Izikiɛ 17 - Yálá laawoo hɛɓɛ (dc)Kuwɔ mąą hanwon 1 Yai-Laa ə mɛ̨nįi ɲɛ̨́i ɓo mą́ą́, yɛ mą́ą́: 2 «Hulɔnu lon, hanwon da hɔɔ a mɛ̨nį kulɔ mąą ta, Israɛlə nuą diɛ: 3 'Kɛ diɛ: Yai-Laa woo ka, yɛ: «Guwɔ kɛnɛ̨i, goon ɲąą kpɛa kpɛa, nɛɠaɠaa ɲąą kɛnɛ̨, gɔlɔɓa lɛɠaɠaa ɲɛ̨́i pɛ̨ɛ̨ a damąą, ə pa Liban, ə kpitili da ton ɲali mɛ̨i, 4 nwonwo yii kpɔ kɛ a gwɛa, ə gulɔ, ə li la yɔw kɛ lɔi hu, nwɔ lɔi hu; ə ɉin lɔ́wɔ́táá ta hu. 5 Yili pulu, ə nɔi ti ɉu wulu ɓɔn da həɠə, ə ɉin tíi ta hu, nąą pɛliɛ a nɛlɛɛ; ə ɉin, yɛ wulu ɓɔn tɛɠɛya kɛnɛ̨ kwɛlɛ. 6 Nwulu ɓɔn ti ə kɛnɛ̨, ə kɛ a viɲə lɛlɛɛ, a ɉuwu yi hva kwɛa a mɔlɔ, a kpɔlɔ lɔ. Nwonwoɠaa di kɛi li gúwɔ́ pɔ pələ, ɉamuɠaa di ɓo mu pələ, ə kɛ a viɲə, nwonwoɠaa diɛ tɔɔ mą a damąą. 7 Kɛlaa kuɔ kɛnɛ̨ ta ə kɛ laa, gooŋąą kpɛa kpɛa, gɔlɔ ɓa lɛɠa huwia. Viɲəi ti ə ɉamuɠaa ɲɛ̨́i tinɛ̨n bɔ pələ, yɛ kɛ yili ə ya pu diɛ, ə nwonwoɠaa haŋąn bɔ pələ, ɓɛi ti kɛ ɉinŋąą laai diɛ nąą mąą tɛɛ. 8 Di ɉin lɔi lɛlɛɛ hu, tɛɛya kɛnɛ̨ kwɛlɛ; nwonwoɠaa diɛ pɛli tɔɔi mą, yɛ pɛli ɓái, yɛ pɛli kɛi a wulu mąąwia. 9 'Kɛ diɛi: Yai-Laa woo ka, yɛ: Gaa mɔ̨ɔ̨ ɓa lɛlɛɛ ɓoi? Gúwɔ́i ti hvo pai ɉamu kulɔi mu, máɠaa diɛ pɛli yohvai, diɛ kala ɲą? Nwonwo kəlee ka pai kpalai mą, huwalawalamun, da nu kpulu mąą kpaan və pai kɛi nuą diɛ, gulɔ mɛ̨nį ɓa a nwun! 10 Da ɉin gaa pai lɛlɛi? Hvaŋą ɲąą nwąnąą a hee mą, kɛlaa gbala hiɛ li kpɔ tɛ̨ɛ̨ tɛ̨ɛ̨. Nɔi ti kɛ mąąnɛ̨ɛ̨ ə lɛlɛ ɉu, gaa pai kpalai laa.» 11 Yai-Laa woo ə həli mą́ą́, yɛ mą́ą́: 12 Mɛ̨nį ɓo gulɔ nwoo mu nuąi ɲɛ̨i diɛ, kɛ diɛ: Ká hvo mɔ̨ɔ̨ mu kulaa kɔ́lɔn? 'Mo, Babilonə tɔɔmun ə pa Ɉerusalɛmə; ə dɔɔmun ɉon, da nu kpɛa kpɛaɠaa, ə li a diɛ Babilonə, nwɔ lɔi hu. 13 Ə dɔɔ kwəlii mun da həɠə, da yaa di woo ə laa mą; yili ə nwoo kwɛlɛ mą, yɛ gwɛla ɉu; ə nɔi kalanɉonŋaa həɠə. 14 Nɔi yɛ pɛli lɛɛi a lɔi tiikpə, hvaŋą hva pɛli kɛi ɲəi hvo kɛnɛ̨ la; yili ɓə a gɛ ə pɛli kanąn ɉi la a yələ kəlee mįnɛ̨ wooi ti ɓa. 15 Kɛlaa dɔɔ kwəlii mun ti ə kulɔ dɔɔ mun ti ɉon nwoo mu; ə nuą tɔɔ Eziptə lɔi hu, yɛ kɛ yili ə hooɠaa tɛɛ bɔ, da kɔ́kulááɠaa. Ɲee kaa mɔ̨ɔ̨ pai pɛli mą? Nui a duwɔ taalee ti ɓo ɲee pɔɔ a pɛli lɛlɛi mɔ̨ɔ̨? Ə mįnɛ̨-həɠə woo hu kala, nwun a pɛli mɔ̨ɔ̨ kulɔi yili hu? 16 Ɲą́ą́ Yai-Laa, Mɛ̨nį kəlee ŋą Hééɓomun Yálá, yii gáá gwɛlai ɉu, ya ka: dɔɔmun ti ɉee a tɔɔmun; nwooi ə gwɛlɛ mą yɛ nɛɛi; yɛ ŋą mįnɛ̨ həɠə wooi hu kala; dɔɔmun ti pɔɔli ɓə gaa pai haai laa Babilonə daa kwəi. 17 Ə mą kɛ Faraɔn aa kpɔn mą a nwɔ kɔlaɠa hu kɛnɛ̨i, ɉu wala walai, yili hva mąą kɔ̨nwɔ̨ a gɔ́ kɔ́ yələ, a ɓɛlɔwai di kaa pai lɔwaɠaa tee la daa ɓa, diɛ kɔ́ pɛlɛ́ɠaa tɔɔ mą, diɛ nu kpulu kɛnɛ̨ paa. 18 Ə nwoo lɛɛ a mįnɛ̨ həɠə-woo hu kalai ə mo, yá pa, ə ɲee hee kpɔ mu; kɛlaa ə gɛɛ kala mɛ̨nįɠaai ti kəlee kɛ; yili ɉu hva pɛli kɛ nɛ̨ɛ̨i mą. 19 Yili mąą mɛ̨nį ɓa, Yai-Laa woo ka, yɛ: Gáá a Mɛ̨nį kəlee ŋą Hééɓomun; nwooi ə gwɛlɛ, yɛ gaa lɛɛi bulu, yii kpɔ ə nɛɛi, ə ŋą mįnɛ̨ wooi hu kala; Gáá ɉu mɔ̨nɔ̨ heei nwuɔ̨. 20 Gáá nwɔ́ hɛlɛn ɉeei dɔwɔ; gaa pai kɔ́i la. Gɛ́ li la Babilonə, gɛ́ giti tee laa, nwooi ti ə gwɛlɛ mą́ą́, yɛ nɛɛ laa, mąą mɛ̨nį ɓa. 21 Nwɔ kɔlaɠai ɲɛ̨i tɔwɔ-nuą kəlee kaa pai haai a kɔ́ kɔ́ ɓɔwa laa pɔɔ; yiiɠaai pai kulɔi ɉu, di kaa pai di taɠa taɠai lɔi kəlee hu. Bələ ɓə ka gili kɔ́lɔn na kaa, ɲą́ą́ Yai-Laa, ŋą́ mo, ŋą́ gɛ. Yai-Laa ŋą mɛ̨nį laakwɛlanmoɔ 22 Nwooi Yai-Laa gu wɔ Yálái ə mo, ya ka, yɛ: «Ɲą́ą́ Yai-Laa, ɲą́ą́ gbįnii gáá pai kpitili tɛlin deei don na, ŋą́ ɉin, ɲą́ą́ gį́nilee ŋą́ pənə ŋą́ ɉin, ŋą́ nwonwo kəlee tɛlin nįnɛ̨ yali ɲą yee kɛnɛ̨ɛ̨ tɔɔ tɔn na. 23 Ŋą́ ɉi Israɛlə yee tɔɔ ton ną nwonwoɠaa kaa pai tɔɔi ma, diɛ ɓa. Kpitili ɓɔn tii kaa pai kɛi a hɛan nɛlɛɛ; nwɛ̨nį huwu kəlee diɛ yii ɉu. Di kaa pai kɛi yii nwonwo nįnįn mu. 24 A kɛ ti lɔwɔi wuluɠaa kəlee da gbaɠala kaa, diɛ kɛ ɲą́ą́ ɓə gaa a Yai-Laa. Yai a wulu kwɛaa kɛ a kpɔlɔ wulu, yɛ kpɔlɔ wulu kɛ a wulu kwɛaa; yɛ wulu nwunu kpala, yɛ gɛ wulu kpala yɛ tɛlin. Ɲą́ą́ Yai-Laa yii ŋą́ mo, ŋą́ gɛ́.» |