Izikiɛ 42 - Yálá laawoo hɛɓɛ (dc)

Yálá hee pɛlɛ́ mąą mɛ̨nįɠaa

¹ Ɉulɔnui tii ə gúlɔ ɲɛnɛ̨ɛ̨ pələ ɲįmąn mu, yii tii ɲələi pələ; ə pənə ə lɔ a ɲą́ą́ bɛlɛ́ yiiɠaai tii ɲɛ̨i heɛ ɲələi pələ, mu.

² Bɛlɛ ɲɛ̨i tɔwɔ kwɛa yee ə kɛ a yee tɔɔɉu nwun dɔ̨nɔ̨, bɛlɛ́ laaləi yii tii kɛ ɲələi pələ bɔ pələ; ɲąą kɛnɛ̨ yee ə ɓo a yee tɔɔɉu pow lɔɔli.

³ Ɓɛi nuą di kɛi tɔɔ laa, nąą nwɔ yee tɔɔɉu pow hveelɛi ɲɛ̨i tɔwɔ, ɛlɛɛ nuą tɔɔi yii ŋɛ̨i kɛ ɲɛnɛ̨ɛ̨ pələ mɛ̨i kɛɛ a pɔlɔ; gəlee nwolo ə kɛ ɉu gee mɛ̨i, ɉeɛ gee mɛ̨i haaɓa.

⁴ Pələ ə kɛ bɛlɛ́ɠaa ɲɛ̨i tɔwɔ, ɲąą kɛnɛ̨ɛ kɛ a yee tɔɔɉu pow, gwɛa yee ə ɓo a yee tɔɔ ɉu nwun dɔ̨nɔ̨. Di laaləi heɛ kɛ ɲələi pələ.

⁵ Ɲələi pɛlɛ́ɠaa mu pɛlɛɛ pɛlɛɛ kɛ, mąąhɔlɔɓo nwoloɠaa di kɛi da kulɔ mą; dɛɛ bɛlɛ́ mu pələ nwɛiɠaa da yiiɠaai kɛ hɛ̨ąi pələ nwɛiɠaai diɛ.

⁶ Bɛlɛ́ɠaai tii heɛi kɛ gee mɛ̨i haaɓa, di wɔ dɔɔmuɠaa da nuą tɔɔi di wɔ dɔɔmuɠaa di hvo kɛ a huwu tɔ̨nɔ̨. Nwɛi pɛlɛɛ pɛlɛɛi kɛ bɛlɛ́ɠaai kɛ ɉɛ̨ąi nwɛiɠaai diɛ, ə həɠə nɔi ɓa, yɛ tɛ ɲələi.

⁷ Bɛlɛ́ nwąną ɲɛnɛ̨ɛ̨ pələ pɛliɛ lɔ kɛ bɛlɛ́ɠaa diɛ, yɛ kulɔ la nuą tɔɔi ɲɛnɛ̨ɛ̨ pələ. Bɛlɛ́ɠaa laaləi kwɛa yee ə kɛ a yee tɔɔɉu pow lɔɔli.

⁸ Mąąhɔlɔɓo, bɛlɛ́ yiiɠaai kɛ di laa heɛ nuą tɔɔi ɲɛnɛ̨ɛ̨ pələ ɓa, di kɛ a yee tɔɔɉu pow lɔɔli; kɛlaa, yii a li bɛlɛ́ kɛnɛ̨ɛ mu pələ, ə kɛ a yee tɔɔɉu nwun dɔ̨nɔ̨.

⁹ Bɛlɛ́ɠaai tii mu pələ, naaləi ta ə kɛi kulɔ voló həɠəi pələ, yɛ kulɔ ɲiman mu ɲɛnɛ̨ɛ̨ pələ.

¹⁰ Bɛlɛ́ taɠaa di kɛ ɲiman bɛlɛ́ nwąną ɓa, voló həɠəi pələ, gwəli hɛ̨ąi da bɛlɛ́ di tənən ma.

¹¹ Pələ ə kɛ di ɲɛ̨i tɔwɔ, kpɔlɔ yɛ bələi bɛlɛ́ yiiɠaai tii kɛ ɲələi pələ, di kɛ la; di kwɛa yee ə kɛ lɔ tanɔ̨n da di ɲąą kɛnɛ̨ yee, di kɛ pələ, da di laaləi kɛ pələ kəlee ə kɛ lɔ tanɔ̨n.

¹² Di kɛ pələ ə kɛ lɔ yɛ bɛlɛ́ɠaai kɛ ɉɛɠɛɛ pələ nwolo ta ə kɛ bələi ŋɛ̨i a li daa mąąkpɛ hį́i tii voló həɠəi pələ bɔ pələ.

¹³ Ɉulɔnui tii yɛ mą́ą́: Bɛlɛ́ yiiɠaai ŋɛ̨i ɲələi pələ, da yiiɠaai ɉɛɠɛɛ pələ di ɲɛ̨i heɛ gwəli hɛ̨ą ɓa, di kaa a kɛnąą mąąhəɠɛɛ, mąąhɔlɔɓo, nąą ɓə ɉaláá laahəli nuąi ŋɛ̨i da lɛɠɛ Yai-Laa ɓa da ɉɛnŋaa mąąhəɠɛɛɠaa mįi laa. Nąą ɓə ɉɛnŋaai kpɔ di mąąhəɠɛɛ kɛnɛ̨, da di hee laa, diɛ ɓaa: Yálá kɔ́ hɛn, nɛ̨ŋɛ̨n mąąhvaalɛɛ haláá hɛn, ɛlɛɛ da nu pɔɔŋa pɛli haláá. Mąąhɔlɔɓo, kɛɛnąą mąąhəɠɛɛ li.

¹⁴ Ɓɛlɔwai ɉaláá laahəli nuą da lɔ la gɛɛnąą mąąhəɠɛɛ ɓa, di hva kɛa pənə di hvo kulɔ ɲiman mu, hvo kɛi da ɉaláá kulɔ həɠəɠaa kulɔ diɛ, di di pu, mąąhɔlɔɓo di mąąhəɠɛɛi, nąąlɔwai, da həɠə takpɛli too kɛa di kwąną, yili pulu, da pɛli kɛa di kulɔ ɓɛi nuą kaa laa.

¹⁵ Ɉulɔnui tii ə ɉɛnŋąą kɔ́ɔn ŋąą laa kulɔ kɛa bɛlɛ́n bələ, kwa yaa ku kulɔ ɲɛnɛ̨ɛ̨ pələ, a bələi tii ɲɛ̨i heɛ voló həɠəi pələ; ə nąą kəlee kɔ́ɔn.

¹⁶ Ə voló həɠəi pələ kɔ́ɔn, a nwulu kpiɛn ti ə kɛi ɉɛnŋaa kɔ́ɔn nai, ə mąątįnɛ̨n ə doo gee hu, ə kɛ a dunwɔ̨n tii ɲąą nwun nɔɔli.

¹⁷ Ə ɲələi pələ kɔ́ɔn, ə kɛ a dunwɔ̨n tii ɲąą nwun nɔɔli, ə mąątínɛ̨n ə doo gee hu.

¹⁸ Ə Ɉɛɠɛɛ pələ kɔ́ɔn, ə kɛ a dunwɔ̨n tii ɲąą nwun nɔɔli.

¹⁹ Ə naa kulɔ kɛa gboloyá pɔ pələ, ə dunwɔ̨n tii ɲąą nwun nɔɔli kɔ́ɔn nąą bələ.

²⁰ Ə bɛlɛ́ kɔ́ɔn gea bomo nąąn ma, gwɛa yee ə kɛ a nwulu kpiɛn tii nwun nɔɔli; ɲąą kɛnɛ̨ yee ə kɛ a nwun nɔɔli; Bɛlɛ́ nwąnąi tii ɓə kɛi ɉɛn mąąhəɠɛɛɠaa da hɛn dakpɛliɠaa di ɓɛla ɓo.