Izikiɛ 29 - Yálá laawoo hɛɓɛ (dc)

Di hąŋąn Eziptə ɓa

¹ Gwɛlan bow, ɲąnin bow nąą nwɔ hvóló pow kɔ́w hveelɛ yələ; Yai-Laa woo ə həli mą́ą́, yɛ mą́ą́:

² «Hulɔnu lon, ə́ ɲɛ̨́i haŋąn Faraɔn, Eziptə tɔɔmun bɔ pələ; 'gwə́i mɛ̨nį hu kulɔ mą, yɛ hvilɛn na gbinįlee ɓa da Eziptə lɔi kəlee.

³ 'Mo, yɛ́ mą: Mɛ̨nį kəlee ŋą Hééɓomun Yálá woo ka, yɛ: Faraɔn Eziptə tɔɔmun, aa lɛɛ gwa yɛ́ gu lɔwai, yɛ́i a mąąɲɔw hɛn gwiɛ kwiɛ; ə́ ɓo pɛlɛni Nilə yaɠaa lɔwai; yɛ́ ɓə ya kɛ diɛ: ‹Nwɔ́ɔ́ ɓaa a Nilə ya! Ɛlɛɛ, ɲą́ą́ gbinįlee ɓə gbɔwɔ pɛli!›

⁴ Gáá pai hoo-laa kwɛli pilii ə́ lá; gɛ́ ə́ wɔ Nilə hu hɔ̨ŋɔ̨leeɠaa yili ə́ kalaɠaa diɛ; gɛ́ ə́ kulɔ Nilə hɛ̨ąi, ka Nilə hu hɔ̨ŋɔ̨leeɠaai kpɔ di yilɛɛ ə́ kalaɠaa diɛ.

⁵ Gɛ́ ə́ pili nɔi pun ɉu, ka ə́ wɔ Nilə hu hɔ̨ŋɔ̨leeɠaa kəlee. Ə́ kaa pai tooi nɔi ɓa, tiiɠaa hu; yɛ́ taɠa-taɠa; ɛlɛɛ di ə́ yɛɠɛ, di hvá ə́ kpɔn ə́ gee ɓa; ŋį́ ə́ tɛɛ lɔwɔ huwɔɠaa da yələi nwɛ́niɠaa pɔ, a di kɔ̨nɔ̨n.

⁶ «A mąą yələ Eziptə nuą kəlee da gili kɔ́lɔn, diɛ kɛ Yai-Laa ɓaa a ɲą́ą́; a diɛi tii kɛ a hveen gbaɠa, Israɛlə nwɔ pɛlɛ́i yɛ gilitɔɔ mą.

⁷ Nuą da ə́ hon a di yee, yá yala di yə́i, yɛ di yee kəlee ɲą ɓɛla; nuąi kɛi tunwɔ̨n ə́ mɛ̨i, ə́ kɛi yali di mu, yɛ́ di hɛ̨ą ti ɉu.

⁸ Yili ɓə gɛi, mɛ̨nįi Mɛ̨nį kəlee ŋą Hééɓomun Yálá ə mo ya ka: Gáá pai pai ə́ mɛ̨i a kɔ́ kɔ́ ɓɔwa; gɛ́ nukanŋąą da taatɛlɛɛɠaa paa ə́ wɔ lɔi hu.

⁹ Eziptə kaa pai kɛi a lɔi pun, a gboloon; bələ ɓə da gili kɔ́lɔn na, diɛ kɛ, Yai-Laa ɓaa a ɲą́ą́; hvó gaai ə kɛ diɛ: ‹Bɔ́ɔ́ ɓaa a Nilə; ɲą́ą́ ɓə naa.›

¹⁰ «Yili mąą mɛ̨nį ɓə gáá pɛlɛi la yɛ́, ka yɛ́ Nilə yaɠaai; gáá pai Eziptə lɔi kɛi a lɔi pun, a gbali kələnŋąą lɔi pun; ə həɠə Migdolə, ə həli la Siɛnə, ə həli kpɔ la Nubi lɔi ɲɛ̨n ɉu.

¹¹ Nu kɔ́wɔ hva kɛa hvilɛn naa; huwɔ kɔ́wɔ hva kɛa hvilɛn naa. Nu hvo pai kɛi laakwɛlan bow nąąn ɲee mu.

¹² Gáá pai Eziptə lɔi kɛi a lɔi pun, lɔi punŋaa lɔwai, nwɔ taaɠaai da kɛ a taai nu hva kɛ ɉu taa kpoloonŋąą lɔwai, kwɛlan bow nąąn ɲee mu; ɛlɛɛ, gáá pai Eziptə nuą taɠa taɠai lɔiɠaa hu; gáá pai di taɠai lɔiɠaa lɔwai.

¹³ «Kɛlaa, Yai-Laa yɛ diɛ: Kwɛlan bow nąąn a tɛɛi, gáá pai Eziptə nuą kulɔi nɔiɠaai ŋį́ di taɠa taɠa di hu, ŋį́ di ɲąą kpɔn.

¹⁴ Gɛ́ Eziptə nuą tɔɔ pələ mąą hvalin, gɛ́ pənə gɛ́ paa a diɛ ɉɛɠɛɛ pələ lɔɠaa hu, diɛ hee laa, ə ɓo a lɔi pɛliɛ ɉu.

¹⁵ A kɛ a lɔi ta kpɛliɠaa diɛ, ɛlɛɛ, hva kɛa tɔɔ lɔi ta kpɛliɠaa mɛ́i. Ŋą́ da kulɔ mą hvo pa kɛa hee lɔiɠaa mɛ̨i.

¹⁶ Hva kɛa kɛ a hɛn da di kilitɔɔ mą; yili ɓə kɛi gɛ Israɛlə nwɔ pɛlɛ́i yɛ ɲɛ̨i tinɛ̨n bɔ pələ, yɛ nɛ̨ŋɛ̨n ɉəɠə la ti; bələ ɓə da gili kɔ́lɔn na diɛ kɛ Yai-Laa ɓaa a ɲą́ą́.»

¹⁷ Gwɛlan bow hveelɛ gɔw mɛ̨i hveelɛnan, ɲąnin doloo toloo ŋą hvóló toloo; Yai-Laa ə pələ ɓo mą́ą́, yɛ mą́ą́:

¹⁸ «Hulɔnu lon, Babilonə tɔɔmun Nabukodonosorə aa naa tɛ kóló kɛnɛ̨ mu; a kɔ́ pɛlɛi ə mo Tirə ɓa: nu kəlee nwun galaanŋąąi, di ɓonwon gəlee hu ɓɛlaa; kɛlaa hvo vɛla hɔlɔɓo li Tirə, ə mą kɛ ŋą kɔ́kulááɠaai hvɛla; gɔ́ kɛnɛ̨i ti di gɔ́ da Tirə taa, ə kɛ kpɔlɔ mąa kpɛli.

¹⁹ Yili mąą mɛ̨nį ɓa, gáá Eziptə tɛɛi Babilonə tɔɔmun Nabukodonosorə pɔ; gaa pai ɉu hɛn gɔwɠaa həɠəi; yɛ nɔi hu hɛnŋąą hɛɠə, yɛ too ɉɛnŋąą kəlee mɛ́i. Eziptə ɓə pai kɛi a nwɔ kɔlaɠai hvɛla.

²⁰ Golói ti ə gɛ, gáá Eziptə tɛɛi bɔ; mąąhɔlɔɓo yaa da nwɔ kɔ́kulááɠaa, ŋą́ kóló ɓə di gɛ. Mɛ̨nį kəlee ŋą Hééɓomun Yálá woo li.

²¹ «A mąą yələ, ŋą́ Israɛlə nwɔ pɛlɛ́i vąŋąn ta pɛlɛ mą; ɛlɛɛ, ə mą kɛ yɛ́, hulɔnu lon, gáá pai gɛi yɛ́ pɛli mɛ̨nį ɓoi diɛ, di lɔwai. A mąą yələ, da gili kɔ́lɔ, diɛ kɛ Yai-Laa ɓaa a ɲą́ą́.»