Izikiɛ 30 - Yálá laawoo hɛɓɛ (dc)

Yálá ŋą kuui da Eziptə

¹ Yai-Laa woo ə həli mą́ą́, yɛ mą́ą́:

² «Hulɔnu lon, gwə́i mɛ̨nį hu kulɔ; 'kɛ diɛ, Yai-Laa ka wɔ Yálái woo ka, yɛ: 'Ka gboo təli a mɔ̨nɔ̨ yələi ti.

³ Mąąhɔlɔɓo ɲələ aa lɛɠɛ; Yai-Laa nwɔ kuui aa lɛɠɛ. Ɲələi ti a kɛ a tulɔ kpinįn ɲələi lɔiɠaa mɛ̨i.

⁴ Kɔ kɔ́ ɓɔwa a pili Eziptə lɔi hu; ɲɔ̨n ɲɛ wolo Nubi lɔi ɓa; a ɲələi nuą kaa pai kɛi tooi la Eziptə lɔi hu a di pɔwa; nuą diɛ li a ɲəi hɛngɔwɠaa; diɛ gulɔ bihɛi.

⁵ Nubi, Putə, Ludə, Kuvə, nɔi huwu tamąąi kpɔ da diɛ ni di kaa ɓɛlan naa hu, da diɛ ni da too a kɔ́ kɔ́ ɓɔwa laa pɔɔ.

⁶ Mąąhɔlɔɓo, mɛ̨nįi Yai-Laa kaa moi ya ka: nuąi kɛi kpɔmąą tɛɛ Eziptə pɔ, daa too; ɉɛn kɛ a vąŋą, yɛ nwun dɛ ɉu, a too, ə həɠə Migdolə ə həli la Siɛnə gəlee kaa pai tooi a kɔ́ kɔ́ ɓɔwa laa pɔɔ. Yai-Laa, ka wɔ Yálái ɓə mo ti.

⁷ Nɔiɠaai ti kaa pai kɛi a lɔi pun, a lɔi pun gələnŋąą; di taɠaa di wɔ taa kpoloonŋąąi lɔwai.

⁸ Da gili kɔ́lɔn a mąą yələ diɛ kɛ Yai-Laa ɓaa a ɲą́ą́; a ɲələi ŋą́ nwɔ̨n doo la Eziptə lɔi hu, ɛlɛɛ nuąi kpɔ da kpɔnmąą tɛɛ bɔ gəlee hu ə wolo.

⁹ A mąą yələi ti; wɛlɛɛ ɓo nuą da həɠə ɓɛ, bɔ́ɔ́ li, diɛ li hiɛ kulɔi kələn ɉu; diɛ Nubi mąą kpɛlin; yai gaa laa, nwəli pulu laɠiɛ. Di mąą kaa pai kɛi kpɛlin ɉi a Eziptə ŋą yələi. A tɛ̨ą, ɲələ kaa pai.

¹⁰ «Mɛ̨nii Mɛ̨nį Kəlee ŋą Hééɓomun Yálá kaa moi ya ka: Gáá pai Eziptə ŋą nu kpulu hu kɛnɛ̨i nwun na pilii a Nabukodonosorə, Babilonə tɔɔmun gɛ mɛ̨nį.

¹¹ Yaa mąn, da nwɔ lɔi hu nuą; lɔiɠaa kəlee di yowo; ŋą́ pa a diɛ nɔi hu kala mɛ̨nį ɓa. Di kaa pai woloi Eziptə ɓa a kɔ́ kɔ́ ɓɔwa, diɛ nɔi laa hvɛɛ a nu pɔwa.

¹² Gáá pai Nilə kɛi a lɔi hu kpalaa; gɛ́ nɔi lɔwɔ́tɔɔ nu ɲɔ̨nwɔ̨ɔ̨ɠaa diɛ; ŋį́ nɔi hu kala, da ɉu hɛnŋąą, a nwɛąą kɛ mɛ̨nį. Ɲą́ą́, Yai-Laa, nwoo li.

¹³ «Hééɓo kəlee Nąmu Yálá woo ka: gáá pai ɉaliɠaa hu kalai, gɛ́ di mąą mɛ̨nį kpɛɛ Mɛmfisə lɔi hu, da tɔɔmun mɛ̨nį, Eziptə lɔi hu. Da hva kɛa kɛ laa. Ŋį́ ɲɔw pili Eziptə lɔi hu.

¹⁴ Gáá pai ɉɛɠɛɛ pələ lɔi hu woloi; gɛ́ nwɔ̨n bili Tanisə. Ŋą́ Tɛbɛsə kiti tee.

¹⁵ Ŋį́ nwɔ́ líiholi ɓɛla Sin mɛ̨i, yai a Eziptə nwɔ taa wala wala ta; ŋą́ nu kpulu tin gbɛɛ Tɛbɛsə.

¹⁶ Ŋą́ nwɔ̨n bili Eziptə hu; Sin yɛ kpəlaan gbəlaan mɔ̨nɔ̨ yei; Tɛbɛsə hu yɛ ɓɛla; Mɛmfisə yɛ lɛɛ yai.

¹⁷ Ɔn da Pi-Bɛsɛtə hilɛlɛa daa laa a ɓɔwa kwɛaa laa pɔɔ; nɛ̨ą diɛ li luwɔlaa hu.

¹⁸ Yələ hvo pai ɓɔi Dafne mɛ̨i, ɲələi gáá pai Eziptə nwɔ hééɓolaai hu yalii la, ŋą́ nwɔ kpɔwɔ ŋąą kɛnɛ̨i kulɔ ɲəi, yai ə kɛi nwun dɛ ɉu. Tulɔ kpinįn gaa pai pɛlɛi mɛ̨i, nonnii nɛ̨ą diɛ li luwɔlaa hu.

¹⁹ Gáá pai nwóóɠaa pɔ mɛ̨nį kɛi Eziptə lɔi mɛ̨i, nąąlɔwai da gbaɠala kaa diɛ kɛ ɲą́ą́ ɓə gáá a Yai-Laa.»

Babilonə tɔɔmun ɓə a Yálá nwɔ kóló kɛ hɛn

²⁰ Gwɛlan bow kɔ́w tanɔ̨n naa, ɲąnin dɔlɔɔ naa voló mɛ̨ihveelɛ yələ, Yai-laa ə hvaa bɔ́, yɛ mą́ą́:

²¹ «Hulɔnu lon, gáá Eziptə tɔɔmun Faraɔn yee yalii, di hva ɉali kɛ, di hvo pai hali pui laa naa yili mɛ̨nį ɓa; di hvo pai ɉali kɛi ə gɛ ɲee ə huwalawala hɔlɔɓo, yɛ pɛli kɔ́ kɔ́ ɓɔwa hon ɉii la.

²² Yili ɓə gaa mą, Mɛ̨nį kəlee ŋą Hééɓomun Yálá woo ka, yɛ: Gáá pai kɔ́ pɛlɛi Eziptə tɔɔmun Faraɔn ɓa, gáá pai ɲeeɠaa yalii, ɲee yii tii ma a nɛlɛɛ, da yi tii ɲaliɛ a bɔlɔi; gɛ́ gɔ́ kɔ́ ɓɔwa kulɔ ɲəi gɛ́ doo.

²³ Gáá pai Eziptə nuą taɠa taɠai lɔiɠaa hu, gɛ́ li a diɛ lɔiɠaa lɔwai.

²⁴ Kɛlaa, gáá pai Babilonə tɔɔmun ɲee huwala walai, gɛ́ nwɔ́ kɔ́ kɔ́ ɓɔwai lɔ ɲee ŋą. Gáá pai Faraɔn yeeɠaa yalii, yɛ ɲiŋɛ yɛ nui daa ɉaɠa baa pələ pɔ.

²⁵ Gáá pai Babilonə tɔɔmun ɲee huwala walai, ɓɛlɔwai Eziptə tɔɔmun nwɛiɠaai da kɛ la mą tooni; nąąlɔwai da gili kɔ́lɔn diɛ kɛ ɲą́ą́ ɓə gáá a Yai-Laa, ɓɛlɔwai ŋą́ nwɔ́ kɔ́ kɔ́ ɓɔwai lɔ la Babilonə tɔɔmun ɲee ŋą yɛ ɉaŋa Eziptə lɔ mɛ̨i.

²⁶ Gáá pai Eziptə nuą taɠa-taɠai lɔiɠaa lɔwai, ŋą́ di taɠa taɠa nuą lɔwai; nąąlɔwai, da gili kɔ́lɔn diɛ kɛ ɲą́ą́ ɓə gáá a Yai-Laa!»