Izikiɛ 38 - Yálá laawoo hɛɓɛ (dc)

Gɔgə mąą mɛ̨nį

¹ Yai-Laa woo ə həli mą́ą́, yɛ mą́ą́:

² Hulɔnu lon, ə́ ɲɛ̨i tinɛ̨n Magɔgə lɔi hu, Gɔgə pɔ pələ; yai gaa a Mɛsɛkə da Tubalə tɔɔmun gɛnɛ̨ɛ. Gwə́i mɛ̨nį hukulɔ, yɛ hvilɛn mą.

³ 'Kɛ mą: «Gáá pɛlɛi yɛ́ a kɔ́, Mɛsɛkə da Tubalə tɔɔmun gɛnɛ̨ɛ Gɔgə,

⁴ gáá pai ə́ kulɔi ə́ kee la, gɛ́ kwɛli pili ə́ la, yɛ́ ká ə́ wɔ kɔlaɠai kəlee, Ɉooɠaa mąn ɉoo mɛ̨i nuą mąn, di mąąyilɛɛ a nɛlɛɛ, di ɓo a nu kpulu kɛnɛ̨ɛ, kɔ́ kɔ́ hɛnŋaa ə ɓo di yəi; gəlee di ɓo a kɔ́ kɔ́ ɓɔwa pili nuą.

⁵ Pɛrsə lɔi da Nubi da Putə, di kaa pai kɛi di pɔ. Ɓowa kwɛa da kɔ́ kɔ́ hə́mə di ɓo gəlee yəi.

⁶ Gomɛrə da nwɔ kɔ́kuláá kpului, Bɛtə-Togarma yɛ həɠə kpɔ ɲa nwuɔ̨ pələ, da nwɔ kɔ́kuláá kpului. Nu huwu tamąą kaa pai kɛi ə́ pulu.

⁷ Ə́ kpɔwɔ pɛli a nɛlɛɛ, yɛ́ ka nu kpului tii ə́ kaa pai ɲąąkpɔn ɉii ə́ kwɛlɛi. Yɛ́ ɓə pai kɛi a di mąąkpɛ mun.

⁸ Ɉu aa kwɛa, mąąnɛ̨ɛ̨ kɛ ku ə́ mąą mɛ̨nį ɲɛ̨i kulɔ; yili kaa pai kɛi tii, gwɛlanŋaa laa a hvɛɛ; lɔi ta hu, da ɉu nuą taɠa, mąąhɔlɔɓo, kɔ́ kɔ́ ɓɔwa a tɛɛ laa. Di həɠə lɔi ta hu, yii kɛ naa hvɛɛ a nu kan, di di ɲąąkpɔn Israɛlə yeeɠaa mɛ̨i; ɲeeɠaai tii daa kɛ lɛɛ a lɔi pun a ɉu kwɛa. Di nuąi tii kulɔ lɔiɠaa lɔwai, di kəlee di kaa pai kɛi liilaa hu.

⁹ Ə kaa pai lii, yɛ́ pənə yɛ́ pa, a ə́ hvąŋą kɛnɛ̨; ə́ kaa pai kɛi yɛ tulɔ kpinįn, a pɛlɛ lɔi mɛ̨i; yɛ́ ka ə́ wɔ kɔ́kuláá kpuluɠaai kəlee, ka nu huwu tamąąi tii pai kɛi ə́ pulu.

¹⁰ Mɛ̨nįi Yai-Laa kaa moi, ya ka: a mąą yələi tii, ə́ kaa pai mɛ̨nį tamąą mąą kili ɲąhiɛ kɛi, ə́ kaa pai kóló ɲɔ̨ŋɔ̨ɔ̨ mąą kili təɠəi ə́ kwəi.

¹¹ Yɛ́ kɛ diɛ: Gáá lii ŋį́ wolo lɔi ta ɓa, mąą kɔnwɔ̨i hvo mą; gáá pai həəi nuą diɛ, di wəli pulu laɠia, di ɓo lii laa yɛnɛ̨ɛ̨ hu; hįi hvo di wɔ taa tai lɔpee ɓa, kpon və laa, naakpulu kwɛli hvo mą.

¹² Yá pa lɔ kɔ́ hon diɛ̨ mɛ̨nį ɓa gee mɛ̨i, toomɛ̨i kɛ mɛ̨nį ɓa; lɔi kpoloon daa pənə daa dɔɔ, yɛ́ nwɔ̨nɔ̨ too nwɔ hɛnŋąą hu; a nuąi tii di di kulɔ lɔiɠaa lɔwai, diɛ di ɲąą kpɔn, di yee ə ɓo di wɔ taatɛlɛɛ, da di yəi hɛnŋąą mąą kóló ɓa; di ɓo a lɔi wəlingɛ̨ą.

¹³ Saba, da Dedan, Tarsisə yɔw kɛ nuą, da ŋą yala lonnii kəlee, di kaa pai kɛi yɛ́: Ə́ pa lɔ kɔ-hon ɉon mɛ̨nį ɓa? Ɛ̨i, too mɛ̨i kɛ mɛ̨nį ɓə ə́ yɛ́ nu kpului ɲąą kpɔn na, wali da hɛni kulɔ mɛ̨nį ɓa nuą yəi? Taatɛlɛɛ da hɛngɔwɠaa həɠə mɛ̨nį ɓə? Kɔ́-hon gɛnɛ̨ həɠə mɛ̨nį ɓə?

¹⁴ Yili mąą mɛ̨nį ɓa, hulɔnu lon, gwə́i mɛ̨nį ɓo; 'kɛ́ Gɔgə ɓa: Mɛ̨nį kəlee ŋą Hééɓomun Yálá woo ka, yɛ: Ɲələi nwɔ́ nu huwui Israɛlə kaa pai kɛi la liilaa yɛnɛ̨ɛ̨ hu, gbaɠala hvo mɔ̨ɔ̨ pai kɛi yɛ́?

¹⁵ Ə́ kaa pai həɠəi ə́ wɔ lɔi hu, ɲanwuɔ̨ pələ, yɛ́ pa, ə́ wɔ nu kpulu tamąą di ɓo ə́ pɔ; di kəlee di ɓo hoo mɛ̨i; ka káá pai kɛi a nu kpulu kɛnɛ̨, a kɔlaɠa kɛnɛ̨.

¹⁶ Ə́ kaa pai pai, yɛ́ wolo nwɔ nu huwui a Israɛlə ɓa; yɛ́ pɛlɛ nɔi kəlee mɛ̨i yɛ nąnąąn. Mɛ̨nįi tii kaa pai həlii a yɛnɛ̨ɛ̨ ɲąą kpɛɛ yələ; gáá pai gɛi yɛ́ wolo nwɔ́ lɔi ɓa, lɔiɠaa diɛ pɛli gɔ́lɔn ɉi, ɓɛlɔwai gáá pai nwɔ mąąhəɠəlaa tooi la pɔ̨nɔ̨ ɲą, di ɲɛ̨i ɓa, a ə́ pulu kulɔ pələ, yɛ́i a Gɔgə.

¹⁷ Mɛ̨nįi Mɛ̨nį kəlee ŋą Hééɓomun Yálá kaa moi ya ka, yɛ: Yɛ́ ɓə ŋį́ kɛi ə́ mąą mɛ̨nį ɓo; wɔlɔ wɔlɔ mɛ̨nį li; gwə́i mɛ̨nį hu kulɔ nuą, diɛ gwə́i mɛ̨nį ɓo, yɛ hvilɛn yɛ́; kwɛlan damąą yee mu, diɛ kɛ gáá pai pai a yɛ́, yɛ́ pɛlɛ diɛ a kɔ́.

¹⁸ Mąą yələi tii, a ɲələi Gɔgə kaa pai pai la Israɛlə lɔi hu, nwɔ́ líiholi a muhəɠə, diɛ gaa ɲɛ̨i pɔ. Yai-Laa woo li.

¹⁹ A tɛ̨ą, ya ka tii gáá moi, lɔi a kpɛlin a gɛnɛ̨ Israɛlə lɔi hu, nwɔ́ tolo kulɔ pələ ɓa da nííholi pələ ɓa.

²⁰ Gboloyá hu hɔ̨ŋɔ̨leeɠaa, yələi nwɛ̨nįɠaa, da lɔwɔ huwɔɠaa, hɛn lɔpee a tala lɔi ɓa; lɔi mɛ̨i nukan gəlee kaa pai kɛi kpɛlin ɉii ɲɛ̨́i tɔ́wɔ́; yeeɠaa mąą kaa pai kɛi yɛɛi, kwɛniɠaa diɛ ɓuwɔ, pɛlɛ́ nwąnąɠaa kəlee diɛ pu.

²¹ Gáá pai kɔ-kɔ-ɓɔwa tolui, yɛ həɠə nwɔ́ yeeɠaa kəlee mɛ̨i, yɛ wolo Gɔgə ɓa. Mɛ̨nį kəlee ŋą Hééɓomun Yálá woo li. Nu tɛi tɛi kaa pai pɛlɛi nąngaa ɓa a kɔ́ kɔ́ ɓɔwa. Hééɓo kəlee Nąmu Yálá woo li.

²² Gáá pai ɉu tɔɔi a ɲɔ̨n da ɲąmą; yaa mąn, da nwɔ kɔ́kulááɠaa, da nu kpulu tamąąi tii pai kɛi bɔi; ŋą́ tulɔ kɛnɛ̨ pu di mɛ̨́i, da hɔ̨n gbuɠulu, da nwɔ̨n, ɛlɛɛ, da nwɔ̨n maɠa.

²³ Gáá pai mą́ą́wiɛ pələ da mąąhəɠə pələ tooi pɔ̨nɔ̨ ŋą di ɲɛ̨i; gɛ́ gɛ lɔi kpulu tamąą diɛ gɔ́lɔn. Da gili kɔ́lɔn dii, diɛ kɛ: Yai-Laa ɓaa a ɲą́ą́.»