Izikiɛ 18 - Yálá laawoo hɛɓɛ (dc)

Yálá a nu kəlee kiti tee yɛ bələi dúwɔ pələ kaa la

¹ Yai-Laa ə hvaa bɔ́, yɛ mą́ą́:

² «Lə ɓə kɛ yai ka kɛ lɔ ɉanwon ŋɛ̨i hɔɔi Israɛlə lɔi hu, kaa kɛ diɛ: ‹Lon gaa nuą di wulu ɓá kpəlee mįi, kɛlaa di lonnii ɓə di ɲin ŋą aa kpona?›

³ «Akɛ kpɔ gáá a vúlú, ka hvo kɛa pai pənəi ka hvo ɉanwon tii hɔɔ Israɛlə lɔi hu.

⁴ A tɛ̨ą, ɉɛnŋaai kpɔ da nɔ̨ɔ̨, bɔ́ɔ́ ɓaa gəlee. Lon gaa nąn da non di wɔ yɛnɛ̨ɛ̨; gəlee hveelɛi kaa a bɔ́ɔ́. Nui a nɛ̨ŋɛ̨n ɉəɠə, ya ɓə a ɉu haa ɓo.

⁵ «Tələnmo mun da akɛi túwɔ a ɉaŋąą, a gwəi kwəlɛɛ,

⁶ hva haláá kɔ̨nɔ̨n mįi, hva ɲɛ̨i hee Israɛlə bɛlɛ́ mu ɉaliɠaa pɔ pələ, hva hvilɛn mɛlaa nɛ̨ą pulu, hva lɛɠɛ nɛ̨ɛ̨nui aa ɲee tɛ mą;

⁷ Hva ɲee pənə nu ta hu, hva tolaa hɛn ɉon, hva nwuɔ̨ kɛ, yɛ gɔ̨nɔ̨n da tɛɛ pulu həɠə mun bɔ, nui həɠə hvo mą, yɛ həɠə kɛ mąą nu ɓa,

⁸ hva kwələ tɔɔ a tɔ̨nɔ̨ hɔlɔɓo pələ ɉu, hva kwələ kpɛ a da laa pələ mɛ̨i, yɛ ɲee kulɔ hulu mɛ̨nį hu; yɛ nuą lɔwai mɛ̨nįɠaa ɓo a tɛ̨ą,

⁹ yɛ nwɔ́ tiɓoɠaai pɔ hiɛ ɓo, yɛ nwɔ́ tɔ́n nwooɠaai hon, yɛ lɛɛ la tii tɛ̨ą pulu; tələnmomun ni, mąą nu kaa pai lɛɛi yɛnɛ̨ɛ̨; ɲą́ą́ Mɛ̨nį kəlee ŋą Hééɓomun Yálá, nwóó li.

¹⁰ «Kɛlɛɛ nui tii lon a kɛ a nu paa mun, ɲee ə ɓo lɔ ɲąmą pu mɛ̨nį hu, yɛ mɛ̨nį ɲɔ̨nŋaai tii ta kɛ,

¹¹ Yá pa, nąn və ta da lɔpee kɛ li, hvo lɛɛ li lɔ a yili, yaamun, non tii yɛ haláá kɔnɔ̨nŋaa mįi; yɛ ɉee yɔwɔ nɛ̨ą ɓɛlɛ kpɛɛmą,

¹² yɛ ɲee pənə mąąwɛli mun da yeehvowolomun di hu, yɛ nwuɔ̨ kɛ, da tolaa heemą, hva kɛa pənə hvo ɉɛn tii tɛɛ nąmu pɔ; hali mɛ̨nį wɛli ə ɓo mą, yɛ ɲee to ɓowo mɛ̨nį hu,

¹³ Yɛ tɔ̨nɔ̨ kwɛli kwələ tɔɔ hu, yɛ tɔ̨nɔ̨ hɔlɔɓo a hulu, mąą lon a pɛli lɛɛi yɛnɛ̨ɛ̨? Hva lɛɛ yɛnɛ̨ɛ̨. Ə mɛ̨nį ɲɔ̨n ɉuwui tii kəlee kɛ, gaa pai haai ɉəɠə mąą hvo ɉu; ɲąmą wulu ə lɛɛ gbɔwɔ nwuɔ̨.

¹⁴ «Kɛlɛɛ nu ta a kɛ laa lon ə ɓo mą, nɛ̨ŋɛ̨nŋaai kpɔ nąn ə ɉəɠə, ə yili kəlee kaa, ɛlɛɛ, hva dúwɔ yili ta ɓo,

¹⁵ hva haláá kɔ̨nɔ̨n mįi, ɲɛ̨i hva kulɔ Israɛlə nwɔ haliɠaai ta lɔpee pɔ; hva hvilɛn ɉee yɔwɔ nɛ̨ą pulu,

¹⁶ hva ɲee pənə nu ta hu, hva kanąn tolaa hɛn ma; hva nwuɔ̨ kɛ, yɛ gɔ̨nɔ̨n dɛɛ nui pulu kaa mą bɔ; Yɛ həɠə tɛɛ nui gaa a gbuwulu bɔ,

¹⁷ yɛ ɲee kulɔ hulu mɛ̨nį hu, hva kwələ kulɔ hon hvo dɛɛ yii ə dɔɔ mą, hva tɔ̨nɔ̨ hɔlɔɓo a hulu; yɛ nwɔ́ tɔ́n nwooɠai hon, yɛ nwɔ́ tíɓoɠaai pɔ hiɛ ɓo, mąą lon tii hva haa nąn nwɔ nɛ̨ŋɛ̨nŋaai mąą mɛ̨nį ɓa; a lɛɛ yɛnɛ̨ɛ̨, yili ɉəɠə mąą hvo mą.

¹⁸ Nąn nwɛi ə wea mɛ̨nį kɛ, yɛ gaayɔwɔ nwuɔ̨, hvo túwɔ a nɛlɛɛ nwɔ́ nuąi lɔwai; gaa pai haai ɉɔn ɉu.

¹⁹ «Ka káá kɛi diɛ: Lə mɛ̨nį ɓa yai lon va nąn nwɔ nɛ̨ŋɛ̨n bulu mɔ̨nɔ̨ mįi? Mąąhɔlɔɓo, non ə tələnmo yii ɓo, yɛ túwɔ a ɉaŋaa; ə nwɔ́ tɔ́n nwooɠaai kəlee pɔ mɛ̨nį kɛ; yili mąą mɛ̨nį ɓa, a lɛɛ yɛnɛ̨ɛ̨.

²⁰ Nui a nɛ̨ŋɛ̨n ɉəɠə, mąą nu ɓə a haa; lon və pai nąn nwɔ nɛ̨ŋɛ̨n ɉu mɔ̨nɔ̨ mįi; lon ga nąn və pai non nwɔ nɛ̨ŋɛ̨n ɉu mɔ̨nɔ̨ mįi. Tələnmomun nwɔ tələnmolaa a lɛɛ nwuɔ̨, nu ɲɔ̨nwɔ̨ɔ̨ nwɔ kili ɲɔ̨nwɔ̨ɔ̨ wulu yɛ lɛɛ nwuɔ̨.

²¹ «Nu ɲɔ̨nwɔ̨ɔ̨ yaan a bulu tɔɔ gɛ nɛ̨ŋɛ̨nŋaa diɛ, yɛ nwɔ́ tiɓoɠaai kəlee pɔ mɛ̨nį kɛ, yɛ hiɛ a ɉaŋaa, a kwəi kwələ laa, mąą nui a lɛɛ yɛnɛ̨ɛ̨, ɉəɠə mąą hvo mą.

²² Di hva kɛa di kiliŋąhiɛ nwɔ kulɔ nwoo mu laai lɔpee ta ɓa, kɛlaa dəlimo laai tii ə gɛ, yili mąą mɛ̨nį ɓə gaa pai lɛɛi la yɛnɛ̨ɛ̨.

²³ Mɛ̨nį kəlee ŋą Hééɓomun Yálá yɛ nwɔ̨nɔ̨ diɛ: Gaa ka kwəi nu ɲɔ̨nwɔ̨ɔ̨ haa mɛ̨nį kaa a gwə́nɛɛ mɛ̨nį? Kɛlaa yaamun bulu tɔɔ mɛ̨nį dúwɔ hɔnŋaa diɛ ɓə, əgɛ, ə lɛɛ yɛnɛ̨ɛ̨.

²⁴ Kɛlaa, tələnmomun yii a ɲee kulɔ tələnmo yíi hu, yɛ túwɔ pələ ɲɔ̨n gulɔ; dúwɔ pələ ɲɔ̨n gbɛa kpɛaɠaai nu ɲɔ̨nwɔ̨ɔ̨ɠaa di kɛi gulɔ, yɛ di kɛ, a kɛi yiliɠaai kɛ, a mɔ̨ɔ̨ pɛli lɛɛ yɛnɛ̨ɛ̨? Dələnmo túwɔi kpɔ ə mo, gili hva lɛɛ nuą ŋą; nwoo kalai ə mo da nɛ̨ŋɛ̨n ə ɉəɠə, yili mąą mɛ̨nį ɓə pai gɛi yɛ haa.

²⁵ Yili ɓə ka tɔɔ, káá kɛ diɛ: Yai-Laa nwɔ pələi hvo haŋą li. Ka ka wəli tɔɔ Israɛlə nwɔ pɛlɛ́i mu nuą; ɲą́ą́ ɓə mɔ̨ɔ̨ nwɔ́ pələi hvo haŋą li, kɛlaa kaa mun mə ka wɔ pələɠaii di hvo haŋą li?

²⁶ Tələnmomun a bulu tinɛ̨n nwɔ tələnmo yíi ɓa, yɛ hulu mɛ̨nį kɛ, a haa yili mąą mɛ̨nį ɓa; vulu mɛ̨nįi tii ə gɛ, yili mąą mɛ̨nį ɓə a haa la.

²⁷ Nu ɲɔ̨nwɔ̨ɔ̨ a bulu tinɛ̨n nwɔ túwɔ pələ ɲɔ̨n ma, yɛ tɛ̨ą da tələnmo yíi ɓo, gaa pai lɛɛi yɛnɛ̨ɛ̨;

²⁸ gili a pu nwɔ kulɔ nwoo mu laai kəlee hu, ɛlɛɛ, a bulu tinɛ̨n gəlee ɓa, gaa pai lɛɛi yɛnɛ̨ɛ̨, ɉəɠə mąą hvo mą, hvo pai haai.

²⁹ Ya ɓə Israɛlə nwɔ pɛlɛ́i mu nuą da kɛ diɛ: Yai-Laa nwɔ pələi hvo haŋą li. A kɛ ti Israɛlə nwɔ pɛlɛ́i mu nuą, nwɔ́ pələi ɓə mɔ̨ɔ̨ hvo haŋą li? Kɛlɛi kaa mun mə ka wɔ pələɠaai di hvo haŋą li.

³⁰ Yili mąą mɛ̨nį ɓa, gáá pai ka tɛi tɛi ka kiti teei ka túwɔ pələ mąą mɛ̨nį ɓa, Israɛlə nwɔ pɛlɛ́i; ɲą́ą́ Mɛ̨nį kəlee ŋą Hééɓomun Yálá, nwóó li. Yili ɓa, 'ka pənə ka pa, 'ka ká pulu tinɛ̨n ka wɔ kulɔ nwoo mu laai ɓa, ɛlɛɛ, ɉɛn kɛi ka kalin yɛ ka too nɛ̨ŋɛ̨n ɉu, ka hvo nɛɛ ka lɔwai.

³¹ 'Ka ká yee kulɔ ka wɔ kulɔ nwoo mu laa kəlee hu, 'ka kiliŋąhiɛ nįnɛ̨ həɠə, 'ka too ka nįnɛ̨ kɔ́lɔi, lə mɛ̨nį ɓa ka káá bɔ ka haa, Israɛlə nwɔ pɛlɛ́i mu nuą?

³² Gwə́inɛ̨ɛ̨ mɛ̨nį hvaa nu ta haa mɛ̨nį, ɲą́ą́ Mɛ̨nį kəlee ŋą Hééɓomun Yálá, nwóó li. 'Ka pənə kani ka pa, kaa pɛli lɛɛi yɛnɛ̨ɛ̨.»