Izikiɛ 19 - Yálá laawoo hɛɓɛ (dc)

Di kaa wɔlɔi nɔi nąmįną mɛ̨i

¹ Yɛ́ ɓə, gɔwɔ tɔɔ yɛ́ wɔlɔ Israɛlə lɔi ɲɛ̨i tɔwɔ nuą mɛ̨i, yɛ diɛ:

² Yá kɛ ə́ lee ɓa: Gbɛɛ ɓaa a yɛ́, yala haa, yɛ́i kɛ laani yala hilɛɠaa lɔwai, ə́ lonnii tinanŋąą yɛ́, diɛ ɲįni kpələ.

³ Ə non dɔ̨nɔ̨ ɲąą kɔ́n, yili ə kɛ a yala laŋa lon, ə ɲąątɔɔ a huwɔ hon ŋąą, yɛ kɛ nuą mįi.

⁴ Lɔiɠaa di mɛ̨i woo mɛ̨n, di lowa tee dɔwɔ di ɉo ɉu, di kwɛli too ɉunwɛ̨i, də li la Eziptə lɔi hu.

⁵ Gaai ɲala haa ə mo yɛ kɛ gilitɔɔi aa lɛɛ a kpɛli, ɲɛ̨i aa lɛɛ bələi kpɛli kpɛli, ə non dakpɛli həɠə, ə yili hu tɔɔ, yili ə kɛ a yala laŋa lon.

⁶ Yili ə kɛi tɛɛ ɲalaɠaa lɔwai, ə kɛ a yala huwala walaa, ə pɛli huwɔ hon ŋąą ɓa; yɛ nuą mįi.

⁷ Ə di wɔ tɔɔ pɛlɛ́i pu, ə daaɠaa lɛɛ a taa kpoloonŋaa; nɔi hu nuą di kɛi ɲɔw domą woo ɓa.

⁸ Gwɛlɛ nuą di həɠə di wɔ taaɠaai hu, di pa di pɛlɛ mą; di lɔwa tee dɔwɔ, di ɉon ɉu.

⁹ Di kwɛli too mą, di nɔ kwənąn ɉu, də li la Babilonə tɔɔmun pɔ. Də li la kwɛni wolo hu, ə gɛ nwoo hvo pa kɛa kɛ tɔɔi Israɛlə yeeɠaa nwuɔ̨.

¹⁰ Ə́ lee ə kɛ yɛ viɲə kpɔmɔ, yii di ɉin tɛɛ ya kwɛlɛ; ə kɛi ɓa, naa hu wiaa, mąąhɔlɔɓo ya kɛnɛ̨i kɛ mą.

¹¹ Nwonwoɠaa di tɔɔ mą a gbɛa kpɛa, di kɛ a tɔɔ tunwɔ̨nŋaa; ɲee mu ə həɠə nwonwoɠaa nwun mɛ̨i, ə kɛi nuą mąą ɲɔw gwɛa pələ ɓa, da nwonwo tamą pələ mą.

¹² Kɛlaa, di gulɔ a nwun a lii ɲąnwąną; di doo nɔi ɓa, hvaŋą ə həɠə hvóló kulɔi pələ, ə maɠaa kpala ma; nwonwo kpɛa kpɛaɠaai tii di kpala, nwɔ̨n ə di kələn.

¹³ Gaa kɛa yiihu tɔɔni lɔi pun ɉu, gbali kələn ŋąą hu, kpələ wɛli lɔi hu.

¹⁴ Kɛlaa, nwɔ̨n ə kulɔ nwonwo lon ɉu, ə nwonwoɠaa da maɠaa kəlee kələn. Viɲə kpɔmɔi tii nwonwo ta hvo kɛa laa a ɉuwala walaa, yɛ pɛli kɛi a tɔɔ tunwɔ̨n. Wɔlɔ woo li, da doo a wɔlɔ wələ.