Izikiɛ 39 - Yálá laawoo hɛɓɛ (dc)Gɔgə mɛ̨nį lɔ nwɔ̨nɔ̨ 1 «Hulɔnu lon, gwə́i mɛ̨nį ɓo, yɛ hvilɛn Gɔgə ɓa; 'kɛ mą: Mɛ̨nį kəlee ŋą Hééɓomun Yálá woo ka: Vílɛn ŋąąi ə́ pulu Gɔgə, Mɛsɛkə da Tubalə tɔɔmun gɛnɛ̨. 2 Gáá pai ə́ kulɔi ə́ kee la, gɛ́ li a yɛ́, gɛ́ həɠə kpɔ a yɛ́ ɲanwuɔ̨ pələ, gɛ́ pa a yɛ́ Israɛlə yeeɠaa ɓa. 3 Gɛ́ ə́ kɛlɛ, ə́ kɛɓɛyee yɛ kulɔ ə́ wɔ kilən ɓa; gɛ́ ə́ wɔ tɔ́nwąɠaai kulɔ ə́ ɓa-mįi-yee ɲą, gɛ́ di pu nɔi ɓa. 4 Ə́ kaa pai tooi Israɛlə yeeɠaa nwuɔ̨; yɛ́, ka yɛ́ kɔ́kulááɠaai, da nɔiɠaai ə́ yee mui; gáá pai ə́ tɛɛi kuwɔ́ɠaa pɔ a di kɔ̨nɔ̨n, da hɛn lɔpee a koon, da lɔwɔ huwɔɠaa pɔ. 5 Ə́ kaa pai tooi gɔ́ hɛ̨ąi; Nwóó li, Ɲą́ą́ Mɛ̨nį kəlee ŋą Hééɓomun Yálá, nwóó li. 6 Gáá pai nwɔ̨n bilii Magɔgə hu, da gboloyá hɛ̨ąi lɔi hu nuą, di kaa laa a di wəli pulu laɠia; bələ ɓə da gili kɔ́lɔn na, diɛ kɛ. Hɛn gəlee Nąmu ɓaa a ɲą́ą́. 7 Gáá pai gɛi di Náá mąąhəɠɛɛ kɔ́lɔn, nwɔ́ lɔi a Israɛlə lɔi, ɉu; ɛlɛɛ, vá kɛa Náá mąąhəɠɛɛ lɛɛ laa di hvo mɛlɛ kpɛɛ mą bələ ɓə lɔiɠaa da gili kɔ́lɔn na tii diɛ kɛ, ɲą́ą́ ɓə a Mɛ̨nį kəlee ŋą Hééɓomun. A Mąąhəɠə mun Israwɛlə lɔi hu. 8 Ya ka, gaa pai, aa pa; volói ŋį́ vaaɓo, yaa li. Mɛ̨nį kəlee ŋą Hééɓomun Yálá woo li. 9 Israɛlə taalee hu nuą kaa pai kulɔi, di kaa pai nwɔ̨n dooi, di yówóɠaa di wɔ kɔ́ kɔ́ hɛnŋąą kəlee hu; di mąą kpɛ hɛnŋąą, gilɛnŋąą, da dɔ́nwąɠaa, kɔ́ kɔ́ hɛn lɔpee da ɉon di yəi ɲą; da pɛli kwɛlan mɛ́ihveelɛ nwɔ̨n ɉee kwɛi hɔlɔɓoi. 10 Di hvo pai kwɛi kwɛlii yɛɛ kɔ́wɔ ta hu, di hvo pai wulu pɔn ɉii lɔwɔi; mąąhɔlɔɓo, gɔ́ kɔ́ hɛnŋąąi tii ɓə di kaa pai kɛi nwɔ̨n ɉeei la. Nuąi di yəi hɛnŋąą kulɔ di yəii, da diɛ kpɛlimąn di wɛiɠaai kulɔ di yəi, nuąi too di mɛ̨́i, da too diɛ kpɛlimąn di mɛ̨i. Yai-Laa woo li. 11 A mąą yələi, ŋą Gɔgə kámą tɛ Israɛlə lɔi hu; kɛɛnąą laa tɛɛ ta ɓa; Ovarim-yee lɔwai lɔi hu, gboloyá kwɛlɛ; a bələ too hiɛ kulɔ nuą tɔwɔ. Nąą ɓə di kaa pai Gɔgə looi laa, da ŋą nu kpului; di kaa pai nąą laa heei a Gɔgə da nwɔ nuą di kámą la. 12 Ɲąnin mɛ̨ihveelɛ ɓə Israɛlə nwɔ pɛlɛ́i mu nuą kaa pai gɛi di loo mɛ̨nį hu, da nɔi mąąhəɠə mɛ̨nį hu. 13 Nɔi hu lonnii kəlee ɓə pai di looi; diɛ di nwun dɛ ɉu a ɲələi tii gáá pai gbɔwɔ ɲɛ̨́i pɔ̨nɔ̨i la. Mɛ̨nį kəlee ŋą Hééɓomun Yálá woo li. 14 Nuą kaa pai kɛi laa, yili ə ɓo a di mąą kolo; diɛ tɛɛ nɔi mɛ̨́i diɛ nu pɔwaɠaa loo, a nu pɔwaɠaai tii pai lɛɛi toonin nɔi ɓai; ə gɛ diɛ pɛli nɔi mąąhəɠəi, nuąi lɛɛ lɔi mɛ̨́i di mąą mɛ̨nį ɓa. Di kaa pai kɛi nuą kwɛlii tii ɲąnin mɛ́ihveelɛ yee mu. 15 Da lɛɛ tɛɛi da nu kɔ́w ta kaa; di kaa pai pɔlɔ tɛi gwɛlɛ, ə lɛɛ ɉu, nu loo-nuą, di di kəlee di loo Gɔgə da nwɔ nuąi di kámą la. 16 Taa kaa pai kɛi kpɔ laa, di kaa pai kɛi mą, Hamona nu kpulu; bələ ɓə di kaa pai nɔi mąąhəɠəi la. 17 Ə́ wəli tɔɔ, hulɔnu lon, Mɛ̨nį kəlee ŋą Hééɓomun Yálá woo ka: 'Mo nwɛ̨niɠaa diɛ, huwɔi lɔpee a koon, lɔwɔ huwɔɠaa kəlee, yɛ́ diɛi: 'Ka ka ɲąą kpɔn, 'ka pa, 'ka həɠə pələ kəlee, 'ka pɛlɛ kee ɓa, ɉaláái gáá pai gulɔi ka mąą mɛ̨nį ɓa, a halaa ɲɛ̨́i kɛnɛ̨, Israɛlə yeeɠaa hu. Ka káá pai huwɔ mį́į́, kaa ɲąmą kpələ. 18 Ka kɔ́kulááɠaa huwɔ mį́į́; ka yɛnɛ̨ɛ̨ tɔɔɓɛlaa ɲąmą kpələ; ɓɛlaa hilɛɠaa li, da ɓɛlaa lonnii, da ɓolu hilɛɠaa, da niŋɛ̨ hilɛɠaa; gəlee kaa a Basan huwɔ wulaaɠaa. 19 Ka káá pai nu wulɔ mį́į́, kaa pilɛ ɉu; kaa ɲąmą kpələ, yɛ ka kɛlɛ; ɉaláái gɛ́ ŋį́ pa gulɔ kaai, ya ka tii. 20 Ka káá pai pilɛi nwɔ haláá kulɔi hooɠaa hu, gilɛ həɠə hooɠaa; gɔ́kulááɠaa kəlee di wɔ hooɠaai hu. Mɛ̨nį kəlee ŋą Hééɓomun Yálá woo li. 21 Gáá pai mąąwiɛ pələ heei lɔiɠaa mɛ̨́i; lɔi kəlee kaa pai nwɔ kitii kaai; yai gáá pai gɛi, da ɲeei gáá pai gɛlɛi di hu. 22 Ə həɠə mąą yələ ɓa, yɛ li la tɔwɔ pələ; Israɛlə nwɔ pɛlɛ́i a gili kɔ́lɔn yɛ kɛ Yai-Laa, di wɔ Yálá ɓaa a ɲą́ą́. 23 Lɔi kəlee kaa pai gbaɠala kaai diɛ kɛ Israɛlə nwɔ pɛlɛ́i ə li luwɔlaa hu; di wɔ nɛ̨ŋɛ̨nŋąą mąą mɛ̨nį ɓa; mąąhɔlɔɓo, di di pulu kulɔ mą́ą́; yili ɓə gɛ gɛ́ ɲɛ̨́i loo diɛ, gɛ́ di tɛɛ di yowoɠaa pɔ, kɔ́ kɔ́ ɓɔwa yɛ di paa. 24 Ŋį́ di hon yɛ bələi lɔ di di mąą liɓi lai, diɛ kulɔ la nwoo mui; yili ɓə gɛ gɛ́ ɲɛ̨́i loo diɛ. 25 Kɛlaa, Mɛ̨nį kəlee ŋą Hééɓomun Yálá yɛ diɛi: Yii hu kɛa, gáá Ɉakɔbə nwɔ yɛnɛ̨ɛ̨ ɲɛ̨́i mąą pənəi; gáá pai Israɛlə nwɔ pɛlɛ́i kəlee hon ɉi a wɛlikɛmąąlaa; gɛ́ ɲɛ̨́i kɛ́ Náá mąąhəɠɛɛ ɓa a tóló. 26 Nwumɛ̨i di mo, da di wooɠaai kpɔ di gala mą́ą́ mɛ̨nį hu, ɓɛlɔwai di kɛ laa di wɔ lɔi hu, nu ta hvo kɛi di mąą kpɛlin, da lɛ̨ą yili kəlee ɓa. 27 Gáá pai di kulɔi lɔiɠaa hu, di yowoɠaa lɔwai, gɛ́ di ɲąąkpɔn; gáá pai nwɔ mąąhəɠə laa lɛi lɔi tamąą ɓa, di mąą mɛ̨nįi tii hu. 28 Da gili kɔ́lɔn diɛ kɛ na tii diɛ kɛ; Hɛn gəlee Nąmu ɓaa a ɲą́ą́, di wɔ Yálá; mąąhɔlɔɓo, tɛ̨ą li, gáá pai lii a diɛ luwɔlaa hu, kɛlaa yili pulu, gáá pai pənəi ŋį́ di ɲąąkpɔn, di kpɔɔ kpɔɔ lɔi hu; vá di lɛɛ gɛɛ nąąi ti ɓa. 29 Vá kɛa ɲɛ̨́i loo diɛ, hvo gaai gáá pai mɛ̨nį kɔlɔn gili yɛɛi Israɛlə nwɔ pɛlɛ́i mɛ̨́i. Mɛ̨nį kəlee ŋą Hééɓomun Yálá woo li.» |