Izikiɛ 28 - Yálá laawoo hɛɓɛ (dc)Di kaa haŋąi Tirə tɔɔmun ma 1 Yai-Laa woo ə həli mą́ą́, yɛ mą́ą́: 2 «Hulɔnu lon, 'mo Tirə tɔɔmun ma, yɛ́ mą; Mɛ̨nį kəlee ŋą Hééɓomun Yálá woo ka, yɛ: Ə́ kpɔɔ ɲąąkɛnɛi yá mo, yɛ́ kɛ diɛ, gáá a yálá, ŋą́ ɓo heeni tɔɔ kpəlin mɛ̨i, yai gaa a yálá hee kpəlin gboloyá hąąi; ya pa nu lɔ ɓaa yɛ́, hvó a yálá. Ə́ kaa ə́ kpɔwɔ kaai yɛ Yálá pɛli. 3 Ə́ kaa ə́ kpɔwɔ kaai a kilimąą mun ə tɛɛ Daniɛlə ɓa, loo mɛ̨nį ta hvo laa yɛ ə́ kwəi pili yɛ́, 4 ə́ kili ɲa laa pələ, da ə́ kili kɛnɛ̨ pələ, yáá hɛn ɉɔlɔɓo; yáá wali da hɛni di tiɛ̨ gee mɛ̨i. 5 Ə́ kili ɲą laai yɔw kɛi, yáá ə́ yəi hɛn gɔw hu kɛnɛ̨, ɛlɛɛ, hɛn gɛnɛ̨ pələ ə́ yəi, yáá ə́ nwun dɛ. 6 «Yili mąą mɛ̨nį ɓa, Mɛ̨nį kəlee ŋą Hééɓomun Yálá woo ka, yɛ: Yii yáá ə́ kpɔwɔ kɛ yɛ Yálá, 7 gáá pai nwɛ̨ąą ɲąątɔɔi yɛ́, a nu huwui nwɔ hee mɛ̨i laa ɲɔ̨nwɔ̨ɔ̨; di kaa pai di wɔ kɔ́ kɔ́ ɓɔwaɠaai pɛlɛi ə́ wɔ mɛ̨nį kɔ́lɔn gili laa tɛɛ ɓa, diɛ ə́ wɔ mąąwiɛ ɓɛlɛ kpɛɛ mą. 8 Di kaa pai ə́ yɛɛi kámą hu, yɛ́ haa a haa ɲɔ̨nwɔ̨ɔ̨, gboloyá hąąi. 9 Nui pai ə́ paai, ə́ lii kaa mɔ̨ɔ̨ pai kpələi, yɛ́ kɛ mą gáá ɓaa yálá? Yá pa, ə́ kaa lɔ nu kan, hvó a yálá, ɛlɛɛ, ə́ ɓo kɛa nuąi pai ə́ paai, di yee kɔnma. 10 Ə́ kaa pai haai yɛ bələi kɛ́nɛ̨ kpolɔwa a haa la, nwɛ̨ąą yee ɲa, ɲą́ą́ ɓə mo. Mɛ̨nį kəlee ŋą Hééɓomun Yálá woo li.» 11 Yai-laa woo ə həli mą́ą́, yɛ mą́ą́: 12 «Nu lon ɉulɔn, gɔwɔ tɔɔ, yɛ́ wɔlɔ Tirə tɔɔmun mɛ̨i, 'kɛ mą, Mɛ̨nį kəlee ŋą Hééɓomun Yálá woo ka; yɛ: Yɛ́ ɓə di kɛi lɛlɛ kəlee kɔɔn ɲɛ́, ə́ kili kɛnɛ̨, ə́ lɛlɛɛ pələ, mąą kulɔi hvo mą. 13 Ə́ kɛ Edɛn Yálá nwɔ kɛɛnąą lɛlɛɛi, ə́ mąątínɛ̨n ŋąąi kɛ a kúwɔ́-kwɛni huwui lɔpee, da hɛni. 14 Ə́ kɛ a mąąkpɛ malaka, yɛ́ lən; ŋą́ ə́ kɛ a nuą mąąkpɛ mun, ə́ kɛ Yálá nwɔ yéé mąąhəɠɛɛ nwuɔ̨, yɛ́ li, yɛ́ pa nwɔ̨n nən ɉąą. 15 Ə həɠə ə́ pɛli yələ ɓa, ə́ túwɔ pələ lɛlɛɛi kɛ, mąą kulɔi hvo kɛ mą; əlɛɛ ɉu, ɲələi di ə́ ɲɔ̨n ɉii kaa la, ɲələ ə həli. 16 Ə́ wɔ yɔw hu kɛnɛ̨ pələ, ə́ laa ə hvɛɛ a hulu mɛ̨nį, ə́ nɛ̨ŋɛ̨n ɉəɠə. Yili mąą mɛ̨nį ɓa, gáá ka kpolowaɠaa ka tɔɔi, gɛ́ ə́ kpɛ Yálá nwɔ yeei nwuɔ̨, nuą mąąkpɛ malaka kaa ə́ kpɛi, ə́ kulɔ nwɔ̨n nənŋaa lɔwai. 17 Ə́i kpɔwɔ ɲąą kɛnɛ̨, ə́ lɛlɛ mɛ̨nį hu, ə́ mąąwiɛ pələ ə́ ə́ wɔ kilikɛɲəi hukala. Gáá ə́ tooi lɔi ɓa, yɛnɛ̨ɛ̨ tɔɔɓɛlaa diɛ pa, diɛ ə́ kaa. 18 Ə́ wɔ nɛ̨ŋɛ̨n tamą pələ, ə́ hvulu pələ yɔw kɛi, yáá ə́ wɔ lɔi mąąhəɠɛɛi ɓɛlɛkpɛɛ mą. Gáá nwɔ̨n mɛlai ə́ hu, yɛ ə́ kələn; gɛ́ ə́ mąą pənə a luwu, lɔi mɛ̨i nuąi kpɔ ə́ kaai, di ɲɛ̨i ɓa. 19 Yɛnɛ̨ɛ̨ nuąi kpɔ ə́ kɔ́lɔn, di kwəi kaa pai pilii diɛ, ə́ mąą mɛ̨nį hu. Ə́ kaa pai kɛi a hɛn da ɲɔw mą, ə́ mąą mɛ̨nį yɛ kpɛɛ yɛnɛ̨ɛ̨, a yələ kəlee da nwɔɔ.» Sidɔn mąą mɛ̨nį 20 Yai-Laa woo ə həli mą́ą́, yɛ mą́ą́: 21 «Hulɔnu lon ə́ ɲɛ̨i tinɛ̨n Sidɔn pələ, ə́ gwə́i mɛ̨nį hukulɔ mą. 22 'Kɛ mą, Mɛ̨nį kəlee ŋą Hééɓomun Yálá woo ka; yɛ: Sidɔn, gáá pai pɛlɛi yɛ́, ɲɛ̨i kaa pai pɔ̨nɔ̨i yɛ́ taa kwəi, diɛ gilin nąąlɔwai, diɛ kɛ; ɲą́ą́ ɓə gáá a Yai-Laa. Bələ ɓə gáá pai, nwɔ́ mąąhəɠə laa lɛi la nuą diɛ. 23 Gáá pai ɲɔ̨n dɛɛi laa, ɲąmą kaa pai kɛi pui gwəliɠaa hu, nuą diɛ too a di powa, daa kwəi. Mąąhɔlɔɓo, kɔ́ kɔ́ ɓɔwa kaa pai heei ma bələ kəlee. Bələ ɓə da gili kɔ́lɔn na, diɛ kɛ; ɲą́ą́ ɓə gáá a Yai-Laa.» Israɛlə kaa pai kɛi líilaa hu 24 «Nąąlɔwai, ɲąąlən va kɛa hee Israɛlə nwɔ pɛlɛ́i ɓa, ɓomodiliin hva kɛa gwənįn, nu ta hva kɛa kɛ gwɛlɛ, yɛ viiɓo, di kaa pai gili kɔ́lɔn ɉii tii, diɛ kɛ; ɲą́ą́ ɓə gáá a Yai-Laa.» 25 «Mɛ̨ni kəlee ŋą Hééɓomun Yálá woo ka; yɛ: Ɲələi gaa pai Israɛlə nwɔ pɛlɛ́i mu nuą kulɔi la nɔiɠaai ŋą́ di taɠa taɠa ɉu di lɔwai, gɛ́ ɲąąkpɔn, gáá pai nɛi lɔiɠaa diɛ, gɛ́ kɛ mą́ą́həɠɛɛi. Di kaa pai kɛi di wɔ lɔi hu, yai ŋą́ dɛɛ nwɔ́ tí mun Ɉakɔbə pɔ. 26 Di kaa pai kɛi laa, liilaa hu, diɛ pɛlɛ́ɠaa tɔɔ, diɛ tííɠaa kɛ. Di ɓo liilaa hu, ɓɛlɔwai gáá pai di kwɛlɛ nuąi kpɔ tii da tɛɠɛɓo di hu, di kiti teei la, da gili kɔ́lɔn, diɛ kɛ, ɲą́ą́ ɓə gáá a Yai-Laa di wɔ Yálá.» |