Izikiɛ 23 - Yálá laawoo hɛɓɛ (dc)Ɉerusalɛmə da Samari di wɔ tuwɔ pələ ɲɔ̨nŋąą 1 Yai-Laa woo ə həli mą́ą́, yɛ mą́ą́: 2 Hulɔnu lon, nɛ̨ąą hveelɛ di kɛ laa, diɛ ɓo a lee lon dɔ̨nɔ̨. 3 Di lɔ wɛli honŋąą hu Eziptə lɔi hu, di lɛɛ tiikpə, di nwɛli honŋąąi ti kɔ́wɔtɔɔ; nąą ɓə di pələ kɛ laa a di kpɛla ɲįnį, di di kpɛla ɲįnį ɲɛ̨i paa. 4 Di laa ka: Ohola ɓə kɛ a nu kɛnɛ̨ laamun, nəɠə ə ɓo a Oholiba; yili pulu, di lɛɛ ɲə́i kwa diɛni ku lon nɛ̨ąą da lon ɉinąą kaa; nɛ̨ąąi ti ka: Ohola ɓaa a Samari; Oholiba ɓaa a Ɉerusalɛmə. 5 Ohola ə too wɛli honŋąą hu; hvo lɛɛ ɲə́i; nii mu ə həɠə kɛnɛ̨ nwɔ wɛliɠaa pɔ; diɛ ɓaa a Asiri nuą, diɛi a gwɛlɛ nuą. 6 Diɛi di mąą həɠə ə kɛ a həɠə kpɔluɔɔ, lɔi ɲąąwooɓonuą, taa ɲąąwooɓonuą; gəlee di ɓo a nu nwunuɠaa; di ɓo hooɠaa mɛ̨́i. 7 Ə gbɔwɔ tɛɛ Asiri lɔi hu nu kpɛa kpɛaɠaa kəlee pɔ. Duwo pələɲɔ̨n gulɔ pələ e gbɔwɔ mąą liɓi a di wɔ haliɠaai kəlee. 8 Ə nwɛli mɛ̨nįi ti kpalatɔɔ Eziptə lɔi hu; a ɓɛlɔwai da yaa di kɛi laa la, ə ɓo nii a nɛ̨ɛ̨non; ɓɛlɔwai di kɛi ɲįnį hon na, diɛ pɛli wɛli pələ kəlee kəi la. Ɲee ə kɛ lɔ nwɛli honŋąąi ti hu. 9 Yili ɓə gɛ, gɛ́ dɛɛ nwɔ wɛliɠaa pɔ, diɛi a Asiri nuą, mąąhɔlɔɓo di lɔɔi kɛ nii mu. 10 Lɛani di gbuwulu ɓo; di non ɉinąą da non nɛ̨ąą həɠə; yai ti nwɛi, di baa a kɔ́ kɔ́ ɓɔwa; ə kɛ a kɔ́ɔnmąą mɛlaa nɛ̨ąą ɲɛ̨i ɓa; yii ə gwɛli, di naa mą. Ɉerusalɛmə nwɔ tuwopələ ɲɔ̨n 11 Nəɠə Oholiba ə mɛ̨nįɠaai ti kəlee kaa, kɛlaa nwɛi ə ɲɔ̨nwɔ̨, ə wɛli hon ə tɛɛ niə ɓa; nwɔ wɛli honŋąą ə kɛɛ kala ə tɛɛ niə ɓa. 12 Da Asiri nuą di too nwumɛ̨-wɛli hu: lɔi ɲąąwooɓo nuą, taa ɲąąwooɓo nuą, kɔ́kulááɠaa di mąą yilɛɛ kpɔ, hoo mɛ̨i nuą, gəlee di ɓo a nu nwunuɠaa, di ɲɛ̨i mąąhəɠɛɛ. 13 Ŋį́ gaa, gɛ́ kɛ a kɛ gbɔwɔ mąąliɓii; gəlee hveelɛ hvilɛn di mo pələ tɔ̨nɔ̨ mɛ̨i 14 Ə nwɔ tuwɔ pələɲɔ̨n ta laa mɛ̨i. Ə hinąą mąąnįnįn gaa pɛlɛ́nwąną ɓa, a Kalde nuą mąąnįnįn di ɉəɠə ti a pɔlɔ kpɔlun. 15 Hąąyili kɔ́lɔ tɔɔ di hąą, həɠə ɓɛla kpinįŋąą di nwun ma. Gəlee di kɛ yɛ tɔɔɓɛlaa lonnii; di kɛ yɛ Babilonə nuąi kɛ Kalde lɔi hu; yai a di kaa lɔi. 16 Ə di kaa lɔ di wɛli ə too mą, ə nuąą tɔɔ di pɔɔli Kalde lɔi hu. 17 Yiliɠaai di pa bɔ, Babilonə nuą di pa nwɛli pɛlɛ́ mu, di mąą liɓi a di wɔ tuwɔ pələ ɲɔ̨n; mąą ə liɓi di mąą mɛ̨nį ɓa. Yili pulu di wɛli ə kpɛɛ mą kpɔ tɛ̨ɛ̨ tɛ̨ɛ̨. 18 Ə gbɔwɔ lɛ a wɛlikɛ nɛ̨ɛ̨nu kɛ pələ; yɛ gbuwulu lɛ. Yaa gbɛli nwɛli ə kpɛɛ mą́ą́ kpɔ tɛ̨ɛ̨ tɛ̨ɛ̨, yɛ bələi niə nɛ̨ɛ̨nu wɛli ə kpɛɛ la mą́ą́. 19 Ə nwɔ wɛli honŋąą hu wiɛ; yɛ gili ɲąą hiɛ la ti gbɛla yələ ɓa, ɓɛlɔwai ə kɛi wɛli hon na Eziptə lɔi hu. 20 Da nwɔ wɛliɠaa da too di kee ɓa, da ɲąąnɛ̨ɛ̨i kaa; kɛlaa di woo laa kulɔi a kɛ yɛ wɛlɛhooɠaa da kɛi tɛ, awala kɛti hooɠaa da kɛi tɛ. Di kaa pai Ɉerusalɛmə hu tɔɔi 21 Yaa pənə yaa ə́ yee too wɛli mɛ̨nį hu, yɛ bələi ə́ kɛi gɛ la a ə́ kpɛla yələ; ɓɛlɔwai Eziptə nuą di kɛi ə́ ɲįnį yɔwɔɔn na; diɛ ə́ kpɛla ɲįnį hon. 22 Yili mąą mɛ̨nį ɓa, Oholiba, nwooi Mɛ̨nį Kəlee ŋą Hééɓomun Yálá kaa moi ya ka, yɛ: Gáá pai ə́ wɔ wəliɠaai ɲąątɔɔi yɛ́; diɛi di wɛli aa kpɛɛ yɛ́. Gáá pai di kpulu ɲąątɔɔi yɛ́, diɛ həɠə pələ kəlee. 23 Babilonə lon ɉinąą, da Kalde nuą kəlee Pekɔdə, Soa, da Koa; Asiri lon ɉinąą kəlee. Gəlee di ɓo a nu nwunu, di ɲɛ̨́i mąąhəɠɛɛ; lɔi ɲąąwooɓo nuą, taa ɲąąwooɓo nuą, tɔɔ kwəlii nuą; nu kpɛa kpɛaɠaa; di kəlee di ɓo hoo mɛ̨i. 24 Mąą yələ, kɔ́ kɔ́ wotoloɠaa, da tiɛ̨ həɠə-wotoloɠaa da həɠə ɲánwuɔ̨ pələ diɛ pa pɛlɛi yɛ́. Da kɛ a nu huwu yee lɔɔ gee hu; da ə́ mąątínɛ̨n a kɔ́ kɔ́ kwɛlihɛnŋąą, di doo gee hu. Ŋą́ nwóó hu kulɔ diɛ, diɛ kɛa ə́ kiti tee yɛ bələi di kaa la bɔ. 25 Ŋą́ tóló kulɔ a yɛ́, diɛ ə́ hɔɔ a líiholi. Di kaa pai ə́ huŋɔ̨ teei yɛ́, da ə́ wəliɠaa. Ə́ hu nuą gbəlii a lɛɛ, ɓɔwa kwɛaa yɛ di paa; di kaa pai ə́ lon ɉinąą da ə́ lon nɛ̨ąą həɠəi, ɛlɛɛ, ə́ kpəlii pai lɛɛi nwɔ̨n ə gələn. 26 Di kaa pai ə́ mąą həɠəɠaa kulɔi yɛ́, diɛ ə́ mąą yilihɛnŋąą həɠə. 27 Ŋą́ ə́ wɔ tuwɔ pələ ɲɔ̨n kpɛla kɛa bələi, da ə́ wɔ wɛli mɛ̨nįi ə́ ə́ yee lɔ ɉu Eziptə lɔi hu, hva kɛa ə́ ɲɛ̨i kulɔ di pɔ; hva kɛa ə́ kiliŋąhiɛ Eziptə ɓa. 28 Mąąhɔlɔɓo mɛ̨nįi Mɛ̨nį kəlee ŋą Hééɓomun Yálá kaa moi ya ka, yɛ: Gáá pai ə́ tooi nuąi ti di wɛli kpɛɛ yɛ́ di yəi ɲą; a diɛ ti ə́ yowolaa kulɔi a diɛ yɛ bələi ə́ kaa la bɔi. 29 Di kaa pai ə́ hon ɉii a yowolaa, diɛ ə́ tɔ̨nɔ̨ kəlee kulɔ ə́ yəi; diɛ ə́ lɛɛ a ə́ kpuwulu, həɠə hva kɛ yɛ́, ə́ wɔ tuwɔ pələ ɲɔ̨nŋąi diɛ kulɔ pɔ̨nɔ̨ ɲą, yili yɛ kɛ a ə́ nwumɛ̨ mɛ̨nį. 30 Ə wɔ wɛli mɛ̨nįi da ə́ tuwɔ pələ ɲɔ̨n mə pai mɛ̨nįɠaai ti laai yɛ́, mąąhɔlɔɓo ə́ tuwɔ pələ ɲɔ̨n gulɔ a hvilɛn ə́ mo lɔiɠaa pulu yɛ́ ə́ mąą liɓi a di wɔ haliɠaai. 31 Ə́ hvilɛn ə́ liɛ nɛ̨ɛ̨nu pulu; yili mąą mɛ̨nį ɓa, gáá nwɔ́ gbamąi lɔi ə́ yəi ɲą, yai a nwɔ́ líiholi gbamą. 32 Mąąhɔlɔɓo, Yai-Laa woo ka, yɛ: Ə́ liɛ nɛ̨ɛ̨nu ŋą gbąmąi, yá ɉu ya gbələ: Yai a ɉugbunŋąą hu kɛnɛ̨. Gaa pai kɛi a yɛ́lɛ́ kulɔ ɉu hɛn, diɛ di woo həɠə mą; ɉu kɛnɛ̨ pələ ɓa. 33 Ə́ kaa pai piləi lɔɔ hu, da mɔ̨nɔ̨; mɔ̨nɔ̨ da kwəi pili gbamą li, a ə́ liɛ nɛ̨ɛ̨nu Samari ŋą gbamąi ti. 34 Kɛlaa ə́ kaa pai gbələi, ə́ ɉuɓo; yɛ́ nwolo a ə́ ɲin; yili pulu, yɛ́ ə́ ɲįnįɠaa mąą ɓɛla ɓɛla a galanŋaa. Ɲą́ą́ ɓə mo, Mɛ̨nį kəlee ŋą Hééɓomun Yálá woo li. 35 Yili mąą mɛ̨nį ɓa, Mɛ̨nį kəlee ŋą Hééɓomun Yálá yɛ: Lɛ̨ąi ə́ mo mą́ą́, yɛ́ bílí ə́ pulu pələ; ə́ wɔ tuwɔ pələ ɲɔ̨n, da ə́ wɔ wɛli mɛ̨nįi, pulu mɔ̨nɔ̨ mįi yɛ́ kpinįi. Yálá kaa Samari da Ɉerusalɛmə di kiti teei 36 Yai-Laa ə hvaa bɔ́, yɛ mą́ą́: hulɔnu lon, ə́ kaa bɔ ə́ Oholiba da Ohola di kiti tee? Di wɔ tuwɔ pələ ɲɔ̨n hu kulɔ kan diɛ. 37 Mąąhɔlɔɓo daa di hilɛ hvulu, daa wəli hon, ɛlɛɛ, ɲąmą pɔɔ kaa di yee ɓa; di too wəli mɛ̨nį hu da di wɔ haliɠaai, di hvo nɛɛ li a yili; lonŋąąi kwa diɛni ku gaai, di di tɛɛ ɉaliɠaai ti pɔ, yiliɠaai diɛ di mįi. 38 Di pənə nwɔ̨nɔ̨ di nwɔ́ hvįįtɔɔ yələi laa pu, a ɲələi di nwɔ́ pɛlɛ́i mąą luwu la. 39 Ɲələi di kɛi di lonnii kulɔ la a haláá ɉaliɠaa diɛ, mąą yələ di lɔ nwɔ́ pɛlɛ́i mu, diɛ mąą luwu la tii; mɛ̨nįi di gɛ ɲəi bɛlɛ́n ya ka ti. 40 Yili pulu di nuą təli diɛ həɠə kwɛa la, di nu tɔɔ kpɔ di pɔɔli, mąą nuą ka ti daa pa, diɛi ə́ ə́ waa di mąą mɛ̨nį ɓa, yɛ́ pə́ną́ laa ə́ ɲɛ̨i kɔ́n bulu; yɛ́ ə́ mąą yili. 41 Yili pulu ə́ laa gbin gɛnɛ̨ɛ ɲą, taɓali hviləŋąą gbin nií la, ɓɛi yaa kɛ nwɔ́ wulɔi da nwɔ́ lansan hee laa. 42 Di kɛi nu kpulu kɛnɛ̨ tin mąn, diɛ kwəinɛ̨ɛ̨ kulɔ, mɛ̨nį hvo kɛ di wəli pulu; nu kpulu kɛnɛ̨ ta kpɛli ə pa ə pɛlɛ yiliɠaai diɛ, diɛ həɠə nɔi pun ɉu pələ kəlee pɔ; di kɛi yee kwąną kwɛli too nɛ̨ąą yee ɓa, diɛ tɔɔɓɔlɔ lɛlɛɛɠaa lɔ di nwuɔ̨. 43 Ya ɓə, nɛ̨ɛ̨nu ta ə kɛ laa, wɛli hon nuą daa ɉaɠa, gɛ́ mą: gaa nwɔ̨nɔ̨ gbɔwɔ tooi wɛli mɛ̨nį hu. 44 Nuą da li bɔ, yɛ bələi nɛ̨ɛ̨nui aa wɛli mɛ̨nį kɛ kóló, nuą da li la bɔ. Bələ ɓə nuą da li la Ohola da Oholiba di pɔ; nɛ̨ąąi tii, nwumɛ̨ hvo kɛa diɛ. 45 Kɛlaa, tələnmo nuą kaa pai di kiti teei yɛ bələi da wɛlikɛ nɛ̨ąą kiti tee la, da nɛ̨ąąi da ɲąmą pu; mąąhɔlɔɓo ɲąmą pɔɔ kaa di yee ɓa. 46 Yaan, mɛ̨nįi Mɛ̨nį kəlee ŋą Hééɓomun Yálá kaa moi ya ka: 'Ka ɲąąkpɔn doo di mąą mɛ̨nį ɓa, di ɲɔw pili di hu, di di wɔ hɛnŋąąi kulɔ di yəi. 47 Ɲąąkpɔn ɉu nuą di di hɔɔ a kwɛni, di di paa a ɓɔwa kwɛaa; di di lon ɉinąą da di lon nɛ̨ąą paa; di di wɔ pɛlɛ́ɠaai kələn. 48 Gáá pai wɛli mɛ̨nį kpɛɛi nɔi hu; di kaa pai moi nɛ̨ąą kəlee diɛ; di hvo pai hvilɛn ɉi ka wɔ wɛli hon mɛ̨nįi pulu. 49 Ka káá pai ka wɔ wɛli mɛ̨nįi ɉu mɔ̨nɔ̨ míí; ka wɔ haliɠaai mąąwiyə mɛ̨nįŋɔ nɛ̨ŋɛ̨nŋąąi nwulu ə lɛɛ ka nwuɔ̨; bələ ɓə ka gili kɔ́lɔn na kaa, ɲą́ą́ ɓə gáá a Mɛ̨nį kəlee ŋą Hééɓomun Yálá. |