Izikiɛ 35 - Yálá laawoo hɛɓɛ (dc)

Edɔmə mąą mɛ̨nį

¹ Yai-Laa ə hvaa bɔ́, yɛ mą́ą́:

² «Hulɔnu lon, ə́ ɲɛ̨i tinən Seirə yee pɔ pələ, 'gwə́i mɛ̨nį hukulɔ mą,

³ yɛ́ mą: Mɛ̨ni kəlee ŋą Hééɓomun Yálá woo ka, yɛ; gáá múhəɠəi ə́ laa ɓa, Seirə yee, gáá pai ɲéé pɛlɛi yɛ́, gɛ́ ə́ kɛ a lɔi pun mąąwɛliɛ,

⁴ gɛ́ ə́ wɔ taaɠaai kɛ a taa kpoloonŋaa; yɛ́ kpinįi yɛ́ kɛ a lɔi pun. Nąąlɔwai yá gbaɠala kaa, yɛ́ diɛ ɲą́ą́ ɓə gáá a Yai-Laa.

⁵ Yɛ bələi ə́ kɛi yowolaa kulɔ la a Israɛlə a yələ kəlee, yɛ́ nonnii ɲąmą pu a kɔ́ kɔ́ ɓɔwa, ɲələi kɔ́ ə kala la diɛ; a ɲələi di kɛ nɛ̨ŋɛ̨n naa ə hvɛɛ la,

⁶ yili ɓa, yii kpɔ gáá a vúlu, Mɛ̨nį kəlee ŋą Hééɓomun Yálá woo li; gáá pai ə́ ɲąmą pui, ɛlɛɛ, ɲąmą a hvilɛn ə́ pulu. Yii kpɔ hvó ɲɔw li ɲąmą ɓa, ɲąmą kaa pai kɛi hvilɛn ni ə́ pulu.

⁷ Gáá pai Seirə yee kɛi a lɔi pun, mąąwɛliɛ; ɛlɛɛ, nuąi da kɛ tɛɛi laa, ŋą́ di nwun na pili.

⁸ Nwɔ nu powaɠaai kaa pai kɛi puu ni di kee mɛ̨i nwɔ yeeɠaai nwuɔ̨, yiiɠaai kɔ́ kɔ́ ɓɔwa a di paa, di kaa pai kɛi puu ni ɲee kpu kpuɠaa lɔwai, ɲee lɔwai lɔiɠaa hu, nwɔ ya pɛlɛɛɠaai hu.

⁹ Ŋą́ ə́ kɛ a lɔi pun a yələ kəlee da nwɔɔ, ɛlɛɛ, nu ta hva kɛa hee ə wɔ taaɠaai hu. Nąąlɔwai ka gbaɠala kaa kaa diɛ ɲą́ą́ ɓə gáá a Yai-Laa.

¹⁰ «Mąąhɔlɔɓo, ə́ kɛ diɛ; ɉįi hveelɛi ŋɛ̨i, nɔi hveelɛi kaa a nwɔ́ɔ́; ɛlɛɛ, ku kaa pai di həɠəi a ku wɔɔ. Kɛlaa, Yai-Laa ə kɛ laa.

¹¹ Yili mąą mɛ̨nį ɓa, yii kpɔ gáá a vúlu, Mɛ̨nį kəlee ŋą Hééɓomun Yálá woo li, nííholi da doloi tii ə́ gulɔ a diɛ ə́ wɔ yowo laa hu, gáá pai bɔɔ kulɔi a yɛ́. Gáá pai gbɔ́ɔ́ lɛi diɛ a ə́ kiti tee pələ.

¹² Nąąlɔwai, yá gili kɔ́lɔn yɛ́ ɲą́ą́ ɓə gáá a Yai-Laa, ɛlɛɛ, nalanŋaai kpɔ ə́ bili a Israɛlə yeeɠaa ŋą́ gəlee mɛ̨n; ɓɛlɔwai ə́ kɛ la diɛ; nąą aa lɛɛ a lɔi pun, aa lɛɛ a ku kɔ̨nɔ̨n.

¹³ Ka kɛi mą́ą́ mɛ̨nį ɓo a ɲɛ̨i tɛ, kaa pələɠaa ɓo a náá, a kpɔwɔ ɲąą kɛnɛ̨; kɛlaa, ŋą́ gəlee mɛ̨n.

¹⁴ «Mɛ̨nii Mɛ̨nį kəlee ŋą Hééɓomun Yálá kaa moi ya ka; yɛ: Mąąhɔlɔɓo nɔi nąą kəlee ka kwəinɛ̨ɛ̨ hu, gáá pai ə́ kɛi a lɔi pun;

¹⁵ mąąhɔlɔɓo ə́ kwəinɛ̨ɛ̨ kulɔ, ɓɛlɔwai Israɛlə pɛlɛ́i ə lɛɛ la a lɔi pun, bələ ɓə gáá pai ə́ kɛi la; Seirə yee kaa pai lɛɛ a lɔi pun, da Edɔmə kəlee. Bələ ɓə ka gili kɔ́lɔn na, kaa diɛ ɲą́ą́ ɓə gáá a Yai-Laa.»