Izikiɛ 25 - Yálá laawoo hɛɓɛ (dc)

Amɔn nuą mąą mɛ̨nį

¹ Yai-Laa ə mɛ̨nį ɓo mą́ą́, yɛ mą́ą́:

² «Hulɔnu lon, ə́ ɲɛ̨i hee Amɔn lonnii pɔɔli pələ, gwə́i mɛ̨nį ɓo, yii hvilɛn na diɛ.

³ 'Kɛ Amɔn lonnii diɛ; 'ka ka wəli tɔɔ Mɛ̨nį kəlee ŋą Hééɓomun Yálá woo ɓa; Mɛ̨nį kəlee ŋą Hééɓomun Yálá yɛ: Ə́ ə́ laa pu mą́ą́wiɛ lɔi hu, ɓɛlɔwai di mɛlɛ too la, a Israɛlə nwɔ lɔi di ɉu wolo, a Ɉuda nwɔ pɛlɛ́i, daa li a bələ tɔ̨nɔ̨ luwɔlaa hui.

⁴ Yili mąą mɛ̨nį ɓa, gáá ə́ tɛɛi hvóló kulɔi pələ nuą pɔ a di wɔɔ. Di kaa pai di wɔ taaɠaai tɔɔi ə́ pɔɔli, diɛ di heei bɛli laa, diɛ ɓə pai ə́ wɔ wulu ɓaɠaai mįi. Di ə́ wɔ taatɛlɛɛɠaai ɲįnįyá kpələ.

⁵ Gáá pai Raba kɛi a ɲɔɔmɛ̨ɛ̨ laa mįi, gɛ́ Amɔn lonnii di wɔ lɔi kɛ a taatɛlɛɛ kpulu pɛlɛi. Bələ ɓə ka gili kɔ́lɔn na, kaa kɛ ɲą́ą́ ɓə gáá a Yai-Laa.

⁶ «Mɛ̨ni kəlee ŋą Hééɓomun Yálá woo ka, yɛ: Ə́ kɛi ə́ yee lɔwa, yɛ́ ə́ kɔ́wɔ kɛlɛ lɔi ɓa, yɛ́ kwəinɛ̨ɛ̨ kulɔ a ə́ lii ɓa, ə́ kɛi tɛɠɛɓo Israɛlə lɔi hu a ə́ lii ɓa, mɛ̨nįɠaai kɛli laa mą, di mąą mɛ̨nį hu.

⁷ Yili mąą mɛ̨nį ɓa, gáá pai hee ə́ mɛ̨i, gáá pai ə́ tɛɛi lɔiɠaa pɔ, diɛ too ə́ hu, gɛ́ ə́ kulɔ lɔiɠaa lɔwai; gáá pai ə́ hukalai, yɛ bələi da lɔi hukala la, gɛ́ ə́ lɛɛ a kpɛli. Bələ ɓə yá gili kɔ́lɔn na, yɛ́ kɛ, ɲą́ą́ ɓə gáá a Yai-Laa.

Moabə mąą mɛ̨nį

⁸ «Mɛ̨ni kəlee ŋą Hééɓomun Yálá woo ka, yɛ: Moabə da Seirə di kɛ diɛ, Ɉuda nwɔ pɛlɛ́i aa kɛ yɛ lɔi takpɛliɠaa.

⁹ Yili mąą mɛ̨nį ɓa, daaɠaai tii Moabə yeeɠaa ɓa, gáá pai di kulɔi laa, nɔi hu taa lɛlɛɛɠaai tii, ŋą́ di kulɔ ɲeeɠaa ɓa: Bɛtə-Yesimotə, Baalə-Meɔn, da Kiriataimə.

¹⁰ Di kaa pai lɛɛi hvóló kulɔi pələ nuą yəi, Amɔn lonnii pɛlɛɛ diɛ; gáá pai nɔi kwɛlɛi, nuą kili hva kpɛli kɛa kɛ ɉu, diɛ kɛ Amɔn lonnii kaa a lɔi.

¹¹ Ŋą́ Moabə kiti tee, diɛ pɛli gili kɔ́lɔn ɉii tii, diɛ kɛ ɲą́ą́ ɓə gáá a Yai-Laa.

Edɔmə mąą mɛ̨nį

¹² «Mɛ̨ni kəlee ŋą Hééɓomun Yálá woo ka, yɛ: Edɔmə ə túwɔ a ɲɔ̨nwɔ̨ɔ̨, ə mɛ̨nį ɲɔ̨nwɔ̨ɔ̨ kɛ a Ɉuda nwɔ pɛlɛ́i. Ə ɉɔn gɛ, a nwąnąi tii ə gulɔ,

¹³ Yili mąą mɛ̨nį ɓa, Mɛ̨nį kəlee ŋą Hééɓomun Yálá yɛ; gáá pɛlɛi Edɔmə ɓa, gɛ́ ɉu nuą da daatɛlɛɛɠaa kpɛɛ laa, gɛ́ gɛ a lɔi pun, ə həɠə Téma, ə həli Dedan. Nuą kaa pai haai a kɔ́ kɔ́ ɓɔwa laa pɔɔ.

¹⁴ Ɲą́ą́ gbínii ɓə nwą́ną kulɔi Edɔmə ɓa, a nwɔ́ lɔi Israɛlə yee. Di ka pai Edɔmə hon ɉii, yɛ bələi nwɔ liiholi da nwɔ lii ɲanwana kaa la bɔ; bələ ɓə da nwą́ną kɔ́lɔn na. Mɛ̨nį kəlee ŋą Hééɓomun Yálá woo li.

Filisti nuą mąą mɛ̨nį

¹⁵ «Mɛ̨ni kəlee ŋą Hééɓomun Yálá woo ka, yɛ: Filisti nuą di toomɛ̨i kɛ, di di nwąną kulɔ a tɛɠɛɓo ɉu kɛnɛ̨; di gɛ lɔ tii kɛɛ kala wɛli ɓa. Yili kɔ́wɔ ə tɔɔ yowo laa mɛ̨nį yii kpɛɛ hvo mą, mąą mɛ̨nį ɓa.

¹⁶ Yili mąą mɛ̨nį ɓa, Mɛ̨nį kəlee ŋą Hééɓomun Yálá woo ka: Gáá pai pɛlɛi Filisti nuą diɛ, gáá pai Kereti nuą hukalai, gɛ́ gboloyá kwɛlɛ lɔi lɛɛ a vowolo.

¹⁷ Gáá nwą́ną kulɔi diɛ a nííɓa, gɛ́ di hutɔɔ a liiholi; bələ ɓə da gili kɔ́lɔn na, diɛ kɛ, ɲą́ą́ Yai-Laa, ɲą́ą́ ka tii nwą́ną kulɔi diɛ.»

« Roimhe

Air adhart »

Bible Society in Guinea-Conakry

Lean sinn:

Ceanglaichean taic

Sanasan