Izikiɛ 27 - Yálá laawoo hɛɓɛ (dc)

Di kaa wɔlɔi Tirə taa kpoloon mɛ̨i

¹ Yai-Laa ə pələ ɓo mą́ą́, yɛ mą́ą́:

² Hulɔnu lon, ə́ woo laa Tirə taa mɛ̨́i.

³ Kɛ́ Tirə ɓa, yɛi heenin gboloyá kwɛlɛ pələɠaa hu, ka lɔiɠaa káá lɔ́wɔ́tɔɔ, ka gboloyá hɛ̨ąąi lɔi tamąą. Mɛ̨nį kəlee ŋą Hééɓomun Yálá woo ka: Tirə, yɛ́ ɓə kɛ diɛ nɛ́lɛɛi, mą́ą́ kulɔi hvo mą́ą́?

⁴ Yɛ́i ŋɛ̨i ə́ wɔ lɔi kaa heeni gboloyá hąąi, nuąi ə́ tɔɔ, di ə́ tɔɔ di bɛli ɉu.

⁵ Di ə́ mąą kwɛnąn a Senirə siprə, di ə́ tɔɔ a Liban kpitili.

⁶ Di ə́ hiɛ minɛ̨ɠaa kɛ a Basan wulu kpɛa kpɛa, di hə́lə́ ɲįn gəlee lɔ ə́ tɔɔ mɛ̨nį hu, da Kitimə wulu siprə.

⁷ Ə́ wɔ hvoló-kpanąn ə kɛ a Eziptə həɠə maakpuɔɠaa. Ə́ wɔ lɔɠɔ-tiɛ̨ mɛ̨i həɠə ə kɛ a gbɔliɔ-mutɛɠiɛ, ə kɛ a gbɔliɔ-gbeletete yɛ həɠə Elisa tinŋaa hu.

⁸ Sidɔn nuą da Arvadə nuą ɓə kɛi ə́ hiɛ, kili mąą nuą ɓə ə́ di həɠə, di tɛ ə́ hu, diɛ ɓə kɛ a ə́ hiɛ nuą.

⁹ Gebalə hulɔgoloɠaa, da nwɔ mɛ̨nį kɔ́lɔn nuą di kɛ ə́ pɔɔli, yɛ kpomói kóló kɛ nuą, gboloyá hu kələnŋaa kəlee, da di hiɛ nuą, di kɛi ə́ pɔɔli lɔwɔ tiɛ̨ ya,

¹⁰ Pɛrsə lɔi, da Ludə, Putə nuą di kɛ ə́ wɔ kɔlaɠai hu, diɛ ɓə kɛ a ə́ wɔ kɔ́kulááɠaa, di nwuɔ̨ ɓɔlɔɠaa da di mąąkɔ̨nwɔ̨ kwɛli hɛnŋaa, ə́ pɔɔli ɓə di kɛi di laai kɛ laa, diɛ ɓə kɛ a ə́ hvaŋą.

¹¹ Arvadə lonnii di kɛ ə́ kwɛlɛ nąą kəlee, ə́ mąąkpɛ hį́iɠaa mɛ̨i da ə́ wɔ kɔ́kulááɠaa. Gamadə nuą di ɓo ə́ mąąkpɛ pɛlɛ́ɠaa mu, di kɛi di mąąkɔ̨nwɔ̨ kwɛli hɛnŋaa hɛlɛn ə́ wɔ hį́i ɓa. Diɛ ə́ lɛlɛ yee ta pɛlɛ mą.

Tirə ə kɛ a lɔ́wɔ́-taa

¹² Ka Tarsisə ka kɛi lɔwɔ tiɛ̨ huwu tamąą kpɛa kpɛa mąąhvalin, nɔwɔ tiɛ̨ yii di kɛi paa la ə́ pɔ, ya ɓaa; wali, kwɛli, howa kwɛli gbąnąą kɔ́w pɛli kwɛli.

¹³ Ə mą kɛ Yavan, Tubalə da Mɛsɛkə, ka diɛni ka kɛi yɔw kɛ; di wɔ lɔwɔ tiɛ̨ ɓaa kɛ a luwɔ, da ɓala kwɛli.

¹⁴ Bɛtə-Togarma nwɛi, gilɛ həɠə hooɠaa da kɔ́ kɔ́ hooɠaa, da tiɛ̨-həɠə hooɠaa ɓə ə kɛi paa la ə́ pɔ.

¹⁵ Ka Dedan lonnii ka kɛi yɔw kɛ, gboloyá hu lɔiɠaa tamąą di kɛi hɛnŋąą ya ə́ yəi. Di kɛi ɉɔ̨nwɔ̨ tɛɛ ə́ pɔ a hə́lə́ ɲįnŋaa, da Eben wuluɠaa.

¹⁶ Ɉɛn damąąi ə́ kɛi bɛli, ya ɓə Aramə ə kɛi ɲa ə́ yəi, nɔwɔ tiɛ̨i di kɛi paa la ə́ pɔ, ya ɓaa; kúwɔ́-kwɛni kpɔliɔ, həɠə ɓɛla kpɔluɔ, həɠə ɓɛla mąąpuɔ, həɠə ɓɛla kwəlɛɛ pə-pə da kúwɔ́-kwɛni huwu tamąą.

¹⁷ Ə mą kɛ, Ɉuda da Israɛlə lɔi, ka diɛni ka kɛi yɔw kɛ; di kɛi Minitə mɔnun nɔwɔtɔɔ yɛ́, da hoo kpai pɛlɛɛ, da kwɛ̨i nwulɔ, da wulɔ kun nɛ̨ɛ̨.

¹⁸ Ɉɛn ɉuwu tamąąi ə́ kɛli di pɛli, Damasə ə kɛi mɔlɔmun ɲa ə́ yəi; ə kɛi ɲa ə́ yəi a Hɛlbɔn lɔɔ da Saharə yeehvunwɔ̨.

¹⁹ Dan da Yavan di kɛi kwɛli yɔwuɔ da hɛn mąą kun nɛ̨ɛ̨ɠaa lɔwɔ́tɔɔ yɛ́, diɛ həɠə la Uzalə.

²⁰ Hoo mɛ̨i kpəlin mə ka Dedan ka kɛi ɲɔw kɛ,

²¹ Arabə lɔi da Kedarə tɔɔɓɛlaa kəlee, yɔw mɛ̨nį ə kɛ ka diɛni ka lɔwai; di kɛi hɛnŋaa ya ə́ yəi a ɓɛlaa lonnii, ɓɛlaa hilɛɠaa, da ɓolu hilɛɠaa.

²² Ə mą kɛ Saba da Raema yɔw ɓɛlaa, lɔwɔ ə kɛ ka diɛni ka lɔwai. Di wɔ mąątí wulɔ kun nɛ̨ɛ̨ nɛlɛɛɠaa ɓə di kɛi dɛɛ ə́ pɔ, da kúwɔ́-kwɛni huwui lɔpee gəlee, da hɛni.

²³ Haran, Kane da Edɛn, Saba yɔw kɛ nuą, Asiri, Kilmadə, ka diɛni kəlee ka kɛi yɔw kɛ.

²⁴ Yii di kɛi nɔwɔtɔɔ yɛ́, ya ɓaa, həɠə ɲɛ̨itɔɔɠaa, gbaawii mąąpuɔɠaa, ganą-həɠə, gɔtɔ yɛliɠaa. Ɉɛnŋaai tii kəlee di kɛi hɔlɔɓo ə́ yəi nɔwɔ kpalan ŋą.

²⁵ Tarsisə kələnŋaa ɓə kɛi ə́ wɔ lɔwɔ hɛnŋaai tiɛ̨, ə́ pilaa kɛ hɛn gəlee hu, ə́ laahvɛɛ lɔwɔ tiɛ̨ hu gboloyá hąąi.

²⁶ Ə́ wɔ kələn ɉiɛ nuą di kɛli li a yɛ́ gboloyá hąąi, hvaŋą ə həɠə hvóló kulɔi pələ, ə ə́ hu yali gboloyá hu.

²⁷ Ə́ yəi hɛnŋaa, ə́ wɔ lɔwɔ tiɛ̨, ə́ wɔ hɛn gɔwɠaai, ə́ wɔ kələn ɉiɛ nuąi, ə́ wɔ kələn ɉu kóló kɛ nuąi, ə́ wɔ lɔwɔ́tɔɔ nuąi, ə́ wɔ mįnɛ̨ ɓaala kóló kɛ nuąi, ə́ wɔ kɔ́ kúlaaɠaai, nuąi kpɔ da di ɲąąkpɔn ə́ pɔɔli, gəlee da too gboloyá hu, a ɲələi yá lɛɛ la ɲai.

²⁸ Ə́ wɔ kələn ɉiɛ nuą tomą woo kaa pai, gbonwo ɲą nuą hu kpɛlin ɉii.

²⁹ Nąąlɔwai, nuąi kpɔ da kələn ɉiɛi, da kulɔ di wɔ kələnŋaai hu, kələn ɉiɛ nuą, gboloyá ŋą kóló kɛ nuą kəlee da lɛɛ nɔi ɓa.

³⁰ Diɛ wɔlɔ ə́ mɛ̨i, diɛ tomą a naa mąąwɛliɛ, diɛ muluun gbala pu di nwuɔ̨, diɛ kiliɠilin luwu hu.

³¹ Diɛ di nwun galaan ə́ ma mɛ̨nį ɓa, diɛ mąąwɛli həɠəɠaa too di kwąną, diɛ wɔlɔ ə́ mɛ̨i a di lii kələnŋaa di kwəi, diɛ di woola a nąą mąąwɛliɛ.

³² Di kaa pai mąąwɛli wələ tooi ə́ mɛ̨i, di wɔ mɔ̨nɔ̨i hu, di wɔlɔ woo kaa a wələ, diɛ kɛ diɛ; gbɛɛ ɓə kɛ yɛ: Tirə! A gboloyá hu taa huwala walaai?

³³ Lii ə́ kɛi mo a ə́ wɔ lɔwɔ tiɛ̨ɠaai gboloyá ɲa, ə́ lɔi tamąą pilɛ, ə́ yɛnɛ̨ɛ̨ tɔɔɓɛlaa kɛ a hɛn gɔw nąmįną, ə́ yəi hɛnŋaa da ə́ wɔ lɔwɔ tiɛ̨ɠaai tamą pələ ɓa.

³⁴ Ə́ lɛɛ yái yələ aa həli, yá yɛɛ kpɔ ya kpon gbala, ə́ wɔ lɔwɔ tiɛ̨ɠaai, nuąi kpɔ kɛi di ɲąąkpɔn ə́ pɔɔli, gəlee daa lɛɛ yái.

³⁵ Gboloyá hu lɔiɠaa kaa di woolaai ə́ mąą mɛ̨nį ɓa, di wɔ tɔɔɓɛlaai diɛ kpɛlin a ɲɔu, di ɲɛ̨ilai maa aa liɓi.

³⁶ Nuąi kɛi ɲɔw kɛ nɔiɠaa lɔwai, diɛ kwəlee hvɛɛ ə́ mɛ̨i, yáá kɛ a hɛn da ɲɔw ma, ə́ mąą mɛ̨nį kpɛɛ li a yələ kəlee da nwɔɔ.