Izikiɛ 36 - Yálá laawoo hɛɓɛ (dc)

Israɛlə kaa pai pənəi ə nwɔ lɔi həɠə

¹ «Yɛ́i ɓaa hulɔnu lon, gwə́i mɛ̨nį hukulɔ Israɛlə yeeɠaa diɛ, 'kɛ diɛ; Israɛlə yeeɠaa, ka ka wəli tɔɔ Yai-Laa woo ɓa,

² Mɛ̨nį kəlee ŋą Hééɓomun Yálá woo ka; yɛ: Ka yowoɠaa di kɛi kɛ diɛ: ‹Dɔwɔ tɔwɔ yeeɠaai ŋɛ̨i daa lɛɛ a ku wɔɔ.›

³ Yili mąą mɛ̨nį ɓa, gwə́i mɛ̨nį hukulɔ diɛ, yɛ́ diɛ; Mɛ̨nį kəlee ŋą Hééɓomun Yálá woo ka: Daa di ɲɛ̨i kulɔ ka pɔ, ɛlɛɛ, daa too ka mɛ̨i bələ kəlee, kaa kɛ a hįį takpɛliɠaa di wɔɔ, daa di laa pu ka hį́i kəlee lɔwai, lɔiɠaa hu;

⁴ yili mąą mɛ̨nį ɓa, kaai a Israɛlə yeeɠaa ka ka wəli tɔɔ, Mɛ̨nį kəlee ŋą Hééɓomun Yálá woo ɓa. Mɛ̨nį kəlee ŋą Hééɓomun Yálá yɛ: Kaai ɓaa a ɲeeɠaa, kaai a ɲee kpu kpuɠaa, kaai a ɲaɠaa, kaai a ɲee lɔwai lɔiɠaa, kaai a daa kpoloonŋaa, kaai ka kwɛlɛ lɔiɠaa di kɛi too ka mɛ̨i, diɛ yɛlɛ kulɔ ka hui;

⁵ Mɛ̨nį kəlee ŋą Hééɓomun Yálá woo ka, yɛ: ‹Nwɔ́ tolo nwɔ̨n hu ɓə gáá mɛ̨nįi ŋɛ̨i ɓoi laa, lɔiɠaa kəlee diɛ, da Edɔmə lɔi; mąąhɔlɔɓo, di nwɔ́ lɔi kɛ a di wɔɔ. Di kwəinɛ̨ɛ̨i kɛ kɛnɛ̨, diɛ nuą hviiɓo, ɓɛlɔwai di too la nɔi hu, diɛ gɛ a di pɔɔ.›

⁶ Yili mąą mɛ̨nį ɓa, 'gwə́i mɛ̨nį hukulɔ Israɛlə lɔi ɓa. 'Mo, ɲeeɠaa, ɲee kpu kpuɠaa, ɲá pɛlɛɛɠaa, da ɲee lɔwai lɔiɠaa diɛ, yɛ́ diɛ; Mɛ̨nį kəlee ŋą Hééɓomun Yálá woo ka, yɛ: ‹Ɲą́ą́ ga! Gáá hvaai a tolo da liiholi, mąąhɔlɔɓo, lɔiɠaa daa kɛ ka ɓɛlɛ kpɛɛ kaa.›

⁷ «Yili mąą mɛ̨nį ɓa, Mɛ̨nį kəlee ŋą Hééɓomun Yálá yɛ: Gáá gwɛ́lai a ɲéé, gɛ́ diɛ nɔiɠaai tii ka kwɛlɛ, nwumɛ̨ a di ɲɛ̨i paa.

⁸ Nąąlɔwai, kaai a Israɛlə yeeɠaa, ka káá pai kɛi a lɔi lɛlɛɛ, hɛn gəlee yɛ lɛlɛ laa, a nwɔ́ nu huwui Israɛlə nwɔɔ, mąąhɔlɔɓo ɉu hvo kɛa kwɛa li, yɛ pənə yɛ pa nwɔ lɔi hu.

⁹ A tɛ̨ą ŋą́ą́ pa ka pɔ, ŋą́ą́ ɲɛ̨́i lɛlɛɛ hee káá. Ka káá pai kɛi a tíi, diɛ mɔ̨nun ɉin ka mɛ̨i.

¹⁰ Gáá pai nuą ɓuwu ɓoi ka mɛ̨i, ya ɓaa; Israɛlə pɛlɛ́ kəlee. Nuą da pənə di kɛ daaɠaa hu, diɛ daa kpoloonŋaa tɔɔ a nįnɛ̨.

¹¹ Yɛi kɛ a nu kan, yɛ ə kɛ a taatɛlɛɛ, gáá pai di ɓuwu ɓoi ka mɛ̨i. Di kaa pai tamąi, diɛ ɓá. Ŋą́ pənə ŋą́ nu tamą ka hu, yɛ tɔlɔɔ tɔlɔɔ yələ; ŋą́ hɛn dɛɛ ka pɔ, ə tɛɛ gɔwɔ tɔɔi lɔwai ɓa. Nąąlɔwai, ka gili kɔ́lɔn kaa kɛ ɲą́ą́ ɓə gáá a Yai-Laa.

¹² Gáá pai ə́ laahvɛɛi a nuą, nwɔ́ nu huwui Israɛlə nuą diɛ ə́ hɔlɔɓo a di pɔɔ. Yá kɛ a di hɔlɔɓo hɛn, hva kɛa di hvɛɠɛ di lonnii hu.

¹³ Mɛ̨nįi Mɛ̨nį kəlee ŋą Hééɓomun Yálá kaa moi, ya ka, yɛ: ‹Nu taɠaa da kɛ kɛi diɛ: Nu mįi lɔi ɓaa yɛ́, yá ə́ wɔ nuąi lonnii kulɔ di yəi.›

¹⁴ Ə həli yɛ́, ə həɠə yiihu ɓa, hvo kɛa nu mįi, hvo kɛa ə́ wɔ nuąi lonnii kulɔ di yəi, Mɛ̨nį kəlee ŋą Hééɓomun Yálá woo li.

¹⁵ Ə́ ɓɛlɛ too wooɠaai lɔiɠaa da kɛ moi, vá kɛa ə́ lɛɛ laa, da hvo too ə́ wəlii; hvo kɛa pai ə́ nwun ɉeei nuą di wɔ lalan nwooɠaa mu. Hvo kɛa pai ə́ wɔ lɔi hu nuą tooi nɛ̨ŋɛ̨n mɛ̨nį hu, Mɛ̨nį kəlee ŋą Hééɓomun Yálá woo li.»

Yálá kaa pai Israɛlə ɲąąkpɔn ɉii kɛɛnąą tɔ̨nɔ̨ ɓa

¹⁶ Yai-Laa ə hvaa bɔ́, yɛ mą́ą́:

¹⁷ «Ə́ wəli tɔɔ hulɔnu lon, Israɛlə nuąi tii kɛ hee ni di wɔ lɔi hu, di nąą kala a di túwɔ pələ, da di kɛ mɛ̨nįɠaa; di túwɔ pələ ə kɛ lɔ ɲɛ̨́i mu yɛ nɛ̨ɛ̨nu a ɲąnin gaai.

¹⁸ Ŋą́ nwɔ́ liiholii hee diɛ, ɲąmąi tii di bu nɔi hu, mąą mɛ̨nį ɓa; da ɉaliɠaai di nɔi mąąliɓi la, di mąą mɛ̨nį ɓa.

¹⁹ Ŋą́ di taɠa taɠa lɔiɠaa hu, di li a diɛ nwea lɔiɠaa hu; ŋą́ di kiti tee di hɔn mąą mɛ̨nį ɓa, da di túwɔ pələ.

²⁰ Də li a nwɔ́ nu huwui lɔiɠaa hu, ɛlɛɛ, di náá mąąhəɠɛɛ; kala laa. Mąąhɔlɔɓo, di kɛi mo a di laa, diɛ kɛ: ‹Yai-Laa nwɔ nu huwui ka, kɛlaa, di hvo di wɔ lɔi hu.›

²¹ Ə mą kɛ tii, ŋą́ náá mąąhəɠɛɛ mąą mɛ̨nį nwąną, a yai tii Israɛlə nwɔ pɛlɛ́i mu nuą di mɛlɛ too, nɔiɠai də li ɉu a diɛ, di ɲɛ̨i ɓa.

²² Yili mąą mɛ̨nį ɓa, 'mo Israɛlə nwɔ pɛlɛ́i ɓa, yɛ́ mą; Mɛ̨nį kəlee ŋą Hééɓomun Yálá woo ka, yɛ: Ka mąą mɛ̨nį hvəi gáá mɛ̨nįi ŋɛ̨i kɛi la, kaai a Israɛlə lonnii; kɛlaa, gáá gɛi tii, náá mąąhəɠɛɛi ka mɛlɛ too nɔiɠaai ka li di hu, mąą mɛ̨nį ɓa.

²³ Gáá pai náá kɛnɛ̨ɛi ŋɛ̨i mąąhəɠə pələ lɛi; yai daa mąąliɓi nɔiɠaa hu. A náái tii ka mąąliɓi lɔiɠaa hui; lɔiɠaa kaa kɛa pai gbaɠala kaai, diɛ kɛ, ɲą́ą́ ɓə gáá a Yai-Laa. Mɛ̨nį kəlee ŋą Hééɓomun Yálá woo li. Ɓɛlɔwai gáá pai mą́ą́həɠə pələ lɛi la ká mąą mɛ̨nį hu, di ɲɛ̨i ɓa.

²⁴ «Gáá pai ka həɠəi lɔiɠaa hu, gɛ́ ka ɲąąkpɔn a ka kulɔi ŋą́ mo lɔi kəlee hu, gɛ́ pənə gɛ́ pa a kaa, ka wɔ lɔi mɛ̨i.

²⁵ Gáá pai ya mąąhəɠɛɛ taɠai ka mɛ̨i, pɔn ɲɛ ɓo la kaa; gáá pai ka mąąhəɠəi, ka wɔ mąąliɓi mɛ̨nįɠaai kəlee yəi; da ka wɔ haliɠaai kəlee yəi.

²⁶ Gáá pai lii nįnɛ̨ tooi ka kwəi, gɛ́ kili nįnɛ̨ too ka hu. Gili wala wali tii ka hu yɛ kwɛni, gáá pai gulɔi ka hu, gɛ́ kaalon gili too ka hu.

²⁷ Gáá pai gbɔ́ kpɔɔ Kilii lɔi ka hu, gáá pai gɛi, kaa hiɛ a nwɔ́ tɔ́n nwooɠaai; kaa ka yee kɛ nwɔ́ lɔi hu yíi ɓo pələ ɓa, kaa túwɔ la tii.

²⁸ Nɔi tii ta ŋą́ dɛɛ ka nąnni pɔ, ka káá pai heei laa; kaa kɛ a nwɔ́ nu huwu, ŋą́ ɓo a ka wɔ Yálá.

²⁹ Gáá pai ka wɔ mąąliɓi mɛ̨nįɠaa kəlee kulɔi kaa, gɛ́ gɛ ɓá yɛ lɛlɛ káá, vá kɛa pulu too kaa.

³⁰ Ɉihɛnŋaa diɛ ɓá ka yəi, tííɠaa diɛ lɛlɛ kaa; ka hva kɛa nwumɛ̨, lɔiɠaa ɲɛ̨i ɓa, kɔ̨nɔ̨n mɛ̨nį ɓa.

³¹ Ka kɛi ka kiliŋąhiɛ, ka wɔ pələ ɲɔ̨nwɔ̨ɔ̨ɠaa diɛ, da ka kɛ mɛ̨nįɠaai tii di hvo kɛ lɛlɛ li di hu, káá kpinįi ka káá pai nwumɛ̨i, ka wɔ nɛ̨ŋɛ̨nŋaai mąą mɛ̨nį ɓa, da ka wɔ túwɔ pələ ɲɔ̨nŋaai.

³² Ka mąą mɛ̨nį hvo gáá gɛi la, mąąnɛ̨ɛ̨ ka kili ə kɛ tii ɉu. Mɛ̨nį kəlee ŋą Hééɓomun Yálá woo li. Ka nwumɛ̨, mąąnɛ̨ɛ̨ ka nwumɛ̨ ka túwɔ pələ mąą mɛ̨nį hu, Israɛlə nwɔ pɛlɛ́i!

³³ «Mɛ̨ni kəlee ŋą Hééɓomun Yálá woo ka, yɛ: Ɲələi gáá pai ka mąąhəɠəi la ka wɔ nɛ̨ŋɛ̨nŋaai kəlee yəi, ŋą́ pa a nu kan, ka wɔ taaɠaai hu; gɛ́ pənə gɛ́ daa kpoloonŋaa tɔɔ.

³⁴ Nɔi ŋɛ̨i daa gala, da tíi kɛ ɉu; hvo pai lɛɛi a lɔi pun, nuą da kɛi tɛɛ, diɛ gaa.

³⁵ Di kaa pai kɛi diɛ; nɔi ŋɛ̨i ta di gala, aa kɛ yɛ Yálá-taa nɔw yɛa. Daaɠaai kɛ a taa kpoloonŋaa, daa kɛ di pu, daa kɛ di wolo, daa di mąąkpɛ hįįɠaa too, nu ə ɓo di hu.

³⁶ Nɔiɠaai tii pai kɛi ka kwɛlɛ, da gili kɔ́lɔn gea, diɛ kɛ ɲą́ą́ ɓə gáá a Yai-Laa. Ɉɛn di nwolo, ɲą́ą́ ka tii pənə gɛ́ dɔɔ; ɉɛn di gala, gɛ́ pənə gɛ́ ɉin. Ɲą́ą́ Yai-Laa, ɲą́ą́ ɓə mo, ɛlɛɛ, gáá gɛi.

³⁷ «Mɛ̨ni kəlee ŋą Hééɓomun Yálá woo ka; yɛ: Yii gáá pai gɛi, ya ka; Gáá pai gbɔ́ɔ́ lɛɛi laa, Israɛlə nwɔ pɛlɛ́i yɛ gwɛ́li, gɛ́ pɛli ɉon ɉii a wɛlikɛmąąlaa, gáá pai di tamąi, yɛ nu taatɛlɛɛ kpulu,

³⁸ yɛ bələi lɔ ɉaláá kulɔ taatɛlɛɛ kpuluɠaa kaa la, yɛ bələi daatɛlɛɛ kpuluɠaa da kɛ la Ɉerusalɛmə, a ɉɛli pu yələɠaa; bələ ɓə daaɠaai ŋɛ̨i a di kpoloon, di laa kaa pai hvɛɛi la, a nu kpulu. Bələ ɓə da gili kɔ́lɔn na, diɛ kɛ, ɲą́ą́ ɓə gáá a Yai-Laa.»