Izikiɛ 41 - Yálá laawoo hɛɓɛ (dc)1 Ə li a ɲą́ą́ bɛlɛ́ kɛnɛ̨ɛ mu, ə bɛlɛ́ dɔɔmuɠaa kɔ́ɔn, di ɲąą kɛnɛ̨ yee ə ɓo a yee tɔɔɉu haaɓa ɓɛ pələ, da ɓɛ pələ. Yii kɛ a ɉəɠə pɛlɛ́ ɲąą kɛnɛ̨ yee. 2 Nuą lɔi pələ ɲąą kɛnɛ̨ɛ kɛ a yee tɔɔɉu pow; bələ tɔ̨nɔ̨ yee tɔɔɉu lɔɔli, bələ tɔ̨nɔ̨ yee tɔɔɉu lɔɔli. Ə bɛlɛ́ kwɛa yee kɔ́ɔn, ə ɓo a yee tɔɔɉu pow nąąn, ɲąą kɛnɛ̨ yee ə ɓo a yee tɔɔɉu pow hveelɛ. 3 Ku lɔ bɛlɛ́n bələ, ə bɛlɛ́ laaləi dɔɔmu kɔ́ɔn, ə ɓo a yee tɔɔɉu hveelɛ; gbon ə ɓo a yee tɔɔɉu mɛ̨ida, bɛlɛ́ laaləi kɛnɛ̨ pələ ə kɛ a yee tɔɔɉu mɛ̨ihveelɛ. 4 Ə bɛlɛ́n gwɛa yee kɔ́ɔn, ə ɓo a yee tɔɔɉu pow hveelɛ, ɲąą kɛnɛ̨ yee ə ɓo a yee tɔɔɉu pow hveelɛ; yili pulu, nui tii yɛ mą́ą́: Gɛɛnąąi ŋɛ̨i ɓə mąąhəɠɛɛ gəlee ɓa. Yálá hee pɛlɛ kɛ pələ 5 Ə Yálá hee pɛlɛ́ bɛlɛ́ nwąną kɔ́ɔn, ə ɓo a yee tɔɔɉu mɛ̨ida; gulɔ gbinma ɲąą kɛnɛ̨ pələ, ə ɓo a yee tɔɔɉu nąąn, yɛ tinɛ̨n bɛlɛ́ ɓa, yɛ doo gee hu. 6 Gulɔ-gbinmaɠaa tɔɔi kɛ di kee mɛ̨i, ɉeɛ kɛ gee mɛ̨i haaɓa, dɛi tɛi nwɔ gulɔ-gbinma pow haaɓa. Gulɔ gbinmaɠaai tii lɔɔ kɛ bɛlɛ́ nwąną hu ɲɛnɛ̨ɛ̨ pələ, kɛlaa, di hvo kɛ lɔ li Yálá hee pɛlɛ́ nwɔ pɛlɛ́ nwąnąi hu. 7 Gulɔ gbinmaɠaai tii hu kɛnɛ̨ pələ ta ə kɛi lɔ pɛlɛ ma, a bɛlɛɛ-pɛlɛɛ. Di kɛ a di tɔɔ tii di kee mɛ̨i; di kɛ lɔ tii, bɛlɛ́ nwąną ɲąą yɛ kolo. Nu a pɛli kɛ ə lɔ ɲələi pɛlɛ́ dɔlɔɔ hu, ə lɛɛ ɉu ə tɛɛ veelɛnąą hu, yɛ tɛ ɉaaɓa nąą hu. 8 Ŋą́ pɔlɔ kaa gee mɛ̨i, bɛlɛ́ koo ɓa nąą kəlee, a bɛlɛ́ kɔ́ɔn nwulu ɲąą tɔ̨nɔ̨; gulɔ gbinmaɠaa kɔ́wɔ mu, bɛlɛ́ hvilɛn ɉii ə kɛ a yee tɔɔɉu mɛ̨ida. 9 Ɲɛnɛɛ pələ gulɔ gbinma, nwɔ pɛlɛ́ nwąnąi ɲąą kɛnɛ̨i kɛ a yee tɔɔɉu lɔɔli; yili ɓə kɛ bɛlɛ́ kɛnɛ̨ɛ da gulɔ gbinmaɠaa di lɔwai. 10 Bɛlɛ́ kpɔ kpɔɔ nwɔ gulɔ gbinmaɠaa da bɛlɛ́ɠaa di lɔwai, nąą ɲąą kɛnɛ̨ɛ kɛ a yee tɔɔɉu pow hveelɛ, yɛ Yálá hee pɛlɛ́ mąątínɛ̨n yɛ doo gee hu. 11 Gulɔ-gbinmaɠaa laaləi heɛi kɛ gwəli hɛ̨ąi pələ, naaləi tɔ̨nɔ̨ ɲɛ̨i heɛ kɛ ɲələi pələ, naaləi tɔ̨nɔ̨ ɲɛ̨i heɛ ɉɛɠɛɛ pələ. Gwəli hɛ̨ą ɲąą kɛnɛ̨ yee ə kɛ a yee tɔɔɉu lɔɔli, yɛ tinɛ̨n ma yɛ doo gee hu. 12 Bɛlɛ́i ŋɛ̨i kɛ ɲɛ̨i heɛ gwəli hɛ̨ąi kɛ gboloyá kwɛlɛ pələ, ɲąą kɛnɛ̨ yee ə kɛ a yee tɔɔɉu pow mɛ̨ihveelɛ, bɛlɛ́ nwąną ə kɛ a yee tɔɔɉu lɔɔli; nąą kəlee; gwɛa yee ə ɓo a yee tɔɔɉu pow mɛ̨inąąn. 13 Ə Yálá hee pɛlɛ́ kɔ́ɔn, gwɛa yee ə kɛ a yee tɔɔɉu nwun dɔ̨nɔ̨, gwəli hɛ̨ąi, bɛlɛ́ da bɛlɛ́ nwąną, gəlee kɔ́ɔn ŋąą ə kɛ a yee tɔɔɉu nwun dɔ̨nɔ̨. 14 Gwəli hɛ̨ą ŋɛ̨i kɛ voló həɠəi pələ, da Yálá hee pɛlɛ́ ɲąą kɛnɛ̨ yee, di kɛ a yee tɔɔɉu nwun dɔ̨nɔ̨. 15 Ə bɛlɛ́ kɔ́ɔn gwəli hɛ̨ąi yii tii kɛ bɛlɛ́ pulu pələ bɔ pələ, da nwɔ woloɠaai, gəlee di kɛ a yee tɔɔɉu nwun dɔ̨nɔ̨. Ɲiman ə kɛ bɛlɛ́ kɛnɛ̨ɛ mu, yɛ li la ɲɛnɛ̨ɛ̨ pələ. 16 Ɓɛlɛ́ laaləi, da bɛlɛ́ woloɠaai kwɛli hɛan bilɛɛ laa, da nwoloɠaa mąątínɛ̨n ŋąą la bələ haaɓai ɓa, yɛ li la bɛlɛ́ laaləi, sehifə wulu ə kɛ laa; ə həɠə bɛlɛ́ laaləi nɔi ɓa, ə həli la bɛlɛ́ woloɠaa diɛ, bɛlɛ́ woloɠaa kpɛli mɛ̨i kɛɛ kɛ. 17 Ə həɠə Yálá hee pɛlɛ́ laaləi ɓa, ə li la gbon ɲa, daa kɛ nąą mąą yili; 18 di kɛɛnąą mąąkpɛ malakaɠaa mąąnįnįn ɉəɠə laa, da gwala laa mąąnįnįn; mąąkpɛ malaka mąąnįnįn veelɛ lɔwai, di kɛi gwala laa mąąnįnįn dɔ̨nɔ̨ kɛ laa. Mąąkpɛ malakaɠaai tii, di ɲɛ̨ilai ə kɛ hveelɛ hveelɛ. 19 Dɔ̨nɔ̨ ə kɛ yɛ nu ɲɛ̨ilai, yili tinɛ̨n ŋaai kɛ gwala laa pɔ pələ; dɔ̨nɔ̨ ə ɓo yɛ yala ɲɛ̨ilai, yili tinɛ̨n ŋąą gwala laa tɔ̨nɔ̨ pɔ pələ. Bələ ɓə ə kɛ la bɛlɛ́ nwąną kəlee ɓa, ə tinɛ̨n ma ə doo gee hu. 20 Ə həɠə kpɔ bɛlɛ́ kɛnɛ̨ɛ mu nɔi ɓa, ə həli la nuą lɔi nwun mɛ̨i, daa kɛ nu mąąkpɛ malaka mąąnįnįn bɛlɛ́ gɔlɔ kəlee, da gwala laa mąąnįnįn. 21 Yálá hee pɛlɛ́ gbon nąą kəlee pɛliɛ kɛ a gee. Gɛɛnąą mąąhəɠɛɛ ɲɛ̨i tɔwɔ yii nuą di kɛi gaa, ə kɛ yɛ: 22 haláá kulɔi, ə ɓo a wulu, mɛ̨i kwɛa yee ə ɓo a yee tɔɔɉu haaɓa, gwɛa yee ə ɓo a yee tɔɔɉu hveelɛ. Nwəli laɠaa di kɛ mą, gbonoɠaa di ɓo laa, di ɓo a wulu. Ɉulɔnui tii yɛ mą́ą́: «Ɉaláá konwolon Yai-Laa lííla, ya ka tii.» 23 Naaləi ə kɛ gee hu hveelɛ, bɛlɛ́ kɛnɛ̨mun da gɛɛnąą mąąhəɠɛɛ di lɔwai. 24 Bɛlɛ́ laaləi hveelɛi, kpon veelɛ hveelɛ ɓə kɛ doɔ di la. 25 Di mąąkpɛ malakaɠaa mąąnįnįn ɉəɠə, Yálá hee pɛlɛ́ gbonŋaa ɓa, yɛ bələi lɔ di gɛ la bɛlɛ́ nwąnąɠaa ɓa. Wuluɓɛla kpatala ə kɛ ɲįnmąn ɲɛ̨i tɔwɔ ɲɛ̨nɛ̨ɛ̨ pələ. 26 Finɛɛtɛlɛɠaa di kɛ ɲįmąn ma, da gulɔgbunmaɠaa ɓa Yálá hee pɛlɛ́ koo ɓa, kwɛlihɛ̨n yɛ ɓo mą, gɛ pələ ə ɓo yɛ gwalalaa. |