Izikiɛ 33 - Yálá laawoo hɛɓɛ (dc)Daa Ezekiɛlə hee a bələi kaamn 1 Yai-Laa ə mɛ̨nį ɓo mą́ą́, yɛ mą́ą́: 2 «Hulɔnu lon, mɛ̨nį ɓo Israɛlə lonnii diɛ, yɛ́ diɛ: Lɔi ta a kɛ laa, ŋą́ gɛ diɛ kɔ́ pɛlɛ mąą lɔi tii ɓa, nɔi tii hu nuą da nu ta həɠə di lɔwai, diɛ gɛ a bələi mąąkpɛɛmun, 3 mąą nui tii a kɔ́ kaa yɛ pa nɔi tii pɔ, a túlú hvɛɛ, yɛ nuą kili pu ɉu. 4 Nu ta a dúlú woo mɛ̨n a wala gilaa pɔ̨nɔ̨ mɛ̨nįi tii kaa a mɛ̨nį wala wala, gɔ́ a pa, mąą nu a lɛɛ ɉu, ɲąmą wulu a lɛɛ gbɔwɔ nwuɔ̨. 5 Ə dúlú woo mɛ̨n, kɛlaa, gili ŋą pɔ̨nɔ̨i tii di mo, hvo yili kaa a mɛ̨nį ta. Ɲąmą wulu a lɛɛ gbɔwɔ nwuɔ̨; kɛlaa nui a gilaa pɔ̨nɔ̨ mɛ̨nįi tii kaa a mɛ̨nį wala wala, a gbɔwɔ nwun mąąɓo. 6 Kɛlaa bələi mąąkpɛɛ mun a gɔ́ kaa yɛ pa, a wala dúlú hvɛɛ, gɔ́ a pa, nu ta a lɛɛ ɉu, nui tii haa mɛ̨nį wulu a lɛɛ bələi mąąkpɛɛ mun nwuɔ̨. 7 Yɛ́ hulɔnu lon, yɛ́ ɓə ŋą́ ə́ tɔɔ a Israɛlə bələi mąąkpɛɛ mun, wooi a kulɔ ná, ə́ wəli tɔɔ mą; yili pulu ə́ mo diɛ a nwɔ mɛ̨nį ɓoɔ. 8 Ŋą́ kɛ nu ɲɔ̨nwɔ̨ɔ̨ ɓa, ə́ kaa pai haai, ɛlɛɛ yɛ́n, yá wala gilaa pono, hvo həɠə nwɔ túwɔ́ pələ ɲɔ̨n pulu, a haa a nwɔ túwɔ́ pələ ɲɔ̨n naa pɔɔ. Kɛlaa, yɛ́ ɓə ɲąmą wulu a lɛɛ ə́ nwuɔ̨. 9 Kɛlaa, yá nu ɲɔ̨nwɔ̨ɔ̨ kilaa pɔ̨nɔ̨, ə gɛ ə həɠə nwɔ túwɔ pələ ɲɔ̨n bulu, a wala gɛ hvo həɠə bulu, a haa gɛ nɛ̨ŋɛ̨n mąą mɛ̨nį ɓa, kɛlaa ə́ wɛi, yá ə́ nii nwun mąąɓo. Nɛ̨ŋɛ̨n ɉəɠə mun a ɉɔn mąą pənə a lɛɛ yɛnɛ̨ɛ̨ 10 «'Ə́ wəli tɔɔ, hulɔnu lon, 'mo Israɛlə nwɔ pɛlɛ́i ɓa, yɛ́ mą: Ka kɛ kɛi diɛ; ku wɔ nɛ̨ŋɛ̨nŋaa da ku wɔ kulɔ nwoo mu laa kaa ku nwuɔ̨ yili mąą mɛ̨nį ka ŋɛ̨i ku kaa luwun ɉii la, ku kaa pai ɓalo pələ kɛi ləi? 11 Ɲą́ą́ Mɛ̨nį kəlee ŋą Hééɓomun Yálá gɛ́ diɛ; yii kpɔ gáá a vúlu, a kɛ tii, gwə́inɛ̨ɛ̨ mɛ̨nį ɓa mɔ̨ɔ̨ a nu ɲɔ̨nwɔ̨ɔ̨ haa mɛ̨nį? Kɛlɛi yii gáá bɔ, ya ɓaa, nu ɲɔ̨nwɔ̨ɔ̨ ə dúwɔ pələ mąąhvalin, ə lɛɛ yɛnɛ̨ɛ̨. Israɛlə nwɔ pɛlɛ́i, ka ka hɔn mąą pənə, ka mɔ̨ɔ̨ haa lə mɛ̨nį ɓa? 12 «Hulɔnu lon, 'mo ə́ wɔ lɔi hu nuą diɛ, yɛ́ diɛ: Ɲələi tələnmomun a kulɔ la nwóó mu, nwɔ tələnmolaai hva kɛa malo; ɛlɛɛ, nu ɲɔ̨nwɔ̨ɔ̨ nwɔ túwɔ pələ ɲɔ̨n va nwun na pili, ɲələi a kpɛla la nwɔ mɛ̨nį ɲɔ̨n gɛɛ ɓa. Ɲələi tələnmomun a nɛ̨ŋɛ̨n ɉəɠə la, nwun mąą hvo pai ɓoi nwɔ tələnmo túwɔ tii tɔlɔɔ ə gɛ, mąą mɛ̨nį ɓa. 13 Ŋą́ kɛ tələnmomun ma; ə́ kaa pai lɛɛi yɛnɛ̨ɛ̨, a gilitɔɔ nwɔ tələnmolaai tii ɓa yɛ nɛ̨ŋɛ̨n ɉəɠə, dəlimo túwɔi kpɔ wɔlɔ aa gɛ, da lɛ̨ą gəlee ɓa; mąą nu a haa nɛ̨ŋɛ̨n tii ə ɉəɠə mąą mɛ̨nį ɓa. 14 Ŋą́ kɛ nu ɲɔ̨nwɔ̨ɔ̨ ɓa; ə́ kaa pai haai, ɛlɛɛ, mąą nu a ɲee kulɔ nwɔ nɛ̨ŋɛ̨n hu, yɛ túwɔ a tələnmolaa, 15 ɉɛn di dolaa hee mą, a pənə a dɛɛ, yɛ nwuɔ̨ hɛn bənə yɛ dɛɛ, yɛ túwɔ a yɛnɛ̨ɛ̨ nwɔ tɔ́nŋaa, yɛ túwɔ pələ ɲɔ̨n maa laa, mąą nu a lɛɛ yɛnɛ̨ɛ̨, hea hvo ɉu, hvo pai haai. 16 Nɛ̨ŋɛ̨nŋaai ə gɛ, di hva da wulu lɛɛ nwuɔ̨, ə tɛ̨ą mɛ̨nį kɛ da tələnmolaa; yili mąą mɛ̨nį ɓa, gaa pai lɛɛi yɛnɛ̨ɛ̨. 17 «Ə́ wɔ lɔi hu nuą da kɛ kɛi diɛ: Yai-Laa nwɔ pələi hvo haŋą li, kɛlɛi diɛ mun mə di wɔ pələi hvo haŋą li? 18 Tələnmomun a bulu tinɛ̨n nwɔ tələnmolaa ɓa, yɛ nɛ̨ŋɛ̨n ɉəɠə, a háá, yili mąą mɛ̨nį ɓa. 19 Nu ɲɔ̨nwɔ̨ɔ̨ a həɠə nwɔ kiliŋąhiɛ ɲɔ̨nwɔ̨ɔ̨ pulu, yɛ túwɔ a ɉaŋaa, a tələnmolaa, gaa pai lɛɛi yɛnɛ̨ɛ̨ mɛ̨nį lɛlɛɛ tii ə gɛ mąą mɛ̨nį ɓa. 20 Ya ɓə ka kɛ kɛi diɛ; Yai-Laa nwɔ pələi hvo haŋą li; gáá pai ka kiti teei yɛ bələi ka tɛi tɛi ka túwɔ la, kaai a Israɛlə nwɔ pɛlɛ́i mu nuą.» Ɉerusalɛmə hon mɛ̨nį nɔi hu wolo mɛ̨nį 21 Ku liɛ nuwɔlaa hu, gwɛlan bow gɔw hveelɛ, ɲąnin bow nwɔ hvóló nɔɔli yələ, nu ta ə pu, ə həɠə Ɉerusalɛmə, ə pa bɔ́, yɛ mą́ą́: «Daa daa hon a kɔ́!» 22 Ɲələi tii bu mun tii ə paa la, mąąyíi yələ, yələ wulii pɔ, Yai-Laa ə nwɔ ə ɲee laa mɛ̨́i, ɓɛlɔwai nui tii ə həɠə la bɔ́ɔ́li yələwala pɔ; náá ə hvaa, və́ kɛa kɛ a muugbɛ. 23 Yai-Laa ə hvaa bɔ́, yɛ mą́ą́: 24 «Hulɔnu lon, daa kpoloon ɉu nuąi tii Israɛlə lɔi hu, da kɛ kɛi diɛ: ‹Abrahamə yaa tɔ̨nɔ̨ ɓə kɛ, ɓɛlɔwai ə kɛi hee la nɔi hu, kuɔi ŋɛ̨i kɛa a ku kɛpulu kɛnɛ̨, nɔi a lɛɛ ku yəi a ku wɔɔ.› 25 Yili ma mɛ̨nį ɓa, 'kɛ diɛ: Mɛ̨nį kəlee ŋą Hééɓomun Yálá woo ka: Ka huwɔ mįi a ɲąmą, kaa ka ɲɛ̨i tinɛ̨n haliɠaa pɔ pələ, kaa lɔi kala mɛ̨nįɠaa kɛ, ya ɓə ka tɔɔ kaa kɛ diɛ nɔi kaa lɛɛi ka yəi a ka wɔɔ? 26 Ka kilitɔɔ ka wɔ kɔ́ kɔ́ ɓɔwaɠaai diɛ, kaai a nɛ̨ąą mɛ̨nį mɛlɛkpɛɛmąa, ya ɓə ka gɛ, kaai a ɉinąą, kaa a ɓɛlan gaalon nɛ̨ą kɛ a wɛli. Yili ɓə ka tɔɔ kaa kɛ nɔi ə lɛɛ ka yəi? 27 'Kɛ diɛ, Mɛ̨nį kəlee ŋą Hééɓomun Yálá woo ka: Yii kpɔ gáá a vúlu, nuąi tii daa kpoloon ɉu, di kaa pai haai a ɓɔwa kwɛa laa pɔɔ; nui a kɛ yɛɛ kɔwɔ hu, ŋą́ dɛɛ lɔwɔ huwɔɠaa pɔ a di kɔ̨nɔ̨n; nuąi kwɛni woloɠaa hu, lɔwaɠaa hu, lɔi mu, di kaa pai haai a ɲɔ̨n. 28 Gáá pai nɔi kɛi a lɔi pun, mąąwɛliɛ; nwɔ huwala walai ə kɛi nwun dɛ ɉu, ŋą́ ɉu kala. Israɛlə yeeɠaa da lɛɛ a lɔi pun; mąąhɔlɔɓo, nu hvo pai kɛi tɛɛi laa. 29 Di kaa pai gili kɔ́lɔn ɉii, diɛ kɛ, ɲą́ą́ ɓə gáá a Yai-Laa, ɓɛlɔwai gáá pai nɔi kɛi laa a lɔi pun, mąąwɛliɛ; di wɔ kɛɛ kala mɛ̨nįɠaai kpɔ di gɛ, gəlee mąą mɛ̨nį ɓa. 30 «Hulɔnu lon, ə́ wəli tɔɔ, ə́ wɔ lɔi hu nuą kaa ə́ laa pələ ɓoi, bɛlɛ́ɠaa pɔ, da bɛlɛ́ɠaa laaləi; di kaa kɛi di keeni diɛ: ‹'Ká pa ka gwəli, ka gu Yai-Laa hvaa woo mɛ̨n.› 31 Di kaa pai pai ə́ pɔ, yɛ a kɛ a nuą ɲąąkpɔn ɲələ; Di kaa pai heei ə́ hu, diɛi tii a nwɔ́ nuą, di kaa pai ə́ woo mɛ̨n ɉii, kɛlaa di hva bɔ mɛ̨nį kɛ. Mąąhɔlɔɓo, di laahvɛɛi a kiliŋąhiɛ ɲɔ̨nwɔ̨ɔ̨, ɛlɛɛ di kaa bɔ di yili pɔ túwɔ ɓo, di wɔ kiliŋąhiɛ hvilɛn ŋaai hɛn gɔw ɓa. 32 Ə́ kaa di ɲɛ̨i mu yɛ wɛli wələi nɛ̨ɛ̨nu a doo, mu heɛ a hvɛ́li woo nɛ̨ɛ̨. Da ə́ wooɠaa mɛ̨n gbɔ, kɛlaa, nu ta hva bɔ mɛ̨nį kɛ. 33 Ɲələi, mɛ̨nįɠaai ə́ kaa moi, bɔ mɛ̨nį kaa pai kɛi la, ɛlɛɛ yaan di pɔ mɛ̨nį aa gbɛa kɛ; ɲələ ɓə da gili kɔ́lɔn na, diɛ kɛ Yálá kwəi mɛ̨nį hukulɔ mun da ə kɛ di lɔwai.» |