Izikiɛ 16 - Yálá laawoo hɛɓɛ (dc)Ɉerusalɛmə ə kɛ yɛ lon nu hvo mą 1 Yai-Laa woo ə həli mą́ą́, yɛ mą́ą́: 2 «Hulɔnu lon, Ɉerusalɛmə kili hvilɛnŋąą lɔ kɛɛ kala mɛ̨nįɠaa diɛ. 3 'Kɛ́ diɛ: mɛ̨nįi Yai-Laa, gu wɔ Yálá kaa moi Ɉerusalɛmə ɓa, ya ka: ə́ huwu mɛ̨nį hu, da ə́ káá pələ hu, Kanaan lɔi kaa a ə́ kalaɓɔlɔ ni di wɔ lɔi; ə́ nąn ə kɛ a Amɔrə mun, ə́ lee ə ɓo a Hɛtə nɛ̨ɛ̨nu. 4 Ə́ káá yələ, a ɲələi ti di ə́ káá la, di hvo ə́ wəlingɛ̨ą tee, di hvo ə́ waa a ya ə́ mąą həɠə mɛ̨nį ɓa; di hvo kpolo pu ə́ kɔ́lɔ ɓa, di hvo ə́ mąąkpinįn gɛ a həɠə ɓɛla. 5 Nui lɔpee da hvo ə́ ɲɛ̨́i mąąwɛli kaa, yɛ pɛli mɛ̨nįɠaai ti ta kɛi yɛ́, ə mą kɛ tanɔ̨n; ə́ kəi ɓailii tɛ a nuą, ɲələi di ə́ káá lai; di ə́ pili kpomói. 6 Ŋą́ kɛi tɛɛ ɓɛi ə́ kɛ laa nąą kwɛlɛ, ŋį́ ə́ kaa, yɛ́ ə́ mąą kɔ̨ŋɔ̨ ə́ ɲąmą hu; ya ɓə ŋį́ kɛ yɛ́, a ɓɛlɔwai ə́ kɛ laa ə́ ɲąmą ti hu: 'yɛnɛ̨ɛ̨ kɛ! A ɓɛlɔwai kpɔ ti ə́ kɛ laa ə́ ɲąmą hu, gɛ́ yɛ́: 'lɛɛ yɛnɛ̨ɛ̨. 7 Ŋą́ ə́ huwalawala, yɛ kpomói kala tiliin; ə́ gbala tɔɔ kɛa ə́ hu yɛ hvɛɛ, yɛ́ kɛnɛ̨; ə́ lɛlɛ kɛa naai və kɛ mą; ə́ ɲįnįɠaa di tɔɔ kɛa, ə́ ləɠaɠaa di kulɔ; kɛlaa həɠə hvo kɛ yɛ́; ə́ kɛ lɔ a ə́ kpuɠulu. 8 Gɛ́ɛ́ tɛɛi ə́ kwɛlɛ, ŋą́ ə́ kaa yáá kpɛla kɛa. Ŋą́ nwɔ́ həɠə wəlii ta pɛlɛ ə́ mɛ̨i; ŋą́ ə́ kpuɠulu loo; ŋį́ nwóó kwɛlɛ yɛ́, gwa yɛ́ gu mįnɛ̨ həɠə, ə́ kɛ kɛa a nwɔ́ɔ́. Yai-Laa gu wɔ yálái woo li. 9 Ŋą́ ə́ waa a yá; ɲąmąi ti kɛ nɔɔ yɛ́i, ŋį́ nwaa yɛ́; ŋį́ ə́ mąąti a wulɔ kun nɛ̨ɛ̨. 10 Ŋą́ həɠə mąąpuɔɠaa tɛɛ ə́ pɔ, da nu kɔ́wɔɲą kɔ́lɔ huwu lɛlɛɠaa, da hɛ̨ą yili kɔ́lɔ kwəlɛɛ pə-pə; ŋį́ həɠə ɲɛ̨i tɔɔɠaa kɛ yɛ́. 11 Ŋį́ ə́ mąą yili hɛnŋą́ą́ kɛ yɛ́; ŋį́ da too ə́ yee kwąną; ŋį́ da too ə́ kɔ́nma. 12 Ŋį́ da kɛ a ə́ hunwɛ̨i kwɛli, da ə́ wəlii kwɛliɠaa, da tɔɔɓɔlɔ ɲɛ̨i tɔɔ, ŋį́ ɉee ə́ nwun ma. 13 Ə́ mąą yili hɛnŋąąi tii di kɛ a hɛni da wali; ə́ mąąyili həɠəɠaa di ɓo a həɠə ɓɛla huwu lɛlɛɛɠaa, gwəlɛɛ pə-pə, a həɠə ɓɛla hɔ̨nwɔ̨ kpɛa kpɛa, di mąą puɔ. Kɔ̨nɔ̨n ɉu yɛɠɛɛ ɓə ə́ kɛi mįi, da kwɛ́in nwulɔ, da wulɔ; ə́ lɛlɛ kpɔ kɛa a gɔn bulu pələ. Ə́ həli tɔɔlaa ɓa. 14 Ə́ lɛlɛ pələ, bələ ə taɠa kɛa lɔiɠaa hu; hvo gaai ə́ mąą kulɔi hvo kɛa kɛ yɛ́, mąąwiɛi tii ŋį́ gɛ yɛ́ mąą mɛ̨nį ɓa. Yai-Laa gu wɔ Yálái woo li.» Kɛlaa Ɉerusalɛmə ə gbɔwɔ kɛ a túwɔ pələ ɲɔ̨n gulɔ nɛ̨ɛ̨nu 15 «Kɛlaa ə́ ə́ kili lɛɛ ə́ lɛlɛ pələi ti ɓa; ɛlɛɛ, bələi ə́ laa ə taɠa la, bələ lɔ ɓə ə́ túwɔ pələ ɲɔ̨n gulɔ la. Ə́ nu kəlee ɲɛ̨i kwɛli, wɛli mɛ̨nį hu; ə́ ɓo di yəi. 16 Ə́ ə́ mąą həɠəɠaa həɠə, yɛ́ ɉalə kɔ́iɠaa mąą yili la, yɛ́ túwɔ pələ ɲɔ̨nŋąą kulɔ ɉu, ɉuwu ta hvo ta kɛ li, ɛlɛɛ da hvo pai kɛi. 17 Ə́ mąą yili hɛnŋąą lɛlɛɛi ŋį́ dɛɛ ə́ pɔ a hɛni da wali, ə́ di həɠə yɛ́ di kɛ a hinąą hɛn mąąnįnįn, yɛ́ túwɔ pələ ɲɔ̨n gulɔ la. 18 Ə́ ə́ mąąhəɠəɠaa mąąpuɔ həɠə yɛ́ gɛ diɛ; yɛ́ nwɔ́ wulɔi da nwɔ́ lansan hee di lííla. 19 Ŋį́ lɛɠɛi ŋį́ dɛɛ ə́ pɔi, da gbanin gɔw, da nwulo, da gwɛ̨in nwulo; yai ŋį́ kɛi ə́ kɔ̨nɔ̨n gɛ la, ə́ ɉee di lííla; a di liilaa haláá kun nɛ̨ɛ̨; ə́ túwɔ pələ ka ti. Yai-Laa, gu wɔ yálái woo li. 20 Ə́ ə́ lon ɉinąą, da ə́ lon nɛ̨ąą, a diɛi ti ə́ di káá mą́ą́; ə́ di həɠə yɛ di kɛ a haláá hɛn, mąąnįnįnŋą́ą́i ti diɛ. Dúwɔ pələ ɲɔ̨n gulaa tii hvo mɔ̨ɔ̨ kɛ ə́ lii hon? 21 Ə́ nónnii nwun dee, yɛ́ di tɛɛ di pɔ a haláá. 22 Ə́ wɔ ɓowo mɛ̨nįɠaai ti kəlee hu, da ə́ wɔ túwɔ pələ ɲɔ̨nŋąą, hvo kɛi ə́ kiliŋąhiɛ ə́ muhəɠə yələ ɓa, a ɓɛlɔwai ə́ kɛ laa a ə́ kpuwulu, həɠə hvo kɛ yɛ́, ə́ ɲąmą lɔɔ yɛ́ hɔwɔ hɔwɔ. 23 «Hééɓo kəlee Nąmu woo ka, yɛ: Mɛ̨nį ɲɔ̨nŋaai tii kəlee kɛɛ pulu, ə́ nwun na ɲɔ̨nwɔ̨ɔ̨i, kpalo ɓɛlaai yɛ́. 24 Ə́ haláá kulɔi tɔɔ, ə́ hali kɔ́i pɛli kwəli hą́ą́ kəlee ɓa. 25 Yáá haláá kulɔi pɛli pələ taŋan na kəlee ɓa, yɛ́ ə́ wɔ lɛlɛ mąąliɓi laa; yɛ́ ə́ kɔ́lɔ tɛɛ tɛɛ bələi nuą́ kəlee pɔ, yɛ́ ə́ wɔ túwɔ pələ ɲɔ̨n hu wiɛ la. 26 Ə́i kpɔɔ tɛɛ Eziptə nuą pɔ wɛli mɛ̨nį hu, da ə́ kwɛlɛ lɔi hu nuą́ koloon gbɛa kpɛai tii. Ə́i wɔ túwɔ pələ ɲɔ̨n hu wiɛ tii, yɛ́ níi kələn gwə́i. 27 Yili ɓə gɛ ŋą́ ɲéé pɛlɛ yɛ́, ə́ kɔ̨nɔ̨n ə kpɛɛ, ŋą́ ə́ tɛɛ ə́ yowoɠaai di kaa a Filisti nɛ̨ɛ̨lɛa di pɔ, diɛi tii ə́ wɔ túwɔ pələ ɲɔ̨n tii aa kɛ nwumɛ̨ hee di ɲɛ̨i. 28 Yili hvo ə́ pilɛ, ə́ too nwɔ̨nɔ̨ Asiri nuą pɔ ka diɛ ni ka túwɔ pələ ɲɔ̨n gulɔ; pələi mąn ə kɛ la tii, yili hvo ə́ pilɛ. 29 Ə́i wɔ túwɔ pələ ɲɔ̨n hu wiɛ yɔwɠaa pɔ taai Kalde lɔi hu, yili hvo kpɛli ə́ pilɛ. 30 Hilɛ wɛli tɛɛi kɛa kɛ ə́ lii pulu, Mɛ̨nį kəlee ŋą Hééɓomun Yálá woo li; ɓɛlɔwai ə́ kɛi mɛ̨nįɠaai tii kəlee kɛ la, ə́ kɛ yɛ wɛlikɛ nɛ̨ɛ̨nui mɛlɛ hvo mą. 31 Ɓɛlɔwai ə́ ɉaláá kulɔi pɛli la bələ taŋan na kəlee ɓa, yɛ́ hali kɔ́i pɛli gwəli hą́ą́ kəlee ɓa, hvo kpɛli kɛi gɛ yɛ wɛlikɛ nɛ̨ɛ̨nu leelee, yai nwɛi a wali hon nuą́ yəi. 32 Ə́ kaa yɛ wɛlikɛ nɛ̨ɛ̨nu, yai a nwɛ̨ą wɛli la kɛ ə́ tɛɛ ɉilɛ ɓa. 33 Wɛli hon nɛ̨ąą kəlee da kɛ di hala hɔlɔɓoi, kɛlaa ə́ wɛi, ə́ kɛi gɛ ə́ wɔ wɛliɠaai diɛ a mɛ̨inɛ̨ɛ̨; ə gɛ, diɛ həɠə kɛɛnąą kəlee, diɛ pa ka diɛni kaa laa. 34 Ə́ wɔ wɛli hon ŋaai tii hu, hvo túwɔ li yɛ ə́ ɓɛlaa wɛlikɛ nɛ̨ąą, ə́ wɛi di hvo kɛi ə́ kwɛli yɛ wɛlikɛ nɛ̨ɛ̨nu, kɛlaa ə́ wɛi, ə́ kɛi nuą́ hala, di hva ə́ hala; yili ɓə gɛ ə́ wɔ wɛli hon bələi kulaa ə́ ɓɛlaa nɛ̨ąą di wɛi mu. 35 «Yili mąą mɛ̨nį ɓa, wɛlikɛ nɛ̨ɛ̨nu, ə́ wəli tɔɔ Yai-Laa woo ɓa. 36 Mɛ̨nį kəlee ŋą Hééɓomun Yálá woo ka, yɛ: Gɛ mɛ̨nį yáá ə́ nɛ̨ąhɛn nɛɛ tooni hvóló ɓa, yáá ə́ kpuwulu lɛ ə́ wɔ wɛli hon ŋąą hu ka ə́ wɛliɠaai, da ə́ wɔ ɓowo haliɠaai ə́ kɛi ə́ lonnii kulɔ diɛ a haláá, yɛ di ɲąmą pu; 37 Yili mąą mɛ̨nį ɓa, gáá ə́ wɔ wɛliɠaai kəlee ɲąąkpɔn ɉii; diɛi ə́ wɛli ə too diɛ, yiiɠaai di wɛli ə kɛ yɛ́, da yiiɠaai di wɛli hvo kɛ yɛ́; gáá pai di ɲąąkpɔn ɉii, diɛ həɠə kɛɛnąą kəlee, diɛ pa ə́ pɔ, ŋą́ ə́ kpuwulu ɓo di ɲɛ̨i ɓa, di kaa pai ə́ kpuwulu kəlee kaai. 38 Nɛ̨ąą da wɛli hon diɛ nu ɲąmą pu, pələi da di hutɔɔ la, bələ ɓə gáá pai ə hutɔɔi la. Gáá pai ə́ ɲąmą pui, nį́į́ holi pələ da nwɔ́ tolo kulɔ pələ mąą mɛ̨nį ɓa. 39 Gáá pai ə́ tooi di yee ɲą, di ə́ wɔ haláá kulɔiɠaai ɓuwɔ, diɛi ə wɔ hali kɔ́iɠaai wolo, diɛ ə́ mąą həɠəɠaa kulɔ yɛ́; diɛ ə́ mąąyili hɛnŋą́ą́ həɠə, diɛ ə́ lɛɛ a ə́ kpuwulu, həɠə hva kɛ yɛ́. 40 Di kaa pai nu kpulu ɲąątɔɔi yɛ́, diɛ ə́ hɔɔ a kwɛni. Diɛ ə́ ɓɛla ɓɛla a di wɔ ɓɔwa kwɛa kwɛaɠaai. 41 Di kaa pai ə́ wɔ pɛlɛ́ɠaai kələn ɉii; di kaa pai giti hu wooɠaai tii pɔ mɛ̨nį kɛi yɛ́ nɛ̨ąą kpulu kɛnɛ̨ɛ ɲɛ̨i ɓa. Gáá pai ə́ wɔ wɛli hon ŋąą kpɛɛi, hva kɛa pɛli wali tɛɛi a nuą́ hvɛla. 42 Gáá pai nwąną kulɔi yɛ́ kpɔ tɛ̨ɛ̨ tɛ̨ɛ̨; yili pulu, vá kɛa tolo kulɔ a yɛ́, ŋą́ níílaa, vá kɛa nííholi. 43 Hvó gɛ hvó ə́ kili lɛɛ ə́ muhəɠə yələ hu, yɛ́ nwą́nąlɔ lɔ mɛ̨nįɠaai tii hu. Yili ɓə pai gɛi ɲą́ą́ gbɛli mąn, gɛ́ ə́ túwɔ pələi tii gbolo yɛɛ a ə́ nwun. Mɛ̨nį kəlee ŋą Hééɓomun Yálá woo li. Hvo mɔ̨ɔ̨ ɓowo mɛ̨nį kɛi a gili kpɛɛ ɲəi túwɔ pələɠaai tii kəlee? 44 «Hanwon ɉɔɔ nuą́ kəlee kaa pai kɛi hanwon ɉɔɔi a ə́ laa, diɛ kɛ diɛ: Bələi lɔ nee ə kɛ la, bələ lɔ ɓə non nɛ̨ɛ̨nu kaa la. 45 Nɛ̨ɛ̨nui ɉilɛ da nonnii di wɛli ə kpɛɛ mą, mąą nɛ̨ɛ̨nui lon nɛ̨ɛ̨nu ɓaa a yɛ́. Ə́ liɛnii tii, di hilɛni da di lonnii di wɛli kpɛɛ diɛi, di ləɠə ɓaa yɛ́. Ka lee ə kɛ a Hɛtə nɛ̨ɛ̨nu; ka nąn ə ɓo a Amɔrə mun. 46 Ə́ liɛ nɛ̨ɛ̨nu ɓaa a Samari, gaa hee ni ə́ kɔ́ɓɛyee hu pələ; ə ləɠə nɛ̨ɛ̨nu ɓaa Sodomə, gaa ə́ ɓa-mįi-yee hu pələ, da non nɛ̨ąą. 47 Hvo di pɔɔ kɔ́ɔn ni a yola, yɛ́ ə́ yee too di wɔ ɓowo mɛ̨nįɠaai tii hu; ə́ ɲɔ̨nwɔ̨ɔ̨ ə́ yee tɛɛ diɛ pələ kəlee hu. 48 A tɛ̨ą, Mɛ̨nį kəlee ŋą Hééɓomun Yálá ɓə moi yɛ: Ə́ ləɠə nɛ̨ɛ̨nu Sodomə da nonnii nɛ̨ąą di yee hvo kpɛli həli ka ə́ lonnii ka wɛi pɔ. 49 Ə́ ləɠə Sodomə nwɔ nɛ̨ŋɛ̨n ka: Ɓələn da bilaa kɛ hɛn gəlee hu, liihɛlɛn və kɛ mą da non nɛ̨ąą; di hvo kɛi mąąwɛli mun da yeehvowolomun di mąąkpɔn mąąɓo, 50 di di lii muhəɠə mɛ̨nį kpɛa kpɛa pɔ, mɛ̨nįi mɛlɛ kpɛɛ gwə́i, diɛ gɛ. Yili mąą mɛ̨nį ɓə ŋą́ą́ di pili la, yili kaa ə́ ɲɛ̨i ɓa. 51 Ə mą kɛ Samari, hvo ə́ wɔ nɛ̨ŋɛ̨nŋaai ɓɛla ɓoɔ ɉeą́ bələ tɔ̨nɔ̨ kɛ. Ə́i wɔ túwɔ pələ ɲɔ̨n damą, ə dɛɛ nwɛi ɓa. Ɛlɛɛ, da ka nonnii ka kɔ́ɔn ka kee ɓa, di lɛlɛɛi di tɛɛ yɛ́. Mowo mɛ̨nįɠaai kpɔ ə́ gɛ gəlee ma mɛ̨nį ɓa. 52 A kɛ ti 'hvaa mą nwumɛ̨ ə hee yɛ́, mąąhɔlɔɓo ə́ wɔ nɛ̨ŋɛ̨ŋaai ɲɔ̨nwɔ pələ tɛɛi ə́ leelonnii di wɛi ɓa. Di túwɔ pələ aa lɛlɛ aa tɛɛ yɛ́. Di tələnmoɔi di tɛɛ yɛ́. 53 Gáá pai di wɔ yɛnɛ̨ɛ̨ dɔwɔ pələ mąąhvalin ɉii, Sodomə da non nɛ̨ąą di wɔ yɛnɛ̨ɛ̨ dɔwɔ pələ. Samari da non nɛ̨ąą di wɔ yɛnɛ̨ɛ̨ dɔwɔ pələ; ə mą kɛ yɛ́ kpɛli, mɛ̨nįi ɉeɛ ə́ tɔwɔ di lɔwai, gáá pai mąąhvɛn ɉii. 54 Ə́ wɔ nwumɛ̨i kaa pai yɛɛi a ə́ nwun, mɛ̨nįɠaai kpɔ ə́ di kɛ, ə́ ɲɛ̨i yɛ paa ɉu. Yili kaa pai di kwəinɛ̨ɛ̨i. 55 Ə́ ləɠə Nɛ̨ɛ̨nu Sodomə da non nɛ̨ąą, di kaa pai pənəi di kɛ yɛ bələi di kɛ la tɔlɔɔ; ə́ liɛ nɛ̨ɛ̨nu Samari da non nɛ̨ąą, di kaa pai pənəi di kɛ yɛ bələi di kɛ la tɔlɔɔ. Yɛ́ kpɛli ma ka ə́ lon nɛ̨ąą ka káá pai pənəi ka kɛ yɛ bələi ka kə la tɔlɔɔ. 56 Kɛlɛi ə́ kɛi ə́ laa pu ə́ ləɠə Sodomə hu, ɓɛlɔwai ə́ kɛi ə́ wɔ ɓələn kulɔ la, 57 ə́ wɔ kili ɲɔ̨nwɔ̨ɔ̨ hvo ni kɛ kulɔ li pɔ̨nɔ̨ ŋą? Ə́ wɛi nąąlɔwai aa həli. Aramə nɛ̨ɛ̨lɛa diɛ di laa pu ə́ hu, da ə́ kwɛlɛ nɛ̨ąą kəlee, da Filisti nɛ̨ɛ̨lɛai tii ə́ kwɛlɛ diɛ tɛɛ ɓo ə́ hu. 58 Ə́ wɔ túwɔ pələ ɲɔŋŋaai da ə́ wɔ ɓowo mɛ̨nįɠaai kəlee di pulu mɔ̨nɔ̨ ka tii ə́ kaa ɉəɠəi, Yai-Laa woo li. 59 «Mąąhɔlɔɓo, mɛ̨nįi Mɛ̨nį kəlee ŋą Hééɓomun Yálá kaa moi ya ka: Gáá lɔ ə́ hon ɉii yɛ bələi ə́ túwɔ la, yɛ́i ŋɛ̨i tɛɠɛ ɓo nɛ̨ŋɛ̨n naa woo hu a mįnɛ̨ hukalai ə́ moi. 60 Nwɛ́i, mįnɛ̨i gwa yɛ́ gu ɉəɠə a ə́ muhəɠə yələ, gáá pai nąą kili tooi ə́ ŋą; gwa yɛ́ guɔ mįnɛ̨ həɠə la, a yələ kəlee mɛ̨nį. 61 Ə́ kaa pai ə́ kiliŋąhiɛi ə́ túwɔ pələ ɓa, yɛ́ nwumɛ̨. Ɓɛlɔwai ə́ kaa pai ə́ liɛni nɛ̨ąą hɔlɔɓoi la, yɛ́ di pɛlɛ ə́ ləɠəni nɛ̨ąą diɛ, a ə́ lonnii; ɛlɛɛ yaan di wɔɔ hvo pai kɛi mįnɛ̨i gwa yɛ gu lɔwai ɉu. 62 Gáá pai nwɔ́ mįnɛ̨i laai gwa yɛ́ gu lɔwai, yɛ́ kɛa gili kɔ́lɔn na yɛ́ kɛ Yai-Laa ɓaa ɲą́ą́. 63 Yá ə́ kiliŋąhiɛ kɛa ma yɛ́ nwumɛ̨ la, ɛlɛɛ nwumɛ̨ pələ, hvaa hvo kpɛli pai lɛɛi ə́ la, a ɲələi ŋą́ ə́ túwɔ pələ kəlee mąąhvaalɛɛ la; Yai-Laa woo li.» |