di kaa pai kɛi nwɔ́ kɛɛnąą mąąhəɠɛɛi ɓa a tínuą; diɛ di ɲɛ̨i kɛ bɛlɛ́ laaləiɠaa diɛ, di ɓo a bɛlɛ́n góló kɛ nuą, diɛ ɓə pai kɛi gɔ́ haláá taatɛlɛɛɠaa nwun deei, da nɔi lonnii di wɔ halááɠaai. Di kaa pai kɛi laa nɔi lonnii mąą mɛ̨nį ɲɛ̨i kulɔ mɛ̨nį ɓa. 12 Mąąhɔlɔɓo, di kɛi di mąą mɛ̨nį ɲɛ̨i kulɔ haliɠaa ɲɛ̨i ɓa; ɛlɛɛ, di Israɛlə nwɔ pɛlɛ́i yee lɔ nɛ̨ŋɛ̨n ɉu; yili mąą mɛ̨nį ɓa, gáá di hutɔɔi diɛ di wɔ nɛ̨ŋɛ̨n ɉu mɔ̨nɔ̨ mįi. Mɛ̨nį kəlee ŋą Hééɓomun Yálá woo li. 13 Di hvo pai lɛɠɛi mą́ą́, diɛ kɛ a nwɔ́ haláá laa həli nuą ta, di hvo pai lɛɠɛi nwɔ́ hɛn mąąhəɠɛɛɠaai diɛ; diɛi tii a ɉɛn mąąhəɠɛɛ kpɛa kpɛai mɛlɛkpɛɛmą. Di kaa pai di wɔ kilikpɛɛgwəi mɛ̨nįɠaai tii ɉu mɔ̨nɔ̨ mįi 14 Gáá di heei bɛlɛ́n gólóɠaa nwun na, yii kpɔ hvilɛn na nwɔ́ kólói ɓa laa, yili kəlee.» Ɉaláá laa həli nuą mąą mɛ̨nį 15 «Ɉaláá laa həli nuą, diɛi a Levi huwu, a Sadɔkə lonnii, diɛi tii kɛi nwɔ́ kɛɛnąą mąąhəɠɛɛi mąą kólóɠaa kɛ, ɓɛlɔwai Israɛlə lonnii di lan na, diɛ di mąą kwɛa mą́ą́, diɛ ɓə pai kɛi di mąą lɛɠɛi mą́ą́, diɛ mą́ą́ mɛ̨nįɠaa ɲɛ̨i kulɔ. Di kaa pai kɛi tɔɔni nííla; di ɉuwɔ wulɔ da ɲąmą di laa həli mą́ą́. Mɛ̨nį kəlee ŋą Hééɓomun Yálá woo li. 16 Diɛ ɓə pai kɛi lɔi nwɔ́ kɛɛnąą maahəɠɛi ɓa, diɛ lɛɠɛ nwɔ́ haláá kulɔi ɓa; diɛ mą́ą́ mɛ̨nį ɲɛ̨i kulɔ; diɛ nwɔ́ tɔ́nŋaai maa yɛlɛ kɛ. 17 Da tɛɛ bɛlɛ́ laaləi diɛ lɔ ɲiman mu da bɛlɛ́n, da həɠə kwəlɛɛ too di kwąną, di hvo huwɔ ləɠa həɠə too di kwąną; ɓɛlɔwai da kɛi ɉaláá mɛ̨nį kɛ laa ɲiman mu, da bɛlɛ́n. 18 Həɠə ɓɛla kwəlɛɛɠaa ɓə da ɲili di nwun ma, bɛlɛ́n gwəlɛɛɠaa ə ɓo diɛ, hɛ̨ą yili kɔ́lɔ hva kɛ diɛ, hvɛnɛya mɛ̨nį ɓa. 19 Da kɛi kulɔ ɲiman mu ɲɛnɛ̨ɛ̨ pələ, nuą pɔ pələ, ɉəɠəɠaai tii kɛ di kwąną diɛ ɉaláá kulɔ lai, mąąnɛ̨ɛ̨ di di kulɔ di kwąną; di di laa gɛɛnąą mąąhəɠɛɛ nąą ta. Di həɠə takpɛliɠaa həɠə, di hvo pa ləi nuą mąąhəɠə a di mąąhəɠəɠaa. 20 Di hvo di nwun bu, di hvo di nwun nɛɛ laa hvo kpili; kɛlaa, da di nwu nəɠa mɛ̨i tee a nɛlɛɛ. 21 Haláá laa həli mun lɔpee ta hvo lɔɔ kpələ, ɓɛlɔwai gaa pai lɔi la ɲįmąn mu bɛlɛ́n bələ. 22 Di hvo kalanin ɉəɠə a di nɛ̨ą, da nɛ̨ɛ̨nui daa gulɔ lɔwɔi. Hvo kɛi lɔ nɛ̨ɛ̨gbɛlaɠaa, a Israɛlə huwu, kɛlaa da pɛli ɉaláá laa həli mun da nwɔ kalanin ɉəɠəi a di nɛ̨ą. 23 «Ɉɛn gaa a mąąhəɠɛɛ, da yii mąą hvo həɠə li, diɛ ɓə da gulɔ nɔwai lɛ nuą diɛ; ə mą kɛ, yii mąąliɓiɛ da yii mąą hvo liɓi li. 24 Kiti mɛ̨nį a kulɔ, diɛ ɓə a giti tee nuą; mąąnɛ̨ɛ̨ di kiti tee, yɛ bələi ŋą́ mąą tɔ́n naa la. Mąą nɛ̨ɛ̨ di nwɔ́ tiɓoɠaa da gwə́i mɛ̨nįɠaa kəlee pɔ mɛ̨nį kɛ nwɔ́ hɛliɠaai kəlee hu; diɛ nwɔ́ hvitɔɔ yələɠaa kaa a hvoló mąąhəɠɛɛɠaa. 25 «Di hvo lɔ nu powa pɔ, da ləi di kpɔɔ mąąliɓi; kɛlaa, nu nąn mɛ̨nį hu, nee mɛ̨nį hu, non ɉulɔnu, non nɛ̨ɛ̨nu, nąn non, mąąhala yii hvo hilɛtai kɛ li, da pɛli di kpɔɔ mąąliɓii yili hu. 26 Mąą nu a mąąhəɠə, da hvóló mɛ̨ihveelɛ tɛɛ bɔ. 27 Yili pulu ɲələi a lɔ la gɛɛnąą mąąhəɠɛɛ ɓa ɲįmąn mu bɛlɛ́n bələ, yɛ ɉaláá mɛ̨nį kɛ gɛɛnąą mąąhəɠɛɛ ɓa, a nwɔ nɛ̨ŋɛ̨n mąąhvaalɛɛ haláá kulɔ. Mɛ̨nį kəlee ŋą Hééɓomun Yálá woo li. 28 Di kwɛlin gaa pai kɛi di yəi, ɲą́ą́ ɓə gáá a di kwɛlin; ka hvo lɔi tɛɛ di pɔ Israɛlə lɔi hu, ɲą́ą́ ɓə ɓaa di wɔ lɔi. 29 Ɉɛnŋaai da gɔ́ la: nɛ̨ŋɛ̨n mąąhvaalɛɛ haláá huwɔ, da nu pɔɔ ŋą pɛli haláá huwɔ, diɛ ɓə pai kɛi mįi. Hɛn lɔpee mąąnɛ̨ɛ̨ ə kɛ a nwɔ́ɔ́ Israɛlə lɔi hu, di wɔɔ li. 30 Hihɛn gəlee má tɔlɔɔ, hɛn lɔpee ka ɉəɠə taatɛlɛɛɠaa hu, ka kɛ kólóɠaa hu, ə kɛ a haláá hɛn lɔpee, ka dɛɛ ɉaláá laa həli mun bɔ; lúwɔ́ ə pɛli yɛɛi ə́ wɔ pɛlɛ́i mɛ̨i. 31 Huwɔi aa haa gbɔwɔ ɓa, a wala kɛ tii daa ɉu ɓɛla, ə kɛ a nwɛ̨nį, ə kɛ a huwɔ takpɛli, ɉaláá kulɔ nuą di hvo da mįi.» |