Izikiɛ 22 - Yálá laawoo hɛɓɛ (dc)Ɉerusalɛmə nwɔ nɛ̨ŋɛ̨nŋaa, hali kɔ́ mɛ̨nį hu 1 Yai-Laa ə mɛ̨nį ɓo mą́ą́, yɛ mą́ą́: 2 Hulɔnu lon, ə́ wəli tɔɔ, akɛti, mąą hvo nɛ̨ɛ̨li mɔ̨ɔ̨ kɛ ə́ ɲąmą taai ŋɛ̨i kiti tee, mąąnɛ̨ɛ̨ kpɔ ə́ giti tee; ə́ nwɔ ɓowo mɛ̨nįɠaai kəlee lɛ mą. 3 'Kɛ diɛ, Mɛ̨nį kəlee ŋą Hééɓomun Yálá woo ka, yɛ: Daai ŋɛ̨i a gwəi lonnii ɲąmą pu, nwɔ yələ aa həli, a haliɠaa pɛli bɔɔli; yili yɛ mąąliɓi. 4 Ə́ ə́ hɔn gɛ, a ɲąmąi ə́ bui, ə́ ə́ mąąliɓi a ɉaliɠaai ə́ di pɛlii; gɛi ə́ mo tii, yáá ə́ wɔ yələ maa kpuɔ; ə́ wɔ kwɛlanŋaa laa aa hvɛɛ. Yili mąą mɛ̨nį ɓa, gáá ə́ kɛi a hɛn a nwumɛ̨ tɛ nu ɓa, lɔiɠaa hu; a hɛn da yɛlɛ ma nuą lɔwai. 5 Kwɛala nuą da kpuɔla nuą, gəlee kaa pai kɛi yɛ́lɛ́i yɛ́. Mąąhɔlɔɓo, yáá ə́ laa pu; ɛlɛɛ, ə́ wɔ túwɔ pələ ɲɔ̨nŋaai daa tamą. 6 «Ə́ pɔɔli, Israɛlə lɔi ɲąąwooɓo nuą da kɛ ɲąmą pui; nu kəlee yɛ gɛ, yɛ bələi lɔ ɲee kɔ̨nwɔ̨n ɉu wala walaa la. 7 Ə́ pɔɔli, nuą da tɛɠɛɓo di nąnni da di leeni di hu. Da nweą hon a wea mɛ̨nį ə́ pɔɔli, diɛ di yee pənə, təli da kalanin di hu ə pɔɔli. 8 Yá kɛ nwɔ́ hɛn mąąhəɠɛɛɠaai hviiɓoi, yɛ́ nwɔ hvįįtɔɔ yələɠaa ɓɛlɛ kpɛɛ mą. 9 Laa kala nuą kaa ə́ pɔɔli, diɛ nuą ɲąątɔɔ ɲąmą pu mɛ̨nį ɓa. Da kɛ haláá kɔ̨nɔ̨n mįi yeeɠaa nwuɔ̨ ə́ pɔɔli, mɛ̨nįi hva nu mąąhon, da gɛ ə́ pɔɔli. 10 Nu taɠaa diɛ laa a di kaa nąn nɛ̨ą, ə́ pɔɔli nuą, di laa a nɛ̨ɛ̨nui ɲəi waai. 11 Nu kpəli kaa laa, yɛ túwɔ pələ ɲɔ̨n gulɔ a mɛlan nɛ̨ą; nu kpəli yɛ non nɛ̨ą mąąliɓi a wɛli mɛ̨nį ɓa ə pɔɔli. Nu kpəli yɛ mąąhala kala, ə ɓo a nąn non gbɔɔ-kpɔ. 12 Da mɛ̨inɛ̨ɛ̨ hon ə́ pɔɔli, ɲąmą pu mɛ̨nį ɓa; yá kɛ hɛnŋaa hɔ̨nwɔ̨ kɛnɛ̨i ə́ pɔɔli, yɛ́ dɛɛ ɲɛn ɉu. Yɛ́ ə́ yee pənə ə́ hee yɔwɔ hu a wea mɛ̨nį; ɛlɛɛ nwɛi, yɛ́ lɛ̨ą mą́ą́. Mɛ̨nį kəlee ŋą Hééɓomun Yálá woo li. 13 «Gáá ɲéé lɔwai gee ɓa ə́ wɔ toomɛ̨i kɛ mɛ̨nį, da ə́ wɔ ɲąmą pu mɛ̨nį ə́ pɔɔli, di mąą mɛ̨nį ɓa. 14 Ə́ kaa pai mɔ̨ɔ̨ ə́ lii kpələi, ə́ yee kɔ̨nwɔ̨n ɉu kaa pai wala walai; a ɲələi mɛ̨nį kaa pai kulɔi la gwa yɛ́ gu lɔwai? Ɲą́ą́ Yai-Laa, ɲá mo, gɛ́ bɔ mɛ̨nį kɛ. 15 Gáá pai ka taɠa taɠai lɔiɠaa hu, ŋą́ li a kaa lɔiɠaa lɔwai; duwɔ pələ ɲɔ̨n gaa ə́ hu, gáá pai gbəlai bələi. 16 Ə́ ə́ kpɔɔ mąąliɓi lɔiɠaa ɲɛ̨i ɓa, kɛlaa, ə́ kaa pai gili kɔ́lɔn ɉii, yɛ́ kɛ Yai-Laa ɓaa a ɲáá.» 17 Yai-Laa ə mɛ̨nį ta ɓo mą́ą́, yɛ mą́ą́: 18 «Hulɔnu lon, Israɛlə nwɔ pɛlɛ́i aa kɛ mą́ą́ yɛ kwɛli kpo, di kəlee; yɛi kɛ a wali, ɓala kwɛli, kwɛli kpɛli kpɛli, howa kwɛli, yii di kaa bui ya ɓə, di kəlee daa kɛ a kwɛli kpo, kwɛli kələ mu. 19 Yili ɓə gɛi, Mɛ̨nį kəlee ŋą Hééɓomun Yálá yɛ diɛ: Yii ka kəlee kaa kɛ a kwɛli kpo, gáá pai ka kəlee ka pui ka kee mɛ̨i Ɉerusalɛmə daa hąąi. 20 Wali, ɓala kwɛli, kwɛli kpɛli, da howa kwɛli, ŋą́ gəlee pu gee mɛ̨i; di nwɔ̨n bu ɉu, ə lɛɛ ɉu ə həɠeen. Bələ ɓə gáá pai ka pui la gee mɛ̨i, níí holi pələ da níí ɲąnwąną pələ ɓa. Ŋą́ ka pu, ŋą́ ka həɠeen. 21 Ŋą́ kaa ɲąąkpɔn, gɛ́ nwɔ́ liiholi nwɔ̨n hvɛɛ ka mɛ̨i, gɛ́ ka həɠeen Ɉerusalɛmə daa hąąi. 22 Bələi lɔ wali a həɠeen na, bələ lɔ ɓə gáá pai ka həɠeen ɉii la Ɉerusalɛmə daa hąąi, ka gili kɔ́lɔn nąąlɔwai kaa kɛ diɛ, ɲą́ą́ Yai-Laa ɲą́ą́ ka tii níí holii ka pɔ.» 23 Yai-laa woo ə həli mą́ą́, yɛ mą́ą́: 24 «Hulɔnu lon, 'mo Ɉerusalɛmə ɓa yɛ́ mą; gaa a lɔi mąą hvo həɠə li, tulɔ hvo pu li mą a liiholi yələ. 25 Nwɔ Yálá kwəi mɛ̨nį hukulɔ nuąi daa daa laahvɛɛ a ɲaba mɛ̨nį, di kaa nuą mįi, yɛ bələi yala a kɛ nuą mįi la; yɛ huluun. Diɛ hɛn gɔwɠaa da waliɠaa həɠə; diɛ kalanənŋaa tamą daa kwəi. 26 Nwɔ haláá laahəli nuąi daa nwɔ́ tɔ́n mąąkala, daa nwɔ hɛn mąąhəɠɛɛɠaa laa pu. Di hvo hɛn mąąhəɠɛɛ da hɛn gbɛli kpɛli kulɔ ɉu kɛli; di hvo hɛn mąąhəɠɛɛ da hɛ mąąliɓiɛ kulɔ nɔwai kɛli. Di di ɲɛ̨i laa kpulu nwɔ hvįįtɔɔ yələɠaai mɛ̨i, ɛlɛɛ daa náá pu di lɔwai. 27 Ɲɛitɔwɔ nuą kaa di lɔwai yɛ kwɛ́liɠaa da kɛ huwɔɠaa lɔwai, diɛ ɲąmą pu, diɛ nuą paa di wɔ hɛn gɔwɠaai nwuɔ̨ mɛ̨nį ɓa. 28 Nwɔ Yálá kwəi mɛ̨nį hukulɔ nuąi, kaa di tɛi hvaŋą a ɓowo woo, diɛ kɛɛɠaa kaa, hvo mɛ̨nį mąąkpɛɛ; diɛ lɛɛ mɛ̨nįɠaa hukulɔ, diɛ kɛ diɛ; Mɛ̨nį kəlee ŋą Hééɓomun Yálá woo ka, ya pa Yai-Laa hvó kɛ mɛ̨nį ta ɓo li diɛ. 29 Nɔi lonnii kaa wɛa mɛ̨nįɠaa kɛi, diɛ nwuɔ̨ kɛ, diɛ hee mąąwɛli nuą da yeehowolo nuą mɛ̨i; diɛ nwɛ̨ą nwɔ tɛ̨ą mɛ̨nį pili ɉu a hulu. 30 Ŋą́ ɲɛ̨́i laa a nu di lɔwai, yii a pɛli bɛlɛ́ nwąną muhəɠəi; yɛ tɔɔ nííla nwolo kɛɛnąą nɔi ɓalo mɛ̨nį ɓa, və́ pa lee ɉukala; kɛlaa, və́ mąą nu kaa li. 31 Yili ɓə gɛ, gɛ́ níí holi di pɔ, gɛ́ di paa nwɔ́ liiholi nwɔ̨n hu. Ŋą́ di túwɔ pələ kəlee wiɛ hee di nwuɔ̨. Mɛ̨nį kəlee ŋą Hééɓomun Yálá woo li.» |