Izikiɛ 26 - Yálá laawoo hɛɓɛ (dc)

Tirə mąą mɛ̨nį

¹ Gwɛlan bow gɔw taanɔ̨n nąn, ɲąnin ŋą hvóló toloo, Yai-Laa woo ə həli mą́ą́, yɛ mą́ą́:

² Hulɔnu lon! Tirə ə mɛ̨nį ta ɓo a Ɉerusalɛmə laa, yɛ kɛ diɛ: «Hiiyoo, daa lɔiɠaa di wɔ kpon wolo!» Bílɛ yələ aa həli; daa nɛɛ a lɔi pun.

³ Yili mąą mɛ̨nį ɓa, ɲą́ą́, Yai-Laa, ka wɔ Yálá, mɛ̨nįi gáá moi ya ka: Gáá pai kɔ́ pɛlɛi yɛ́, Tirə; gáá lɔi kpuluɠaa muhəɠəi, ŋą́ di wolo yɛ́, yɛ gboloyá a kɛli muhəɠə.

⁴ Di kaa pai ə́ mąą kpɛ-hį́į́ɠaa pui, di ə́ mąą kɔ̨nwɔ̨ pɛlɛ́ɠaa wolo; gáá pai ɉu-muluun gələi; gɛ́ nwɔ kwɛni kpuwuluɠaai lɛɛ lɔ a di mɛ̨i ponoɔ.

⁵ Gaa pai kɛi a hɔ̨ŋɔ̨lee kpɛ tumɔ̨ɠaa kpalai gboloyá hɛ̨ąi. Ɲą́ą́ Yai-Laa, ka wɔ Yálá, Nwóó li. Lɔiɠaa kaa pai ɉu hɛnŋąą kəlee həɠəi ɲəi.

⁶ Nonnii ti ɲɛɛ kɔ́wɔɠaa hu, kɔ́ kɔ́ ɓɔwa ɓə pai di paai. Bələ ɓə nuą da gili kɔ́lɔn na, diɛ kɛ Yai-Laa ɓaa a ɲą́ą́.

⁷ Mąąhɔlɔɓo, mɛ̨nįi Yai-Laa ka wɔ Yálá kaa moi ya ka: Gáá pai Babilonə tɔɔmun, tɔɔɓɛlaa di wɔɔ tɔɔmun, Nabukodonosorə, gáá pai doli, ə həɠə ɲánwuɔ̨ pələ, ə kɔ́ pɛlɛ Tirə ɓa; gaa pai pai a hooɠaa, a kɔ́ kɔ́-wotoloɠaa, a nuąi hoo mɛ̨i, da lɔi ta kpɛliɠaa, a kɔ́kuláá kpulu kɛnɛ̨.

⁸ Gaa pai ə́ lon nɛ̨ąą paai a kɔ́ kɔ́ ɓɔwa ɲɛɛkɔwɔɠaa hu; gaa pai gala tɔɔi yɛ́, yɛ pɔlɔ tiɛ̨ gee mɛ̨i yɛ ə́ mąą tinɛ̨n na; gaa pai mąą kpɛ hɛŋąą tɔɔi tɔ́nwą tɔwɔ.

⁹ Gaa pai nwɔ pɛlɛ́ nwąną pu hɛn gɛlɛi ə́ wɔ hį́iɠaai hu, yɛ ə́ mąą kɔ̨nwɔ̨ pɛlɛ́ɠaa ɓuwɔ a nwɔ ɉugbunŋaai.

¹⁰ Nwɔ hoo kpulu tamą pələ, gaa pai muluun bɛlɛ́i yɛ́, ə́ nąą kəlee; ɉooɠaa, da nwotoloɠaa di kɔ́wɔ mu tin gaa pai kɛi ə́ wɔ hį́iɠaa hu kpɛlin ɉin; ɓɛlɔwai gaa pai tɛɛ la ɉį́i laalei, yɛ da kɛi lɔ taai ɉį́i wolo ɓa pələ.

¹¹ Nwɔ hooɠaai kɔ́wɔ kaa pai tɛɛi ə́ wɔ kwəliɠaai kəlee hu; gaa pai ə́ hu nuą paai a kɔ́ kɔ́ ɓɔwa; ə́ wɔ hali kɔ́iɠaai ti ə́ kilitɔɔ diɛ, gaa pai di kulɔi ə di too.

¹² Di kaa pai ə́ wɔ hɛngɔwɠaai həɠəi a kɔ-hon, diɛ too ə́ wɔ lɔwɔtiɛ́ɠaai hu; diɛ ə́ wɔ pɛlɛ nwąnąɠaai pu, diɛ ə́ wɔ ɲąŋą kulɔ pɛlɛ́ɠaai wolo. Ə́ hu kwɛniɠaa, nwuluɠaa, da nąą munuunŋaa, gaa pai gəlee pui yai.

¹³ Gáá pai ə́ wɔ wələ wooɠaai kpɛɛi, di hva kɛa ə́ wɔ gwɛniŋąąi woo mąn.

¹⁴ Gáá pai ə́ kɛi yɛ kwɛnii hɛn da hvo mɛ̨i, yɛ́ kɛ a hɔ̨nwɔ̨lee kpɛ-tumɔ̨ kpalai, di hva kɛa pɛ̨nɛ̨, di hvo ə́ tɔɔ; ɲą́ą́, Yai-Laa, Nwóó li. Mɛ̨nį kəlee ŋą Hééɓomun Yálá woo li.

¹⁵ Mɛ̨nį kəlee ŋą Hééɓomun Yálá woo ka, Tirə lɔi ɓa: ə́ too tin a pa tɔɔi, nu lɛɠɛɠaa diɛ ɲiŋɛ́, baa ɓoi ti di kaa pai gɛi ə́ hu; gboloyá hu lɔiɠaa di hvo mɔ̨ɔ̨ pai kpɛlin ɉin?

¹⁶ Gboloyá hu tɔɔɓɛlaa kaa pai həɠəi di wɔ tɔɔ kpəlinŋaai mɛ̨i, di di wɔ gbaawiiɠaai kulɔ di kwąną, di di wɔ həɠə ɲɛ̨i tɔɔɠaai kulɔ diɛ; di mąą həɠə ə lɛɛ lɔ a kpɛlin mo; di hee lɔi ɓa, diɛ kpɛlin nɔ, diɛ di woo laa ə́ mąą mɛ̨nį ɓa.

¹⁷ Di kaa pai kɛi wɔlɔi ə́ mɛ̨i, diɛ kɛ diɛ: Ə́ kulɔ pələ kɛ ləi yɛnɛ̨ɛ̨ lɔiɠaa lɔwai, gboloyá ɲą taa? Daa laa tɛɛi ti, yai da ɉu nuą di hvąŋą kɛnɛ̨ɛ kɛ gboloyá ɲą; a daa ti di kɛi ɲɔw mą kɛɛnąą kəlee.

¹⁸ Yii hu, gboloyá hu lɔiɠaa kaa kpɛlin ɉii a ə́ pu yələ. Gboloyá hu lɔiɠaa daa ɲɔw kɛnɛ̨ ə́ too mɛ̨nį ɓa.

¹⁹ Mąąhɔlɔɓo, Mɛ̨nį kəlee ŋą Hééɓomun Yálá woo ka: ŋį́ pa kɛa ə́ kɛi a taa kpoloon, ə́ ɓo yɛ daaɠaai ti nu hvo di hu; ŋą́ pa ɲąmuątaa ɲąątɔɔi yɛ́, yahvɛɛɠaa diɛ ə́ mɛ̨i kpulu.

²⁰ Gáá pai ə́ yɛɛi kámą hu nuą pɔ, ə́ ɓo yɛ tɔwɔ tɔwɔ taa kpoloon, gɛ́ ə́ hee ɓoloon ɉu nuą pɔ. Yá kɛ kɛa a taa kpoloon tɔɔ hva kɛa kɛ mą, nu kanŋaa di wɔ lɔi mɛ̨i.

²¹ Ŋą́ ə́ kɛ a hɛn nuą da pu mą, hvá kɛa kɛ yɛnɛ́ɛ́, di kaa pai kɛi ə́ kwɛlii, kɛlaa di hva kɛa ə́ káá a hvoló kəlee da nwɔɔ. Mɛ̨nį kəlee ŋą Hééɓomun Yálá woo li.