Izikiɛ 2 - Yálá laawoo hɛɓɛ (dc)

Yálá kaa Ezekiɛlə tɔɔi Israɛlə nuą pɔ

¹ Yɛ mą́ą́: «Hulɔnu lon, 'haŋą ə́ tɔɔ, gɛ́ ŋą́ pələ ɓo yɛ́.»

² Gɛɛ bələ ɓoi mą́ą́, hvaŋą ta ə too ɉú, ə ɉáŋá ə dɔ́ɔ́. Nui kɛi bələɓo mą́ą́ ŋą́ nwoo mɛ̨n,

³ yɛ mą́ą́: «Hulɔnu lon, gáá ə tɔɔi Israɛlə lonnii pɔ, a gulɔ nwoomu nu huwui tii, a nuąi daa tɔɔ ná a kɔ́, diɛ mąn di nąnni mąn, aa lɛɛ ɉu háákələi aa həli.

⁴ Nu huwu nwun nwala walai tii, da gili wala wala nuąi tii ɓə gáá ə́ tɔɔi di pɔɔli, yɛ́ diɛ: ‹Ną́mu Yálá woo ka!›

⁵ Nąąlɔwai di di wəli tɔɔ di hvo di wəli tɔɔ, hvo gaai kulɔ nwoomu nu huwu li, da gili kɔ́lɔn diɛ kɛ Yálá kwəi mɛ̨nį hu kulɔmun gaa di lɔwai.

⁶ «Ə́ wəli tɔɔ hulɔnu lon: Hvo ɲɔw diɛ, ho ɲɔi di hvaa woo ɓa; ə́ kaa hɛa too nuą lɔwai, ɲąąlən ɉu. Ə́ kaa heeni ɲɔ̨n-gaaləɠaa mɛ̨i, ho ɲɔw di hvaa woo ɓa, 'hvó ɲɔw di ɲɛ̨ilai ɓa, mąąhɔlɔɓo kulɔ nwoo mu nu huwu li.

⁷ Nwóóɠaa ɓo diɛ, di mɛ̨n, di hvo mąn, kulɔ nwoomu nuą li.

⁸ «Hulɔnu lon, ə́ wəli tɔɔ, mɛ̨nį gáá moi yɛ́ mą, 'hvó kɛ a nui a nwun gulɔ mɛ̨nį mu, yɛ gulɔ nwoo mu nukan ŋɛ̨i, ə́ laa taɠa, ɉɛn gáá dɛɠɛi ə́ pɔ, 'ə́ mįi.»

⁹ Ŋą́ ɲɛ̨́i hee, ŋą́ nu yee kaa ɉaŋąą bɔ́ pələ, hɛɓɛ́ ə ɓo ɲəi a gbinįn gɛɛ.

¹⁰ Ə volóon ɲɛ̨́i ɓa, hɛɓɛ́ pɛ̨ɛ̨i kɛ bələ kəlee hveelɛi, woolaa wooɠaa ɓə kɛ bɛ̨ɛ̨ ɉu, nu ɲiŋɛ̨ woo da tomą wooɠaa.