Izikiɛ 43 - Yálá laawoo hɛɓɛ (dc)Yálá ə pənə ə pa ɉee pɛlɛ́ mu 1 Ə li a ɲą́ą́, bɛlɛ́ laaləi yii tii kɛ ɲɛ̨i heɛ voló kulɔi pələ. 2 Ŋą́ Israɛlə nwɔ Yálá nwɔ mąąwiɛlaa kaa, yɛ həɠə voló kulɔi pələ, yɛ pa a din gɛnɛ̨ɛ, yɛ ya hvɛɛ tin. Lɔi mɛ̨i ə pɔ̨nɔ̨ a nwɔ mąąwiɛlaa. 3 Ə kɛ yɛ nu a kɛli hį́i kaa, yɛ ɉį́i tii ta ŋą́ gaa; a yii tii ŋą́ gaa ɓɛlɔwai ə paa la daa woloi. Ɉį́iɠaai tii kulaa kɛ, yii ta ŋą́ gaa Kebarə yá kwɛlɛ mą. Nąąlɔwai, ŋą́ pɛlɛ níí ɓa. 4 Yai-Laa nwɔ mąąwiɛ ə lɔ Yálá hee pɛlɛ́ mu, yɛ həɠə bɛlɛ́ laaləi tii kɛ ɲɛ̨i heɛ voló kulɔi pələi. 5 Yálá nwɔ Kilii ə ɉə́ɠə ə li a ɲą́ą́, gwəli hɛ̨ąi tii ɉu pələ ma, Yai-Laa nwɔ mąąwiɛ aa kɛ bɛlɛ́i tii laa hvɛɛ. 6 Ɛlɛɛ ŋą́ nu woo mąn, yɛ hvaa bɔ́, nwoo yɛ kulɔ bɛlɛ́n bələ, nąąlɔwai, nui tii tɔɔ kɛ gwɛ́lɛ. 7 Nwooi tii yɛ mą́ą́: Hulɔnu lon, nwɔ́ tɔɔkpəlin hvilɛn ɉii ka, da ɓɛi gáá pai gɔ́wɔ tɔɔi laa; nąą ɓə gáá pai heei laa, Israɛlə lonnii lɔwai a yələ kəlee da nwɔɔ. Israɛlə nwɔ pɛlɛ́i hva kɛa náá mąąhəɠɛɛi mąąliɓi, yaa mąn, ə mą kɛ nwɔ tɔɔɓɛlaa da di wɔ túwɔ pələ ɲɔ̨nŋaa; ə mą nwɔ̨nɔ̨ kɛ nwɔ tɔɔɓɛlaa powaɠaa, da di kámąɠaa. 8 Daa di wɔ pɛlɛ́i laaləi kulɔ, nwɔ́ pɛlɛ́i laaləi ɲɛ̨itɔwɔ, di wɔ kpon nwuluɠaai di ɓo nwɛ́iɠaai kwɛlɛ; kwa diɛni ku kpɔn ŋąą pɛlɛ́ nwąną tɔ̨nɔ̨ ɓa. Di náá mąąhəɠɛɛ mąąliɓi, a duwɔ pələ ɲɔ̨nŋaai di kɛi gulɔi; yili ɓə gɛ, gɛ́ di nwun na pili a nwɔ́ liiholi. 9 Yiihu kɛa, di kaa pai di wɔ túwɔ pələ ɲɔ̨nŋaai maakwɛai mą́ą́, da di wɔ tɔɔɓɛlaaɠaai powaɠaa, gɛ́ pɛli kɛa heei di lɔwai a yələ kəlee mɛ̨nį. 10 Ɛlɛɛ, yɛ́ hulɔnu lon, Yálá hee pɛlɛ́i ŋɛ̨i kiliin Israɛlə nwɔ pɛlɛ́i ɓa, ə gɛ, di nwumɛ̨ mɛ̨nįɠaai di gɛ, hvo pɛli li ɉu mąą mɛ̨nį ɓa; di gɛ pələ kɔ́ɔn. 11 Akɛ da nwumɛ̨ di kɛ mɛ̨nįɠaa hu, bɛlɛ́n mɛ̨nįɠaa kɛ pələ lɛ diɛ, dɔɔ pələ, nuą lɔiɠaa, di kulɔiɠaa; ɉukwɛlɛ pələ, ɉee kpəlin na kɛ pələ, nąą mɛ̨nįɠaa kɛ pələ. Gəlee pɛ̨ɛ̨ di ɲɛ̨i ɓa, diɛ pɛli ɉee kpəlin na kɛ pələ kɔ́lɔn ɉii, da nąą mɛ̨nįɠaa kɛ pələ, ɛlɛɛ, diɛ di pɔ mɛ̨nį kɛ. 12 Bɛlɛ́ mąą tɔ́n ga: Ɲee ton na, da nɔi kpɔ tii gwɛlɛ nąą kəlee, ə mąątínɛ̨n ə doo gee hu, mąąhəɠɛɛ kpɔ kɛnɛ̨. Bɛlɛ́ mąą tɔ́n ga tii. Ɉaláá kulɔi da Ɉaláá hɛnŋaa 13 Ɉaláá kulɔi kɛnɛ̨ pələ ka, yee tɔɔɉu, nu yee ɓáá ɲą tɔ̨nɔ̨ pɛlɛɛ mą. Nowa ɲąą a kɛnɛ̨ a yee tɔɔɉu, di gwɛlɛ laa yɛ mąątínɛ̨n, yɛ doo gee hu; ɲąą kɛnɛ̨ɛ a yee tɔɔɉu tɔ̨nɔ̨. Ɉaláá kulɔi dɔɔmɛ̨i: 14 Ə həɠə nɔi ɓa, ə həli la gbono ɓa, mu pələ, yee tɔɔɉu hveelɛɛ, ɲąą kɛnɛ̨ɛ a yee tɔɔɉu tɔ̨nɔ̨. Ə həɠə gbono logolo ɓa, ə həli la gɛnɛ̨mun ma, yee tɔɔɉu nąąn, ɲąą kɛnɛ̨ɛ a yee tɔɔɉu tɔ̨nɔ̨. 15 Nwɔ̨n dinii, ə ɓo a yee tɔɔɉu nąąn, nwɔ̨n dinii mɛ̨i pələ, nwəli la, mįnɛ̨ɠaa di kɛ mą nąąn. 16 Nwɔ̨n dinii ə kɛ a yee tɔɔɉu pow kɔ́w hveelɛ, gwɛa pələ hu da ɲąą kɛnɛ̨ pələ hu naa kəlee pɛliɛ a gee. 17 Ɉaláá kulɔi hvilɛn ɉii, ə kɛ a yee tɔɔɉu pow kɔ́w nąąn, gwɛa pələ hu, ɲąą kɛnɛ̨ pələ ə ɓo pow kɔ́w nąąn. Nwəli kwɛlɛ laai kɛ nąą kəlee yɛ mąątinɛ̨n yɛ doo gee hu; ə ɓo a yee tɔɔɉu kpulɔ, nɔwai a mąątinɛ̨n yɛ doo gee hu, yee tɔɔɉu tɔ̨nɔ̨. Ɓɛ pələi da tinɛ̨n na ɲɛ̨i heɛ voló kulɔi pələ. 18 Ɉulɔnui tii yɛ mą́ą́: hulənu lon, Mɛ̨nį kəlee ŋą Hééɓomun Yálá woo ka: ɲələi di kaa pai ɉaláá kulɔi tɔɔi la, nąą mąą tɔ́nŋąą ka; Yálá kɔ́ haláá kulɔ mɛ̨nį ɓa mɛ̨i, diɛ ɲąmą pu laa. 19 Yai-Laa woo ka, yɛ: nįŋɛ̨ hilɛ gbɔn dɛɛ ɉaláá laa həli nuą, Levi lonnii pɔ, nɛ̨ŋɛ̨n mąąhvaalɛ haláá kulɔ mɛ̨nį ɓa; diɛi di kaa Sadɔkə huwu hu, diɛ kóló kɛ mą́ą́. 20 Ə́ ɲąmą ta həɠə ə́ ɉiɛ ɉaláá kulɔi mįnɛ̨ nąąn ma, da vilən ɉɛn gɔwɔ nąąn ma, ɛlɛɛ, ə́ da hiɛ nwəlila nąą kəlee ə́ dinɛn mą ə́ doo gee hu. Bələ ɓə yá nɛ̨ŋɛ̨n gulɔ la ɉaláá kulɔi ɓa; yɛ́ mąąhəɠə. 21 Nįŋɛ̨i tii kɛ a nɛ̨ŋɛ̨n ɉaláá hɛn, yá ɉəɠə, di gələn ɓɛi mąąnɛɛ di gələn naa bɛlɛ́n, kɛlaa hva kɛ gɛɛnąą mąąhəɠɛɛ ɓa. 22 Vóló veelɛ yələ, yá pa a ɓolu hilɛi kpɔi hva kɛ mą; ə kɛ a yii da nɛ̨ŋɛ̨n gulɔ la ɉaláá kulɔi ɓa; yɛ bələi ka niŋɛ̨ lon nwɛi kɛ la. 23 Yá kpɛɛ a nɛ̨ŋɛ̨n gulɔ mąą ɉaláá kulaai, ə́ pa a niŋɛ̨ gbɔn yii kpɔi hva kɛ mą, ə́ bɛlɛ́ ɓɛlaa hilɛ tɔ̨nɔ̨ ɓa yii kpɔi hva kɛ mą; ə́ ɉəɠə daatɛlɛɛ pɛlɛɛɠaa lɔwai. 24 Ə́ pa a diɛ, ə́ di laa həli Yai-Laa ɓa, ɉaláá laa həli nuą di kpolo kpɛ̨ŋɛ̨n diɛ, di di kulɔ a haláá Yai-Laa ɓa. 25 Hvóló mɛ̨ihveelɛ yee mu, ə́ kaa pai kɛi ɓolu hilɛ kulɔi a nɛ̨ŋɛ̨n mąąhvaalɛɛ haláá, hvóló kəlee di kaa pai niŋɛ̨ gbɔn da mɛlaa hilɛ haláái tii kulɔi kpɔi hva kɛ diɛ, yii da ɉəɠə daatɛlɛɛ pɛlɛɛɠaa lɔwai. 26 Hvóló mɛ̨ihveelɛ yee mu, da kɛi ɉaláá kulɔi waa haláá kulɔi, diɛ nąą mąąhəɠə la, diɛ kɛa goló kpala tɔɔ mɛ̨i. 27 Volóɠaai tii da tɛɛi, voló mɛ̨ihaaɓa yələ da voló yii tiiɠaai ɉaláá laa həli nuą da ka wɔ haláái laa həli la ɉaláái da gəlee kələn, ə pɛlɛ la ka wɔ liilaa halááɠaai diɛ, di gulɔ ɉaláá kulɔi, nąąlɔwai ŋą́ ɲɛ̨i lɛlɛɛ hee kɛa kaa. Mɛ̨nį kəlee ŋą Hééɓomun Yálá woo li. |