Izikiɛ 24 - Yálá laawoo hɛɓɛ (dc)

Ɉerusalɛmə kaa yɛ kwɛli ləɠii ɓɛ̨nɛ̨ aa ɉon

¹ Gwɛlan mɛ̨inąąn nąą, ɲąnin bow nąą nwɔ hvóló pow yələ, Yai-Laa ə mɛ̨nį ɓo mą́ą́, yɛ mą́ą́:

² «Hulɔnu lon, háákələi hvólói ŋɛ̨i laa pɛ̨ɛ̨ hɛɓɛ́ hu; a volói ŋɛ̨i kpɔ kpɔɔ, mąąhɔlɔɓo háákələi yələ ɓə Babilonə tɔɔmun ə kɔ́ pɛlɛ la Ɉerusalɛmə taa ɓa.

³ «Hanwon da hɔɔ gulɔ nwoo mu nu huwui ŋɛ̨i ɓa, 'kɛ diɛ: Mɛ̨nį kəlee ŋą Hééɓomun Yálá woo ka: «Kwɛli ləɠi pɛli, 'bɛli ə́ ya pu ɉu,

⁴ Ɉuwɔ kpuwuluɠaa too ɉu, ɉuwɔ lɛlɛɛɠaa, wəla da ɲee; na hvɛɛ a gɔw kpɛa kpɛaa. Gbuwulu lɛlɛɛ həɠə,

⁵ gɔwɠaa lɔ mu pələ, ə nɛn gbɔ kpulu kpulu, mąąnɛ̨ɛ̨ gɔwɠaa kəlee di mɔ̨n.

⁶ Mąąhɔlɔɓo, Mɛ̨nį kəlee ŋą Hééɓomun Yálá yɛ: Ɲąmą pu taa nɛ̨ŋɛ̨n naai, gɛ pələ kaa yɛ kwɛli ləɠi yii ɓɛ̨nɛ̨ aa hee mą, ɛlɛɛ, di hva pɛli gulɔi ma. Ɉuɓo, yɛ́ ɉuwɔ kpuwulu kulɔ ɉu tɛi tɛi, hvo da lɛɛ ɉu, mąąhɔlɔɓo, hu yɛɠɛ hvo ɉu.

⁷ Mąąhɔlɔɓo, ɲąmąi ə bu, gaa nii daai, ə bu kwɛni kpuwulu mɛ̨i lɔ tii, hvo bu li lɔi ɓa, hvo muluun bu li mɛ̨i.

⁸ Bələi ŋą́ tɛɛ la, gɛ́ nwɔ́ líiholii yɛɛ mɛ̨i, gɛ́ nwą́ną kulɔ mą, ɲąmąi tii ə bu gwɛni kpuwulu mɛ̨i, gáá nɛɛi laa vá mɛ̨i kpulu.

⁹ Yili mąą mɛ̨nį ɓa, Mɛ̨nį kəlee ŋą Hééɓomun Yálá yɛ: Kpalo ɓɛlaai ɲąmą pu taa ɓa, gáá pai kpaɠa nwɔ̨n ɉeei,

¹⁰ 'gwɛi tiɛ̨ gee mɛ̨i, nwɔ ɲąą tɛ; ɉuwɔ mɔ̨n, ə́ pənə ə́ mɔ̨n, gbolo da giɛn di kɛ mą, gɔwɠaa di kələn.

¹¹ Gwɛli ləɠi howolo hee nwɔ̨n dəŋa ɲa, ə hulɔ, gwɛli ə kpɔlu, ɉu pələ kalaɠaa di kələn, mɛnɛ̨i tii gaa mą ə kələn.

¹² «Ɓɛnɛ̨ aa kóló hee mą́ą́ tai, ə mą kɛ tii, nwɔ̨n və pai mɛ̨nɛi tii ɉeɛ gwɛli ləɠii tii ɓa, gulɔi mą.

¹³ Túwɔ pələ ɲɔ̨n mə a ə́ mąąliɓi, mąąhɔlɔɓo ŋą́ą́ ə́ mąąhəɠə, kɛlaa ə́ mąą hvo həɠə li. Ɛlɛɛ, ə́ mąą hvo pai həɠəi ə́ mąąliɓi hɛn tii yəi. Hvo kɛli ŋą́ níí holi ə́ pɔ, ŋą́ naa kulɔ.

¹⁴ Ɲą́ą́ Yai-Laa váá woo li, ɛlɛɛ, gəlee kaa pai kɛi; gáá gɛi vá hviikpɛɛlaa too ɉu, və́ pai nu mąąwɛli kaai, və́ pai nwóó yalii bulu. Di kaa pai ə́ kiti teei ə́ túwɔ pələ ɓa, ə́ kɛ mɛ̨nįɠaa pɔ pələ, Mɛ̨nį kəlee ŋą Hééɓomun Yálá woo li.»

Yálá ə haa too Ezekiɛlə ɓa

¹⁵ Yai-La ə mo mą́ą́, yɛ mą́ą́:

¹⁶ «Hulɔnu lon, gáá pai ə́ ɲɛ̨i kɔ́w kwəinɛ̨ɛ̨ hɛn gulɔi ə́ yəi a wea. Hvó túwɔ yɛ haa a too yɛ́, hvó pai ə́ woo laai, hvó pai wɔlɔi.

¹⁷ Ya kɛ lɔ ɲiŋɛi ə́ hu pələ, mɛ̨nįɠaai da gɛ haa mɛ̨nį hu, hvo pai da kɛi. Ə́ wɔ ɓɔlɔi lɔ ə́ nwuɔ̨, ə́ wɔ kɔ́lɔɠaai lɔ, hvó həɠə pɛlɛ ə́ laaləi, ɛlɛɛ, hvó kɔ̨nɔ̨n ɉon gwəlii mun da yəi.»

¹⁸ Ŋą́ mɛ̨nįi tii ɓo nuą diɛ yələ wala pɔ, ɛlɛɛ, nɛ̨́ą ə haa yələ wulii pɔ. Yələ ɓɔɔ, bələi di dí la, ŋą́ gɛ lɔ tii.

¹⁹ Nuą diɛ mą́ą́: «Dúwɔi ŋɛ̨i ə́ kaa moi, hvá mɔ̨ɔ̨ nwun nɛ kuɔ?»

²⁰ Nąąlɔwai, gɛ́ diɛ: «Yai-Laa ə woo ta ɓo mą́ą́, yɛ má:

²¹ 'Mo Israɛlə nwɔ pɛlɛ́i ɓa, yɛ mą: ‹Mɛ̨ni kəlee ŋą Hééɓomun Yálá woo ka, yɛ, gáá pai nwɔ pɛlɛ́i pui, yai gaa a ka ɲɛ̨i pɔ̨nɔ̨ hɛn, ka wɔ ɲąąwooɓo laai hu; yai gaa a ka ɲɛ̨i kɔ́w nwɔ kwəinɛ̨ɛ̨; yai ka ka kilitɔɔi mą ka wɔ yɛnɛ̨ɛ̨ hu. Ka lon ɉinąą da ka lon nɛ̨ąąi tii ka di lɛɛ Ɉerusalɛmə, di kaa pai tooi ɓɔwa kwɛa yee ŋą.

²² Nąąlɔwai, ka káá pai gɛi yɛ bələi ŋą́ gɛ la. Ka hvo pai həɠə pɛlɛi ka laaləi, ka hvo pai kɔ̨nɔ̨n ɉon ɉii gwəlii mun da yəi.

²³ Ka wɔ ɓɔlɔɠaai da kɛ ka nwuɔ̨, ka wɔ kɔ́lɔɠaai di ɓo ka kɔ́wɔ ŋą, ka hvo pai túwɔi yɛ haa a too kaa; ka hvo pai wɔlɔi, kɛlaa ka káá pai kpalai ka wɔ nɛ̨ŋɛ̨nŋaai mąą mɛ̨nį ɓa, kaa ɲiŋɛ ka kee ni mąą mɛ̨nį ɓa.

²⁴ Ezekiɛlə aa mɛ̨nįi tii lɛɛ kwɛa la, yɛ nɛ kaa. Mɛ̨nįiɠaai kpɔ ə gɛ, ka káá pai gəlee kɛi. Mɛ̨nįi tii a pa həlii kaa, ka gili kɔ́lɔn nąąlɔwai, kaa kɛ ɲą́ą́ ɓə gáá a Mɛ̨nį kəlee ŋą Hééɓomun Yálá.›

²⁵ «Hulɔnu lon ə́ wəli tɔɔ, ɲələi gáá pai di hvaŋą kulɔi la di yəi, da di wɔ yɛnɛ̨ɛ̨ ɲąąnɛ̨ɛ̨ hɛnŋaai, da di mąąyili hɛnŋaa, ɉɛn da di ɲɛ̨i hee mą yɛ di kwəinɛ̨ɛ̨; ɉɛn a di wɔ yɛnɛ̨ɛ̨ ɲąąnɛ̨ɛ̨ diɛ, di lon ɉinąą da di lon nɛ̨ąą;

²⁶ Mąą yələ, nu ta kaa pai pai ə́ pɔ, a nui nwun aa kulɔ ɉu, yɛ nwɛlɛɛ ɓo.

²⁷ Mąą yələ, ə́ laa a hvaa, yɛ pɛli pələ ɓoi nui tii pui mą; ə́ kaa pai kɛi hvaai, hvo kɛa pai kɛi a muugbɛ. Yáá gbɛa kɛ mɛ̨nįɠaa lɛɛ kwɛaa la, yáá mo diɛ, di kaa pai gili kɔ́lɔn ɉii nąąlɔwai, diɛ kɛ ɲą́ą́ ɓə gáá a Yai-Laa.»