Izikiɛ 32 - Yálá laawoo hɛɓɛ (dc)

Di kaa wɔlɔi Eziptə nwɔ tɔɔmun di mɛ̨i

¹ Gwɛlan bow kɔ́w hveelɛ nwɔ ɲąnin bow kɔ́w hveelɛ nwɔ hvóló dɔlɔɔ yələ, Yai-Laa ə mɛ̨nį ɓo mą́ą́, yɛ mą́ą́:

² Hulɔnu lon, gɔwɔ tɔɔ yɛ́ haa mɛ̨i wələ too, Eziptə tɔɔmun Faraɔn mɛ̨i; yɛ́ kɛ diɛ: «Ə́ kɛ yɛ lɔiɠaa di wɔ yala lon, ə́ kɛ yɛ hvalə kɛnɛ̨ gboloyá hu, ə́ kɛi yáɠaa pili yələi; yɛ́ yá kɛ tukpu tukpu a ə́ kɔ́wɔɠaa, yɛ́ tɛɛ ya kpɛa kpɛa kala.

³ «Mɛ̨ni kəlee ŋą Hééɓomun Yálá woo ka: Gáá pai nwɔ́ diɲɛ̨n bui ə́ mɛ̨i, nɔiɠaa di wɔ ɲąąkpɔn gɛnɛ̨ɛi hu; diɛ ə́ yala gbonwon ɲa nwɔ́ tumɔi hu.

⁴ Gáá pai ə́ tɔɔi lɔi ɓa, ŋą́ ə́ pili kpomói, ŋą́ gə yələi nwɛ̨nįɠaa kəlee diɛ hee ə́ mɛ̨i, lɔwɔ huwɔɠaa kəlee diɛ pilɛ ə́ hu.

⁵ Ŋą́ ə́ huwɔ taɠa-taɠa yeeɠaa nwuɔ̨, gɛ́ yee lɔwai lɔiɠaa laa hvɛɛ a ə́ kpoyɛliɠaa.

⁶ Ə́ ɲąmąi tii pai kɛi yɛɛi ɲeeɠaa diɛ, ŋą́ nɛɛ lɔi yəi yɛ gbələ. Tɛɛyá pɛlɛɛɠaa kəlee laa a hvɛɛ la.

⁷ Ə́ lən a luwun ə kpɛɛ ɉu, ŋą́ yələ kɔ́lɔn mɛ̨i kpulu, gɛ́ pɛmɛ̨lɛ̨n-gɔwɠaa hu kpinį; gɛ́ hvóló mɛ̨i kpulu a tulɔ kpinįn, ɛlɛɛ, ɲąnin və pai kɛa hvólói.

⁸ Hɛnŋaai kpɔ da lən yələ kwəi, ŋą́ gəlee hu kpinį, ə́ mąą mɛ̨nį ɓa; gɛ́ kpinį pɛlɛ ə́ wɔ lɔi mɛ̨i. Mɛ̨nį kəlee ŋą Hééɓomun Yálá woo li.

⁹ Gáá pai lɔi tamąą lii kələn ɉii di kwəi, ɓɛlɔwai gáá pai lii la a ə́ wɔ luwɔɠaai, nɔiɠaai hvo di kɔ́lɔn di hui.

¹⁰ Ə́ mąą mɛ̨nį ɓa, gáá pai lɔi tamąą mąąwɛlii, di wɔ tɔɔɓɛlaa nwun milimili kaa pai yɛɛi a diɛ, ɓɛlɔwai gáá pai kɔ̨nwɔ̨i la a nwɔ́ kɔ́ kɔ́ ɓɔwai di ɲɛ̨i ɓa. Di ta hvo pai kpɛlai kpɛlin ɉii, gbɔwɔ mąą mɛ̨nį ɓa, a ɲələi yá too la.

¹¹ «Mąąhɔlɔɓo, mɛ̨nįi Mɛ̨nį kəlee ŋą Hééɓomun Yálá kaa moi, ya ka: Babilonə tɔɔmun nwɔ kɔ́ kɔ́ ɓɔwai kaa pai ɓɔi ə́ hu,

¹² ŋą́ ə́ wɔ nu kpulu kɛnɛ̨ɛi too, a kɔ́kulááɠaa di wɔ kɔ́ kɔ́ ɓɔwa, lɔi ta hvo laa hvo ɲɔ̨n, hvo tɛɛ mą. Ɉɛn Eziptə a nwun dɛ ɉu, da ɉu kala, diɛ ɉu nuą kəlee paa.

¹³ Ɉuwɔɠaa kpɔ kɛ ɲa kpɛa kpɛaɠaa kwɛlɛ, ŋą́ gəlee paa. Nu kɔ́wɔ mu tin va kɛa tɔɔ laa, huwɔ kɔ́wɔ mu tin va kɛa tɔɔ laa.

¹⁴ Ŋą́ Eziptə tɛɛyáɠaa mąąyɛɛ, ɲaɠaa diɛ tɛɛ yɛ wulɔ. Mɛ̨nį kəlee ŋą Hééɓomun Yálá woo li.

¹⁵ Gáá pai Eziptə lɔi kɛi a lɔi pun, ɉɛnŋaai tii daa maa hvɛɛ, ŋą́ gəlee hukala, ŋą́ ɉu nuą kəlee kpɛɛ; da gili kɔ́lɔn nąąlɔwai, diɛ kɛ ɲą́ą́ ɓə gáá a Yai-Laa.»

¹⁶ Haa mɛ̨i wələ li, yai lɔiɠaa hu nɛ̨ɛ̨lɛa kaa pai kɛi dooi, diɛ doo Eziptə da nwɔ nu kpulu kɛnɛ̨ɛi di mɛ̨i. Mɛ̨nį kəlee ŋą Hééɓomun Yálá woo li.

Faraɔn kaa yɛɛi ɲąmuątaa

¹⁷ Gwɛlan bow gɔw hveelɛnąą, ɲąnin nwɔ hvóló bow kɔ́w lɔɔli yələ, Yai-Laa ə mɛ̨nį ɓo mą́ą́, yɛ mą́ą́:

¹⁸ «Hulɔnu lon, wɔlɔ Eziptə nwɔ nu kpului mɛ̨i, ə́ ɲɛɛ moloon gɛnɛ̨ɛi hu, da nɔiɠaa hu nɛ̨ɛ̨lɛa. Di wɔ mąąwiɛ ə mą kɛ diɛ, di too nɔi mu lɔi hu pələ; da nuąi da yɛɛ lowa hu.

¹⁹ Ə́ lɛlɛ ɓə mɔ̨ɔ̨ nu takpɛliɠaa diɛ? 'Yɛɛ gáma hu ka kɛ̨nɛ kpolɔwaɠaa.

²⁰ Ka nuąi tii gɔ́ kɔ́ ɓɔwa ə ɓɔ di hu. Yii kɛa gɔ́ kɔ́ ɓɔwa aa too, ka Eziptə yala da ɉu nu kpulu kəlee.

²¹ Kɔ́kulááɠaa di nwun nąmįną kaa pai kɛi pələ pilii mą, ɲąmuątaa; da di yee pɔ nuą. Kɛ̨nɛ kpolɔwaɠaa, diɛi tii haa a gɔ́ kɔ́ ɓɔwa laa pɔɔ. Daa yɛɛ, di kaa laani kámą hu.

²² «Asiri nwɔ kpɔn kəlee kaa laa, di mąątínɛ̨n ŋąą a di wɔ kámąɠaai, diɛi di di paa a kɔ́ kɔ́ ɓɔwa laa pɔɔi.

²³ Di Asiri nuą kámąɠaa tee kpɔ nowa kpon ɉu, nwɔ kpɔn kaa gámaɠaa mąątínɛ̨n ɉii yɛ doo gee hu, di di kəlee di paa, di too a ɓɔwa kwɛa laa pɔɔ; a diɛi tii kɛi ɲɔw too yɛnɛ̨ɛ̨ nuą hui.

²⁴ «Elamə kaa laa, da nwɔ nu kpulu kɛnɛ̨ɛi, di tinɛ̨nŋaa di kámą ɓa diɛi di kəlee daa too a kɔ́ kɔ́ ɓɔwa laa pɔɔ. Di lɛɛ a kɛ́nɛ̨ kpolɔwaɠaa, diɛ yɛɛ nɔi mu pələ; a diɛi tii kɛi ɲɔw too yɛnɛ̨ɛ̨ nuą hui. Di wɔ nwumɛ̨i aa lɛɛ diɛ, da nuą daa yɛɛ la nɔwai.

²⁵ Daa Elamə laai pɛli haa nuą lɔwai, da nwɔ nu kpulu kɛnɛ̨ɛi, di mąątínɛ̨n ŋąą a di wɔ kámą; gɛ́nɛ kpolɔwaɠaai tii kəlee, kɔ́ kɔ́ ɓɔwa ɓə ɓɔ di hu, ɛlɛɛ ya pa, nuą di kɛi ɲɔw diɛ yɛnɛ̨ɛ̨ pələ; di wɔ nwumɛ̨i aa lɛɛ diɛ, da nuą daa yɛɛ nɔwai tii haa nuą lɔwai ɉu.

²⁶ «Mɛsɛkə Tubalə da nwɔ nu kpulu kəlee, di mąą tinɛ̨nŋaai a nwɔ kámąɠaai, di kaa laa, gəlee kaa a kɛ́nɛ̨ kpolɔwa; kɔ́ kɔ́ ɓɔwa ɓə ɓɔ di hu. Mąąhɔlɔɓo, di kɛi ɲɔw too yɛnɛ̨ɛ̨ nuą hu.

²⁷ Da gɔ́kulááɠaai tii haa di ɓo a kɛ́nɛ̨ kpolɔwaɠaa, di hva pɛli kɛi laa ni kɛɛnąą tɔ̨nɔ̨ ɓa, di yɛɛ ɲąmuątaa, di wɔ kɔ́ kɔ́ hɛnŋaai kəlee ə ɓo diɛ, di di wɔ kɔ́ kɔ́ ɓɔwaɠaai laa di nwun mu, di wɔ nɛ̨ŋɛ̨nŋaa di ɓo di kɔ́wɠaa mɛ̨i. Mąąhɔlɔɓo, kɛi di mo a kɔ́kulááɠaa, di ɲɔu too yɛnɛ̨ɛ̨ nuą hu.

²⁸ Ə mą kɛ yɛ́, ə́ kaa pai laai kɛ́nɛ̨ kpolɔwaɠaa lɔwai; nuąi gɔ́ kɔ́ ɓɔwa ə ɓɔ di hu, ka diɛni ɓə pai laai kɛɛnąą tɔ̨nɔ̨ ɓa.

²⁹ «Edɔmə kaa laa, nwɔ tɔɔɓɛlaai, da nwɔ lɔi ɲɛ̨itɔwɔ nuąi; bələi mąn tii di kɔ́ la kɛnɛ̨, da nuąi gɔ́ kɔ́ ɓɔwa ə ɓɔ di hu, da diɛ ni ɓə kɛɛnąą tɔ̨nɔ̨ ɓa. Diɛ kpɛ́li mąn, da gɛ́nɛ kpolɔwaɠaa ɓə di laa, da nuąi yɛɛ nɔwa hu.

³⁰ «Ɲa nwuɔ̨ pələ, lɔi nąmįną kaa laa, di kəlee, da Sidɔn nuąi kpɔ daa yɛɛ haa nuą pɔ; diɛi tii kɛi ɲɔw too nuą hui. Nwumɛ̨ aa hee di ɲɛ̨i, bələi mąn tii di walaa kɛ la, di kɛi mɔ̨ɔ̨ a kɛ́nɛ̨ kpolɔwaɠaa, da nuąi kɔ́ kɔ́ ɓɔwa ə ɓɔ di hu, da diɛ ni ɓə laa ni. Nwumɛ̨ aa lɛɛ diɛ, diɛ li la, nuąi da yɛɛ nɔwa hu, di pɔ.

³¹ «Faraɔn kaa pai di kaai, yɛ gbɔwɔ lii laa nu kpulu kɛnɛ̨ɛi tii mąą mɛ̨nį ɓa. Faraɔn da nwɔ kɔlaɠai kəlee, kɔ́ kɔ́ ɓɔwa kaa pai ɓɔi di hu. Mɛ̨nį kəlee ŋą Hééɓomun Yálá woo li.

³² Ŋą́ Faraɔn lɛɛ laa, yɛ ɲɔw too yɛnɛ̨ɛ̨ nuą hu, kɛlaa di kaa pai naai gɛ́nɛ kpolɔwaɠaai tii kɔ́ kɔ́ ɓɔwa ə ɓɔ di hu, di lɔwai. Faraɔn da nwɔ nu kpului kəlee, da nwɔ kɔ́kuláái kəlee. Mɛ̨nį kəlee ŋą Hééɓomun Yálá woo li.»