Izikiɛ 31 - Yálá laawoo hɛɓɛ (dc)

Eziptə tɔɔmun ə kɛ yɛ kpitili kɛnɛ̨

¹ Gwɛlan bow kɔ́w tanɔ̨n nwɔ ɲąnin ɉaaɓa voló tɔlɔɔ yələ, Yai-Laa ə mɛ̨nį ɓo mą́ą́, yɛ mą́ą́:

² Hulɔnu lon! 'Mo Eziptə tɔɔmun da nwɔ nu kpulu kɛnɛ̨i diɛ, yɛ́ diɛ: «Lə ɓə ŋą́ pɛli ə́ kɔ́ɔn ɉii mą, yɛi ə wɔ huwalawalalaa kɛnɛ̨i?

³ Ə́ kaa yɛ Liban kpitili, nwonwo hu wia, nįnįn ɉu kɛnɛ̨, a hɛan gɛnɛ̨, yai don na ə kɛi hee tulɔ kpinįn ma.

⁴ Yáɠaa di gɛ, yɛ kɛnɛ̨ palə kpon ɉu kwɛaa di ɓo mu ya kpɛa-kpɛaa diɛ kulɔ laa diɛ laa gɔwɔ mu ɲa mąąɓɛlaɠaa diɛ taɠa-taɠa nɔwɔɠaa mu.

⁵ Bələ ɓə ə kɛnɛ̨ la ə tɛɛ mɛlaa wuluɠaa kəlee diɛ, ɲee kɔ̨nwɔ̨n ɉu ə kɛnɛ̨, ɉu ə kɛnɛ̨ ə tɛɛ lɔwɔi wuluɠaa kəlee diɛ, ɲa kpɛa kpɛaɠaai tii kɛi tɛɛ mu, di haalai.

⁶ Yələi nwɛ̨nįɠaa di kɛi di taa tɔɔ nwoŋoɠaa hu, lɔwɔ huwɔɠaa diɛ di kaa mu, lɔi kpulu tamąą diɛ taa pu nįnįn mu,

⁷ nɛlɛɛ kɛ, gɛnɛ̨ pələ ɓa, da ɲee kɔ̨nwɔ̨n ɉu kɛnɛ̨ pələ ɓa, ɉamuɠaa di kɛi həli tɛɛ yaɠaa kpɛa kpɛaɠaa diɛ,

⁸ Yálá yəi nɔw yɛa kpitiliɠaa di hvo kɛi həli bɔ, ə mą kɛ, siprəɠaa di hvo kɛi həli naa ɓa, ə mą kɛ ɓɛ́lɛ́ɠaa di hvo kɛi həli nwoŋoɠaa pɔ, Yálá yəi nɔw yɛa wulu ta hvo kɛi həli bɔ lɛlɛ mɛ̨nį hu.

⁹ Ŋą́ nɛlɛ a ɲee kɔ̨nwɔ̨n ɉu kɛnɛ̨ pələ, Yálá-taa wuluɠaa kəlee diɛ tolo kulɔ la.

Daa ɉɛan nwun dɛɛi hu yali

¹⁰ «Yili mąą mɛ̨nį ɓa, mɛ̨nįi Mɛ̨nį kəlee ŋą Hééɓomun Yálá kaa moi ya ka: Yɛ bələi ə nwun dɛ la, ə nwun dɛ, ə ɉee tulɔ kpinįn ma, ə nwun dɛ, a kpɔɔ ɲąą kɛnɛ̨,

¹¹ gáá dɛɛi lɔiɠaa nwun nąmu pɔ, yɛ ɉon yɛ bələi nwɔ lii ɲɔ̨n gwəi laa kaa la. Ŋą́ą́ ə́ kpɛ.

¹² Nwɛ̨ąąi di ɲɔ̨nwɔ̨ɔ̨ lɔiɠaa kəlee lɔwai, daa bɔn, daa nɛɛ laa diɛ li. Nwonwoɠaa daa pu yeeɠaa nwuɔ̨, da yee lɔwai lɔiɠaa kəlee hu. Nwonwoɠaa hu aa yali yali lɔi mɛ̨i, ya pɛlɛɛɠaa kəlee hu; lɔi mɛ̨i nuą kəlee daa kulɔ nįnįn mu daa taɠa ma.

¹³ Yələi nwɛ̨nįɠaa kəlee diɛ hee gwɛi kɔ́wɔ mɛ̨i, lɔwɔ huwɔɠaa diɛ pa diɛ pɛlɛ nwoŋoɠaa hu.

¹⁴ Yili ə kɛ tii, ə gɛ, wului lɔpee, ə mą kɛ gaa ya kwɛlɛ, hvo gbɔwɔ ɲąą kɛnɛ̨, nwun və hee tulɔ kpinįn ma; ə gɛ wulu ta lɔpee, ə mą kɛ daa ya pu mą a nɛlɛɛ, hvo nwun dɛ mɛlaa mɛ̨i. Mąąhɔlɔɓo, haa pɛ̨ɛ̨i gəlee nwuɔ̨, lɔi mu pələ lɔiɠaa hu, yɛnɛ̨ɛ̨ nuą lɔwai, a nuąi daa yɛɛ kámą hu.

¹⁵ «Mɛ̨nii Mɛ̨nį kəlee ŋą Hééɓomun Yálá kaa moi, ya ka, yɛ: Ɲələi gbitili tii ə yɛɛ la ɲąmuątaa, ŋą́ kɛ ɓaləi tii ɓa, hvo kɛi yá ɉaa wɔlɔ ɓo, ŋą́ moloon tii mɛ̨i kpulu, ŋą́ tɛɛyá kpɛa kpɛaɠaa tɔɔ, ɲá hvɛɛɠaa di kpala; ŋą́ Liban ɲɛ̨i maa wɛli mąą mɛ̨nį ɓa. Ŋą́ lɔwɔi wuluɠaa kəlee kpala mąą mɛ̨nį ɓa.

¹⁶ Ŋą́ lɔiɠaa mąą kpɛlin, doo tin ma; ɓɛlɔwai ŋą́ ɲɛɛ laa haa nuą taa, da nuąi daa yɛɛ nowa hu, lɔi mu pələ lɔiɠaa hu, Edɛn wuluɠaa kəlee lii ə laa. Wuluɠaa, Liban wulu nɛlɛɛɠaa, a diɛi tii da kɛ ya pui diɛ,

¹⁷ diɛ kpɛli mąn, da diɛ ni ɓə yɛɛ ɲąmuątaa, nuąi tii mowa kwɛa ə di paa, di pɔ. Diɛ ɓə kɛ a ɲeeɠaa, di ɓo a nįnįn lɔiɠaa lɔwai.

¹⁸ «Ká gbɛɛ ɓə ká kulaa ká gee ɓa, ə́ mąąwiɛ pələ hu, ə́ kɛnɛ̨ pələ hu, Edɛn wuluɠaa lɔwai; di ə́ yɛɛ, ka Edɛn wuluɠaa lɔi mu pələ, ə́ kaa pai kɛi laa ni kɛ́nɛ̨ kpolɔwaɠaa lɔwai, ka nuąi tii kɔ́ kɔ́ ɓɔwa ə bɔɔ lɛɛ diɛi. Bələ ɓə Faraɔn kaa pai kɛi la, da nwɔ nu kpului. Mɛ̨nį kəlee ŋą Hééɓomun Yálá woo li.»