Izikiɛ 21 - Yálá laawoo hɛɓɛ (dc)Di kaa pai Israɛlə hu kalai a nwɔ̨n da kɔ́ kɔ́ ɓɔwa 1 Yai-Laa ə mo mą́ą́, yɛ mą́ą́: 2 «Ə́ ɲɛ̨i hee ə́ ɓa-mįi-yee hu pələ, 'hąŋą ɉɛɠɛɛ pələ lɔiɠaa diɛ; gwə́i mɛ̨nį hu kulɔ Negɛvə lɔwɔɠaa diɛ. 3 Kɛ Negɛvə lɔwɔɠaa diɛ, ka ka wəli tɔɔ Yai-Laa woo ɓa: Hééɓo kəlee Nąmu Yálá yɛ diɛ: Gáá pai nwɔ̨n dooi ka hu; nwɔ̨n tii kaa pai wulu nwunuɠaa da wulu kpalaɠaa kəlee kələn ɉi; hvo pai luwuun ɉi; nu kəlee ɲɛ̨́i lai kaa pai kələn ɉi, ə həɠə Negɛvə, ə li ɲələi pələ. 4 Bələ ɓə nu kəlee kaa pai gɔlɔn ɉi la diɛ, ɲą́ą́, Yai-Laa, ɲą́ą́ ɓə nwɔ̨n doo, ɛlɛɛ luɠuun və mą.» 5 Nąąlɔwai, ɲą́ą́, Yálá kwəi mɛ̨nį hukulɔ mun, ŋą́ kɛ mą: «Kə Ną́mu Yai-Laa; kɛlaa da kɛ moi náá mɛ̨́i diɛ kɛ: ‹Yələ kəlee hanwon ɉɔɔmun hvoli kɛi!›» 6 Yai-Laa woo ə həli mą́ą́, yə mą́ą́: 7 «Hulonu lon, ə́ ɲɛ̨́i hąŋąn Ɉerusalɛmə pələ; haŋą ɉaláá kulɔiɠaa diɛ; 'gwə́i mɛ̨nį hukulɔ Israɛlə lɔi ɓa: 8-9 'Kɛ Israɛlə lɔi ɓa: ‹Yai-Laa yɛ: Gáá pai pɛlɛi yɛ́; gáá pai nwɔ́ kɔ́ kɔ́ ɓɔwai kulɔi daai; ŋą́ tələnmomun da nu ɲɔ̨nwɔ̨ɔ̨ɠaa di kulɔ nɔi, yɛ bələi gáá pai da nu ɲɔ̨ŋɔ̨ɔ̨ di kulɔi la nɔi, yili ɓə gɛi gɛ́ pa nwɔ́ kɔ́ kɔ́ ɓɔwai kulɔi la daa hu nu kəlee laa ɓa; ə həɠə Negɛvə, ə li la ɲələi pələ. 10 Nu kəlee kaa pai gili kɔ́lɔn ɉi la ti, diɛ kɛ ɲą́ą́ Yai-Laa, ɲą́ą́ ɓə ŋą́ kɔ́ kɔ́ ɓɔwai kulɔ daa hu, ɛlɛɛ, hva kɛa pənə hvo lɔ laa.› 11 «Hulɔnu lon, 'kɛ ɲiŋɛ̨i, ə́ mąą pɛlɛɛ, a lii ɲą nwąną; 'kɛ ɲiŋɛ́i di ɲɛ̨́i ɓa. 12 Da kɛ yɛ́: ‹Ə́ kaa ɲiŋɛ́i lə mɛ̨nį ɓa?› 'Kɛ́ diɛ: ‹Wɛlɛɛ ɓə aa pa; nu kəlee hvii kaa pai kpɛɛi; nu kəlee yee hu kaa pai haai; nu kəlee hu kaa pai pui mą, nu kəlee kɔ́wɔ yɛ kpɛlin mu. Ya ka ŋɛ̨i pai! Gaa kɛa kɛi. Yai-Laa, gu wɔ Yálái woo li.›» Mɔwa kwɛaa mąą mɛ̨nį 13 Yai-Laa woo ə həli nwɔ̨nɔ̨ mą́ą́: 14 «Hulɔnu lon, kɛ diɛ: Ną́mu woo ka; yɛ: «Kɔ́ kɔ́ ɓɔwa, kɔ́ kɔ́ ɓɔwa ɲąąliɛ, yɛ lən mąną-mąną. 15 Ɲąą liɛɛ nu paa mɛ̨nį ɓa, mąą kəlɛɛ, yɛ lən, yɛ kɛ wɛlɛn-wɛlɛn. 16 Ə dɛɠɛ ɲąąwaa mɛ̨nį ɓa di ɲąą waa, diɛ pa ɉon ɉi a di yee hveelɛ. Daa ɲąąli, diɛ pai nɔi nu paamun ɲəi. 17 'Tómą, gboo təli, hulɔnu lon! Mąąhɔlɔɓo, gɔ́ kɔ́ ɓɔwa aa yamąn nwɔ́ nuąi lɔwai aa yamąn Israɛlə lɔi ɲąąwooɓo nuą kəlee mɛ̨i daa di pili gɔ́ kɔ́ ɓɔwa ɲą da nɔi lonnii, 'ə́ yee pɛlɛ ə́ la. 18 Hu kɔ́ɔnmo ka ti, lə mɛ̨nį ɓə pai kɛi, akɛ, tɛɠɛɓoɉu tɔɔ-tunwɔ̨n a wala kɛ laa Yai-Laa woo li 19 Ə́ wəli tɔɔ, hulɔnu lon, gwə́i mɛ̨nį ɓo, ə́ yee lɔwa gee ɓa. Gɔ kɔ́ ɓɔwa kaa pai kɛlɛɓo kɛi gee mɛ̨i hveelɛ, gee mɛ̨i haaɓa, haa nuą di wɔ ɓɔwa kwɛaa li, haa nuą di wɔ ɓɔwa kwɛaa kɛnɛ̨i, ya ɓə ɓɔ di hu. 20 Ŋą́ą́ gɔ́ kɔ́ ɓɔwa ɲąą hee pɛlɛ́ kəlee laaləi yɛ nuą lii kulɔ diɛ yɛ nuąi tooi di kpulu hu kɛnɛ̨. Di bɛli yɛ lən mąną mąną, di ɲąąli nuą paa mɛ̨nį ɓa. 21 Ɓa-mįi-yee hu pələ, kɛɓɛyee hu pələ, ɓɛi lɔ pəə ya ə́ ɲɛ̨́i tinɛ̨n naa nąą ə lɛɛ a ɓɔwa kwɛaa laa lowo. 22 Ɲą́ą́ gbɛlimąn, gáá ɲee kɛlɛi gee ɓa, gáá nwą́ną́ kulɔi, vá gbɛla pələi. Ɲą́ą́, Yai-Laa, Nwóó li.» Daa gbɛa gɔ́ pɛlɛ Ɉerusalɛmə ɓa 23 Yai-Laa woo ə həli mą́ą́ yɛ mą́ą́: 24 «Hulɔnu lon, pələ hveelɛ kulɔ, a Babilonə tɔɔmun ŋą kɔ́ kɔ́ ɓɔwai tɛɛ pələ. Bələ hveelɛi ti di kɛ kulɔi lɔi tɔ́nɔ́ hu. Hɛn da tɔɔ bələ tɛi tɛi nwun na, yɛ taa ta ŋą pələ lɛ. 25 Bələ tɔ̨nɔ̨ laa, gɔ́ kɔ́ ɓɔwa yɛ ɉąŋąn a Raba pələ, Amɔn lonnii di wɔ taai, da Ɉuda lɔi hu pələ, Ɉerusalɛmə taa pɔ pələ, mąą tinɛ̨nŋąąi a mąą kɔ́nwɔ̨ hįi. 26 Babilonə tɔɔmun gaa tɔɔni bələ tąŋąną; bələ hveelɛi ti kee kaai, yɛ tɔlu kpɛ. Gaa dɔ́nwąɠaa hutɔɔi, yɛ ɉaliɠaa mąąni kɛ, yɛ huwɔ yɛlɛɠaa hu kaa. 27 Mamįiyee hu pələ, Ɉerusalɛmə ə́ ɓa-mįi-yee hu pələ, tɔlu ɓə woo laa, yɛ kɛ: ‹'Ka pa a bɛlɛ́ nwąną wolo hɛnŋąą; 'ka nu paa mɛ̨nį loloɓo; 'ka ka woo tɛ yələi, kaa kɛ diɛ: «Kɔ́ ɓə!» 'Ka pa a gbon nwolo hɛnŋąą; 'ka bɔlɔ ɓuwo; 'ka lɔwa tee.› 28 Di kaa pai gaai a lɛɛ-tɔlu; daa di kilitɔɔi lɛ diɛ; di wɔ nɛ̨ŋɛ̨nŋąąi kili too mɛ̨nį ɓə di ɲą; di kaa pai di hon ɉi gɔ́ hu. 29 Yili ɓə gɛ Yai-Laa yɛ kɛ diɛ: ka wɔ nąŋąŋąąi kili tooi ka mo ka ɲą, a ɓɛlɔwai ka wɔ kulɔ nwoo mu laa ə too la pɔ̨nɔ̨ ɲą, nuą diɛ ka wɔ nɛ̨ŋɛ̨nŋąą kaa, ka kɛ mɛ̨nįɠaa kəlee hu, ɛlɛɛ nuą ɲɛ̨́i tinɛ̨n ka mo ka pɔ pələ, yili mąą mɛ̨nį ɓa, di kaa pai ka hon ɉii gɔ́ hu lɔ poto poto. 30 Israɛlə tɔɔmun, ə́ wəli tɔɔ, ə́ kili ɲɔ̨ŋɔ̨ɔ̨i ə́ kwəi, hvó Yálá kɔ́lɔn, ə́ wɔɔ yələ kaa pai, ɲələ a kɛ lɔ a ɲələi, yɛ́ ká ə́ wɔ nɛ̨ŋɛ̨nŋąąi ka kpɛɛ la. 31 Yai-Laa, Yálá woo ka: Di kaa pai mɔlɔ kulɔi, di dɔɔɓɔlɔ kulɔ di nwuɔ̨; mɛ̨nįɠaa kɛ pələ hvo kɛa pai kɛi yɛ bələi ə kɛi kɛ la; yii kɛ mąą yɛɛ, di dɛ; yii mąą tɛɛ, di mąą yɛɛ. 32 Əkə kɛɛ kalaa! Əkə kɛɛ kalaa! Gáá pai nąą kalai ɲɔ̨nwɔ̨man da hvo ta kɛli, ə lɛɛ ɉu nui ŋą́ giti mɛ̨nį tɛɛ bɔ, mąą nu ə pa.» Di kɔ́ pɛlɛ Amɔn nuą diɛ 33 «Ə́ wəli tɔɔ, hulɔnu lon, gwə́i mɛ̨nį hu kulɔ; kɛ́ diɛ: Mɛ̨nįi Mɛ̨nį kəlee ŋą Hééɓomun Yálá kaa moi Amɔn lonnii diɛ, da di wɔ yɛlɛ mąą, ya ka: 'Kɛ́ diɛ: Kɔ́ kɔ́ ɓɔwa, kɔ́ kɔ́ ɓɔwa aa kulɔ daa hu, daa ɲąąli nu paa mɛ̨nį ɓa, yɛ paaɓo kɛ, yɛ lən mąną mąną. 34 Yɛ nu ɲɔ̨nwɔ̨ɔ̨ɠaa nwun dee, da nɛ̨ŋɛ̨n ɉəɠə nuą; di wɔlɔ yələ kaa pai həlii, da di wɔ nɛ̨ŋɛ̨n gbɛɛ yələ; mąąhɔlɔɓo di kaa ə́ ɓowo mɛ̨nį mąą hįi kaai, diɛ lɛɛ mɛ̨nį ɓo yɛ́. 35 Pənə ə́ gɔ́ kɔ́ ɓɔwa lɔ daa hu, gáá pai ə́ kiti teei ɓɛi di ə́ pɛli laa, ə́ kaa lɔi hu. 36 Gáá pai níí holui ə́ pɔ, gɛ́ nwɔ lii ɲą nwąną hee yɛ́, gɛ́ ə́ too kilikpɛɛgwəi nuą yəi ɲą; diɛi di wəlɛɛ paaɓo kɛi. 37 Ə́ kaa pai lɛɛi a nwɔ̨n gɔ̨nɔ̨n, diɛ ə́ ɲąmą kpoloon naa lɔi ɓa, ə́ kili hvo pai lɛɛi nuą ɲą. Ɲą́ą́ Yai-Laa, nwóó li.» |