Izikiɛ 15 - Yálá laawoo hɛɓɛ (dc)Viɲə wului di bili nwɔ̨n ɉu 1 Yai-Laa woo ə həli mą́ą́, yɛ mą́ą́: 2 «Hulɔnu lon, lə ɓə a viɲə wulu hviɛla ɓo yɛ tɛɛ la wulu ta kpɛliɠaa diɛ; yɛ nwonwo hviɛla ɓo lɔwɔ wulu ta kpɛliɠaa wonwo ɓa? 3 Da kɛ mɔ̨ɔ̨ nwulu ta həɠəi diɛ kóló kɛ la? Da kɛ mɔ̨ɔ̨ da haɠai diɛ hɛnŋąą hɛlɛn mą? 4 Viɲə wulu ka, daa dɔɔ nwɔ̨n ma, nwɔ̨n aa ɉunwɔ̨la hveelɛi mį́į́ ma ɉɛąi aa kələn lə wolo kpɔ ɓə kɛa da pɛli gɛi la? 5 Ɓɛlɔwai ə kɛ la a ɲąą pɛliɛ, di hvo kɛi hɛn da kɛ la; nwɔ̨n a ɉu kala kɛa, a gələn, da pɛli mɔ̨ɔ̨ kɛa hɛn da kɛi la? 6 «Yili mąą mɛ̨nį ɓa, Mɛ̨nį kəlee ŋą Hééɓomun Yálá yɛ diɛ: Bələi lɔ ti ŋą́ viɲə too la nwɔ̨n ɉu, və́ gɛli a lɔwɔ kwɛi ta kpɛli, bələ lɔ ɓə gáá Ɉerusalɛmə kələn ɉi la. 7 Gáá heei di hu: Daa kulɔ nwɔ̨n ɲəi, kɛlaa nwɔ̨n gaa pai di kələn ɉi; bələ ɓə ká gili kɔ́lɔn na ti káá kɛ, Yai-Laa ɓaa a ɲą́ą́, ɲą́ą́ ɲɛ̨i hee ka hui. 8 Gáá nɔi ɲɛ̨́i kɛi a lɔi pun, lɛɛi di hvo mo di woo pulu mąą mɛ̨nį ɓa. Ɲą́ą́ Yai-Laai a Yálá nwóó li.» |