Izikiɛ 4 - Yálá laawoo hɛɓɛ (dc)

Di kaa pai kɔ́ pɛlɛi Ɉerusalɛmə ɓa

¹ Yai-Laa yɛ nwɔ̨nɔ̨ mą́ą́: Yɛ́, hulɔnu lon, pɔlɔ kɔ́w tɔ̨nɔ̨ həɠə, naa ə́ lííla; taa ta mąąnįnįn gɛ mɛ̨i, Ɉerusalɛmə.

² Yili pulu, 'kɔ́ pɛlɛ daa ɓa; 'lɔwa tee gwɛlɛ; 'pɔ́lɔ́ tɛ mą; 'kɔlaɠa hee mą; 'mąątínɛ̨n a pɛlɛ́ nwąną wolo hɛnŋąą.

³ 'Kwɛli ɓɛla həɠə; 'dɔɔ yɛ kwɛli pɛlɛ́ nwąną ka daa ka lɔwai, 'tinɛ̨n ə́ ə́ ɲɛ̨i hee daa ɓa hįį; a kɛ a taa yii daa kɔ́ hee mą; mąąhɔlɔɓo, yáá kɔ́ hee mą. Israɛlə nwɔ pɛlɛ́i mąą hanwɔ̨n ga ti.

⁴ 'Laa ə́ kɛɓɛyee mɛ̨i; 'Israɛlə nu huwu nwɔ nɛ̨ŋɛ̨n hee ə́ nwuɔ̨; volóɠaai ə́ kaa pai gɛi laanin ə́ pələ tɔ̨nɔ̨, di wɔ nɛ̨ŋɛ̨nŋaai ti da kɛ lɔ ə́ nwuɔ̨ volóɠaai ti yee mu.

⁵ Gáá hvólóɠaa pɛ̨ɛ̨i ə́ nwuɔ̨, di lononŋaa yɛ həli di wɔ nɛ̨ŋɛ̨nŋąąi di wɔ kwɛlan bɔ: nwun ɉaaɓa yee mɛ̨inąąn, ə́ kaa pai Israɛlə nu huwu nwɔ nɛ̨ŋɛ̨n heei ə́ nwuɔ̨.

⁶ Yá volóɠaai ti laa kulɔ, ə́ pənə, ə́ laa ə́ ɓa-mįi-yee hu pələ, Ɉuda nu huwu nwɔ nɛ̨ŋɛ̨n həɠə hvóló pow nąąn ɲeemu; hvóló tɔ̨nɔ̨ kwɛlan dɔ̨nɔ̨.

⁷ Yili pulu ə́ ə́ ɲɛ̨i hee Ɉerusalɛmə ɓa; 'gɔ́ pɛlɛ mą; ə́ ə́ yee kulɔ ɉəɠə yee hu, ə́ gwə́i mɛ̨nį hu kulɔ mą.

⁸ Gáá ə́ yilii a yɛli, hvo pai kɛi tinɛ̨nɉi; yɛ́ həɠə ə́ yee yii mɛ̨i, yɛ́ laa da kpɛli mɛ̨i, hvo kɛli volóɠaai ə́ kaa gɔ́ hee la daa ɓa da kpɛɛ.

⁹ Mɔ̨nun ɉəɠə, da kpai, da tɔ́wɔ, da hoo-kpai da mąnąn, 'di pu hɛnɲąŋą ta hu, ə́ lɛɠɛ pɛli la a ə́ wɔ́ɔ́. Volóɠaai ti ə́ kaa pai kɛi la laani ə́ kɛɓɛyee hu, a voló nwun ɉaaɓa yeemɛ̨inąąn, yɛ́ mįi.

¹⁰ Gɔ̨nɔ̨n ti ɓə ə́ kaa pai kɛi mįi, wali kwələ pow-hveelɛ, hvóló tɔ̨nɔ̨; yi gaa a Bɛlɛ́ mąąhəɠɛɛ mu wali kɛ pələ; ya mįi ti hvóló tɛi tɛi yee mu.

¹¹ Di kaa pai ə́ kpələyá kɔ́ɔn ɉi a kputali ɲąą tɔ̨nɔ̨ da da wolo, hvóló tɛi tɛi yee mu.

¹² Ə́ kaa pai nɛɠɛi ti mɔ̨n ɉi, di ɲɛ̨i ɓa, a nwɔ̨nmu kɛ pələ, yɛ́ mįi.

¹³ Yai-Laa yɛ: «Nɔiɠaai kpɔ gáá pai Israɛlə nu huwu taɠa taɠai ɉu, bələ ɓə di kaa pai kɛi kɔ̨nɔ̨n mąąuɓɛɛ mįi la nɔiɠaai ti hu.»

¹⁴ Ŋą́ nwoo pulu pənə, gɛ́ mą: «Yai-Laa, nwɔ́ Yálá, və́ ta dɛ́a mįi li; ə həɠə nólókolo yələ ɓa, ə həli la háákəlee ɓa; huwɔ powa, awala kɛti, huwɔi mɛlan ɉuwɔ aa wolo mą; və́ ta da mįi li; huwɔ yii tɔ́n gaa mą, da hvo ta lɔ li ná.»

¹⁵ Yá ɓə a kɛ mą́ą́: «Yii gaa ti, gáá nįŋɛ̨ kpo tɛɛi ə́ pɔ, a nu kpo mąąhvalin, a ə́ wɔ lɛɠɛ mɔ̨n ɉɛn.»

¹⁶ Yɛ mą́ą́: «Hulɔnu lon, kɔ̨nɔ̨n nuą daa ɉee di yee pulu Ɉerusalɛmə, gáá pai gəlee kpɛɛi laa; di kaa pai lɛɠɛ kɔ́ɔn ɉi a lii hɛlɛn, diɛ mįi; diɛ ya kɔ́ɔn a ɲɔw kɛnɛ̨, diɛ gbələ.

¹⁷ Mąąhɔlɔɓo, lɛɠɛ da ya di kaa pai hvɛɠɛi, di kaa pai howai a gee, ɛlɛɛ di kəlee diɛ luɠuun a di wɔ nɛ̨ŋɛ̨nŋąąi laa pɔɔ.»